Kan Ou Ena enn Maladi Bien Grav

“Kan mo ti aprann ki mo ti ena enn kanser poumon ek enn kanser kolon, mo ti sir ki mo ti pou mor. Me kan mo ti sorti kot dokter ek ki mo ti retourn lakaz, mo ti dir ar momem, ‘Bon, se pa seki mo ti pe panse, me mo bizin trouv enn fason pou fer fas ar sa sitiasion-la.’”—Linda, 71 an.

“Mo maladi afekte bann ner ki dan kote gos mo figir ek sa fer mwa bien soufer. Ena fwa, sa douler-la ti fer mwa tom dan depresion. Ek bien souvan, mo santi mwa tousel ek mo’nn mem pans pou swisid mwa.”—Elise, 49 an.

Enn misie ki malad ek ki dan enn fotey roulant, antoure avek bann dimounn ki kontan li

SI OU ouswa enn kikenn ki ou kontan ena enn maladi ki bien grav, ou kone kouma sa kapav bien difisil. Ou bizin fer fas ar maladi-la, me ou bizin osi lit kont bann santiman negatif. Bann randevou kot dokter, bann difikilte pou gagn ouswa pou pey enn tretman, ouswa lefe segonder bann konprime kapav fer ou plis strese, trakase, ek per. Langwas ki enn kikenn gagne akoz enn maladi grav kapav bien difisil pou siporte.

Kotsa nou kapav gagn led? Boukou dimounn inn gagn enn gran rekonfor kan zot inn kont lor Bondie, zot inn priye Li, ek zot inn lir bann pasaz ankourazan ki ena dan Labib. Enn lot kitsoz ki’nn ed zot osi se lamour ek soutien ki zot inn gagne avek zot fami ek kamarad.

SEKI SERTIN DIMOUNN INN FER DAN SA SITIASION-LA

Robert, ki ena 58 an, dir: “Ena lafwa dan Bondie ek Li pou ed ou andir ou maladi. Priye Zeova. Dir Li seki ou resanti. Demann Li so lespri sin. Dir Li ed ou pou res pozitif ek ankourazan pou ou fami, ek ed ou res kalm pandan ki ou pe andir ou maladi.”

Robert dir: “Se vremem enn gran led kan ou fami soutenir ou lor plan emosionel, kan zot la pou ou. Toulezour, enn ouswa de manb mo fami sonn mwa ek demann mwa, ‘Ki manier?’ Mo gagn lankourazman osi avek bann kamarad ki res dan diferan landrwa. Gras-a zot, mo vremem santi mwa bien, ek zot ed mwa pou mo pa abandone.”

Si ou pe vizit enn kamarad ki malad, get konsey ki Linda done: “Enn kikenn ki malad anvi ena enn lavi ki normal otan ki posib, ek kitfwa li pa anvi koz lor so maladi touletan. Alor, koz lor bann kitsoz ki zot abitie koze.”

Avek lafors ki Bondie done, bann pasaz ankourazan ki ena dan Labib, lamour ek soutien bann fami ek bann kamarad, nou kapav sir ki li vo lapenn viv, mem kan nou pe fer fas ar enn maladi bien grav.

Bann Verse Labib ki Kapav Ed Ou

Kont lor Bondie.

“Mo ti dimann LESEGNER [“Zeova,” NW] vinn ed mwa e li ti reponn, li ti balye prop tou mo bann angwas. Enn malere kriy osekour; LESEGNER [“Zeova,” NW] finn tann li.”—Psom 34:4, 6.

Linda, ki nou ti mansione avan, dir: “Kan mo priye, zame mo pa dir, ‘Fer mwa bien.’ Me mo touletan dir, ‘Donn mwa lafors, ek ed mwa andir mo maladi.’”

Lir Parol Bondie pou gagn lafors.

“Okenn abitan pa pou dir: ‘Mo malad.’”—Izai 33:24.

Medit lor bann promes ki Bondie inn fer pou lavenir. Sa pou donn ou lespwar, ek sa pou donn ou lafors pou andire.

Rod soutien ar ou fami ek bann kamarad.

“Enn vre kamarad montre so lamour touletan, ek li enn frer ki’nn ne pou bann moman difisil.”—Proverb 17:17.

Elise, ki nou ti mansione avan, dir: “Pa res dan ou kwin. Les ou bann kamarad ed ou. Kitfwa pou ena bann moman kot ou pou santi ou tousel, kot ou pou mem panse ki Bondie pa pe ekout ou, me fode pa ou res dan ou kwin.”