Kan Ou Santi ki Ou Nepli Kapav Tini

Adriana, ki res Brésil, explike: “Sa bann santiman-la ti telman for ki mo ti deside ki vomie mo swiside.”

ESKI ou finn deza santi ou telman mal ki ou nepli anvi viv? Si wi, alor kitfwa ou konpran santiman Adriana. Adriana ti depresif. Li ti strese pou nanye, li ti dezespere, ek li ti santi li bien tris.

Kaoru, enn misie ki res Japon, ti okip so bann paran ki ti vie ek malad. Kaoru explike: “Sa lepok-la, mo ti ena boukou presion dan travay. Avek letan, mo ti perdi lapeti, ek mo pa ti pe kapav dormi bien. Mo ti koumans panse ki mo ti pou gagn soulazman si mo ti mor.”

Ojebode, enn misie ki res Nigeria, explike: “Mo ti touletan tris ek mo ti plore. Akoz sa, mo ti rod enn fason pou mo swisid mwa.” Erezman, Ojebode, Kaoru, ek Adriana pa ti swisid zot. Me sak lane, plizir santenn milye dimounn swisid zot.

KOTSA OU KAPAV GAGN LED

Laplipar bann dimounn ki swiside se bann zom, ek boukou parmi zot ti tro onte pou rod led. Zezi ti dir ki bann dimounn malad bizin get enn dokter. (Lik 5:31) Alor, si ou osi ou santi ki ou nepli kapav tini ek ki ou anvi swiside, pa gagn onte ek rod led. Boukou dimounn depresif inn reisi fer fas ar zot sitiasion gras-a bann tretman medikal. Ojebode, Kaoru, ek Adriana finn gagn led bann dokter ek asterla, zot pe reisi fer fas ar zot sitiasion.

Pou ed bann dimounn ki ena depresion, bann dokter ekout bann pasian rakont zot problem, zot kapav osi donn bann medsinn, ouswa zot fer toulede. Bann dimounn ki ena depresion bizin ki zot fami ek kamarad soutenir zot, konpran zot, donn zot latansion, ek ena pasians avek zot. Meyer kamarad ki enn kikenn kapav ena se Zeova, ek Li donn bann bon konsey dan so Parol, Labib.

ESKI ENA ENN SOLISION KI POU DIRE POU TOULETAN?

Bien souvan, bann dimounn ki gagn depresion bizin swiv bann long tretman ek kitfwa zot bizin osi sanz zot bann labitid. Si ou enn kikenn ki pe lit kont depresion, ou kapav atann pou gagn enn lavenir ere, parey kouma Ojebode. Li explike: “Mo atann avek inpasians zour kot mo pou trouv Izai 33:24 akonpli. Sa verse-la predir enn lepok kot personn lor later pa pou dir ‘Mo malad.’” Parey kouma Ojebode, ou kapav gagn rekonfor dan promes Bondie konsernan “enn nouvo later” kot “douler” nepli pou existe. (Revelasion 21:1, 4) Sa promes-la vedir ki nepli pou ena okenn soufrans mantal ek emosionel ankor. Bann santiman ki abitie fer ou soufer pou’nn fini disparet net. Ou nepli pou rapel sa bann santiman ki ti pe fer ou soufer la, zot nepli “pou vinn dan [ou] leker.”—Izai 65:17.

Bann Verse Labib ki Kapav Ed Ou

Bondie konpran ou bann santiman.

“Parski mwa, Zeova to Bondie, mo pe trap to lame drwat bien for, mo dir twa: ‘Pa per. Mo pou ed twa.’”—Izai 41:13.

Zeova konpran nou bann santiman plis ki ninport kisannla, ek Li anvi ed nou.

Reflesi lor seki’nn ekrir dan Parol Bondie.

“[Eli] ti demann pou tir so lavi ek li ti dir: ‘ . . . A Zeova, tir mo lavi.’”—1 Lerwa 19:4.

Ojebode dir: “Kan mo’nn reflesi lor seki’nn ekrir dan Parol Bondie, sa finn bien ed mwa. Mo’nn trouve ki profet Eli ti ena mem santiman ki mwa.”

Aprann ar bann lexanp Biblik.

“Mo [Zezi] finn priye pou twa [Pier] pouki to pa perdi lafwa.”—Lik 22:32.

Lapot Pier trwa fwa ti dir ki li pa ti konn Zezi. Apre sa, li ti bien sagrin, li ti soufer ek li ti plore boukou. Kaoru dir: “Seki ti ariv Pier inn fer mwa konpran ki Zeova ek Zezi ti konpran santiman Pier, ek sa finn bien ankouraz mwa.”

Ou nepli pou rapel sa bann santiman ki ti pe fer ou soufer la, zot nepli “pou vinn dan [ou] leker.”—Izai 65:17