Iehova ese Goada be Henidamu

1. Babulono ai e nohova Iuda taudia edia mauri be ede bamona?

LAḠANI momo lalodiai Iuda taudia ese Iehova na e gwau-edeede henia loulouva. Una dainai Babulono taudia ese edia tano e hadikaia bona e abidia mauri. Babulono ai Iuda taudia edia mauri be ede bamona? (2 Si. 36:15, 16, 20, 21) Guna edia gabu ai e karava ḡaudia, unuseni ai na dounu e karava. (Jer. 29:4-7) To idia na asie urava unuseniai bae noho. Edia hemami be ede bamona? Idia ta na ini e gwau toma: “Babulono sinavaidia badibadidiai, a helai dihova, a taiva, Siona a laloa taova negadia ai.” (Sal. 137:1) Iuda taudia na ta ese baine hagoadadia na namo. To daika ese baine hagoadadia?

2-3. (a) Babulono ese e abidia mauri Iuda taudia daidiai Iehova be dahaka e kara? (b) Ina atikol ai dahaka baita herevalaimu?

² Iehova na “tauhalo Diravana.” (2 Ko. 1:3) Iehova ese ena taunimanima na e lalokau henidiamu bona e uramu baine hagoadadia. Ia na mai dibana Babulono ese e abidia mauri taudia haida na sisiba be abi daemu bona Ia be lou heniamu. (Isa. 59:20) Laḡani 100 momo gunadiai Iehova ese Isaia ena amo Iuda taudia ediai baine vara ḡauna e perovetalaia bona una na Isaia bukana ai e torea. Dahaka dainai? Isaia na e gwa: “Emui Dirava na e tomu, ‘Egu bese na tauna ba haloa, tauna ba haloa.’” (Isa. 40:1) Oibe, Isaia bukana amo Iehova ese tauhalo herevadia e gwaurai unu amo e abidia mauri Iuda taudia baine durudia.

³ Iuda taudia heḡereḡeredia ita danu nega haida tauhalo baita abi na namo. Ina atikol ai Babulono ai e nohova Iuda taudia na Iehova ese e hagoadadia daladia toi baita herevalaimu: (1) Ia na e gwauhamata helalo-kerehai taudia edia dika baine gwautao, (2) ena taunimanima na helaro e henidia bona (3) e durudia basie gari. Bona Iehova ese hari ita e hagoadadamu dalana danu baita herevalaiamu.

IEHOVA NA MAI HEBOGAHISINA IDA EDA DIKA E GWAUTAOMU

4. Edena dala ai Iehova ese e hahedinaraiamu ia na hebogahisi Diravana? (Isaia 55:7)

⁴ Iehova na “Tama hebogahisina.” (2 Ko. 1:3) Isaia amo Iehova na e gwauhamata e abidia mauri Iuda taudia edia dika na baine gwautao. (Isaia 55:7 ba duahia.) Ia na e gwa: “Mia-hanaihanai helalokauna amo baina bogamu hisi.” (Isa. 54:8) Iehova ese ena hebogahisi be ede e hahedinaraia toma? Ena be Iuda taudia na edia gwau-edeede dainai laḡani momo Babulono ai bae noho, to Iehova na e gwauhamata unuseniai na basie noho hanaihanai. (Isa. 40:2) Una ese helalokerehai Iuda taudia na e hagoadadia bona e ura Iehova bae hamoalea!

5. Dahaka dainai ta abia dae momokanimu Iehova ese eda dika na be gwautaomu?

⁵ Dahaka ta dibamu? Iehova na mai ena ura ida ena hesiai taudia edia dika na e gwautao vaitanimu. Hari ita danu Iuda taudia heḡereḡeredia ta abia dae momokanimu Iehova ese eda dika na e gwautaomu. To ita na badi momo daidiai unu ta lalo tomamu. Dahaka dainai? Iehova ese dika e gwautaomu badina na ta lalopararalaiamu. Isaia e peroveta bena laḡani hanred momo muridiai, Iehova ese natuna lalokauna e siaia tanobada ema helalo-kerehai taudia iboudiai daidiai mauri idavalaina boubouna e heni. Una boubou ḡauna dainai kara dika iboudiai na “bae heabi oho” vaitani. (Apos. 3:19; Isa. 1:18; Efe. 1:7) Momokani, ita ese ta hesiai heniamu Diravana na hebogahisi Diravana!

6. Iehova ena hebogahisi baita laloa badamu karana ese ede be duruda tomamu? (Laulau danu ba itaia.)

⁶ Bema kerere ta dainai ta lalohisihisimu, Iehova ena hereva Isaia 55:7 ai ese ita na be hagoadadamu. Ita haida na eda kerere gunadia amo vada ta helalo-kerehai, to doini ta lalohisihisilaimu. Unu ta kara tomamu badina eda kerere amo e vara hisihisidia na doini ta mamimu. To, bema ita na eda kerere ta gwaurai hedinarai bona una kerere na asita karaia loumu, baita abia dae Iehova ese eda dika na e gwautao. Bona Iehova ese eda dika e gwautaomu neganai, ma se lalodia loumu. (Jeremaia 31:34 ida ba haheḡereḡerea.) Una dainai bema Iehova ese eda kara dika gunadia na se lalotaomu, ita danu unu baita kara toma. Iehova enai mai anina bada ḡauna na hari ta karamu ḡaudia, dia guna ta kara kereredia. (Esek. 33:14-16) Bona kahirakahira Tamada hebogahisina ese eda kerere amo e varamu hisihisidia na be kokidia vaitanimu.

7. Bema ta karaia kerere badana ta huniamu, dahaka ese be hagoadadamu heduru baita tahu?

⁷ Bema ta karaia kerere badana ta huniamu dainai, laloda mamina ese e hahemaoro henidamu, dahaka baita kara be namo? Baibul ese e hagoadadamu elda edia heduru baita tahu. (Jei. 5:14, 15) Reana edai na be aukamu eda kerere baita gwauraia hedinarai. To bema baita helalo-kerehaimu bona baita helalotaomu Iehova bona elda taudia na mai lalokaudia bona mai hebogahisidia ida ita be durudamu, ita na baita uramu idia baita hereva henidia. Iehova ese elda taudia e ḡaukaralaidia tadikaka ta ladana Arthur e durua dalana mani aita laloa.a Ia na e karaia kererena dainai e lalohisihisi bada. Arthur na e gwa: “Lau na laḡani ta heḡereḡerena ponografi laulaudia na ita. Tok ta ai lalomamina e herevalaia, bona una na kamonaia murinai, adavagu bona elda taudia ediai egu kerere na gwauraia hedinarai. Bena egu hemami na e namo, to na karaia kererena dainai dounu na lalohisihisiva. Elda taudia ese e hamaorogu Iehova ese lau na se dadaraigu. Ia ese e sisiba auka henidamu badina e lalokau henidamu. Idia ese lau na e hagoadagu bona e durugu baina laloparara, Iehova ese egu dika na e gwaudiatao.” Hari, Arthur na regula painia bona hesiai tauna ta. Ta moalemu badina ta dibamu bema baita helalo-kerehaimu, Iehova na mai hebogahisina ida eda dika be gwautaomu.

IEHOVA ESE HELARO E HENIDA

8. (a) Iehova ese Babulono ai e nohova Iuda taudia be, dahaka helaro e henidia? (b) Isaia 40:29-31 heḡereḡerena, una helaro ese helalo-kerehai Iuda taudia be ede e durudia toma?

⁸ Taunimanima edia roharoha ai e abidia mauri Iuda taudia na asi edia helaro. Momo mai dibadia Babulono ena World Power ese e ḡuidiava taudia na ma se ruhadiava. (Isa. 14:17) To, Iehova ese ena taunimanima na helaro e henidia. Ia na e gwauhamata ena taunimanima na baine ruhadia bona ḡau ta ese una na basine koua. (Isa. 44:26; 55:12) Iehova matanai Babulono na kahu na heto. (Isa. 40:15) Kahu na bo hiriria ohomu neganai, be boiomu. Una heḡereḡerena, Iehova enai na dia auka, ena taunimanima na Babulono amo baine hamauridia. Una helaro ese Iuda taudia be ede e durudia toma? E hagoadadia, to dia una mo. Isaia na e gwa: “Iehova e nariamu taudia ese edia goada bae hamatamata.” (Isaia 40:29-31 ba duahidia.) Una dainai idia na “hanidia amo bae roho dae, ugava na heheto.”

9. Edena dala ai Iuda taudia na e diba Iehova ese idia na Babulono amo baine hamauridia?

⁹ Danu Iehova na Babulono ai e nohova Iuda taudia ediai, e hamomokania ena gwauhamata na be haḡuḡurudiamu. Edena dala ai? Mani e ḡuḡuru peroveta herevadia a lalodia. Heḡereḡere, idia na e diba Iehova ena hereva heḡereḡerena Asuria taudia ese Israel ena not basileiana e hadarerea bona e ḡuidia taudia na e abidia. (Isa. 8:4) Bona e itaia Iehova ena hereva heḡereḡerena Babulono ese Ierusalem e hadikaia bona idia na e abidia mauri. (Isa. 39:5-7) Danu, King Sedekia matana e hakepuludia bona e laohaia Babulono neganai, idia na e diba. (Jer. 39:7; Esek. 12:12, 13) Iehova ena peroveta herevadia iboudiai na e ḡuḡuru. (Isa. 42:9; 46:10) Una ese idia na e hagoadadia dainai e abia dae, Iehova ese idia baine ruhadia gwauhamatana na baine haḡuḡurua.

10. Dahaka ese baine duruda ina nega dokonai eda helaro baita hagoadaia?

¹⁰ Dahaka ta dibamu? Ta lalohisihisimu negadiai, eda vaira nega helarona ese be hagoadadamu. Ina tanobada maurina na e dika e laomu bona Dirava e inai heniamu siahu taudia ese ita na e inai henidamu. To ita na basita lalomanoka. Iehova ese ita na helaro namo hereana e henida una na tanobada paradaisona ai mauri hanaihanai baita abiamu, bona maino ai baita nohomu. Danu nega iboudiai una helaro na baita laloa. Bema unu basita kara tomamu, eda helaro na vaitani windo mirona ta amo ta roha lasimu gabu mai hairaina na asi ta itaia namonamomu na heto. Edena dala ai eda helaro baita hagoadaia? Hanaihanai nega baita ato tanobada matamata ai baita abia mauri hereadaena baita laloa. Eda helaro e herevalaimu atikol idauidau baita duahidia, vidiodia baita ita, bona anedia baita hakala. Danu, eda ḡuriḡuri lalonai Paradaiso ai ta uramu baita kara ḡaudia na Iehova baita hamaorolaia.

11. Gorere badana ta e haheaukalaiava taihuna ta be edena dala ai goada matamatana e abia?

¹¹ Mani gorere badana ta e haheaukalaiava taihuna ta ladana Joy aita laloa, ia na helaro namona ese e hagoadaia. Ini e gwau toma: “Lau na lalometaumu neganai, egu hemami na Iehova na hamaorolaiamu, badina dibagu ia ese lau na e lalopararalaigumu. Bona nega unu bamodia ai, Iehova ese goada e henigumu.” (2 Ko. 4:7) Danu, Joy na tanobada matamatana ai sibona ena mauri e laloamu, una nega ai, “ta basineto ‘E goreregumu.’” (Isa. 33:24) Ita danu eda hemami na Iehova baita hamaorolaia bona tanobada matamatana ai eda mauri baita laloa, unu amo goada baita abimu, ta davarimu hekwakwanaidia baita haheaukalaimu.

12. Dahaka dainai baita abia dae Iehova ena gwauhamata iboudiai na be ḡuḡurumu? (Laulau danu ba itaia.)

¹² Iehova ese Babulono ai Iuda taudia na iena gwauhamata bae abia dae badidia momo e hadibadia. Una heḡereḡerena, hari ita danu unu e hadibada tomamu. Hari ina negai e ḡuḡurumu peroveta herevadia mani aita lalo. Heḡereḡere, hari ta itaiamu Anglo-American World Power enai ina na e ḡuḡurumu: “Kahana baine goada bona kahana baine makohi kava.” (Dan. 2:42, 43) “Tano danu bae laḡa” herevana na e ḡuḡurumu, bona sivarai namona na “bese iboudiai” ediai ta harorolaiamu. (Met. 24:7, 14) Unu bona ma peroveta herevadia momo na e ḡuḡurumu dainai ta abia daemu, Iehova ese e gwauhamatalai vaira ai bae vara ḡaudia danu be ḡuḡurumu.

IEHOVA ESE E DURUDAMU BASITA GARI

13. (a) Iuda taudia e ruhadia neganai, dahaka hekwakwanai e davari? (b) Isaia 41:10-13 heḡereḡerena Iehova ese Iuda taudia be ede e hagoadadia toma?

¹³ Ena be Iehova ese Iuda taudia e henidia helarona na Babulono amo baine ruhadia, to ia na e diba iruhadia negana be kahirakahiramu neganai, hekwakwanai haida be davarimu. Iena peroveta herevana heḡereḡerena king goadana ta ese Babulono bona badina besedia baine tuari henidia. (Isa. 41:2-5) Unu hereva daidiai Iuda taudia bae gari be maoro? Una do se vara neganai, Iehova ese ini e hagoadadia toma: “Basio gari, badina be lau na oi ida; kudoumu basine hetaha, badina be lau na oiemu Dirava.” (Isaia 41:10-13 ba duahidia.) Dahaka dainai ia na e gwa:“Lau na oiemu Dirava”? Ia na dia Iuda taudia e hamaorodia ia bae tomadiho henia, to e hadibadia ia na idia ida bona baine durudia.—Sal. 118:6.

14. Iehova be ma dahaka e kara unu amo Iuda taudia e durudia basie gari?

¹⁴ Iehova ese Iuda taudia e durudia dalana ma ta na e hadibadia iena siahu bona diba na asi hetoadia. Una dainai e hamaorodia bae gaga dae hisiu bae itadia. Bona e hadibadia ia ese dia unu hisiu mo e karadia, to ta ta ladadia danu mai dibana. (Isa. 40:25-28) Iehova na mai dibana, unu hisiu ta ta ladadia, anina na ena hesiai taudia ta ta ladadia danu mai dibana. Bona bema Iehova na mai ena siahu hisiu e karadia, ia na momokani mai ena siahu ena taunimanima baine durudia. Oibe, Iuda taudia bae gari na asi badina.

15. Edena dala ai Dirava ese vaira ai bae vara ḡaudia daidiai Iuda taudia e haheḡaeḡaedia?

¹⁵ Iehova ese vaira ai bae vara ḡaudia daidiai ena taunimanima e haheḡaeḡaedia. Isaia bukana ai, Dirava ese ena taunimanima e hamaorodia eto: “Emui daiutu ai ba raka vareai, iduaramui ba kou; nega taina ba komu, ela bona badu baine ore.” (Isa. 26:20) Reana King Kurese ese Babulono e tuari henia neganai, Iuda taudia ese una hereva e badinaia. Grik ena histori e torea tauna ta na e gwa, Kurese na Babulono ai e vareai neganai, ia ese “[ena tuari taudia] e haḡanidia murimuri ai nohodia na bae hamasedia.” Mani a laloa Babulono ai e nohova taudia iboudiai na e gari dikadika. To Iuda taudia na se gari badina Iehova ena hereva e badinaia.

16. Dahaka dainai hisihisi badana ai be varamu ḡaudia daidia basita gari? (Laulau danu ba itaia.)

¹⁶ Dahaka ta dibamu? Kahirakahira hisihisi badana be hematamamu, ina tanobada ai hisi unu bamona ta se vara. Una nega ai, tanobada taudia na be daradaramu bona be gari dikadikamu. To Iehova ena taunimanima ediai unu na basine vara tomamu. Ita na mai dibada Iehova na iseda Dirava. Ita na baita lalogoada badina dibada “[ihamaurida] vada baine kahikahi.” (Luk 21:28) Ena be tanobada besedia ese be tuari henidamu, to dounu baita gini goadamu. Iehova ese aneru bona ena hahediba herevadia amo ita be gimadamu. Edena dala ai unu hahediba herevadia baita abimu? Ita na asi dibada. Reana kongrigeisin amo be hadibadamu. Unu na vaitani iseda “daiutu” ai be laomu, unuseniai baita noho namonamomu. Vaira ai be varamu ḡaudia daidiai ede baita heḡaeḡae toma? Namona na eda hetura karana tadikaka taihu ida baita hagoadaia, mai eda ura ida tiokratik dalana baita badinaia, bona baita abia dae Iehova ese iseda orea na e hakauamu.—Heb. 10:24, 25; 13:17.

17. Edena dala ai Iehova enai goada baita abi?

¹⁷ Babulono ai Iuda taudia edia mauri na auka, to Iehova ese e durudia dainai e lalogoada. Ita edai danu unu be kara tomamu. Herevana vaira negai dahaka bae vara, to dounu Iehova enai goada baita abi. Oibe, bavabia dae Iehova ese ena hesiai taudia edia dika na e gwautaomu bona idia ta ta edia namo na e lalo badamu. Hanaihanai emu helaro ba hagoadaia. Ba helalotao, Iehova na oiemu Dirava, una dainai basio gari.