KAHA 9
Ruma Bese ida Iehova Ba Tomadiho Henia
“Guba bona tanobada . . . e kara Diravana ba toma henia diho.”—Apokalupo 14:7
Ina buklet amo ome diba, Baibul ai hahekau herevadia na momo umui baine durumui. Iehova na e uramu ba moale. Ia na e gwauhamata, bema ia itomadiho henina karana bo atoa gunamu, emui dabu ḡaudia iboudiai be henimuimu. (Mataio 6:33) Ia na e uramu ia turana ai baola. Hanaihanai Dirava ihetura henina karana baita hagoadaia. Una na hahenamo hereadaena.—Mataio 22:37, 38.
1 IEHOVA IHETURA HENINA KARANA BA HAGOADAIA
BAIBUL NA E GWAUMU: “Lau na Tamamui ai bainala, bona umui na natugu mamaruanemui bona hahinemui ai baina halaomui. Lohiabada siahu-hereadaena unu e gwau toma.” (2 Korinto 6:18) Dirava na e uramu ia turana namona ai baola. Ḡuriḡuri karana ese baine durumu unu ba kara toma. Iehova na e noinoimu “ḡuriḡuri basio hadokoa.” (1 Tesalonika 5:17) Ia na e uramu, o lalomu bona o uramu ḡaudia baine kamonai. (Filipi 4:6) Bema emu ruma bese ida bo ḡuriḡurimu, idia na be itaiamu Dirava o abia dae momokanimu.
Dirava ba kamonai henia danu na ḡau badana. Ba karaia dalana na Baibul bona Baibul e herevalaiamu bukadia ba stadilai. (Salamo 1:1, 2) O dibamu ḡaudia ba lalodia dobu. (Salamo 77:11, 12) Bona hanaihanai Kristen heboudia baola.—Salamo 122:1-4.
Iehova ihetura henina karana ba hagoadaia dalana hereadaena ta na, haida vairadiai Ia ba herevalaia. Bema hanaihanai unu bo kara tomamu, ia turana namona ai bo laomu.—Mataio 28:19, 20.
BA KARA DIBA ḠAUDIA:
Dina ta ta ai nega bavato Baibul ba duahia bona ba ḡuriḡuri
Emu ruma bese ida Iehova itomadiho henina karadia bavato guna, moale karadia be gabeai
2 Ruma Bese Tomadihona Ba Moalelaia
BAIBUL NA E GWAUMU: “Dirava ba raka henia kahi, bena ia ese danu baine raka henimui kahi.” (Iakobo 4:8) Ruma bese tomadihonaa ena sediual ta ba karaia bona ba badinaia hanaihanai. (Genese 18:19) To ḡau haida danu ba kara. Emu mauri dinadia iboudiai Dirava ba laloa. Emu ruma bese edia hetura karana Dirava ida baine goada totona, “ruma ai ba helai negadia ai, bona dala ai ba raka negadia ai, bona ba hekure negadia ai, bona ba tore isi negadia ai” Dirava ba herevalaia. (Deuteronomi 6:6, 7) Namona na Iosua ba tohotohoa, ia na e gwa: “A lau be egu ruma taudia ida Iehova isiaina baia lao heni.”—Iosua 24:15.
BA KARA DIBA ḠAUDIA:
Hanaihanai ruma bese taudia ta ta baine durudia daladia haida bavabi hidi bona ba badinadia
[Footnote]
a Iehova ena Witnes taudia na pura ta lalonai, dina ta e abia hidimu edia ruma bese ida Bible e herevalaiamu.