Haroro Heboudia Bae Hekara Namonamo Daladia Haida

Haroro heboudia na kongrigeisin heboudia heḡereḡeredia, unu na Iehova ese e heni daladia, ita bae duruda baita helalokau heheni bona kara namodia baita kara. (Heb 10:24, 25) Namona na miniti 5 eiava 7 lalodiai bae hekara, una nega lalonai tadikaka taihu bae haridia, teritori bae abia hidi, bona ḡuriḡuri bae gwauraia. (Bema haroro hebou murinai, hebou ma ta baine heabi, haroro hebouna bae hakwadoḡia na namo.) Hebou baine hakaua tadikakana ese una dina ai haroro ela taudia baine durudia dalana baine heḡaeḡaelaia. Heḡereḡere, bema Saturday ai haroro hebouna ela taudia momo na wiki lalonai asie haroro, hebou ihakauna tadikakana ese haroro ai bae herevalai ḡaudia baine gwauraia lou. Ededia topik ma haida danu ba herevalai na namo?

• Eda Kristen Mauri Bona Hesiai Ḡaukara ​—⁠Hebou Pepana ai e ato haroro dalana ta

• Emui gabu ai e vara ḡauna ta eiava nius ai e halasia ḡauna ta amo herevahereva ba hamatamaia dalana

• Ekskius herevana ta ba hanaia dalana

• Dirava na lasi lalohadaina e abia daemu tauna, evolution e abia daemu tauna, idau gado tauna, eiava emui teritori ai tomadiho idauna e laomu tauna ta ba hereva henia dalana

• Eda jw.org websait, JW Library^® app, eiava Baibul ba ḡaukaralaia dalana

• Hahediba Toolbox amo pablikeisin ta ba ḡaukaralaia dalana

• Haroro daladia idauidau, heḡereḡere telefon, revareva, pablik haroro, lou henia, o Baibul stadi ba kara daladia

• Seifti, haroro daladia ba haidau, kara namodia, lalohadai maorona, o ḡau unu bamodia edia hahediba herevadia haida

• Duahiduahi Bona Hahediba Ba Goadalai buklet amo lesen eiava vidio ta

• Haroro ai ba ḡaukara hebou tadikaka o taihu ba durua bona ba hagoadaia dalana

• Haroro ḡaukara e herevalaiamu sirina ta eiava hahegoada ekspiriens ta