“Nahuamui Ba Toho, Tau ta ese . . . Umui Baine Tarapumui Na Garina”!

1. Kolose 2:4, 8 ena hereva heḡereḡerena, Satana be edena dala ai e uramu eda lalohadai baine biagua?

SATANA na e uramu Iehova baita dadaraia. Una dainai, eda lalohadai e uramu baine biagua bena iena ura karadia baita kara. Ia ese ta ura henimu ḡaudia amo laloda e verimu ia baita badinaia totona.​—Kolose 2:4, 8 ba duahi.

2-3. (a) Dahaka dainai Kolose 2:8 ena sisiba baita laloa bada? (b) Ina stadi ai dahaka baita herevalaimu?

² O laloamu Satana ese baine koida diba, a? Oibe. Ba helalotao, Paulo ese Kolose 2:8 ai e gwauraia herevana na Dirava ese ena lauma helaḡa amo e horodia taudia totodia e torea, dia idau taudia totodia. (Kol. 1:2, 5) Una negai unu Kristen taudia haida na e moru, ita danu baita moru diba. (1 Kor. 10:12) Dahaka dainai? Satana na tanobada ai e tahoa dobi dainai, e uramu Dirava ena hesiai taudia baine hakaudia kerere. (Apok. 12:9, 12, 17) Danu, ina negai kara dika taudia bona koikoi taudia ese edia kara dika bona koikoi karadia na e ‘habadamu.’​—2 Tim. 3:1, 13.

³ Ina stadi ai baita itaiamu, Satana be edena dala ai “lalo-hadai koikoidia” e ḡaukaralaimu eda lalohadai baine biagua totona. Bona iena “dibaka” karadia toi baita herevalaimu. (Efe. 6:11) Bena stadi gabena ai, Satana ena koikoi daidiai ta abi dae lalohadaidia baita haidau daladia baita herevalaimu. To hari mani aita itaia, Israel taudia na Gwauhamata Tanona ai e vareai neganai Satana ese ede e koidia toma, bona edia sivarai amo baita dibamu ḡaudia aita herevalai.

E DIBAḠANIDIA KAIVAKUKU BAE TOMADIHO HENIDIA

4-6. Deuteronomi 11:10-15 ai, Gwauhamata Tanona ai Israel taudia ese edia biru daladia be ede e haidau toma?

⁴ Satana na mai aonegana ida Israel taudia e dibaḡanidia kaivakuku bae tomadiho henidia. Edena dala ai? Ia na dibana idia na be uramu aniani bae abi, una dainai una e ḡaukaralaia. Israel taudia na Gwauhamata Tanona ai e vareai neganai, edia biru daladia na e haidau. Aigupto ai e nohova neganai, Nilo Sinavaina ai e abiva ranudia amo edia uma e dairiva. To, Gwauhamata Tanona ai sinavai badadia na lasi dainai, medu bona hunu ese edia uma e haparidiava. (Deuteronomi 11:10-15 ba duahi; Isa. 18:4, 5) Una dainai, biru daladia matamatadia bae diba na namo. To una na mai hekwarahina badina biru mai dibadia taudia momo na tano ḡaḡaena ai vada e mase.

⁵ Iehova ese ena taunimanima e hadibadia edia noho dalana na be idaumu. Bena haheḡani ta e henidia, reana matamanai bo laloamu una na dia biru ḡaukarana e herevalaia. Dirava eto: “Nahuamui ba toho, sibomui lalomui bae hekoi bena ba raka siri, dirava idaudia isiaidia ba lao heni bona ba toma henidia diho, na garina.” (Deu. 11:16, 17) Dahaka dainai Iehova ese biru dala matamatadia bae dibaia karana e herevalaia neganai, e haḡanidia nahuadia bae toho dirava koikoi bae tomadiho henidia na garina?

⁶ Iehova na dibana Israel taudia na be uramu dirava koikoidia e tomadiho henidiamu taudia amo biru daladia haida bae diba. Momokani, dekedia taudia na mai edia diba biru ḡaukaradia ai, bona Dirava ena taunimanima na idia amo diba bae abi diba, to mai ena dika. Kanaan edia biru taudia na Baal e tomadiho heniava taudia. Bona e laloava Baal na guba biaguna bona medu e hadihoamu diravana. Iehova na se ura iena taunimanima ese unu hahediba koikoidia bae abi dae. To, Israel taudia na dounu e urava Baal bae tomadiho henia. (Num. 25:3, 5; Hah. 2:13; 1 Ha. 18:18) Satana ese Israel taudia na una dala amo e ḡuidia.

SATANA ESE ISRAEL TAUDIA E ḠUIDIA DALADIA TOI

7. Gwauhamata Tanona ai Israel taudia be dahaka hahetoho e davari?

⁷ Satana ese e ḡaukaralaia dalana ginigunana na, edia ura ḡauna ta amo lalodia e veri; idia na e ura medu baine diho. Laḡani ta ta, April dokona amo ela September lalonai, Gwauhamata Tanona ai medu na se diho momova. Israel taudia bae mauri bona edia aniani bae tubu totona, idia na October ai baine diho meduna e nariava. Satana ese Israel taudia lalodia e veri unu amo bae abia dae edia aniani bae tubu totona, dirava koikoidia e tomadiho henidiamu besedia edia kara bae tohotoho. Idia na e tomava bema edia dirava bae tomadiho henidia, medu bae hadihoa diba. Iehova se abidadama heniava taudia na e abia dae medu baine diho haraḡa dalana tamona buna; una dainai Baal itomadiho henina karadia idauidau e karava.

8. Satana ese e ḡaukaralaia dalana iharuana be dahaka? Ba herevalaia.

⁸ Satana ese e ḡaukaralaia dalana iharuana na, matabodaḡa karadia amo lalodia e veri. Dirava koikoidia e tomadiho henidiava taudia na edia tomadiho lalodiai kara dika rohorohodia e karava. Heḡereḡere tatau bona hahine na dubu ai ariara karadia e karava. Idia ese e abi daeva karadia haida na, tatau tatau ida bona hahine hahine ida e mahuta hebouva bona kara bodaḡadia ma haida. (Deu. 23:17, 18; 1 Ha. 14:24) E laloava unu kara amo edia dirava bae hamoaledia bena edia uma anianidia momo bae tubu. Israel taudia momo na unu bese idaudia edia matabodaḡa karadia ese lalodia e veri dainai, dirava koikoidia isiaidia e lao heni. Una dala amo idia na Satana ese e ḡuidia.

9. Hosea 2:16, 17 ena hereva heḡereḡerena, Satana be edena dala ai Israel taudia lalodia e veri Iehova bae laloaboio?

⁹ Satana ese e ḡaukaralaia dalana ihatoina na, Israel taudia lalodia e veri Iehova bae laloaboio. Peroveta tauna Ieremia ena negai, Iehova na eto peroveta koikoidia ese iena bese taudia lalodia e ani bena “Baal dainai” Ia ladana e laloaboio. (Ier. 23:27) Dirava ena taunimanima ese Iehova ladana gabunai Baal ladana e ḡaukaralaia; Baal anina na “Biaguna” o “Lohiabada.” Israel taudia ese Iehova bona Baal edia idau na se lalopararalaia dainai, idia ese Baal itomadiho henina karadia bona Iehova itomadiho henina karadia e kara hebouva.​—Hosea 2:16, 17 ba duahi.

HARI SATANA ESE E ḠAUKARALAIMU DALADIA

10. Hari ina negai Satana ese e ḡaukaralaimu daladia be dahaka?

¹⁰ Satana ese Israel edia negai e ḡaukaralai daladia na hari ina negai danu e ḡaukaralaimu. Ia ese taunimanima e ḡuidiamu daladia na, edia ura ḡaudia amo lalodia e verimu, e dibaḡanidiamu matabodaḡa karadia bae ura heni, bona lalodia e verimu Iehova bae laloaboio. Mani una dala ginigabena aita herevalaia guna.

11. Edena dala ai Satana ese taunimanima lalodia e verimu Iehova bae laloaboio?

¹¹ Satana ese taunimanima lalodia e verimu Iehova bae laloaboio. Iesu ena aposetolo e mase murinai, sibodia e hegwauraiva Kristen taudia ese hahediba koikoidia e hahedibalai matama. (Apos. 20:29, 30; 2 Tes. 2:3) Idia ese Dirava korikori tamona ena kara na e huniva. Heḡereḡere, Baibul amo Dirava ladana korikorina e kokia bona gabunai “Lohiabada” e atoa. Unu e kara toma dainai, Baibul e duahiamu tauna ese Iehova bona “lohia hutuma” edia idau bae lalopararalaia na auka. (1 Kor. 8:5) Idia na e gwaumu, “Lohiabada” na Iehova bona Iesu, una dainai taunimanima na asie dibamu Iehova bona Iesu na idau bona edia dagi danu idau. (Ioa. 17:3) Una daradara ese Toi Tamona hahediba herevana e duruamu; a Baibul ese una na se hahedibalaia. Una dainai, momo na e laloamu Dirava bae dibaia na auka. To una na koikoi herevana!​—Apos. 17:27.

12. Roma 1:28-31 ena hereva heḡereḡerena, tomadiho koikoi be dahaka kara e abi daemu, bona una dainai dahaka e varamu?

¹² Satana ese e dibaḡanidiamu matabodaḡa karadia bae ura heni. Israel edia negai, Satana ese tomadiho koikoi amo taunimanima e veridia matabodaḡa karadia bae kara. Hari danu, unu e kara tomamu. Tomadiho koikoi ese matabodaḡa karadia na e abi daemu. Una dainai, ena be haida e gwaumu idia na Dirava e hesiai heniamu to iena kara maoromaoro taravatudia na asie badinamu. Aposetolo Paulo ese Roma taudia e tore henidia neganai, unu bamona taudia edia kara e herevalai. (Roma 1:28-31 ba duahi.) Unu “kara dikadia” haida na matabodaḡa karadia idauidau, tatau tatau ida bona hahine hahine ida e mahuta heboumu karadia. (Roma 1:24-27, 32; Apok. 2:20) Una dainai Baibul ena hahediba herevadia baita badina na ḡau badana!

13. Satana ese e ḡaukaralaiamu dalana ma ta be dahaka?

¹³ Satana ese taunimanima na edia ura ḡaudia amo lalodia e verimu. Ita iboudai na ta uramu diba baita abi, unu amo siboda baita henari bona eda ruma bese baita naridia. (1 Tim. 5:8) Unu diba iabidia totona skuli ta laomu bona ta ḡaukara goadamu. To baita henahua toho na namo. Tano momo ai, stiuden na skuli ai skills haida e dibamu bona taunimanima edia aonega ma haida danu e hadibadiamu. Heḡereḡere, stiuden haida e hadibadiamu Dirava se nohomu lalohadaina bae abia dae bona Baibul ena hereva bae dadaraia. Danu e hadibadiamu mauri na evolusen amo e hematama. (Roma 1:21-23) Hahediba unu bamodia na dia “Dirava ena aonega” heḡereḡerena.​—1 Kor. 1:19-21; 3:18-20.

14. Taunimanima edia aonega ese dahaka kara e hahedinaraimu?

¹⁴ Taunimanima edia aonega ese Iehova ena kara maoromaoro taravatudia na se ura henimu eiava e hakoikoimu. Una aonega na dia Dirava ena lauma huahuadia e hahedinaraimu, to “tau-anina ena kara” e hahedinaraimu. (Gal. 5:19-23) Danu taunimanima e hagoadadiamu bae hekokoroku o bae heaḡi, una dainai taunimanima na ‘sibodia e heura henimu.’ (2 Tim. 3:2-4) Manau karana na dia unu heto; Dirava na e uramu ena hesiai taudia na bae manau. (2 Sam. 22:28) Iunivesiti ela Kristen taudia haida ese tanobada ena lalohadai e badinaia matama dainai, Dirava ena lalohadai na asie laloa badamu. Dahaka baine vara diba bema basita henahua tohomu? Mani ekspiriens ta aita herevalaia.

15-16. Taihu ta ena ekspiriens amo dahaka o dibamu?

¹⁵ Laḡani 15 mai kahana lalonai fultaim hesiai ḡaukara e karaia taihuna ta na e gwaumu: “Lau na bapatiso Witnes ta dainai, iunivesiti ena dika idauidau na duahi bona na kamonai, to unu hahediba herevadia na asina lalodia bada. Na laloava egu ai una na basine varamu.” Una taihu be dahaka hekwakwanai e davari? Ia na e gwa: “Skuli ḡaudia istadilaidia karana ai egu nega bada na haoreava dainai, asi egu nega Iehova baina ḡuriḡuri henia, bona na hesikuva dainai haida ediai Baibul na asina herevalaiava, bona hebou totodia asina heḡaeḡaeva. Gabeai na laloparara una ese egu hetura karana Iehova ida na e hadikaia, una dainai na lalo iunivesiti baina rakatania na namo. Bona unu na kara toma.”

¹⁶ Edena dala ai edukeisin badana ese una taihu ena lalohadai e haidaua? Taihu na e gwa: “Iunivesiti ai na abia dibana dainai lau ese ma haida, tadikaka bona taihu danu, edia kerere na tahuva, na lalova basie kara diba ḡaudia danu bae kara, bona asina urava baina bamodia. Laḡani momo lalodiai na hekwarahi una lalohadai baina haidaua. Egu ai e vara ḡauna amo na diba, bema Tamada guba ai e nohomu ese ena orea amo e henidamu sisibadia basita badinamu, dika baita davarimu. Iehova ese egu kara na e dibaia ḡoevaḡoeva. Matamanai Ia bama kamonai henia hari namo!”

17. (a) Namona na laloda baita hadai dahaka baita kara? (b) Stadi gabena ai dahaka baita herevalaimu?

¹⁷ Namona na laloda baita hadaia, Satana ena tanobada ena “aonega kavakavadia” bona “lalo-hadai koikoidia” ese basie biaguda. Namona na hanaihanai Satana ena koikoi daladia daidiai baita henahua toho. (1 Kor. 3:18; 2 Kor. 2:11) Dia namo Satana ese baine koimu bena Iehova ba laloaboio. Iehova ena kara maoromaoro taravatudia ba badinadia. Bona Satana ese basine koimu Iehova ena sisiba ba dadaraidia totona. To dahaka ba kara diba, bema emu lalohadai na ina tanobada ese vada e biagua? Stadi gabena ese be hahedinaraiamu, edena dala ai Dirava ena Hereva ese baine duruda lalohadai dikadia bona ta manadalai karadia baita dadarai.​—2 Kor. 10:4, 5.