Fer Kamarad ar Bann Ki Pa Parey Kouma Ou

Kifer?

Parski si nou evit bann dimounn ki nou pa kontan, nou kapav ena pli boukou prezize. Ek si nou fer kamarad zis avek bann dimounn ki parey kouma nou, nou pou ena linpresion ki se zis nou fason panse, ek azir ki bon.

Prinsip Labib

“Ouver zot leker.”​—2 KORINTIEN 6:13.

Ki savedir? Nou “leker” kapav fer referans ar nou bann santiman. Si nou kontan zis bann dimounn ki parey kouma nou, nou pe ferm nou leker. Pou evit sa problem-la, nou bizin dispoze pou fer kamarad avek bann dimounn ki pa parey kouma nou.

Ki Bienfe Nou Pou Gagne?

Kan nou koumans konn lezot pli bien, nou konpran kifer zot pa azir parey kouma nou. Ek kan nou koumans kontan zot, nou bliye ki zot pa parey kouma nou. Nou plis apresie zot, ek nou partaz zot lazwa ek zot lapenn.

Anou get lexanp Nazaré. Avan, li ti ena bann prezize lor bann imigran. Ki ti ed li pou lit kont so bann prezize? Li dir: “Mo ti pas letan avek zot ek mo ti travay ansam avek zot. Sa bann dimounn-la ti bien diferan ar seki lezot ti pe dir lor zot. Kan to fer kamarad avek bann dimounn ki sorti dan enn lot kiltir, to pa pou ena tandans pou kol enn letiket lor zot ledo, ek to pou koumans kontan zot kouma zot ete.”

Seki Ou Kapav Fer

Rod bann lokazion pou koz avek bann dimounn ki sorti dan enn lot pei, ki pa mem ras ki ou, ouswa ki pa koz mem lang ki ou. Ou kapav

• Demann zot pou rakont zot zistwar.

• Invit zot pou manz ansam avek ou.

• Ekout zot bien, ek esey konpran ki kitsoz inportan pou zot.

Si ou esey konpran ki kitsoz finn inflians personalite sa bann dimounn-la, sa kapav ed ou pou ena enn latitid pozitif anver zot.