“Rasanble Lepep”
1. Ki resanblans ena ant sa gran rasanbleman ki ti ena apre ki bann Izraelit ti kit l’Égypte la avek nou bann lasanble distrik ek internasional?
1 Enn tipe apre ki bann Izraelit inn sorti l’Égypte, Jéhovah ti dir Moïse “rasanble lepep” lor Montagn Sinaï. Kifer? Pou ki lepep ekout So bann parol ek koumsa zot kapav ena lakrint pou Li ek ansegn zot bann garson So bann fason azir. (Deut. 4:10-13) Sirman sa rasanbleman-la ti enn levennman memorab ki ti fortifie zot lafwa! Pandan bann mwa ki pe vini, Jéhovah so pep pou asiste bann lasanble distrik ek bann lasanble internasional pou les zot ansegne par Li. Ki nou bizin fer pou profit maximum sa lasanble-la?
2. Ki nou bizin fer pou nou “pre” pou nou lasanble?
2 ‘Zot Bizin Pre’: Jéhovah ti dir bann Izraelit ki ‘zot bizin pre’ pou sa gran rasanbleman lor Montagn Sinaï la. (Ex. 19:10, 11) Li parey pou nou osi. Tou bann ki pou asiste sa lasanble-la bizin bien prepar zot, pa zis bann ki ena enn partisipasion. Par exanp, boukou pou bizin demann konze dan zot travay. Kitfwa to dan mem sitiasion ki Nehémia. Li ti travay kot Lerwa Artaxerxès; li ti servi divin. Me, li ti anvi pran konze pou al ed bann Izraelit rekonstrir bann miray Jérusalem. Selman, li ti kone ki lerwa pa pou tro dakor avek sa. Alor li’nn priye, li’nn bien swazir so bann mo ek avek kouraz li’nn dir lerwa ki li pe pans pou fer. Lerwa inn les li ale ek li’nn mem soutenir sa proze konstriksion-la! (Neh. 2:1-9) Apart demann konze to patron, eski to’nn pran osi bann dispozision pou transpor? Bann ansien pou kontan pou ed ninport kisannla ki bizin led. Organiz twa pou ariv bien boner pou sak sesion, koumsa to pou pre pou “port enn latansion plis ki normal” ar bann kitsoz ki to pou tande.—Héb. 2:1.
3. Ki pou ed nou prepar nou leker?
3 Enn lot fason ki nou montre ki nou pre se, kan nou prepar nou leker pou ekoute ek aprann. (Ezra 7:10) Program lasanble pou disponib depi bien boner lor nou sit jw.org. Lor program to pou kapav trouv tou bann tit diskour ansam avek enn ouswa de verse prinsipal pou sak diskour. Se bann size bien apropriye ki nou kapav examine dan nou Ladorasion an Fami dan bann semenn avan lasanble. Sertin proklamater inprim program-la ek servi li pou pran bann ti not pandan lasanble.
4. Kouma bann paran kapav servi lasanble pou ansegn zot zanfan?
4 ‘Ansegn To Bann Garson’: Enn bann lobzektif sa rasanbleman ki ti ena lor Montagn Sinaï la se pou ed bann paran Izraelit ‘ansegn zot bann garson.’ (Deut. 4:10) Pandan lasanble distrik, bann paran pou gagn lokazion pou fer parey. Zot bizin asiz kot zot bann zanfan pandan bann sesion ek ed zot pou ekout bien. Lafin lazourne ek plitar pandan zot ladorasion an fami, zot kapav koz lor seki zot inn aprann dan lasanble.
5. Ki bienfe nou pou gagne si nou asiste nou prosin lasanble?
5 Sa gran lasanble ki ti ena lor Montagn Sinaï la, ti ed bann Izraelit pou apresie gran privilez ki zot ti ena pou form parti lepep Bondie. (Deut. 4:7, 8) Nou prosin lasanble distrik finn fer dan enn fason ki nou kapav tir profi parey kouma zot. Pandan trwa zour nou pou kapav met enn lipie andeor sa move lemond Satan ki resanble enn gran dezer la ek profit rekonfor spiritiel ek bon konpagni nou bann frer-ser dan nou paradi spiritiel. (Is. 35:7-9) Zour Jéhovah deryer laport. Alor, anou fer tou pou ki nou pa rat sa lokazion ki nou gagne la pou zwenn ansam pou ankouraz sakenn nou kamarad!—Héb. 10:24, 25.