Out

Rapel de pwin inportan sa psom-la: (1) Bann dimounn drwat gagn bann difikilte. (2) Zeova ed nou dan nou bann difikilte. Kouma Li fer sa? Enn fason Li fer sa, se kan Li ed nou pou trouv bann kitsoz dan enn fason realist. Mem si Zeova promet nou ki nou kapav zwaye kan nou servi Li, Li pa’nn promet nou ki nou pa pou gagn bann difikilte dan sa lemond-la. (Iza. 66:14) Parkont, Li ankouraz nou pou res konsantre lor lavenir; lor lepok kot nou pou viv ere pou touletan. (2 Kor. 4:16-18) Me an-atandan, Li ed nou pou nou kontign andire sak zour. (Lam. 3:22-24) Ki nou kapav aprann ar lexanp bann fidel serviter Zeova dan lepase ek dan nou lepok? Mem si nou gagn bann difikilte ki nou pa atann, si nou kont lor Zeova, Li pou touletan soutenir nou.—Ps. 55:22. w23.04 14-15 ¶3-4

Zozef ek Mari ti obeir bann lotorite, mem kan sa ti bien difisil. (Lik 2:1-6) Anou gete seki nou kapav aprann ar zot lexanp. Mari ti ansint depi apepre nef mwa, kan li ek Zozef ti bizin fer enn kitsoz bien difisil. Lanperer Romin Ogis ti donn lord pou ki fer enn resansman. Akoz sa, Zozef ek Mari ti bizin retourn Betleem. Sa ti enn vwayaz apepre 150 kilomet, ek zot ti bizin travers bann kolinn. Sa ti bien difisil, sirtou pou Mari. Kitfwa zot ti trakase pou lasante Mari ek pou zot ti baba ki pa ti ankor ne. Sey mazine seki ti kapav arive si Mari ti akouse pandan sa vwayaz-la! Anplis, sa baba ki ti dan so vant la ti pou vinn Lemesi. Eski Zozef ek Mari ti servi sa kouma enn pretext pou ki zot pa obeir gouvernman Romin? Mem si Zozef ek Mari ti bien trakase, zot ti obeir lalwa gouvernman Romin. Ek Zeova ti beni zot lobeisans. Zot vwayaz ziska Betleem ti bien pase, Mari ti donn nesans enn baba ki ti an bonn sante, ek zot ti mem ede pou realiz enn profesi Labib.—Mish. 5:2. w23.10 8 ¶9, 11; 9 ¶12

Me ki to pou fer si to strese pou donn enn repons dan renion? To bizin prepar twa bien. (Prov. 21:5) Plis to konn size ki pou fer dan renion, plis to pou santi twa alez pou reponn. To kapav osi donn bann repons ki pa tro long. (Prov. 15:23; 17:27) To pou mwin strese si to donn enn ti repons. Kan to donn enn ti repons dan to prop mo, to montre ki to’nn bien prepar twa ek ki to’nn bien konpran size ki pe etidie. Me ki to pou fer si, apre ki to’nn swiv sa bann konsey-la, to touzour strese pou reponn plis? To kapav sir ki Zeova apresie bann zefor ki to’nn fer. (Lik 21:1-4) Zeova pa demann twa pou fer plis ki seki to kapav fer. (Fil. 4:5) Alor, reflesi lor seki to kapav fer, fer zefor pou fer li, ek priye pou ki to mwin strese. O-koumansman, kitfwa to pou kapav donn zis enn ti repons. w23.04 21 ¶6-8

Lapot Pol konpar nou ar bann solda ki lor zot gard ek ki abiye pou lager. Kan ena enn lager, enn solda bizin pare pou lager ninport ki moman. Li parey pou nou osi. Nou prepar nou pou zour Zeova kan nou met lafwa ek lamour kouma enn zile proteksion lor nou, ek kan nou met lesperans kouma enn elmet lor nou latet. Sa bann kalite-la bien itil pou nou. Parey kouma zile proteksion protez leker enn solda, lafwa ek lamour protez nou leker sinbolik. Sa bann kalite-la pou ed nou pou kontign servi Zeova ek pou kontign swiv Lekris. Gras-a lafwa, nou sir ki Zeova pou rekonpans tou bann ki rod Li ar tou zot leker. (Ebre 11:6) Lafwa pou motiv nou osi pou res fidel ar nou Sef Zezi, mem si nou gagn bann difikilte. Nou bizin ogmant nou lafwa pou nou kapav fer fas ar bann difikilte. Nou kapav fer sa kan nou reflesi lor lexanp bann fidel serviter Zeova dan nou lepok, ki pe res fidel anver Li malgre persekision ek bann difikilte ekonomik. Ek nou kapav osi evit tom dan piez materyalis kan nou swiv lexanp bann serviter Zeova ki’nn sinplifie zot lavi pou zot fer plis pou Rwayom Bondie. w23.06 10 ¶8-9

Kan nou ena kontrol lor noumem, savedir ki nou kapav kontrol nou bann santiman ek nou bann aksion. Sa kalite-la kapav ed nou realiz nou lobzektif sirtou si sa lobzektif-la li difisil pou fer ouswa si nou mank motivasion pou fer li. Pa bliye ki, kontrol lor noumem li form parti frwi lespri sin Bondie. Alor, demann Zeova so lespri sin pou to kapav devlop sa kalite ki bien inportan la. (Lik 11:13; Gal. 5:22, 23) Pa bizin atann bon moman. Dan sa lemond-la, si nou atann enn bon moman pou fer enn kitsoz, kitfwa zame nou pa pou reisi fer li. Alor, si nou atann ki tou korek dan nou lavi pou nou fixe enn lobzektif, kitfwa zame nou pa pou reisi realiz nou lobzektif. Nou kapav mank motivasion osi parski nou’nn fixe enn lobzektif ki difisil pou realize. Si to dan sa sitiasion-la, eski to kapav koumans par bann pli tipti lobzektif? Si to lobzektif se pou devlop enn kalite, kitfwa to kapav rod bann lokazion kot to kapav manifeste li. Si to lobzektif se pou lir Labib an-antie, kitfwa to kapav koumans par rezerv enn ti moman sak zour pou to lir Labib. w23.05 29 ¶11-13

Pandan bann dernie zour, Zeova pe servi so lorganizasion pou donn nou nou manze spiritiel, pou ki nou tou nou kapav kontign mars lor “Semin ki Sin.” (Iza. 35:8; 48:17; 60:17) Kan enn dimounn aksepte enn letid Labib, li gagn lokazion pou koumans mars lor “Semin ki Sin.” Sertin vwayaz enn ti moman lor sa semin-la ek apre zot kit li. Me ena lezot ki bien deside pou kontign mars lor sa semin-la ziska ki zot ariv zot destinasion. Ki sa destinasion-la sa? Pou bann ki ena lesperans pou viv dan lesiel, “Semin ki Sin” pou amenn zot dan “paradi Bondie” ki dan lesiel. (Rev. 2:7) Pou bann ki ena lesperans pou viv lor later, “Semin ki Sin” pou amenn zot ziska lafin Regn Mil An Zezi Kris, kot tou dimounn pou vinn parfe. Si to lor sa semin-la azordi, pa pans bann kitsoz ki to’nn kite deryer twa. Me sirtou, pa kit sa semin-la ziska ki to ariv dan lemond nouvo! Nou swet twa enn “bon vwayaz!” w23.05 17 ¶15; 19 ¶16-18

Kan to reflesi lor tou seki Zeova inn fer pou twa, sa pou ogmant to rekonesans anver Li. Ek plis to rekonesan anver Zeova, plis to pou anvi donn Li to lavi. (Ps. 116:12-14) Labib dir ki se Zeova ki donn “tou zoli don ek tou kado parfe.” (Zak 1:17) Pli zoli kado ki Li’nn donn nou se sakrifis so Garson, Zezi. Gras-a laranson, to kapav vinn pros ar Zeova ek to kapav viv pou touletan. (1 Zan 4:9, 10) Laranson se pli gran prev lamour ki Zeova inn donn nou! Alor, kan to donn to lavi Zeova, to montre ki to vremem rekonesan anver Li pou sa zoli kado-la ek osi pou tou bann lezot kitsoz ki Li’nn donn twa.—Det. 16:17; 2 Kor. 5:15. w24.03 5 ¶8

Kan nou reflesi lor bann prinsip moral ki bann dimounn ena azordi, nou ena mem santiman ki Lot. Lot “ti bien boulverse par kondwit devergonde bann dimounn ki ti dezobeir Lalwa,” parski li ti kone ki Zeova deteste bann move kondwit. (2 Pier 2:7, 8) Lot ti kontan Bondie ek li ti ena enn gran respe pou Li. Akoz sa, li ti deteste kondwit bann dimounn ki ti ena otour li. Nou osi nou antoure ar bann dimounn ki pa respekte bann prinsip moral Bondie. Selman, si nou kontign kontan Zeova ek nou ena enn gran respe pou Li, nou pou ena enn bon kondwit moral. Zeova ed nou pou ena bann bon prinsip moral gras-a bann konsey ki ena dan liv Proverb. Tou bann Kretien, ki zot zenn ouswa vie, kapav gagn bann bienfe gras-a bann bon konsey ki ena dan sa liv-la. Kan nou ena enn gran respe pou Zeova, nou pa fer kamarad ar bann dimounn ki ena enn move kondwit. w23.06 20 ¶1-2; 21 ¶5

Eski to’nn gagn persekision ar to fami? Ouswa, eski to’nn fer sertin sakrifis pou to kapav met Rwayom Bondie an premie dan to lavi? (Mat. 6:33) Si wi, to kapav sir ki Zeova inn trouv tou seki to’nn fer pou Li. (Ebre 6:10) Ek sirman to’nn trouv sa bann parol Zezi la realize: “Pena personn ki’nn kit lakaz, frer, ser, mama, papa, zanfan, ouswa karo akoz mwa ek akoz bon nouvel ki pa pou gagn 100 fwa plis dan sa lepok-la, lakaz, frer, ser, mama, zanfan, ek karo, avek so persekision, ek dan lemond ki pe vini lavi pou touletan.” (Mark 10:29, 30) Sirman to pou dakor ki bann benediksion ki to’nn gagne, zot boukou plis ki bann sakrifis ki to’nn fer.—Ps. 37:4. w24.03 9 ¶5

Kan ti ena enn gran lafaminn dan Zide, bann frer ek ser dan lasanble Antios “ti deside, sakenn dapre seki li kapav, pou avoy bann sekour pou bann frer ki ti res dan Zide.” (Zist. 11:27-30) Mem si zot bann frer ek ser dan Zide ti res bien lwin, bann Kretien dan Antios ti bien deside pou ed zot. (1 Zan 3:17, 18) Azordi, kan nou aprann ki nou bann frer ek ser pe soufer akoz enn katastrof, nou osi nou kapav montre konpasion. Par exanp, nou kapav demann bann ansien seki nou kapav fer pou ede, nou kapav fer bann kontribision pou nou laktivite, ouswa nou kapav priye pou bann ki afekte par sa katastrof-la. Nou bann frer ek ser kitfwa pou bizin nou led osi pou gagn bann kitsoz ki zot bizin pou viv. Kan nou Lerwa Zezi Kris, pou ziz bann dimounn, nou anvi ki li trouve ki nou ena konpasion. Lerla, li pou invit nou pou “erit Rwayom.”—Mat. 25:34-40. w23.07 4 ¶9-10, 12

Parey kouma so Papa, Zezi osi rezonab. Zezi ti vinn lor later pou pres ar “bann mouton perdi dan nasion Izrael,” ek li ti rezonab kan li ti fer sa. Enn fwa, enn madam ki pa ti enn Zwif ti sipliy Zezi pou geri so tifi ki ti pe “extra soufer parski li [ti] posede par enn demon.” Zezi ti montre ki li ti ena konpasion kan li ti geri sa tifi-la. (Mat. 15:21-28) Anou get enn lot lexanp. Kan li ti lor later, Zezi ti dir: ‘Tou dimounn ki dir ki li pa mo disip, mwa osi mo pou dir ki li pa mo disip.’ (Mat. 10:33) Me kan Pier trwa fwa ti dir ki li pa konn Zezi, eski Zezi ti rezet li? Non. Zezi ti trouv lafwa Pier, ek li ti trouve ki Pier ti repanti. Apre so rezireksion, Zezi ti aparet ar Pier ek li ti montre Pier ki li kontan li ek ki li’nn pardonn li. (Lik 24:33, 34) Nou’nn trouve ki Zeova ek Zezi rezonab. Me ki nou kapav dir lor nou-mem? Zeova anvi ki nou rezonab. w23.07 21 ¶6-7

Kifer nou sir ki later pou vinn enn paradi. Ki nou kapav dir bann dimounn pou fer zot konpran ki sa pou vremem arive? Premierman, se Zeova Limem ki fer sa promes-la. Liv Revelasion dir: “Sa Kikenn ki ti pe asize lor tronn la ti dir: ‘Gete! Mo pe fer tou kitsoz nouvo.’” Zeova Li ena sazes, pwisans, ek dezir pou tini sa promes-la. Deziemman, Zeova telman sir ki so promes pou realize, ki pou Li se koumadir li’nn fini realize. Se akoz sa ki Li dir: “Sa bann parol-la zot fidel ek vre. . . . Zot inn fini akonpli!” Ek trwaziemman, kan Zeova koumans enn kitsoz, Li terminn li. Se pou sa rezon-la ki Li dir: “Momem Alfa ek Omega.” (Rev. 21:6) Alafin, Zeova pou montre ki Satan enn manter ek ki li pa kapav anpes Li realiz So proze. Alor, si enn dimounn dir twa, “Se enn zoli promes, me mo pa krwar ki sa pou arive,” lir ek explik li Revelasion 21:5, 6. Ek montre li ki se Zeova Limem ki donn enn garanti ki So promes pou realize.—Iza. 65:16. w23.11 7 ¶18-19

Zeova ti fer sa promes-la Abraam, kan li ti ena 75 an ek ki li pa ti ankor ena zanfan. Eski Abraam inn trouv sa promes-la realize? Li’nn trouv enn parti realize, me li pa’nn trouv promes-la realiz net. Apre ki li’nn travers larivier Efrat ek ki li’nn atann pandan 25 an, Abraam ti trouv nesans so garson Izaak, ki ti ne gras-a enn mirak. Ek 60 an plitar, li’nn osi trouv nesans so bann ti-zanfan, Ezai ek Zakob. (Ebre 6:15) Me Abraam pa’nn trouv so bann desandan vinn enn gran nasion, ek li pa’nn trouv zot rant dan Later Promiz. Selman, sa zom fidel la ti ena enn bon lamitie ar Zeova. (Zak 2:23) Ek kan li pou resisite, li pou bien kontan pou aprann ki, gras-a so lafwa ek so pasians, tou bann nasion inn gagn bann benediksion! (Zen. 22:18) Ki leson nou aprann? Kitfwa azordi nou pa pe trouv tou bann promes Zeova realize. Selman, si nou ena pasians parey kouma Abraam, nou kapav sir ki Zeova pou rekonpans nou depi aster-la mem, ek ki Li pou rekonpans nou plis ankor kan nou pou dan lemond nouvo.—Mark 10:29, 30. w23.08 24 ¶14

Lerwa Ozias ti ena limilite kan li ti zenn. Li ti aprann “pou ena enn gran respe pou vre Bondie.” Li ti viv ziska laz 68 an, ek pandan enn bon parti so lavi, Zeova ti beni li. (2 Kro. 26:1-4) Ozias ti gagn laviktwar lor boukou lennmi, ek li ti ranforsi defans lavil Zerizalem. (2 Kro. 26:6-15) Sirman Ozias ti bien kontan ki Zeova ti ed li pou fer tousala. (Ekle. 3:12, 13) Lerwa Ozias ti abitie dir lezot seki zot bizin fer. Kitfwa sa ti donn li linpresion ki li ti kapav fer seki li anvi. Enn zour, Ozias ti montre ki li ti ena lorgey kan li ti rant dan tanp ek li ti esey bril lansan lor lotel. Bann lerwa pa ti gagn drwa fer sa. (2 Kro. 26:16-18) Gran Pret Azarya ti esey aret li, me Ozias ti bien ankoler. Ozias pa ti res fidel ar Zeova, ek Zeova ti pini li kan Li ti fer li gagn lalep. (2 Kro. 26:19-21) Sey mazine kouma lavi Ozias ti pou ete si li ti kontign ena limilite! w23.09 10 ¶9-10

Mem apre ki li ti gagn lesperans pou al dan lesiel, lapot Pier ti bizin kontign lit kont so bann febles. Lane 36 Nou Lepok, Pier ti la kan Korney, enn non-Zwif, ti gagn lespri sin. Sa ti montre ki “Bondie pa fer preferans,” ek ki bann non-Zwif ti kapav form parti dan lasanble Kretien. (Zist. 10:34, 44, 45) Akoz sa, Pier ti santi li alez pou manz ar bann non-Zwif, enn kitsoz ki zame li pa ti pou fer avan. Selman, sertin Kretien Zwif pa ti dakor ki bann Zwif ek bann non-Zwif manz ansam. Kan sertin parmi zot ti ariv Antios, Pier ti aret manz ar so bann frer non-Zwif, kitfwa parski li ti per pou ofans bann Kretien zwif. Lapot Pol ti trouv seki Pier ti fer ek li ti koriz li devan tou dimounn. (Gal. 2:13, 14) Mem si li ti fer sa erer-la, Pier ti kontign persevere. w23.09 22 ¶8

To bizin onet ar tomem, ek to bizin gete ki kitsoz to kapav ameliore. Fode pa to dekouraze. Pa bliye ki “Lesegner li bon,” ek Li pou ed twa pou ameliore. (1 Pier 2:3) Lapot Pier donn nou sa lasirans-la: “Bondie . . . limem li pou fini zot formasion. Li pou fer zot vinn ferm.” O-koumansman, Pier pa ti santi li dign pou li ansam ar Zezi. (Lik 5:8) Me avek led Zeova ek Zezi, Pier ti persevere, ek li ti kontign swiv Zezi avek fidelite. Akoz sa, Zeova ti les Pier rant “dan Rwayom eternel nou Segner ek Sover Zezi Kris.” (2 Pier 1:11) Se enn rekonpans extraordiner, pa vre! Si to kontign persevere parey kouma Pier, ek to les Zeova form twa, twa osi to pou gagn lavi eternel. To pou gagn ‘rekonpans pou to lafwa, setadir to delivrans.’—1 Pier 1:9. w23.09 31 ¶16-17

Otour tabernak, ti ena enn gran lakour ki ti antoure ar enn baraz. Se dan sa lakour-la ki bann pret ti fer zot travay. Dan lakour-la, ti ena enn gran lotel an kwiv pou bann sakrifis ki bril net, ek osi enn gran basin an kwiv. Bann pret ti servi sa basin delo la pou zot lav zot avan ki zot fer zot bann travay sakre. (Ex. 30:17-20; 40:6-8) Azordi, bann Kretien ki ena lesperans pou al dan lesiel servi Zeova avek fidelite dan lakour andan, ki dan tanp spiritiel Bondie. Sa gran basin delo la rapel zot, ek tou bann Kretien osi, linportans pou res prop lor plan moral ek spiritiel. Me kotsa “gran lafoul,” ki pe soutenir bann frer Zezi Kris, pe ador Zeova? Dan vizion ki lapot Zan ti gagne, li ti trouv zot pe “debout devan tronn” ek “zot pe donn [Bondie] enn servis sakre lanwit-lizour dan so tanp.” (Rev. 7:9, 13-15) Sa servis sakre la, zot pe fer sa lor later, dan lakour andeor tanp spiritiel Bondie. Nou bien rekonesan ki Zeova inn donn nou posibilite pou ador Li dan so gran tanp spiritiel! w23.10 28 ¶15-16

Zeova servi bann ansien pou donn nou lafors. (Iza. 32:1, 2) Alor, si ena enn kitsoz ki pe trakas twa, fer bann ansien kone. Ek kan zot ed twa, aksepte zot led parski Zeova kapav servi zot pou donn twa lafors. Ki nou ena lesperans pou viv pou touletan dan lesiel, ouswa ki nou ena lesperans pou viv lor later ki pou vinn enn paradi, bann promes ki ena dan Labib kapav donn nou lafors. (Rom. 4:3, 18, 19) Nou lesperans kapav donn nou lafors pou andir bann difikilte, pou pres bon nouvel, ek pou asim nou bann responsabilite dan lasanble. (1 Tes. 1:3) Se sa lesperans-la mem ki ti donn lapot Pol lafors. Dan let ki li ti ekrir bann Korintien, li ti konpar limem ar enn resipian later. Li ti gagn “bann gran presion,” li pa ti “kone ki pou fer,” ek li ti “gagn persekision.” So lavi ti an danze. (2 Kor. 4:8-10) Pol ti gagn lafors pou andire parski li ti res konsantre lor so lesperans. (2 Kor. 4:16-18) Pol ti res konsantre lor so lesperans pou al viv dan lesiel. Li ti reflesi lor so lesperans, ek sa ti donn li lafors pou andire. w23.10 15-16 ¶14-17

Kan to priye, demann tomem si se bon moman pou ki Zeova reponn to lapriyer. Parfwa, nou kapav panse ki Zeova bizin reponn nou deswit kan nou priye Li. Selman, Zeova kone ki pli bon moman pou ed nou. (Ebre 4:16) Kan nou pa gagn enn repons deswit pou nou lapriyer, kitfwa nou panse ki Li pa pou reponn nou lapriyer. Me kitfwa pankor ariv ler pou Li reponn nou lapriyer. Par exanp, enn zenn frer ti priye Zeova pou ki li geri. Me so lasante pa ti ameliore. Si Zeova ti fer enn mirak pou geri li, Satan ti kapav dir ki frer-la pe kontign servi Zeova zis parski Li’nn geri li. (Zob 1:9-11; 2:4) Anplis, Zeova inn fini fixe enn moman kot Li pou geri tou bann maladi. (Iza. 33:24; Rev. 21:3, 4) Me ziska ki sa moman-la arive, Zeova pa pou fer enn mirak pou geri nou. Alor, pou ki kitsoz sa zenn frer-la ti kapav priye Zeova? Li ti kapav demann Zeova lafors ek lape lespri, pou ki li kapav andir so maladi ek kontign servi Zeova avek fidelite. w23.11 23 ¶13

Sanson ti fer enn erer bien grav. Selman, li pa ti aret servi Zeova. Li ti kontign rod enn lokazion pou fer mision ki Zeova ti donn li, setadir pou lager kont bann Filistin. (Ziz 16:28-30) Sanson ti sipliy Zeova, ek li ti dir: “Les mo tir vanzans kont bann Filistin.” Lerla, Bondie ti reponn so lapriyer ek ti redonn li enn lafors extraordiner. Gras-a sa, Sanson ti “touy pli boukou dimounn kan li’nn mor, ki kan li ti vivan.” Mem si Sanson ti bien soufer akoz erer ki li ti fer, li pa ti aret fer volonte Zeova. Nou osi parey, si nou fer enn erer ek ki nou gagn enn disiplinn, ouswa si nou perdi enn privilez, fode pa nou aret servi Zeova. Pa bliye ki Zeova anvi pardonn nou. (Ps. 103:8, 9) Malgre nou bann erer, Zeova kapav donn nou lafors pou fer so volonte, parey kouma li ti fer ar Sanson. w23.09 6 ¶15-16

Kan nou andire, nou gagn faver Zeova. Me sa pa vedir ki Zeova kontan kan nou gagn bann leprev. Li kontan kan nou andire avek fidelite. Sa bien ankouraz nou kan nou kone ki, kan nou andir bann leprev, nou fer leker Zeova kontan! (Ps. 5:12) Abraam osi ti gagn bann leprev, ek kan li ti andir zot avek fidelite, sa ti fer Zeova plezir. Akoz sa, Zeova ti konsider li kouma enn kikenn ki drwat, ek Li ti dir ki Abraam ti so kamarad. (Zen. 15:6; Rom. 4:13, 22) Nou osi nou kapav vinn enn kikenn ki drwat devan lizie Zeova ek vinn so kamarad. Pou nou gagn faver Zeova, sa pa depann lor kantite kitsoz ki nou fer pou servi Li, ouswa lor bann privilez ki nou ena. Li donn nou so faver parski nou andir nou bann leprev ar fidelite. Ninport ki laz nou ena, ninport ki kapasite nou ena, ek dan ninport ki sitiasion nou ete, nou tou nou kapav andire. Eski to pe andir enn leprev ek to pe res fidel ar Zeova? Si wi, to kapav sir ki to ena faver Zeova. Kan nou kone ki nou pe fer Zeova plezir, sa fer nou ena plis konfians dan bann promes ki Li’nn fer nou, ek sa fer nou lesperans vinn pli vre. w23.12 11 ¶13-14

Enn frer bizin aprann kominik bien. Enn kikenn ki kominik bien, li ekout lezot ek li konpran zot santiman. (Prov. 20:5) Li kapav osi aprann pou konpran lezot gras-a ton zot lavwa, lexpresion zot figir, ek bann zes ki zot fer. Pou to reisi aprann tousala, to bizin pas letan ar lezot. Si to touletan kominik ar lezot par mail ouswa par mesaz, kitfwa li pou difisil pou to kominik bien avek bann dimounn kan zot fas-a-fas ar twa. Alor, rod bann lokazion ek fer zefor pou kominik avek lezot fas-a-fas. (2 Zan 12) Pou to vinn enn frer ki ena matirite, to bizin kapav pran tomem swin ek osi okip to fami. (1 Tim. 5:8). Li enn lavantaz si to aprann enn metie ki pou ed twa gagn enn travay. (Zist. 18:2, 3; 20:34; Efe. 4:28) Aprann travay dir, ek fini tou travay ki to koumanse. Lezot pou remark sa ek zot pou kone ki to enn kikenn ki serye. Lerla, to pou ena plis sans pou gagn enn travay ek pou gard travay-la. w23.12 27 ¶12-13

Dan Labib, “zour Zeova” se moman kot Zeova detrir so bann lennmi ek Li sov so pep. Dan lepase, Zeova ti detrir plizir nasion. (Iza. 13:1, 6; Eze. 13:5; Sof. 1:8) Dan nou lepok, “zour Zeova” pou koumanse kan bann dirizan politik pou detrir Gran Babilonn ek sa pou fini ar lager Armagedon. Pou nou reisi travers sa zour-la vivan, nou bizin prepar nou depi aster-la mem. Zezi inn ansegn nou ki nou “bizin pare” pou “gran soufrans,” savedir ki nou bizin kontign prepar nou pou sa zour-la. (Mat. 24:21; Lik 12:40) Dan premie let ki li ti ekrir bann Tesalonisien, lapot Pol ti servi plizir lexanp pou ed bann Kretien pou zot prepar zot pou zour Zeova. Pol ti kone ki zour Zeova pa ti pou vinn deswit. (2 Tes. 2:1-3) Kanmem sa, li ti ankouraz so bann frer ek ser pou prepar zot pou sa zour-la, koumadir zour-la ti pou vini dime. Nou osi nou kapav swiv konsey lapot Pol. w23.06 8 ¶1-2

An 1978, dan lavil Tokyo dan Zapon, ti aranz enn gran batiman 60 letaz. Bann dimounn ti pe demann zotmem si sa batiman-la ti pou tini, parski souvan gagn bann tranbleman-de-ter dan zot pei. Ki bann inzenier ti fer pou ki sa batiman-la reziste kont bann tranbleman-de-ter? Zot ti fer an-sort ki batiman-la li solid ek anmemtan flexib. Lerla, li ti pou kapav reziste bann tranbleman-de-ter. Bann Kretien bizin kouma sa batiman-la. Dan ki fason? Enn Kretien bizin ekilibre, setadir li bizin solid ek flexib toule-de. Li bizin ferm ek solid, kan sa konsern bann lalwa ek bann prinsip Zeova. Li bizin “dispoze pou obeir” bann lalwa Zeova, mem kan sa difisil. Me enn Kretien bizin flexib osi, setadir “rezonab” dan bann sitiasion kot pena okenn prinsip Labib ki inplike. (Zak 3:17) Enn Kretien ki ekilibre, li pa pou tro strik ek li pa pou tro mou. w23.07 14 ¶1-2

Zezi ti bizin reziste kont bann tantasion ki Satan ti met devan li. Enn fwa, Satan ti mem dir li aret servi Zeova. (Mat. 4:1-11) Satan ti bien deside pou fer Zezi fer pese kont Zeova. Lerla, li pa ti pou kapav donn so lavi kouma enn ranson. Kan li’nn koumans so servis pou Zeova, Zezi inn gagn bann lezot leprev. So bann lennmi ti persekit li ek zot ti esey touy li. (Lik 4:28, 29; 13:31) Li ti bizin siport bann defo ek bann erer ki so bann disip ti fer. (Mark 9:33, 34) Kan li ti pas devan lakour, bann dimounn ti tortir li ek boufonn li. Zezi ti bien soufer ek li ti gagn enn vilin lamor. (Ebre 12:1-3) Anplis, avan so lamor, Zezi ti bizin andir tou sa bann leprev-la li tousel, parski Zeova ti tir So proteksion lor li. (Mat. 27:46) Zezi inn bien soufer pou li kapav donn so lavi kouma enn ranson. Kan nou reflesi ki kantite Zezi inn soufer pou nou, eski sa pa ogmant nou lamour pou li? w24.01 10-11 ¶7-9

Nou bizin ena pasians si nou anvi ena enn bon relasion ar lezot. Enn kikenn ki ena pasians, li ekoute kan lezot koze. (Zak 1:19) Pasians ede osi pou ki ena lape. Si nou ena pasians, nou pa pou azir brit, ek nou pa pou dir bann move kitsoz kan nou strese. Kan nou ena pasians, nou pa ankoler vit kan lezot bles nou, ek nou pa rod tir vanzans. Okontrer, nou ‘kontign siport sakenn nou kamarad ek pardonn sakenn nou kamarad avek tou nou leker.’ (Kol. 3:12, 13) Pasians pou osi ed nou pou pran bann pli bon desizion. Olie ki nou azir vit ouswa brit, nou pou reflesi lor bann swa ki nou ena, pou ki nou kapav pran enn pli bon desizion. Par exanp, si nou pe rod enn travay, kitfwa nou pou aksepte premie travay ki nou gagne. Parkont, si nou ena pasians, nou pou pran letan pou reflesi lor ki lefe sa travay-la pou ena lor nou fami ek lor nou lamitie ar Zeova. Nou pou evit pran bann move desizion kan nou ena pasians. w23.08 22 ¶8-9

Si to dekouraze parski to pe bizin kontign lit kont to bann move dezir, kan to reflesi lor promes ki to’nn fer Zeova kan to’nn donn Li to lavi, sa kapav ed twa pou fer fas ar ninport ki tantasion. Kifer nou dir sa? Kan to donn to lavi Zeova, to aret viv pou tomem. Savedir ki to’nn rezet bann dezir ek bann lobzektif personel ki pa fer Zeova plezir. (Mat. 16:24) Lerla, kan to gagn enn tantasion ouswa enn leprev, to pa bizin demann tomem seki to bizin fer. To deza kone seki to bizin fer! To bizin res fidel ar Zeova, ek akoz sa, to pou fer tou seki to kapav pou fer Li plezir. To pou koumadir Zob! Mem si li ti gagn bann gro difikilte, Zob ti bien deside pou fer Zeova plezir. Li ti dir: “Mo pou kontign res fidel ar Bondie!”—Zob 27:5. w24.03 9 ¶6-7

Zeova, nou “Bondie lamour,” Li avek nou! (2 Kor. 13:11) Li interese ar sakenn parmi nou. Nou sir ki nou “proteze par so lamour infini.” (Ps. 32:10) Plis nou reflesi lor kouma Li’nn montre so lamour pou nou, plis nou pou trouve kouma Li pran nou swin, ek plis nou pou vinn pros ar Li. Nou kapav priye Zeova komie fwa nou anvi, pou dir Li ki nou bien bizin so lamour. Nou kapav zet tou nou bann traka lor Li, parski nou sir ki Li konpran nou ek ki Li anvi ed nou. (Ps. 145:19) Zeova so lamour atir nou, parey kouma saler enn dife atir bann dimounn enn lanwit kot fer bien fre. Zeova bien kontan nou; Li ena boukou lafeksion ek tandres pou nou. Alor, anou aksepte so lamour dan nou lavi, ek anou dir ar tou nou leker: “Mo kontan Zeova”!—Ps. 116:1. w24.01 31 ¶19-20

Zezi pa ti zis dir bann dimounn ki nom Bondie se Zeova. Bann dimounn ki Zezi ti ansegne, ti bann Zwif ek zot ti deza konn nom Bondie. Selman, Zezi ti fer boukou zefor pou fer zot “konn” Zeova pli bien. (Zan 1:17, 18) Par exanp, bann Lekritir Ebre montre ki Zeova Li pre pou pardone ek Li ranpli ar konpasion. (Ex. 34:5-7) Me pou ed bann dimounn konpran sa pli bien, Zezi ti servi lexanp sa garson ki ti perdi la. Dan sa lexanp-la, nou trouve kouma sa papa-la ti galoupe pou al zwenn so garson “letan li ti ankor bien lwin.” Kan li ti zwenn li, li ti may li ek li ti pardonn li ar tou so leker. Sa lexanp-la montre nou kouma Zeova ete; Li enn Bondie ki pre pou pardone ek ki ena boukou konpasion. (Lik 15:11-32) Zezi ti ed lezot pou konpran ki kalite Bondie so Papa ete. w24.02 10 ¶8-9

Zeova rafresi ek rekonfort bann ki dan difikilte. Kouma nou kapav swiv lexanp Zeova kan nou montre konpasion ek nou rekonfort lezot? Enn fason nou fer sa, se kan nou devlop bann lezot kalite ki pou ed nou pou ena konpasion ek pou rekonfort lezot. Anou get sertin parmi sa bann kalite-la. Ki kitsoz pou ed nou pou kontign kontan ek ‘kontign rekonfort sakenn nou kamarad’ sak zour? (1 Tes. 4:18) Nou bizin devlop bann kalite kouma lafeksion fraternel ek zantiyes. Ek kan enn kikenn soufer, nou osi nou “soufer ansam” ar li. (Kol. 3:12; 1 Pier 3:8) Kouma sa bann kalite-la kapav ed nou? Kan nou ena konpasion pou lezot ek ki nou vremem gagn zot traka, sa pou pous nou pou rekonfort zot kan zot pe soufer. Zezi ti explik sa kan li ti dir: “Parol ki sorti dan labous enn dimounn montre ar ki kitsoz so leker ranpli. Enn bon dimounn dir bann bon kitsoz parski so leker ranpli ar bann bon kitsoz.” (Mat. 12:34, 35) Alor, enn parmi bann meyer fason ki nou montre ki nou kontan nou bann frer ek ser, se kan nou rekonfort zot kan zot dan difikilte. w23.11 10 ¶10-11

Nou bizin rod led pou konpran bann profesi ki ena dan Labib. Anou pran enn lexanp. Fer koumadir to pe vizit enn landrwa ki to pa konn ditou, me to ena enn kamarad avek twa ki konn landrwa-la bien. Li kone exakteman kotsa zot ete, ek li kone osi ki sime zot bizin pran. Sirman to bien kontan ki sa kamarad-la inn vinn avek twa, pa vre! Zeova Li koumadir sa kamarad-la. Li konn lavenir! Alor, pou nou konpran bann profesi ki ena dan Labib, nou bizin demann Li so led. (Dan. 2:28; 2 Pier 1:19, 20) Parey kouma ninport ki bon paran, Zeova anvi ki so bann zanfan ena enn zoli lavenir. (Zer. 29:11) Selman, nou bann paran pa konn lavenir. Me Zeova kone seki pou arive dan lavenir, ek Li touletan ena rezon! Dan Labib, Li’nn fer ekrir bann profesi pou nou kapav konn bann levennman inportan ki pou arive dan lavenir.—Iza. 46:10. w23.08 8 ¶3-4