Mauri Bona Hesiai Ḡaukara Hebou Pepana Ena Refrens
MARCH 7-13
DIRAVA ENA HEREVA ENA NAMO | 1 SAMUEL 12-13
“Hekokoroku Dainai Baita Kara Kava Neganai Hemarai be Varamu”
w00 8/1 rau 13 par. 17
Hekokoroku Dainai Baita Kara Kava Neganai Hemarai be Varamu
17 Matamanai sivarai baita duahiamu neganai baita laloamu, Saulo ena kara na reana maoro. Badina Dirava ena taunimanima na asi edia dala, e lalohekwarahiva bona kudoudia danu e hetaha badina dika bada herea na ediai be varamu. (1 Samuel 13:6, 7) Momokani, hekwakwanai negadiai kara ta baita karaia na dia kerere. To, namona na baita helalotao, Iehova na kudou e itamu bona ta ena kara badina na mai dibana. (1 Samuel 16:7) Una dainai, reana Saulo enai ḡau haida na e diba, to Baibul ese unu na se herevalaidia. Heḡereḡere, reana Iehova ese e itaia Saulo na e hekokoroku dainai se nari. Reana Saulo na e badu dikadika, badina ia—Israel ibounai pavapavana—ese e halaheva peroveta tauna burukana baine naria na dia maoro! Herevana dahaka, to Saulo na e laloa Samuel na e halahe dainai ia na mai ena maoro kara ta baine karaia bona Dirava ena haheḡani se badinadia. Dahaka e vara? Samuel ese Saulo na se hanamoa e karaia karana dainai. To Saulo e gwau henia: “Emu basileia na basine hesiriu . . . badina be oi ese Iehova ena haheḡani emu ai na so badinaia.” (1 Samuel 13:13, 14) Baita gwau loumu, hekokoroku dainai baita kara kava neganai hemarai be varamu.
w07 6/15 rau 27 par. 8
Iehova ese Emu Kamonai Karana Na E Laloa Badamu
8 Baibul ai King Saulo sivaraina ese e hahedinaraiamu kamonai karana na mai anina bada. Matamanai Saulo e pavapava neganai ia na manau tauna eiava lalona na e hamanaua. To gabeai, e hekokoroku bona ḡau na se haero namonamo dainai abi hidi kereredia e kara. (1 Samuel 10:21, 22; 15:17) Nega ta, Filistia taudia ese Saulo e tuari henia. Samuel ese Saulo e hamaoroa ia baine naria, Iehova ena boubou baine karaia bona Ena amo haheḡani ma haida baine abi totona. To, Samuel na e gwauraia negana ai se kau haraḡa dainai, taunimanima na e karoho. Una e itaia neganai, Saulo ese “ḡole-oho boubouna e hahelaḡaia.” Una ese Iehova na e habadua. Samuel e kau neganai, pavapava na ena kamonai lasi karana dainai e hahekora, e gwa Samuel se kau haraḡa dainai, “nato” lau ese ḡole-oho boubouna baina hahelaḡaia. King Saulo enai, una boubou ḡauna baine karaia na mai anina bada, to Samuel ese boubou ḡauna baine karaia totona baine naria haheḡanina na dia ḡau badana. Samuel ese e hamaoroa: “Vada o kara kava; Iehova, emui Dirava, ena haheḡani, e henimu ḡauna, na so badinaia.” Iehova se kamonai henia dainai, Saulo ese ena pavapava dagina e haboioa.—1 Samuel 10:8; 13:5-13.
Dirava Ena Hereva Ba Tahua Namonamo
w11 7/15 rau 13 par. 15
Iehova ese mai Ena Lalokau ida E Heni Hahekau Herevadia be Bo Badinadiamu, A?
15 Idia be e laloava tanobada ai baine lohia tauna na be itaia dibamu bona bae tabekau henia diba, to Iehova be lasi, a? Bema oibe, idia na dia ḡau maorona e tahumu! Bona bema basie henari namonamomu Satana ese be hahedinaraimu laulau koikoidia be badinamu. Tanobada pavapavadia ese taunimanima na bae veridia diba kaivakuku bae tomadiho henidia. Kaivakuku e tomadiho heniamu taudia ese ina lalohadai kererena e abiamu, e laloamu e itamu ḡaudia—au eiava nadi amo e karadia diravadia—na dala ma ta ai idia na momokani bona bae tabekau henidia diba, to asie itaiamu Diravana, Iehova, ḡau iboudiai e havara Diravana be lasi. To, aposetolo Paulo ena hereva heḡereḡerena, kaivakuku na “asi anidia.” (1 Kor. 8:4) Idia na asie itamu, asie kamonaimu, asie herevamu eiava kara ta basie karaia diba. Reana bo itadiamu bona daudia toho dibamu, to bema bo tomadiho henidiamu, oi ese dia ḡau korikorina ta—laulau asi anina bona dika baine havaraia ḡauna—bo badinaiamu.—Sal. 115:4-8.
MARCH 14-20
DIRAVA ENA HEREVA ENA NAMO | 1 SAMUEL 14-15
“Kamonai ese Boubou Na E Hereaia”
w07 6/15 rau 26 par. 4
Iehova ese Emu Kamonai Karana Na E Laloa Badamu
4 Iehova na ḡau iboudiai Ihavaradia Tauna dainai, ita dekedai miadia ḡaudia iboudiai na iena. Bema unu bamona, ma ḡau idauna ta baita henia diba, a? Oibe, mai anina bada ḡauna ta baita henia diba. Una be dahaka? Una henanadai haerena na ina hereva amo baita abia diba: “Natugu e, ba aonega, lalogu na ba hamoalea, e gwau henigumu tauna baina haere henia totona.” (Hereva Lada-isidia 27:11) Ita ese eda kamonai karana Dirava baita henia diba. Ena be eda noho daladia bona mauri daladia na idauidau, to Dirava ena hereva baita badinamu neganai, ita ta ta ese Satana Diabolo ena hahebade herevana, taunimanima na hahetoho neganai Dirava basie badinaia, na baita hakoikoia dibamu. Una na hahenamo badana!
it-2 rau 521 par. 2
Kamonai Karana
Ma kara ta na kamonai karana ida basita haheḡereḡereamu, bema basita kamonaimu Dirava ena lalonamo na basita abiamu. Samuel ese King Saulo e hamaoroa: “Iehova ese ḡole-oho bouboudia bona boubou idau-idau e moalelaidia badamu, a Iehova erena ikamonaina [sha·maʽʹ] e moalelaia maraḡimu a? A laloa, kamonai [anina na, badinaia] ese boubou e hereaiamu; taia-kirara ese nani mamaruanedia digaradia e hereadiamu.” (1Sa 15:22) Kamonai lasi karana anina na Iehova ena hereva idadaraina karana, bona be hahedinaraiamu una hereva bona e gwauraia Tauna na asie abidia daemu bona asie abidadama henidiamu. Una dainai asi ena kamonai tauna na babalau tauna bona kaivakuku e tomadiho heniamu tauna heḡereḡeredia. (1Sa 15:23; Ro 6:16 ba itaia.) Bema ta na e gwauhamata kara ta baine karaia to se karaia, ena hereva na asi anina; se karaia dainai be hahedinaraiamu e gwauhamata henia tauna na se abia daemu eiava se matauraiamu. (Mt 21:28-32) Dirava ena hereva momokani e kamonaiamu bona e moalelaiamu, to karana asie karaiamu taudia na lalohadai koikoidia amo sibodia e hekoimu bona hahenamo na basie abimu. (Iak 1:22-25) Dirava Natuna ese e hahedinaraia, dia dala maorona o badi maorona dainai haheḡani heḡereḡeredia basie kara taudia na Basileia ai basie vareai bona be dadaraidiamu.—Mt 7:15-23.
Dirava Ena Hereva Ba Tahua Namonamo
it-1 rau 493
Hebogahisi
Hebogahisi karana na haida edia hedori dainai, to dia Dirava ena ura dainai baita hahedinaraiamu neganai, hekwakwanai badadia be vara dibamu. Una na King Saulo enai e vara ḡauna ese e hahedinaraia. Dirava na e gwa Amalek taudia, Israel Aigupito amo e lasi neganai e tuari henidia taudia ginigunadia, na baine habuadia tari. Saulo na e haḡania basine bogadia hisi. Ena taunimanima edia hereva dainai, Iehova ena haheḡani idoinai se badinaia. Una dainai, Iehova ese Saulo na ena pavapava dagina amo e kokia. (1Sa 15:2-24) Iehova ena dala maorodia be lalo badamu bona Ia be badinaiamu tauna ese Saulo e karaia kererena na basine karaiamu, bona Dirava ena lalonamo na basine haboioamu.
MARCH 21-27
DIRAVA ENA HEREVA ENA NAMO | 1 SAMUEL 16-17
“Tuari Na Iehova Ena”
wp16.5 rau 11 par. 2-3
“Tuari Na Iehova Ena”
David ese Saulo lalona ihagoadana totona, ia ese laion bona bea e hamasedia sivaraina e gwauraia. Ia be e hekokorokuva, a? Lasi. David na mai dibana dahaka dainai unu animal ruaosi e hamasedia. Ia na e gwa: “Iehova, leona imana amo bona bea imana amo vada e hamaurigu Diravana, ese ina Filistia tauna imana amo do baine hamaurigu.” Saulo lalona na e goada, bona e gwa: “Aola, Iehova ese baine bamomu.”—1 Samuel 17:37.
O uramu David ena abidadama heḡereḡerena bavabidadama, a? David ena abidadama na dia e laloa kava ḡauna eiava e nihilaia ḡauna. Ena diba bona ena mauri ai e vara ḡaudia dainai ena Dirava na e abidadama henia. Mai dibana Iehova na ia Igimana Tauna bona gwauhamata Ihamomokanidia Tauna. Bema ta uramu abidadama unu bamona baita abia, namona na hanaihanai Baibul ese e gwauraia Diravana baita dibaia. Ta dibamu ḡaudia heḡereḡeredia baita maurimu neganai, edai be varamu ḡau namodia ese eda abidadama na be hagoadaiamu.—Heberu 11:1.
wp16.5 rau 11-12
“Tuari Na Iehova Ena”
Ema bona hari, David ese e gwauraia herevana na abidadama bada herevana ta. Mani a laloa, mero matamatana ese Goliata e boi heniamu: “Oi na mai emu dare bona mai emu io bona mai emu matani-ḡadiva ida dekegu oma, a lau be Iehova Sabaota, Israel tuari oreadia, oi ese vada o hare henidia oreadia, Diravana ladana ai na vasimu.” David na mai dibana taunimanima edia goada bona tuari kohudia na asi anidia. Goliata ese Iehova Dirava na se matauraia, una dainai Iehova ese kara ta baine karaia. David ena hereva heḡereḡerena, “tuari na Iehova ena.”—1 Samuel 17:45-47.
David ese Goliata ena bada bona ena tuari kohudia na e ita. To, David na se ura unu ese bae hagaria. Ia na se ura Saulo bona ena tuari taudia heḡereḡeredia baine gari. David na sibona Goliata ida se he’haheḡereḡere. To, ia ese Goliata ena goada na Iehova ena goada ida e haheḡereḡerea. Goliata ena lata na 2.9 mita heḡereḡerena, ia ese tatau ma haida e lata tanidia, to guba bona tanobada Lohiana ida na se heḡereḡere. Momokani, ia na taunimanima mo, mauri ḡauna maraḡi-maraḡina ta na heto—ena kara dainai, Iehova na de heḡaeḡae baine hamasea!
wp16.5 rau 12 par. 4
“Tuari Na Iehova Ena”
Hari, Dirava ena hesiai taudia na asie tuarimu. Unu na de ore. (Mataio 26:52) To, David ena abidadama karana na dounu baita tohotohoa na namo. David heḡereḡerena, namona na baita laloa Iehova na momokani e nohomu—ia sibona baita hesiai henia bona baita matauraia na namo. Reana nega haida baita laloamu eda hekwakwanai na babada, to Iehova ena siahu ida baita haheḡereḡerediamu neganai, idia na mamaraḡi. Bema David heḡereḡerena, Iehova na eda Dirava ai baita halaoamu, hekwakwanai ta eiava metau ta ese basine hagaridamu. Ḡau ta ese Iehova ena siahu na basine koua diba!
Dirava Ena Hereva Ba Tahua Namonamo
it-2 rau 871-872
Saulo
Una bona David na Israel ena pavapava matamatana ai e horoa murinai, Iehova ena lauma na Saulo ena amo e hekoki. Una nega amo “lauma dikana ta Iehova ena amo ese e hahisia.” Iehova ese ena lauma na Saulo ena amo e kokia dainai, Ia ese lauma dikana na se koua Saulo lalonai baine vareai, una dainai Saulo se lalo-mainova bona una lauma ese ena hemami bona lalohadai e hadikadiava bona lalonai e itava ḡaudia na dia mamaoro. Saulo ese Iehova se badinaia dainai lalona bona kudounai lalohadai dikadia e abiva bona Dirava ena lauma ese se gimaia bona una lauma dikana ituari henina goadana na se henia. Iehova ese una “lauma dikana” na se koua iena lauma gabuna baine abia bona Saulo baine hauraia dainai, baita gwau dibamu “lauma dikana” na “Iehova ena amo,” una dainai Saulo ena hesiai taudia ese e herevalaia neganai e gwa “lauma dikana ta Dirava ena amo.” Ena hesiai tauna ta ena hereva dainai, Saulo ese David e boiria ena ruma ai miusik ihataina tauna ai bainela, unu amo “lauma dikana” ese baine hauraia neganai lalona baine hanamoa.—1Sa 16:14-23; 17:15.
MARCH 28–APRIL 3
DIRAVA ENA HEREVA ENA NAMO | 1 SAMUEL 18-19
“Ba Kwalimu Neganai Ba Manau”
w04 4/1 rau 15 par. 4
Mauri Daladia E Idaumu Neganai Dirava Ena Lauma Ena Heduru ai Ba Tabekau
4 Kahirakahira ina mamoe nari merona na lada bada tauna ta ai be laomu. E boiria pavapava baine hesiai henia bona ia totona miusik baine hatai. Ia ese tuari mai dibana tauna Goliata, Israel ai tuari mai dibadia namonamo taudia ese garina e gariva tauna, na e alaia. David ese tuari taudia e gunalaidia neganai, tuari ai Filistia taudia na e hadareredia. Taunimanima ese e lalokau heniava. Ane amo e imodaiava. Matamanai, King Saulo ena hesiai tauna ta ese David na dia se gwauraia “gitara ihataina” ai ena ‘diba na bada herea’ mo, to danu e gwauraia “goada tauna bona tuari tauna; ena hereva [na] nanamo bona ita-itana danu namo.”—1 Samuel 16:18; 17:23, 24, 45-51; 18:5-7.
Iehova E Hesiai Heniamu Bona Se Hesiai Heniamu Taudia Edia Idau Ba Itaia
6 Taunimanima haida na e hekokorokumu badina mai hairaidia, ladadia na bada, edia diba miusik ai na bada, mai goadadia, bona mai edia dagi namodia. David enai unu iboudiai na mimia; to ia na ena mauri ibounai lalonai manau karana e hahedinaraia. Goliata e alaia bona King Saulo natuna kekenina e henia baine adavaia neganai, David na eto: “Lau be daika, bona varavaragu, tamagu ena ruma taudia, be daidia Israel ai, dainai lau na pavapava ravana ai bainala?” (1 Sam. 18:18) Dahaka ese David e durua dainai e manau? David ese e karaia karana, ena diba, bona unu hahenamo e abi badina na Dirava na ‘e igo dobi’ eiava e hahemanau, bona ia e kamonai henia. (Sal. 113:5-8) David na e laloparara e abi ḡau namodia iboudiai na Iehova ese e henia.—1 Korinto 4:7 ba itaia.
7 David heḡereḡerena, hari ina negai Iehova ena taunimanima na e ḡaukara goadamu manau karana bae hahedinaraia totona. Ta moalemu badina ta dibamu Iehova, ḡau iboudiai e lohiadiamu Tauna hereadaena, ese manau karana e hahedinaraiamu. (Sal. 18:35) Ta uramu ina sisiba baita badinaia: “Ini na ba hahedokilai: hebogahisi, gado namo, manau, manada, haheauka.” (Kol. 3:12) Danu, mai dibada lalokau na “se heaḡimu; se hekokorokumu.” (1 Kor. 13:4) Manau karana baita hahedinaraiamu neganai, taunimanima baita veridia dibamu Iehova bae dibaia totona. Hahine edia kara namodia ese adavadia bae veridia diba Dirava bae dibaia totona, una heḡereḡerena, Dirava ena taunimanima edia manau karana ese ma haida baine veridia diba Ia bae dibaia totona.—1 Pet. 3:1.
Dirava Ena Hereva Ba Tahua Namonamo
it-2 rau 695-696
Peroveta Tauna
Ena be Iehova ena lauma ese e horodia, to anina na da dia peroveta taudia ese e herevalaiva ḡaudia iboudiai na lauma helaḡa ena hahekau heḡereḡerena. To, Dirava ena lauma ese ‘e rohediava’ negadiai, ena hereva e halasiva. (Esek 11:4, 5; Mik 3:8) Una ese lalodia e ha-uradiava dainai, idia na e herevava. (1Sa 10:10; Ier 20:9; Am 3:8) Dia hoa karadia mo e karava, to edia hereva bona kara ese goada bona hemami idauna e hahedinaraiava. Una ese taunimanima haida na “peroveta taudia heḡereḡeredia e kara” anina taina e hakeniamu. (1Sa 10:6-11; 19:20-24, NWT; Ier 29:24-32; Apos 2:4, 12-17; 6:15; 7:55 ba itaia.) Reana edia ḡaukara na e lalo badamu bona e goadalaimu dainai taunimanima vairadiai be karamu karadia na idau, bona reana haida ediai una na kavakava, Iehu e horoa neganai, tuari lohiadia ese una peroveta tauna e laloa heḡereḡerena. To, gabeai e laloparara ia na peroveta tauna ta neganai, unu tuari lohiadia na mai edia ura bada ida iena hereva na e abia dae. (2Ha 9:1-13; Apos 26:24, 25 ba itaia.) Saulo ese David e tahuava neganai, ia danu Dirava ena lauma ese e rohea neganai “peroveta tauna heḡereḡerena e kara,” bona ena dabua e doki oho bena ‘ḡaḡaena mo e hekure, una dina idoinai, bona hanuaboi idoinai danu,’ una neganai David na e heau mauri. (1Sa 19:18–20:1, NWT) Anina na dia peroveta taudia na nega iboudiai ḡaḡaedia ai e nohova, to Baibul ese e hahedinaraia nega haida una na e varava. Baibul ese e gwauraidia negadia rua ai, peroveta tauna na badi ta dainai ḡaḡaena ai e noho, unu amo ena peroveta herevana baine hahedinaraia namonamo. (Isa 20:2-4; Mik 1:8-11) Saulo ḡaḡaena ai e noho badina—reana baine hahedinaraia ia na taunimanima mo, ena pavapava dabuana e kokia, o ia na dia heḡereḡere Iehova ena lohia siahuna bona ena goada baine abi, eiava ma badi ta dainai—na Baibul ese se herevalaia.
APRIL 4-10
DIRAVA ENA HEREVA ENA NAMO | 1 SAMUEL 20-22
“Tura Namona ai Baola Dalana”
Dokona Do Se Kau ai Emui Hetura Karadia Ba Hagoada
18 Hari ina negai, tadikaka bona taihu na hekwakwanai idauidau e davarimu. Heḡereḡere, disasta idauidau eiava taunimanima ese e havaramu dika ese e hametaudiamu. Nega unu bamodiai, ita haida ese idia na eda ruma ai baita abidia dae diba. Eiava ita haida na moni dalanai baita heduru diba. To iboudai ese Iehova baita noia diba idia baine durudia. Bema ta lalopararamu tadikaka ta o taihu ta na e lalomanokamu, reana basita dibamu dahaka baita gwaurai eiava ede baita kara toma. To ita iboudai na dala idauidau ai baita heduru diba. Heḡereḡere, nega baita ato turada baita bamoa. Bema turada na ḡau ta e herevalaiamu namona na baita hakala namonamo. Bona ia ida hahegoada sirina ta baita duahia hebou. (Isa. 50:4) Ḡau badana na ia heduru e uramu neganai, oi na heḡaeḡae ia ba durua.—Hereva Lada-isidia 17:17 ba duahia.
w08 2/15 rau 8 par. 7
Iehova Ena Dala ai Ba Raka
7 Dirava na e uramu taunimanima ese bae abidadama henida diba tura namodia ai baitala. (Her. 17:17) King Saulo natuna Ionatan na David turana ai ela. Ionatan na David ese Goliata e hamasea sivaraina e kamonai neganai, “Ionatan bona David na lalo-tamona ai e hetura heheni; Ionatan ese David e lalokau henia, ia sibona e helalokau heniva heḡereḡerena.” (1 Sam. 18:1, 3) Ionatan ese danu David e hadibaia Saulo na e urava ia baine alaia. David e heau neganai, Ionatan na David ida e hedavari bena raruosi gwauhamata ta e karaia. Ionatan na David dainai Saulo e hereva henia neganai mokona e hamasea, to Ionatan bona David e hedavari lou neganai edia hetura karana dainai e karaia gwauhamatana na ma e gwauraia lou. (1 Sam. 20:24-41) Edia hedavari ginigabena ai, Ionatan ese David na “Dirava ladana ai e hagoadaia.”—1 Sam. 23:16-18.
w09 10/15 rau 19 par. 11
Lalokau Lasi Tanobadana ai Emu Hetura Karana Ba Hagoadaia
11 Hebadina heheni karana ba hahedinaraia. Solomon na eto: “Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.” (Her. 17:17) Solomon na unu hereva e tore neganai, reana ia tamana David bona Ionatan edia hetura karana e laloa. (1 Sam. 18:1) King Saulo na e urava natuna Ionatan na Israel pavapavana ai bainela. To Ionatan na e abia dae Iehova ese David hari e abia hidi pavapava dagina baine abia. Ionatan na dia Saulo heḡereḡerena, ia ese David na se mama henia. Taunimanima ese David e hanamoa neganai Ionatan na se badu, bona Saulo ese David ladana ihadikana herevadia e gwaurai neganai ia ese unu na se abia dae. (1 Sam. 20:24-34) Ita be Ionatan heḡereḡerena, a? Turada hahenamo e abimu neganai, ta moalemu, a? Metau e davarimu neganai, taudia ta halomu bona ta durudiamu, a? Haida ese turada e maumauraiamu neganai, edia hereva ta abi dae haraḡamu, a? Eiava, Ionatan heḡereḡerena, turada ta badinaiamu dainai ia totona baita hereva, a?
Dirava Ena Hereva Ba Tahua Namonamo
w05 3/15 rau 24 par. 4
Samuel Ginigunana Bukana Ena Hereva Badadia
21:12, 13. Iehova na e uramu eda haero-haero karana bona diba baita ḡaukaralai, mauri ai e varamu hekwakwanaidia baita haheaukalai. Ia ese ena Hereva e heni, unu amo baita lalo namonamomu, diba baita abimu bona ḡau baita haero namonamomu. (Hereva Lada-isidia 1:4) Bona e abidia hidi Kristen elda taudia edia amo heduru baita abi diba.
APRIL 18-24
DIRAVA ENA HEREVA ENA NAMO | 1 SAMUEL 23-24
“Mai Eda Haheauka ida Iehova Baita Naria”
w04 4/1 rau 16 par. 8
Mauri Daladia E Idaumu Neganai Dirava Ena Lauma Ena Heduru ai Ba Tabekau
8 David na se ura Saulo baine hadikaia. Ia na e abidadama bona e haheauka, bona ḡau iboudiai na Iehova imana ai e ato. Pavapava ese nadi kohuana e rakatania neganai, David ese e boi henia, eto: “Iehova ese ita raruosi baine hahemaoro henida; Iehova ese baine hadikamu lau daigu ai, a lau imagu ese basine hadikamu.” (1 Samuel 24:12) Ena be mai dibana Saulo na e kerere, to David ese ena dika davana na se haloua; danu Saulo na se gwau henia eiava se gwauraia dika. Nega momo ai, David na e hedogotao dika davana na se karaia. To Iehova enai e tabekau, ia ese baine hamaoromaoroa.—1 Samuel 25:32-34; 26:10, 11.
w04 6/1 rau 22-23
Emu Noho Dalana ese Emu Mauri E Biaguamu, A?
Ta dibaiamu ḡauna ihatoina na, Baibul ena hahekau herevadia ida asie heḡereḡere daladia amo hekwakwanai na basita hamaoromaoro, to namona na Iehova baita naria. Hahediba tauna Iakobo na eto: “A haheauka ese ena ḡaukara baine haḡuḡurua baine namo, bena ba ḡoeva dae bona ba namo ḡuḡuru, ḡau ta ai basio dabu.” (Iakobo 1:4) Eda hekwakwanai na baita haheaukalaia ela bona baine ore, unu amo haheauka ese “ena ḡaukara baine haḡuḡurua,” to Baibul ena hahekau herevadia ida asie heḡereḡere dalana amo basita hamaoromaoroa toho. Hekwakwanai ese eda abidadama na be tohoamu bona be hanamoamu, unu amo eda abidadama be hagoadaiamu. Iosef bona David na haheauka unu bamona e hahedinaraia. Idia na Iehova ese basine moalelaia dalana asie tahua hekwakwanai ihamaoromaorona totona. To edia hekwakwanai na e haheaukalai. Idia na Iehova e naria, una dainai hahenamo e abi! Iehova ese e ḡaukaralaidia ena taunimanima e gunalaidia bona e hamauridia.—Genese 41:39-41; 45:5; 2 Samuel 5:4, 5.
Ita danu hekwakwanai ta davarimu neganai, reana baita uramu Baibul ena hahekau herevadia ida asie heḡereḡere dalanai eda hekwakwanai baita hamaoromaoroa. Heḡereḡere, oi be o lalomanoka badina ba adavaia tauna maorona ta do so davaria, a? Bema oibe, Iehova ena haheḡani, “Lohiabada lalonai mo” ba headava haheḡanina, bae utua hedibaḡanidia na ba dadarai. (1 Korinto 7:39) Emu headava lalonai hekwakwanai o davarimu, a? Dia namo tanobada ena lalohadai heḡereḡerena headava ba hapararaia o ba hadokoa, to raruosi ba ḡaukara hebou emui hekwakwanai ba hamaoromaoro. (Malaki 2:16; Efeso 5:21-33) Emu moni na dia heḡereḡere dainai, emu ruma bese inarinai o hekwarahimu, a? Iehova ba naria anina na, gavamani ena taravatu iutuna daladia amo moni bavabia karana na ba dadaraia. (Salamo 37:25; Heberu 13:18) Oibe, namona na iboudai baita ḡaukara goada eda noho daladia heḡereḡerediai hekwakwanai baita haheaukalai bona Iehova ese eda hekwarahi baine hanamoa. Unu ta kara tomamu neganai, laloda baita hadai Iehova baita naria hekwakwanai baine hamaoromaorodia.—Mika 7:7.
Dirava Ena Hereva Ba Tahua Namonamo
Ḡau ta ese Basine Koumu Davamu Bavabia Totona
11 Bema lalokau bona hebogahisi karana baita hahedinarai, basita mama dibamu. Dirava ena Hereva na e gwaumu: “Lalokau na e haheauka taritarimu; lalokau na mai ena heabidae; asi ena hebore [“se mamamu,” NWT].” (1 Kor. 13:4) Kudouda ai mama karana baita dadaraia totona, namona na baita hekwarahi Dirava ena lalohadai heḡereḡerena ai ḡau baita haero, bona eda tadikaka taihu baita lalodia na vaitani tauani tamona na heto. Una ese be durudamu edia hemami baita lalo bada totona. Baibul na e gwaumu, bema “rege ta bae hanamoa, rege iboudiai na ia ida bae moale hebou.” (1 Kor. 12:16-18, 26) Una dainai, bema haida na hahenamo e abimu neganai, basita mama henidia, to baita moale. Mani King Saulo natuna Ionatan ena haheitalai aita laloa. Iehova ese David pavapava ai e halaoa neganai, Ionatan na se mama. To, ia ese David e hagoadaia. (1 Sam. 23:16-18) Namona na Ionatan ena lalokau bona hebogahisi karana baita tohotohoa, ani?
APRIL 25–MAY 1
DIRAVA ENA HEREVA ENA NAMO | 1 SAMUEL 25-26
“Oi be So Lalo Namonamomu Bena O Karamu, A?”
ia-E rau 78 par. 10-12
Aonega Dalanai E Kara
10 Unu ḡaukara goadagoada tuari taudia ese unu mamoe nari taudia be ede e kara henidia toma? Idia bema ura neganai nega ta ta ai mamoe ta bema alaia bema ania, to unu na asie kara toma. To, Nabal ena seri bona ena hesiai taudia ediai idia na hegima habana ta na heto. (1 Samuel 25:15, 16 ba duahi.) Mamoe bona e naridiava taudia ese hekwakwanai momo e davariva. Animal dikadia na momo, bona Israel ena saot kahana hetoana na kahikahi herea hanua ma haida amo dainai, nega momo unu gabu edia dadidadi taudia bona henaohenao taudia ese e vareai henidiava.
11 Tano ḡaḡaena ai unu tatau bae ubudia na ḡaukara badana ta. Una dainai, dina ta David na heduru totona hesiai taudia gwauta e siaidia Nabal dekena. David na mai ena aonega ida nega maorona e abia hidi. Una na mamoe huidia iutudia negana, bona hariharibada bona moale negana. David ese baine gwaurai herevadia danu e abi hidi namonamo, ia baine hereva henia totona hereva namodia e ḡaukaralai. Bona sibona e hegwaurai “natumu David,” reana unu amo ena hemataurai Nabal enai baine hahedinaraia badina laḡanina na bada. Nabal be dahaka e kara?—1 Sam. 25:5-8.
12 Ia na e badu dikadika! Eregabe ta ese e vara ḡauna na Abigail enai e herevalaia, eto, “ia ese e ḡonaḡonalaidia.” Gogosi tauna Nabal na ena parao, ranu, bona e aladia vamudia daidiai e maumau badabadava. Ia ese David na asi anina tauna ta heḡereḡerena e kirikirilaia, bona e heau hesiai tauna ta ida e haheḡereḡerea. Nabal ese David e laloava dalana na Saulo, David e inai heniava tauna, ena heḡereḡerena. Idia raruosi ese Iehova ena lalohadai na asie abia. Dirava ese David na e lalokau henia bona ia ese David na dia gwau-edeede hesiai tauna ta bamona e laloa, to vaira neganai Israel baine lohiaia tauna heḡereḡerena e laloa.—1 Sam. 25:10, 11, 14.
ia-E rau 80 par. 18
Aonega Dalanai E Kara
18 Abigail na e sori una kerere dainai bona David e noia ena dika baine gwauatao. E gwa adavana na ladana heḡereḡerena, kavakava tauna, reana e urava David na baine laloparara, ia ese taunimanima unu bamona baine panisia na asi anina. E hahedinaraia ia ese David na e abia dae Iehova ena gwaukau tauna, bona mai dibana David na “Iehova ena tuari” e karaiava tauna. Danu, e hahedinaraia, ia na mai dibana Iehova ese David na e gwauhamata henia pavapava ai bainela, badina e gwa: “Iehova ese . . . Israel pavapavana ai baine halaomu.” Bona David e hamaoroa rara ihahebubuna karana ta basine karaia, eiava una kara dainai ‘lalona basie hisihisi’—anina na lalona mamina ese basine hahemaoro henia. (1 Samuel 25:24-31 ba duahi.) Unu na hereva namodia!
Dirava Ena Hereva Ba Tahua Namonamo
ia-E rau 80 par. 16
Aonega Dalanai E Kara
16 Anina be Abigail ese adavana ena kwara dagina se matauraia, a? Lasi; ba helalotao Nabal na Iehova ese e horoa hesiai tauna e kara dika henia, bona iena kara dainai ena ruma ai e nohova asi edia kerere taudia bema hamasedia diba. Bema Abigail na kara ta basinema karaia, adavana ena kerere bema durua diba, ani? Ia na Dirava ibadinana karana e atoa guna bona adavana ibadinana be gabeai e atoa.