Satisfer U Bezwin Spirityel
1 Nu prosin Lasanble Distrik “Bann Proklamater Rwayom Ki Zele” pu donn nu enn lokazyon extraordiner pu satisfer nu bezwin spirityel. Parey kuma enn repa byin nurisan, program la pu sirman nuri nu spirityelman “avek bann parol lafwa.” (1 Tim. 4:6) Li pu permet nu vinn pli pros ar Zeova. Nu kapav atann pu gayn konsey ek lankurazman ki pu ed nu fer fas ar bann leprev dan nu lavi. Zeova donn nu lasirans: “Mo pu donn twa lintelizans ek mo pu instrir twa dan semin kot to bizin ale. Mo pu konsey twa avek mo lizye lor twa.” (Psom 32:8) Li vremem enn benediksyon ki nu ena so direksyon ranpli ar lamur dan nu lavi! Get detrwa kitsoz pratik ki nu kapav fer pu tir maximem profi ar program lasanble.
2 Nu Bizin Prepar Nu Leker: Sakenn parmi nu ena enn responsabilite pu protez so prop leker sinbolik. (Pro. 4:23) Pu sa, nu bizin disiplinn numem ek nu bizin onet anver numem. Lasanble li enn moman pu medit lor nu relasyon avek Zeova, ek enn moman pu ‘fuy dan lalwa parfe ki donn liberte.’ Pu prepar nu leker pu ‘aksepte ki laparol inplante dan nu,’ nu bizin sipliy Zeova pu egzaminn nu, pu idantifye kit latitid “ki amenn sufrans,” ki nu bizin korize, ek pu gid nu dan “semin leternite.”—Zak 1:21, 25; Psom 139:23, 24.
3 Ekute ek Medite: Zezi ti felisit Mari parski li ti port enn gran latansyon ar so bann parol. Li ti dir: “Mari finn swazir bon par, ek pa pu pran sa ar li.” (Lik 10:39, 42) Si nu ena mem latitid lespri, nu pa pu les bann ti kitsoz distrer nu. Nu pu fer sir ki nu asize ek ekut byin program la antye. Nu pu evit koze ek marse pu nanyin ek nu pu fer manyer ki nu pa distrer lezot avek nu telefonn portab, pager, laparey foto ek kamera video.
4 Kan nu ekut bann diskur, li bon nu pran bann ti not ki pu ed nu pu analiz size ki pe devlope. Nu bizin relye seki nu tande ar seki nu kone deza. Sa pu ed nu konpran ek retenir size la. Kan nu reget nu bann not, nu bizin fer sa avek lobzektif pu met seki nu’nn aprann an pratik. Sakenn parmi nu kapav demande: ‘Ki lefe sa ena lor mo relasyon avek Zeova? Ki bann sanzman mo bizin fer dan mo lavi? Kuma eski mo kapav aplik sa bann ranseynman la dan mo fason azir avek lezot? Kuma eski mo kapav servi sa dan mo minister?’ Diskit avek lezot lor bann pwin ki u sirtu apresye. Si nu fer tusala, sa pu ed nu pu gard bann parol Zeova ‘omilye nu leker.’—Pro. 4:20, 21.
5 Anu Aplik Seki Nu Aprann: Apre ki enn delege finn asiste lasanble distrik, li’nn dir: “Program la ti tus tu dimunn personelman, li ti pus nu pu egzaminn kondisyon nu leker ek leker nu fami, ek pu ofer led neseser ki sorti dan Labib ek ki ranpli avek lamur. Li’nn fer mwa pli konsyan mo responsabilite pu ed plis dan kongregasyon.” Sirman buku parmi nu finn ena mem reaksyon. Me li pa ase ki nu sinpleman rant kot nu byin ankuraze ek fortifye apre lasanble. Zezi ti dir: “Si zot konn sa bann kitsoz la, zot pu ere si zot fer li.” (Zan 13:17) Nu bizin fer zefor pu kontiyn met an pratik bann pwin ki aplik ar nu personelman. (Fil. 4:9) Sa mem lakle pu satisfer nu bezwin spirityel antyerman.
[Lankadre lor paz 5]
Medit lor Seki U Tande:
■ Ki lefe sa ena lor mo relasyon avek Zeova?
■ Kuma eski sa inflyans mo bann fason azir avek lezot?
■ Kuma eski mo kapav aplik sa dan mo lavi ek dan mo minister?