1 Aprann faire la Bible confiance

“Tou l’Ecriture finn inspiré par Bondié, ek li utile pou enseigné, pou corrigé, pou mette bann kitsoz en ordre.”—2 Timothée 3:16.

KIFER LI DIFFICILE? Beaucoup croire ki la Bible li zis enn livre kot ena sagesse bann dimoune. Certain croire ki bann renseignement historik ki ena ladan zot pa exact. Lezot pretann ki pa kapav suive bann conseil ki ena dan la Bible parski zot nepli pratik pou nou lepok.

COUMA OU KAPAV SURMONTE SA DIFFICULTÉ-LA? Souvent, bann dimoune pena confiance dan la Bible ou-soit zot pensé ki la Bible pena okenn valeur pratik parski zot pa finn examine sa livre-la par zot-mem. Zot zis repete seki lezot dire. Mais, la Bible donne sa l’avertissement-la: “Enn kikenn ki mank l’experience, croire tou seki li tendé, mais enn dimoune ki ena enn bon jugement, faire attention kot li mette so lipié.”—Proverbes 14:15.

Au lieu ki nou zis croire dan enn fason aveugle seki lezot dire, kifer nou pa imite l’exemple bann premier chretien ki ti vive dan Bérée, azordi li nord la Grèce? Zot pa ti accepté coumsa-mem seki lezot ti dire. Au contraire, zot ti ena reputation pou “examine bann l’Ecriture en profondeur toulé-jour pou guetté si sa bann kitsoz-la ti exact.” (Actes 17:11) Pou enn ti moment anou guette deux raison kifer ou kapav ena confiance ki la Bible c’est Parole ki finn inspiré par Bondié.

Bann recit historik ki ena dan la Bible zot exact. Pendant bann l’année ki finn passé, bann dimoune finn dire—ek encore pé dire ki zot ena doute concernant bann nom ek bann place ki’nn mentionné dan la Bible. Mais, chaque fois bann preuve inn montré ki sa bann doute-la, zot pa fondé ek ki nou kapav faire confiance bann recit ki ena dan la Bible.

Par exemple, ti ena enn moment kot bann bibliste ti pé douté ki le roi assyrien Sargon ki mentionné dan Isaïe 20:1, ti vrai-mem existé. Mais, dan bann l’année 1840, bann archeologue inn commence deterre palais sa le roi-la. Azordi, Sargon li enn parmi bann le roi assyrien ki bann dimoune pli koné.

Certain ki critik la Bible ti demandé si Ponce Pilate, sa gouverneur romain ki ti donne l’ordre pou condamne Jésus-la, ti vrai-mem existé. (Matthieu 27:1, 22-24) Mais en 1961, ti decouvert enn roche pré kot la ville Césarée en Israël ek lor la ti ena Pilate so nom ek position ki li ti ena.

Pou montré ki bann recit historik ki ena dan la Bible zot exact, journal U.S.News & World Report ki ti publié le 25 octobre 1999, ti dire: “Dan enn fason extraordinaire, bann recherche archeologik moderne finn confirmé ki bann partie important ki ena dan Ancien ek Nouveau Testament zot exact lor plan historik—zot confirme bann partie important lor zistoire bann grand chef famille dan nation Israël, lor l’Exode, setadir kan bann Israélite ti sorti l’Égypte, lor regne David ek concernant fason ki la vie ti été dan lepok Jésus.” Mem si la foi dan la Bible li pa depann lor bann decouverte ki bann archeologue faire, mais c’est sa bann qualité preuve historik exact-la ki nou attann ki enn livre ki finn inspiré par Bondié donne nou.

Sagesse pratik ki ena dan la Bible li profitable pou tou qualité dimoune. Bien longtemps avant ki ti decouvert bann microbe ek role ki zot ena pou transmette bann maladie, la Bible ti donne bann conseil lor la propté ki encore toujours utile ek important azordi. (Lévitique 11:32-40; Deutéronome 23:12, 13) Kan bann membre enn famille applik bann conseil la Bible lor fason ki zot bizin traite zot camarade, zot pli heureux. (Éphésiens 5:28–6:4) Enn dimoune ki vive en accord avek bann principe la Bible vinn enn pli bon travailleur ou-soit enn patron ki pli raisonnable. (Éphésiens 4:28; 6:5-9) Kan enn kikenn applik bann principe la Bible sa li aussi profitable lor plan emotionnel. (Proverbes 14:30; Éphésiens 4:31, 32; Colossiens 3:8-10) C’est sa bann conseil pratik-la ki nou attann ki nou Createur donne nou.

KI BENEDICTION OU POU GAGNÉ? Sagesse ki ena dan la Bible kapav mem faire enn dimoune ki pena l’experience vinn sage. (Psaume 19:7) En plus, enn fois ki nou’nn gagne confiance dan la Bible, plus ki n’importe ki livre, li kapav aide nou pou passe lor deuxieme l’etape ek gagne enn la foi pli solide.

Pou gagne plus renseignement, guette chapitre 2, “La Bible—Enn livre ki Bondié inn donné,” dan livre Ki la Bible enseigné vrai-mem?a

[Note]