O Helalotaomu, A?

Ina laḡani ena Gima Kohorona iboudiai o duahidia? Bema oibe, mani ini henanadai ba haerelaidia:

Dahaka dainai Iehova baita imodaia?

Badina ita ese Iehova ta matauraiamu bona ta lalokau heniamu. Danu, ita ese ia ta imodaiamu badina ta uramu momo ese ia bae dibaia.—w25.01, rau 3.

Bema ta ese e hahisidamu, edena dala ai ena dika baita gwauatao?

Ta ese e hahisidamu neganai ta abimu hemamidia na asita lalodia maraḡimu; to baita hekwarahi eda badu baita haorea. Unu amo hekwakwanai na basie varamu.—w25.02, rau 15-16.

Dahaka dainai hahediba tauna Mak na haheitalai namona tadikaka matamatadia ediai?

Mak na mai moalena ida ena hesiai ḡaukara e karaia. Ena be nega ta hekwakwanai ta dainai e lalohisihisi, to ia na se hesiku. Ia na Paulo bona lo tadikakadia ibamodia karana amo ḡau namodia momo e diba.—w25.04, rau 27.

Iesu na e ḡuriḡuri, e gwa: “Oi ladamu danu vada na hadibalaidia.” Una hereva anina be dahaka? (Jon 17:26)

Iesu ena hahediba taudia na mai dibadia Dirava ladana. To, ia ese ena hahediba taudia ediai, Iehova ena ura, ena ḡaukara, bona ena kara namodia e hadibalaidia.—w25.05, rau 20-21.

Edena dala ai ta hahedinaraiamu ita na ta manaumu?

Ita na ta lalopararamu ḡau haida na asi dibada. Heḡereḡere, nega dokona baine kau dinana bona horana na asi dibada. Bona ita na asi dibada kerukeru be dahaka be varamu eiava Iehova ese ita e dibada namonamo dalana ilalopararalaina na auka.—w25.06, rau 15-18.

Stadi atikol ta eiava pablik tok ta ese ita be ede be duruda tomamu?

Siboda baita henanadai: ‘Dahaka hahemomokani ḡaudia ese kamonai taudia e durudia bona hereva momokani e abia dae? Edena haheitalai namona be egu hahediba negadiai baina ḡaukaralaia diba? Daika be ina topik be ura heniamu?’—w25.07, rau 19.

Dirava ese David ena dika e gwauatao karana amo dahaka ta dibamu?

Ena be David na kara dika badadia e kara, to mai kudouna idoinai ida e helalo-kerehai. Una dainai Iehova ese ena dika na e gwaudiatao. (1 Ki. 9:​4, 5) Dirava na ta ena dika e gwautaomu neganai, e lalodia boio vaitanimu.—w25.08, rau 17.

Bema Baibul stiuden na poin ta se lalopararalaiamu, dahaka ba kara?

Bema Baibul amo una poin o herevalaia namonamo to doini se laloparara, una kaha ba rakatania bena gabeai ba herevalaia.—w25.09, rau 24.

Dahaka dainai Baibul na e gwa kara dika na mai ena “koikoi siahuna?” (Heb. 3:​13, NWT)

Kara dika ese baine koida diba bena kara kereredia baita karamu. Danu, be koidamu bena baita daradaramu, baita laloamu Iehova ese ita na se lalokau henidamu.—w25.10, rau 16.

Ededia dala toi ese be durudamu eda ḡuriḡuri karana baita hanamoamu?

(1) Iehova ena kara namodia baita haerodia. (2) Eda mauri ai e varamu ḡaudia baita gwaurai hedinarai, heḡereḡere, ta ena dika baita gwauatao. (3) Ḡuriḡuri lalonai basita ḡava. Una ese be durudamu laloda herevadia iboudiai baita gwauraidia namonamomu.—w25.10, rau 19-20.

Edena dala ai burukadia baita durudia?

Burukadia na baita vadivadidia eiava baita rini henidia. Danu, dokta dekedia e laomu negadiai, baita bamodia. Eiava dala idauidau ai burukadia ida baita haroro hebou.—w25.11, rau 6-7.

Edena dala ai tadikaka bona taihu edia headava dinana ai Iehova bae hamoalea?

Gavamani edia headava pepadia bae heḡaeḡaelai. Namona na headava gabuna bona headava ariana ai Iehova ena lauma huahuadia bae hahedinarai. Hemataurai dabuadia bae hahedokilai, bona Iehova ese se moalelaimu kastom karadia bae dadarai. Headava plen o karamu neganai ba herevahereva namonamo.—w25.12, rau 21-24.