Kestyon Ki Suleve
◼ Ki bann pwin nu bizin rapel kan nu pe servi bann telefonn portab ek bann pager elektronik?
Sa bann laparey la kapav ed nu pu kontakte lezot ninport kot sa nu ete. Alor ki zot kapav itil, nu bizin fer atansyon pu pa servi bann telefonn portab ek bann pager dan bann moman ki kapav deranz nu minister uswa nu bann reynion Kretyin. Kuma eski sa kapav arive?
Gete ki kapav arive si nu telefonn portab uswa nu pager sone alor ki nu pe gayn enn konversasyon dan predikasyon. Ki dimunn la pu panse? Ki linpresyon nu kapav donn dimunn la si nu aret koz ar li pu reponn korl la? Sirman nu pa pu anvi fer nanyin pu anpes lezot ekut mesaz Rwayom. (2 Kor. 6:3) Donk, si nu ena enn telefonn portab uswa enn pager avek nu, nu bizin regle li pu ki li pa deranz nu uswa lezot dan predikasyon.
Me ki arive si nu pe atann pandan ki lezot pe donn temwaynaz? Si nu finn rezerv enn letan pu predikasyon, eski fode pa nu konsantre lor sa aktivite la? Par respe pu nu servis sakre, gard bann biznes personel uswa bann koze ar kamarad uswa ar fami ki pa neseser pu enn lot moman. (Rom. 12:7) Byinsir, sa pa vedir ki nu pa gayn drwa servi telefonn pu donn plis temwaynaz uswa pu pran enn randevu pu fer sa.
Nu bizin fer sirtu atansyon kan nu servi telefonn portab pandan ki nu pe kondir, pwiski sertin lanket montre ki kan servi bann telefonn portab sa ogmant buku risk fer aksidan. Nu bizin obeir egzakteman tu lalwa ki defann servi telefonn portab pandan ki pe kondir.
Nu vinn bann reynion Kretyin ek bann lasanble pu ador Zeova ek pu ki Li anseyn nu. Eski rekonesans pu sa bann lokazyon sakre la pa pus nu pu teyn bann telefonn portab ek bann pager pu ki zot pa deranz nu uswa deranz lezot? Si ena kitsoz inportan ki bizin okipe deswit, nu bizin servi li andeor plas kot fer reynion. Sinon, nu bizin fer an sort ki nu okip bann kitsoz personel ek profann andeor bann moman ki nu’nn rezerve pu ladorasyon.—1 Kor. 10:24.
Donk kan nu servi telefonn portab uswa ninport ki lekipman eletronik, anu tuzur montre konsiderasyon pu lezot ek montre ki nu byin apresye bann kitsoz spirityel.