Oi Mai Dibamu, A?
Dahaka dainai boubou ḡaudia ai kerea bona pune e ḡaukaralaiva na mai ena namo?
TARAVATU heḡereḡerena, kerea bona pune na bae ḡaukaralai diba Iehova enai bae bouboulai totona. Boubou taravatudia ai ini manu ruaosi na hanaihanai e gwauraidia hebouva bona bema unu manu rua amo ta na lasi ta bae ḡaukaralaia diba. (Lev. 1:14; 12:8; 14:30) Dahaka dainai una na dala namona? Badi ta na, kerea na se davaria momova manuna. Dahaka dainai?
Kerea
Siahu negadiai, kerea na Israel tanonai e davaridiamu. October ai, idia na saut kahana tanodia edia siahu gabudia e laomu, siahu (spring) negana ai e loumu Israel. (Sol. 2:11, 12; Ier. 8:7) Guna Israel edia negai, idia ediai na e aukava kerea na paraka (wintertime) neganai bae ḡaukaralaia boubou totona.
Pune
To pune be gabu tamona ai mo e nohova dainai, Israel ai na laḡani ibounai lalonai e davariava. Danu, pune na taunimanima ese e naridiava. (Ioane 2:14, 16 ba haheḡereḡerea.) Buka ta, Bible Plants and Animals, na e gwa, “Palestine ena hanua bona taoni iboudiai lalodiai pune e nariva. Ruma biagudia ta ta na mai edia pune rumadia, eiava haba na mai matudia, pune na unuseniai bae noho diba.”—Isaia 60:8 ba haheḡereḡerea.
Pune ta na ena ruma ai
Israel taudia ese bae bouboulai manudia na laḡani ta ibounai lalonai bae davari diba. Iehova ese unu boubou ḡaudia e abi daeva karana amo e hahedinaraiava ia na lalokau Diravana bona edia noho daladia na e lalo badava.