Septam

Bondie inn donn Zezi pouvwar pou rezoud tou bann problem ki bann dimounn gagne. Kan li ti fer bann mirak, Zezi ti montre ki li ena pouvwar pou rezoud ninport ki difikilte ki nou pa kapav rezoud par noumem. Par exanp, li ena pouvwar pou eliminn lasours tou nou bann problem, setadir pese, ek osi bann kitsoz ki arive akoz pese, kouma maladi ek lamor. (Mat. 9:1-6; Rom. 5:12, 18, 19) Kan li ti fer bann mirak, Zezi ti montre ki li ti kapav geri “tou sort kalite maladi.” Li ti mem kapav resisit bann mor. (Mat. 4:23; Zan 11:43, 44) Zezi ti kapav osi kontrol lanatir ek tir bann demon. (Mark 4:37-39; Lik 8:2) Sa bien rasir nou kan nou kone ki Zeova inn donn tou sa pouvwar-la so Garson! Nou kapav sir ki Rwayom Bondie pou realiz tou bann promes ki Zeova inn fer konsernan lavenir. Kan Zezi ti enn imin ek ki li ti lor later, li ti fer bann gran mirak. Sa montre nou ki li pou fer bann pli gran mirak ankor parski li Lerwa dan Rwayom Bondie ki dan lesiel. w23.04 3 ¶5-7

Si ena boukou proklamater dan to lasanble, kitfwa to pa gagn kantite repons ki to anvi. Akoz sa, kitfwa to nepli anvi reponn. Me fode pa to aret reponn. Prepar plizir repons. Lerla, si to pa’nn gagn repons dan koumansman renion, to ankor ena bann lezot lokazion pou reponn. Kan to prepar to Latour Degard, reflesi kouma sak paragraf ena enn lien ar tem lartik-la. Kan to fer sa, sa pou ed twa pou donn bann pli zoli repons. Anplis, to kapav prepar twa pou reponn dan bann paragraf ki pli difisil. Kifer? Parski ena mwins dimounn ki reponn pou sa bann paragraf-la. Me ki to pou fer si to touzour pa’nn gagn repons apre plizir renion? To kapav al get frer ki pou fer size-la ek dir li pou ki paragraf to ti pou kontan reponn. w23.04 21-22 ¶9-10

Zozef pa ti tarde pou swiv bann instriksion Zeova, ek akoz sa li ti vinn enn pli bon mari. Omwin trwa fwa, Zeova ti donn li bann instriksion pou so fami. Ek sak fwa, li ti obeir deswit, mem kan sa ti difisil pou li. (Mat. 1:20; 2:13-15, 19-21) Kan li ti swiv bann instriksion Zeova, Zozef ti protez Mari, li ti soutenir li, ek li ti pran li swin. Kan Zozef ti azir koumsa, sirman sa ti fer Mari ena pli boukou lamour ek pli boukou respe pou li! Bann mari kapav swiv lexanp Zozef kan zot rod bann konsey ki ena dan Labib pou zot pran swin zot fami. Kan to fer sa, mem kan sa difisil pou twa, to montre ki to kontan to madam ek ki to anvi ki to maryaz vinn pli solid. Enn ser ki res Vanuatu, ek ki marye depi plis ki 20 an, dir: “Kan mo mari rod direksion Zeova ek ki li met li an pratik, mo ena plis respe pou li. Mo santi mwa an sekirite ek mo ena konfians ki li pou pran bann bon desizion.” w23.05 21 ¶5

Bann Zwif ki ti pe retourn Izrael ti bizin vinn “enn pep ki sin” pou zot Bondie. (Det. 7:6) Selman, sa pa vedir ki zot pa ti bizin fer bann sanzman pou fer Zeova plezir. Laplipar bann Zwif ti ne dan Babilonn, ek zot ti fini abitie ar fason panse ek bann prinsip bann Babilonien. Plizir dizenn lane apre ki bann Zwif ti retourn Izrael, Gouverner Neemi ti etone kan li ti aprann ki bann zanfan ki ti ne dan Izrael pa ti konn koz langaz bann Zwif. (Det. 6:6, 7; Ne. 13:23, 24) Kouma sa bann zanfan-la ti pou aprann kontan ek ador Zeova si zot pa ti konpran Ebre, langaz prinsipal ki’nn ekrir Parol Bondie? (Esdr. 10:3, 44) Alor, sa bann Zwif-la ti ena bann gran sanzman pou fer. Selman, li ti pou pli fasil pou zot fer sa bann sanzman-la dan Izrael, kot tigit-tigit ladorasion pou Zeova ti pe koumans retabli.—Ne. 8:8, 9. w23.05 15 ¶6-7

Malerezman, mem si nou bien motive, li kapav arive ki nou dekouraze si enn sitiasion arive ek ki sa fer nou lobzektif vinn pli difisil pou realize. Par exanp, “bann sitiasion ki personn pa atann” kapav pran nou letan. Lerla, nou pena ase letan pou realiz nou lobzektif. (Ekle. 9:11) Nou kapav osi gagn enn difikilte ki dekouraz nou ek ki pran tou nou lenerzi. (Prov. 24:10) Ek akoz nou inparfe, nou kapav fer bann erer ki pou fer nou lobzektif vinn pli difisil pou realize. (Rom. 7:23) Ouswa, parfwa nou zis santi nou extra fatige. (Mat. 26:43) Ki kitsoz kapav ed nou pou fer fas ar sa bann sitiasion-la? Si enn kitsoz pe anpes twa realiz to lobzektif, sa pa vedir ki to bizin bes lebra. Labib dir ki nou kapav gagn plizir difikilte ki kapav anpes nou realiz nou lobzektif. Selman, li dir osi ki nou kapav realiz nou bann lobzektif. Wi, kan nou kontign avanse malgre bann difikilte, nou montre Zeova ki nou anvi fer Li plezir. To kapav sir ki Zeova bien kontan kan Li trouv twa pe kontign fer zefor pou realiz to lobzektif! w23.05 30 ¶14-15

Servis pionie kapav ed enn zenn frer pou adapte li ar diferan kalite dimounn. Sa kapav osi ed li pou aprann fer enn bidze, ek pou pa depans plis ki seki li gagne. (Fil. 4:11-13) Enn kitsoz ki kapav ed twa pou servi Zeova aplintan se servis pionie tanporer. Boukou inn fer pionie tanporer pandan enn sertenn letan, ek sa inn ed zot pou vinn pionie permanan. Kan to fer pionie permanan, sa kapav donn twa lokazion pou partisip dan lezot form servis aplintan, kouma par exanp lor konstriksion ouswa dan Betel. Tou bann frer bizin fer zefor pou ena bann kalite ki bizin ek pou ranpli bann kondision pou servi kouma ansien dan lasanble. Labib dir ki bann frer ki fer sa zefor-la, zot pe rod fer “enn bon travay.” (1 Tim. 3:1) Pou koumanse, enn frer bizin ranpli bann kondision pou servi kouma serviter lasanble. Bann serviter lasanble fer boukou kitsoz pou ed bann ansien. Avek limilite, bann ansien ek bann serviter lasanble pran swin bann frer ek ser, ek zot bien aktif dan predikasion. w23.12 27-28 ¶14-16

Lerwa Zozias ti ena 16 an kan li ti koumans rod Zeova. Li ti anvi aprann konn Zeova ek li ti anvi fer So volonte. Selman, lavi sa zenn lerwa-la pa ti fasil. Kifer? Parski sa lepok-la, laplipar bann dimounn ti pe ador bann fos bondie. Alor, Zozias ti bizin ena kouraz pou ki li fer zot aret ador bann fos bondie. Ek li ti reisi fer sa! Avan laz 20 an, Zozias ti koumans tir bann fos ladorasion ki ti ena dan Zerizalem ek dan Zida. (2 Kro. 34:1, 2) Mem si to bien zenn, to kapav swiv lexanp Zozias kan to rod Zeova ek to aprann kontan So bann zoli kalite. Si to fer sa, sa pou motiv twa pou donn to lavi Zeova ek pou pran batem. Kan to donn to lavi Zeova, ki lefe sa bizin ena lor twa? Luke, ki’nn pran batem laz 14 an, dir: “Depi sa zour-la, mo’nn desid pou met Zeova an premie dan mo lavi, ek mo fer mo maximum pou fer Li plezir.” (Mark 12:30) Si twa osi to fer sa, to kapav sir ki to pou gagn boukou benediksion! w23.09 11 ¶12-13

Kan lapot Pol ti ekrir so let, lasanble Tesalonik ti forme depi mwins ki enn an. Bann frer ki ti ena bann responsabilite dan lasanble, kitfwa pa ti ena boukou lexperyans, ek kitfwa zot ti fer bann erer. Kanmem sa, zot bann frer ek ser ti respekte zot. Plis nou pe koste ar gran soufrans, plis nou bizin ena konfians dan bann ansien nou lasanble. Dan sa lepok difisil ki nou pe viv la, li kapav arive ki nou nepli ena kontak ar bann frer ki dan Betel ouswa ki dan biro mondial. Akoz sa, li bien inportan ki depi aster-la mem, nou aprann kontan ek respekte bann ansien nou lasanble. Pa bliye ki Zeova pe servi Zezi pou gid sa bann zom fidel la. Alor, ninport ki arive, fode pa nou res konsantre lor defo sa bann frer-la ek nou bizin gard nou bon sans. Parey kouma enn elmet protez latet enn solda, nou lesperans protez nou bann panse. Nou kone ki tou bann kitsoz ki lemond kapav donn nou, zot pena okenn valer. (Fil. 3:8) Nou lesperans ed nou pou res kalm. w23.06 11-12 ¶11-12

Bann dimounn ki tann lavwa sa “fam ki bet” la, zot ena enn desizion pou pran: Eski zot pou aksepte so linvitasion ouswa non? Nou ena bann bon rezon pou rezet limoralite sexiel. Sa “fam ki bet” la dir: “Bann delo ki’nn kokin zot dou.” (Prov. 9:17) Ki ete sa “bann delo ki’nn kokin” la? Labib konpar bann relasion sexiel ki ena ant enn misie ek so madam ar enn bon delo fre ki rafresi. (Prov. 5:15-18) Enn misie ek enn madam ki marye legalman, zot kapav fer zot kamarad plezir gras-a bann relasion sexiel. Sa bien diferan ar “bann delo ki’nn kokin,” ki reprezant bann relasion sexiel imoral. Souvan bann dimounn ki komet limoralite, zot esey fer sa an kasiet, parey kouma enn kikenn ki kokin. “Bann delo ki’nn kokin,” setadir limoralite sexiel, kapav paret “dou” pou bann dimounn ki panse ki personn pa’nn trouv zot. Selman, zot pe anbet zotmem, parski Zeova trouv tou kitsoz. Pena nanye ki pli amer ki perdi faver Zeova. Se pa enn kitsoz ki “dou” ditou!—1 Kor. 6:9, 10. w23.06 22 ¶7-9

Eski to santi ki to nepli pe priye Zeova ar tou to leker? Ouswa, eski to’nn perdi to lazwa pou prese? Akoz nou inparfe, li kapav arive ki nou ena sa bann santiman-la. Si to dan sa sitiasion-la, fode pa to panse ki Zeova nepli pe donn twa so lespri sin. Si to santi ki to nepli aktif parey kouma avan dan to servis pou Zeova, reflesi lor lexanp lapot Pol. Pol ti fer boukou zefor pou imit Zezi. Me parfwa, li pa ti santi li motive pou fer sa. Selman, mem si parfwa Pol pa ti santi li motive, li ti bien deside pou res aktif dan so servis pou Zeova. Parey kouma Pol, fode pa ki to les bann santiman negatif afekte to servis pou Zeova. To bizin bien deside pou kontign servi Li, mem si parfwa to pa santi twa motive pou fer sa. Si to kontign fer to maximum pou Zeova, avek letan to bann santiman pou sanze.—1 Kor. 9:16. w24.03 11-12 ¶12-13

Nou kapav montre lamour anver nou bann frer ek ser, kan nou fer kamarad ar zot ek kan nou pas letan ar zot. (2 Kor. 6:11-13) Dan nou bann lasanble, boukou frer ek ser sorti dan diferan kiltir ek zot ena diferan personalite. Nou kapav ogmant nou lamour pou sakenn parmi zot kan nou konsantre nou lor zot bann zoli kalite. Kan nou fer zefor pou trouv lezot parey kouma Zeova trouv zot, nou montre ki nou vremem kontan zot. Pandan gran soufrans, li pou bien inportan ki nou kontan nou bann frer ek ser. Kouma Zeova pou protez nou kan gran soufrans pou koumanse? Anou gete seki Zeova ti demann so bann serviter pou fer kan bann Babilonien ti atak zot. Li ti dir: “Ale mo pep, rant dan to bann lasam ki trouv andan, ek ferm laport deryer twa. Kasiet pou enn ti moman ziska ki lakoler pase.” (Iza. 26:20) Pandan gran soufrans, kitfwa nou pou bizin swiv sa bann instriksion-la. w23.07 6-7 ¶14-16

Nou bizin ena repitasion enn kikenn ki rezonab. Alor, demann tomem: ‘Eski lezot trouv mwa kouma enn kikenn ki rezonab, enn kikenn ki pa persiste ek ki sede? Ouswa eski zot trouv mwa kouma enn kikenn ki strikt, ki dir, ek ki teti? Eski mo ekout lopinion lezot ek mo sede kan bizin?’ Plis nou rezonab, plis nou imit Zeova ek Zezi. Nou bizin rezonab kan nou sitiasion sanze. Kan ena bann sanzman, nou kapav gagn bann difikilte ki nou pa atann. Par exanp, san ki nou atann, nou kapav gagn enn maladi bien grav. Ouswa kan ena bann sanzman ekonomik ouswa politik dan pei, nou kapav pas par bann sitiasion bien difisil. (Ekle. 9:11) Nou kapav osi gagn bann difikilte kan ena bann sanzman dan lorganizasion. Nou pou reisi adapte si nou fer sa kat kitsoz-la: (1) aksepte ki nou sitiasion inn sanze, (2) res konsantre lor lavenir, pa lor lepase, (3) res pozitif, ek (4) ed lezot. w23.07 21-22 ¶7-8

Daniel ti enn zenn zom kan bann Babilonien ti amenn li kouma prizonie dan Babilonn, enn lavil ki ti bien lwin ar Zerizalem. Mem si Daniel ti zenn, bann Babilonien ti inpresione par li. Zot ti trouv “seki paret devan [zot] lizie,” setadir ki Daniel ti enn zenn ki ti “san okenn defo, zoli,” ek ki ti sorti dan enn gran fami. (1 Sam. 16:7) Se pou sa bann rezon-la ki bann Babilonien ti form Daniel pou ki li servi dan pale lerwa. (Dan. 1:3, 4, 6) Zeova ti kontan Daniel, pa parski li ti enn zoli garson ouswa parski li ti ena bann privilez dan pale lerwa, me parski Daniel ti swazir pou vinn enn kikenn ki fer Zeova plezir. Daniel kitfwa ti ena anviron 20 an kan Zeova ti konpar li ar Noe ek Zob. Sa montre ki, mem si Daniel ti zenn, Zeova ti konsider li kouma enn kikenn ki zis, parey kouma Noe ek Zob, ki ti servi Zeova avek fidelite pandan plizir dizenn lane. (Zen. 5:32; 6:9, 10; Zob 42:16, 17; Eze. 14:14) Zeova ti kontign kontan Daniel toutlong so lavi.—Dan. 10:11, 19. w23.08 2 ¶1-2

Si to anvi aste enn lakaz, sirman to pou anvi chek tou ti detay konsernan lakaz-la tomem, pa vre! Nou bizin fer parey kan nou lir ek etidie Labib. Si nou lir li zis lao-lao, nou pou aprann zis “bann kitsoz debaz konsernan mesaz sakre ki sorti kot Bondie.” (Ebre 5:12) Parkont, si nou examinn li parey kouma nou ti pou examinn sa lakaz ki nou ti pou aste la, nou pou konpran li pli bien. Enn parmi bann meyer fason pou etidie Labib, se kan nou reflesi kouma tou bann lansegnman ki ena dan Labib, zot ena enn lien ar zot kamarad. Nou bizin fer zefor pou konpran sa bann lansegnman-la, ek osi fer zefor pou konpran kifer nou krwar sa bann lansegnman-la. Si nou anvi konpran seki ena dan Labib, nou bizin etidie li an profonder. Lapot Pol ti ankouraz bann Kretien pou pran letan pou etidie Parol Bondie, pou zot kapav “konpran bien larzer, longer, oter ek profonder” bann verite Biblik. Lerla, zot ti pou kapav “bien anrasine ek bien etabli” dan zot lafwa. (Efe. 3:14-19) Nou osi nou bizin fer parey. w23.10 18 ¶1-3

Labib koz lor bann serviter Zeova ki ti ena pasians. Eski to kapav etidie zot lexanp dan to letid personel? Par exanp, mem si David ti bien zenn kan Zeova ti swazir li pou vinn lerwa lor Izrael, li ti bizin atann plizir lane avan ki li reisi vinn lerwa. Simeon ek Ana ti kontign servi Zeova avek fidelite pandan ki zot ti pe atann Lemesi. (Lik 2:25, 36-38) Kan to etidie lor lexanp sa bann serviter Zeova la, rod repons pou bann kestion kouma: Ki kitsoz inn ed sa dimounn-la pou ena pasians? Ki bienfe li’nn gagne parski li’nn ena pasians? Kouma mo kapav swiv so lexanp? To kapav osi tir bann leson ar lexanp bann dimounn ki pa ti ena pasians. (1 Sam. 13:8-14) Par exanp, to kapav demann tomem: ‘Kifer zot pa ti ena pasians? Ki konsekans zot inn gagne akoz sa?’ w23.08 24 ¶15

Lapot Pier ti enn kikenn ki fidel; li pa ti les nanye anpes li swiv Zezi. Par exanp, enn fwa li ti montre so fidelite kan Zezi ti dir enn kitsoz ki so bann disip pa ti konpran. (Zan 6:68) Sa zour-la, boukou disip ti aret swiv Zezi avan mem ki zot gagn enn explikasion lor seki Zezi ti dir. Me Pier pa ti fer sa. Kifer? Parski li ti kone ki zis Zezi tousel “ena bann parol lavi eternel.” Zezi ti kone ki Pier ek bann lezot zapot ti pou abandonn li. Kanmem sa, li ti fer Pier konfians. Li ti sir ki Pier ti pou retourne ek ki li ti pou res fidel. (Lik 22:31, 32) Zezi ti konpran ki “lespri anvi fer seki bon, me laser li feb.” (Mark 14:38) Alor, mem si Pier ti dir ki li pa ti konn Zezi, Zezi pa ti abandonn li. Apre so rezireksion, Zezi ti aparet ar Pier, kitfwa dan enn moman kot li ti tousel ek dekouraze. (Mark 16:7; Lik 24:34; 1 Kor. 15:5) Sirman sa ti bien ankouraz lapot Pier! w23.09 22 ¶9-10

Bondie pardonn, ouswa kouver, pese bann ki ena lafwa an Li. Li pardonn zot net ek Li nepli pran kont bann pese ki zot inn fer. (Ps. 32:1, 2) Zeova konsider sa bann dimounn-la kouma bann dimounn drwat parski zot ena lafwa an Li. Mem si Zeova ti konsider Abraam, David, ek so bann lezot fidel serviter kouma bann dimounn ki drwat, zot ti ankor inparfe. Me parski zot ti ena lafwa, Zeova ti konsider zot kouma bann dimounn ki drwat. Akoz zot lafwa, zot ti diferan ar bann dimounn ki pa ti ador Zeova. (Efe. 2:12) Dan let ki li ti ekrir bann Romin, lapot Pol explike ki nou bizin ena lafwa pou ki nou kapav vinn kamarad Bondie. Abraam ek David ti bann kamarad Bondie parski zot ti ena lafwa an Li. Nou osi nou kapav vinn kamarad Bondie si nou ena lafwa an Li. w23.12 3 ¶6-7

Azordi, tou bann Kretien ena privilez pou ofer Zeova bann sakrifis. Nou fer sa kan nou servi nou letan, nou lenerzi, ek nou bann dibien pou servi Zeova. Nou montre ki nou apresie loner ki nou ena pou servi Zeova kan nou kontign fer nou best pou servi Li. Lapot Pol ti koz lor bann kitsoz ki nou bizin touletan fer pou ador Zeova. (Ebre 10:22-25) Parmi sa bann kitsoz-la ena lapriyer, predikasion, asiste bann renion, ek ankouraz sakenn nou kamarad “ankor plis kan [nou] trouv zour [Zeova] pe koste.” Ver lafin liv Revelasion, anz Zeova ti dir: “Ador Bondie!” (Rev. 19:10; 22:9) Li ti dir sa de fwa pou montre ki se vremem enn kitsoz bien inportan. Alor, fode zame nou bliye bann kitsoz profon ki nou’nn aprann konsernan gran tanp spiritiel Zeova, ek anou kontign apresie loner ki nou ena pou ador Zeova dan so tanp! w23.10 29 ¶17-18

Nou tou nou anvi “kontign kontan sakenn nou kamarad.” Selman, nou bizin rapel ki Zezi ti dir ki “lamour laplipar dimounn [ti] pou diminie.” (Mat. 24:12) Zezi pa ti pe rod dir ki laplipar so bann disip ti pou aret kontan zot kamarad. Selman, dan lemond azordi, boukou dimounn pa kontan zot kamarad, ek nou bizin fer atansion ki nou pa les nou inflianse par sa fason panse-la. Kouma nou kapav kone si nou ena enn gran lamour pou nou bann frer ek ser? Pou nou kone si nou ena enn gran lamour pou lezot, nou kapav reflesi lor kouma nou reazir dan diferan sitiasion. (2 Kor. 8:8) Lapot Pier koz lor enn sa bann sitiasion-la. Li dir: “Avan tou kitsoz, ena enn lamour profon pou sakenn zot kamarad, parski lamour kouver enn kantite pese.” (1 Pier 4:8) Alor, fason ki nou reazir kan nou bann frer ek ser fer bann erer, ouswa kan zot bles nou, pou ed nou pou kone si nou ena enn gran lamour pou zot. w23.11 10 ¶12-13

Nou pa pou reisi obeir “nouvo komannman” ki Zezi ti donn so bann disip, si nou kontan zis sertin dan lasanble ek nou pa kontan lezot. Parey kouma Zezi, nou kapav santi nou pli pros ar sertin dan lasanble. (Zan 13:23; 20:2) Selman, lapot Pier rapel nou ki nou bizin fer zefor pou kontan tou nou bann frer ek ser, parski zot tou form parti nou fami. (1 Pier 2:17) Lapot Pier ankouraz nou pou ‘kontan sakenn nou kamarad avek enn gran lamour avek tou nou leker.’ (1 Pier 1:22) Dan sa verse-la, lexpresion ena “enn gran lamour” vedir fer zefor pou kontan enn kikenn, mem si sa difisil pou montre lamour anver li. Par exanp, si enn frer inn bles nou ouswa inn ofans nou, nou pou ena plis tandans pou tret li parey kouma li’nn tret nou, olie ki nou montre lamour anver li. Selman, Pier ti aprann ar Zezi ki kan enn kikenn azir koumsa, sa pa fer Bondie plezir. (Zan 18:10, 11) Akoz sa, Pier ti dir: “Pa rann lemal pou lemal, ek pa insilte bann ki insilte zot. Okontrer, an-retour donn enn benediksion.” (1 Pier 3:9) Alor, kan nou ena “enn gran lamour” pou lezot, nou pou zanti avek zot ek nou pou tret zot dan enn bon fason. w23.09 28-29 ¶9-11

Bann zanfan grandi bien vit, pa vre! Anplis, se enn kitsoz ki otomatik. Zot pa bizin fer zefor pou grandi. Parkont, pou vinn enn Kretien ki ena matirite, li pa otomatik; nou bizin fer bann zefor. (1 Kor. 13:11; Ebre 6:1) Pou nou gagn matirite, nou bizin ena enn bon lamitie avek Zeova. Nou bizin osi So lespri sin pou nou devlop bann zoli kalite, bann kapasite ki itil, ek pou nou prepar nou pou bann responsabilite ki nou pou gagne dan lavenir. (Prov. 1:5) Kan Zeova ti kree bann imin, “li ti kree zot zom ek fam.” (Zen. 1:27) Li vre ki bann zom ek bann fam zot diferan fizikman, me zot diferan dan lezot domenn osi. Par exanp, Zeova inn donn bann zom ek bann fam bann responsabilite ki diferan. Alor, zot bizin devlop bann kalite ek bann kapasite ki pou ed zot pou asim zot bann responsabilite.—Zen. 2:18. w23.12 18 ¶1-2

Zezi ti anvi ki lezot servi nom so Papa. Selman, kitfwa bann sef relizie ti panse ki zot ti pou mank respe anver Bondie si zot ti servi so nom. Me Zezi pa ti les sa bann tradision-la anpes li loue nom so Papa. Par exanp, kan Zezi ti al dan rezion bann Zerazenien, li ti geri enn zom ki ti posede par enn move lespri. Selman, bann dimounn ti gagn per ek zot ti sipliy Zezi pou kit sa landrwa-la. (Mark 5:16, 17) Me avan li ale, Zezi ti anvi ki bann dimounn ki res laba konn nom Zeova. Alor, li ti donn lord sa zom ki li ti geri la pou rakont tou seki Zeova inn fer pou li. (Mark 5:19) Azordi osi, Zezi anvi ki tou dimounn konn nom so Papa, ek kan nou fer sa, nou fer nou Lerwa Zezi kontan!—Mat. 24:14; 28:20. w24.02 10 ¶10

Nou pe viv bann dernie zour ek se enn lepok bien difisil. Alor, nou bien kontan ki nou form parti dan lorganizasion Zeova, pa vre! Mem si lavi dan sa lemond-la pe vinn deplizanpli difisil, Zeova inn donn nou enn fami spiritiel ki anvi ed nou. (Ps. 133:1) Li osi ed nou pou ena enn zoli lavi fami. (Efe. 5:33–6:1) Ek Li donn nou sazes ki nou bizin pou ki nou kapav fer fas ar nou bann traka ek nou res anpe. Selman, nou bizin fer zefor pou kontign servi Zeova avek fidelite. Kifer? Parski parfwa lezot kapav ofans nou par zot bann parol ouswa zot bann aksion. Nou kapav osi dekouraze akoz nou bann erer, sirtou si sak fwa nou fer mem erer. Nou bizin kontign persevere dan nou servis pou Zeova (1) kan enn frer ouswa enn ser ofans nou, (2) kan nou konzwin desevwar nou, ek (3) kan nou dekouraze akoz nou bann erer. w24.03 14 ¶1-2

Detanzantan, to pou tann koz lor bann frer ek ser ki’nn desid pou fer plis dan zot servis pou Zeova. Kitfwa zot inn fer Lekol pou Bann Evanzelizater Rwayom Bondie, ouswa zot inn al servi kot ti bizin plis proklamater. Si to kapav fixe bann lobzektif koumsa, fer li. Bann serviter Zeova fer zefor pou fer plis dan predikasion. (Zist. 16:9) Me si pou linstan, to pa pe reisi fer plis pou Zeova, fode pa to panse ki lezot pli bon ki twa. Seki pli inportan, se ki to kontign andire ek persevere. (Mat. 10:22) Kan to fer to maximum dapre to kapasite ek to sitiasion, se enn bann meyer fason pou to kontign swiv Zezi ek pou to fer leker Zeova kontan.—Ps. 26:1. w24.03 10 ¶11

Zeova inn promet ki Li pou pardonn bann ki repanti. (Ps. 86:5) Alor, si nou’nn vremem repanti pou nou bann pese, nou kapav sir ki Zeova inn tini so promes, setadir Li’nn fini pardonn nou. Pa bliye ki Zeova Li enn Bondie ki rezonab. Zame Li pa pou demann twa fer plis ki seki to kapav fer. Li apresie tou seki to fer pou Li, tanki to fer to maximum. To pou osi gagn bann bienfe kan to reflesi lor lexanp bann serviter Zeova ki’nn servi Li ar tou zot leker. Par exanp, lapot Pol ti bien aktif dan so servis pou Zeova pandan plizir lane. Li ti vwayaz boukou ek li ti etabli boukou lasanble. Selman, kan so sitiasion ti sanze, li ti nepli kapav fer otan pou Zeova. Eski sa vedir ki li ti perdi faver Zeova? Non. Li ti kontign fer seki li kapav, ek Zeova ti beni li. (Zist. 28:30, 31) Dan mem fason, nou osi nou sitiasion kapav sanze, ek kitfwa nou nepli kapav fer otan ki avan. Me seki pli inportan pou Zeova, se rezon pou kifer nou pe servi Li. w24.03 27 ¶7, 9

Zezi inn donn nou enn zoli lexanp konsernan lapriyer. Toutlong so minister, li ti priye Zeova souvan. Zezi ti bien okipe, ek souvan ti ena boukou dimounn avek li. Akoz sa, li ti bizin trouv letan pou priye. (Mark 6:31, 45, 46) Li ti lev boner gramatin pou ki li kapav tousel pou priye. Ek enn fwa, avan ki li ti pran enn desizion inportan, li ti priye enn lanwit. (Lik 6:12, 13) Lanwit avan so lamor, zis avan ki li terminn mision ki so Papa ti donn li, Zezi ti priye Zeova plizir fwa. Li ti kontign priye so Papa mem dan sa moman bien difisil-la. (Mat. 26:39, 42, 44) Lexanp Zezi montre nou ki nou bizin trouv letan pou priye, mem si nou bien okipe. Parey kouma Zezi, nou bizin rod enn moman pou priye. Kitfwa nou kapav lev inpe pli boner gramatin, ouswa al dormi inpe pli tar aswar. Kan nou fer sa, nou montre Zeova ki lapriyer ena valer pou nou. w23.05 3 ¶4-5

Dan sa verse-la, ena lexpresion “finn ranpli.” Enn diksioner Labib dir ki sa lexpresion-la vedir “inn vinn lor nou kouma enn larivier.” Se enn zoli zimaz ki montre ki kantite Zeova kontan bann 144,000, pa vre! Anplis, bann-la kone ki Zeova bien kontan zot. (Zid 1) Lapot Zan ti dir: “Gete ki kalite lamour Bondie inn donn nou, pou ki apel nou bann zanfan Bondie!” (1 Zan 3:1) Me eski Zeova kontan zis bann Kretien ki ena lesperans pou al dan lesiel? Non, Zeova inn montre ki Li kontan nou tou. Laranson se pli gran prev lamour ki Zeova inn donn nou!—Zan 3:16; Rom. 5:8. w24.01 28 ¶9-10

Sa verse-la koz lor enn kitsoz ki ti ed David pou sirmont so laper. Mem si so lavi ti an danze, li ti reflesi lor bann kitsoz ki Zeova ti pou fer pou li dan lavenir. David ti kone ki Zeova ti pou sov li dan moman ki bizin. Kifer? Parski Zeova ti dir David ki li ti pou vinn prosin lerwa lor Izrael. (1 Sam. 16:1, 13) David ti sir ki Zeova ti pou tini So promes. Ki kitsoz Zeova inn promet nou? Fode pa nou panse ki Li pou tir tou nou bann problem. Selman, ninport ki problem nou ena azordi, Zeova pou fer li disparet dan lemond nouvo. (Iza. 25:7-9) Nou Kreater Li bien pwisan ek Li ena pouvwar pou resisit bann mor, pou geri bann maladi, ek pou detrir tou nou bann lennmi.—1 Zan 4:4. w24.01 6 ¶12-13

Reflesi pou ki rezon to’nn donn to lavi Zeova ek to’nn pran batem. To’nn fer sa parski to ti anvi fer volonte Zeova. Rapel ki kitsoz inn konvink twa ki to’nn trouv laverite. To’nn aprann konn Zeova, ek to’nn koumans kontan ek respekte Li. To lafwa inn grandi ek sa finn motiv twa pou repanti. To’nn aret fer bann kitsoz ki Zeova deteste, ek to’nn koumans fer bann kitsoz ki fer Li plezir. To’nn vremem soulaze kan to’nn realize ki Bondie inn pardonn twa. (Ps. 32:2) To’nn asiste bann renion, ek to’nn koumans partaz bann zoli kitsoz ki to ti pe aprann ar lezot. Aster-la ki to’nn donn to lavi Zeova ek to’nn pran batem, to bien deside pou kontign mars lor semin lavi. (Mat. 7:13, 14) Alor, kontign ogmant to lamour pou Zeova, ek kontign obeir so bann komannman. w23.07 17 ¶14; 19 ¶19

Kan to reflesi lor promes ki to’nn fer Zeova kan to’nn donn Li to lavi, sa kapav donn twa lafors pou fer fas ar ninport ki tantasion. Anou pran enn lexanp. Eski to pou interese ar enn kikenn ki deza marye? Non zame! To’nn fini promet Zeova ki zame to pa pou fer enn kitsoz koumsa! To’nn promet Li ki to pa pou “fer mem larout ki bann move.” (Prov. 4:14, 15) Parey kouma Zezi, to pou bien deside pou rezet deswit ninport ki kitsoz ki pa fer Zeova plezir. (Mat. 4:10; Zan 8:29) Kan to gagn bann leprev ek bann tantasion, sa donn twa lokazion pou montre ki to bien deside pou “kontign swiv” Zezi. Ek to kapav sir ki Zeova pou ed twa pou to reisi fer sa. w24.03 9-10 ¶8-10