Kaha 14

Iehova Ena Witnes Taudia Edia Orea E Haheauamu Dalana

Iehova ena Witnes taudia edia orea be ede e matama toma? (1)

Iehova ena Witnes taudia edia hebou be ede e heabi tomamu? (2)

Ğau davadia be ede e heni tomamu? (3)

Daika ese kongregesen ta ta e gunalaidiamu? (4)

Lağani ta ta ai ededia hebou badadia e abimu? (5)

Edia hedikwota bona brens ofesi lalodiai be dahaka ğaukara e karamu? (6)

1. Iehova ena Witnes taudia edia orea na lağani 1870 murinai e matama. Matamanai, ladadia na Bible Students. To lağani 1931 ai, Baibel amo una lada Iehova ena Witnes taudia e abia. (Isaia 43:10) Orea marağina amo e tubu matama ema bona hari Witnes taudia milioni momo na tano 230 mai kahana lalodiai e haroro goadagoadamu.

2. Iehova ena Witnes taudia edia kongregesen momo na pura ta ai nega toi e heboumu. Unu hebou na ba lao heni diba. (Heberu 10:​24, 25) E hahedibalaimu ğaudia na Baibel amo. Hebou na ğuriğuri amo e kehodiamu bona e koudiamu. Unu hebou momo lalodiai danu hebou taudia na mai lalodia iboudiai “lauma anedia” e abimu. (Efeso 5:​18, 19) Vareai na asi davana bona moni na se gogomu.​—Mataio 10:8.

3. Kongregesen momo edia hebou na Kingdom Hall ai e karamu. Unu na dia ruma idau hereadia, bona volantia taudia ese e karamu. Kingdom Hall lalodiai laulau, korosi, eiava ğau unu bamodia na basio itamu. Ğau davadia na ura kwalimu ai e henimu monidia amo davadia e henimu. Bema haida e uramu harihari monidia bae heni, kontribusen mauana ta na mia.​—2 Korinto 9:7.

4. Kongregesen ta ta ai, elda taudia eiava heitatao taudia na nonoho. Kongregesen lalonai hahediba ğaukaradia na idia ese e gunalaimu. (1 Timoteo 3:​1-7; 5:17) Idia na hesiai taudia (diakono) ese e durudiamu. (1 Timoteo 3:​8-10, 12, 13) Unu tatau na se abidia isimu kongregesen taudia oredia daediai. (2 Korinto 1:24) Idia na dia dagi ladadia idau hereadia e abimu. (Mataio 23:​8-10) Dabua idaudia se karamu. Edia ğaukara davadia danu se abimu. Elda taudia na mai edia ura ida kongregesen ese lauma kahanai baine abia heduruna e henimu. Hekwakwanai negadiai idia ese hahegoada bona hahekau herevadia na bae heni diba.​—Iakobo 5:​14-​16; 1 Petro 5:​2, 3.

5. Iehova ena Witnes taudia na lağani ta ta ai hebouhebou badadia danu e karamu. Unu nega ai kongregesen momo na e heboumu Baibel ena hahekau herevadia bae abi totona. Nega momo unu hebouhebou lalodiai kaha ta na hahediba taudia matamatadia ibapatisodia karana.​—Mataio 3:​13-17; 28:​19, 20.

6. Iehova ena Witnes taudia tanobada heğeğemadai lalonai edia hedikwota na New York ai. Hakaua Oreana na unu kahai, una hegunalai oreana taudia na lağani momo lalodiai elda ğaukaradia e kara taudia, idia ese una tanobada heğeğemadai oreana e nariamu. Bona tanobada heğeğemadai brens ofesi danu 100 mai kahana. Unuseniai, volantia taudia ese Baibel e herevalaiamu bukadia e printimu bona e siaimu. Haroro ğaukara baine heau namonamo totona sisiba herevadia danu unu amo e henimu. Mani baola emu gabu brens ofesina baha itaia.