Ki été la foi?

KI DEFINITION ou pou donné pou la foi? Certain dire ki la foi c’est zis enn croyance aveugle. Enn grand ecrivain ek journaliste américain Henry Louis Mencken ti dire enn fois ki la foi “c’est croire sans okenn logik ki enn kitsoz ki pena chance arrivé, pou realisé.”

Mais la Bible li, li pa decrire la foi ni couma enn croyance aveugle ni couma enn kitsoz ki pena okenn logik. Parole Bondié dire: “La foi c’est kan nou sur ki seki nou pé attann pou arrivé, li enn preuve sur ki bann kitsoz ki pourtant nou pa trouvé, zot enn realité.”—Hébreux 11:1.

Parski bann dimoune ena different l’idée lor la foi, anou guette reponse sa bann question ki suive-la:

• Couma definition ki la Bible donné li different ar seki beaucoup dimoune dire kan zot koz lor la foi?

• Kifer eski li important ki nou cultive sa la foi ki la Bible decrire-la?

• Couma ou kapav developpe enn la foi solide?

Enn contrat ek enn preuve solide

Dan lepok ki finn ecrire livre Hébreux, souvent ti servi terme grec ki ti traduire mot ‘sur pou arrivé.’ Souvent ti servi sa terme-la dan bann document commercial ek sa ti enn garantie ki enn dimoune pou possede enn kitsoz dan l’avenir. Alors, enn livre reference propose ki traduire Hébreux 11:1 coumsa: “La foi li enn contrat pou bann kitsoz ki nou pé attann.”

Si ou finn deja acheté enn kitsoz ar enn compagnie ki ena enn bon reputation ek apré ou finn attann ki livré ou sa kitsoz-la, ou finn montré sa qualité la foi-la. Reçu ki ou’nn gagné donne ou raison pou ena la foi dan sa compagnie kot ou finn acheté sa kitsoz-la. Dan enn sens, sa reçu-la li ti ou contrat ou-soit enn garantie ki ou pou gagne seki ou finn acheté. Si ou finn perdi sa reçu-la ou-soit si ou’nn jette li, ou ti pou’nn perdi preuve ki c’est ou ki proprietaire sa kitsoz-la. Li pareil pou bann ki ena la foi ki Bondié pou realise so bann promesse. Zot ena enn garantie ki zot pou gagne seki zot pé attann. Mais, bann ki pena la foi ou-soit ki perdi zot la foi, zot pena droit pou gagne bann kitsoz ki Bondié inn promette.—Jacques 1:5-8.

Deuxieme expression ki nou trouvé dan Hébreux 11:1, dire ki la foi li enn “preuve sur,” setadir li donne bann preuve ki contraire ar bann kitsoz ki zis parette vrai. Par exemple, nou ena l‘impression ki soleil li tourne autour la terre—li leve dan coté l’est, li bougé dan le ciel, ek li al couché dan coté l’ouest. Mais, l’astronomie ek bann calcule mathematik faire nou koné ki la terre li pa trouve dan centre nou systeme solaire. Enn fois ki ou finn konn sa preuve-la ek ou accepté li couma enn verité, ou ena la foi ki c’est la terre ki tourne autour soleil—mem si c’est pa sa ki nou lizié trouvé. Ou la foi li pa aveugle. Au contraire, li permette ou trouve bann kitsoz couma zot été vrai-mem, pa zis couma nou trouve zot devant nou lizié.

Kifer li important pou ena enn la foi solide?

C’est sa qualité la foi-la ki la Bible encourage nou pou ena—enn la foi solide ki basé lor bann preuve ki sur, mem si nou bizin faire bann changement dan seki nou croire. Sa qualité la foi-la li bien important. L’apotre Paul ti ecrire: “Sans la foi personne pa kapav faire Bondié plaisir. Enn kikenn ki vinn vers Bondié bizin croire ki Bondié existé ek ki li recompense bann ki vrai-mem rod Li.”—Hébreux 11:6, Bible en français courant.

Li pa toujours facile pou developpe enn la foi solide. Mais si ou mette en pratik sa quatre point ki pou examiné lor bann page ki suive-la, ou pou kapav reussi.