Devlop Lobeisans Plis Lafin Pe Koste

“Tu bann pep pu obeir [Silo].”—ZENEZ 49:10.

1. (a) Kuma eski lontan bann dimunn ti suvan montre zot lobeisans anver Zeova? (b) Ki profesi Zakob ti done konsernan lobeisans?

LONTAN lobeisans anver Zeova ti suvan vedir obeir so bann reprezantan. Parmi, sa bann reprezantan la, ti ena bann anz, bann sef fami, bann ziz, bann profet ek bann lerwa. Ti mem apel tronn bann lerwa an Izrael, tronn Zeova. (1 Kronik 29:23) Purtan, li byin tris ki buku parmi sa bann lerwa la ti dezobeir Zeova, ek sa ti amenn maler lor zot mem ek lor zot pep. Me, Zeova pa ti les so bann fidel serviter san lespwar. Li ti promet ki Li pu donn zot enn bon lerwa, ki pa pu mor, ki bann dimunn drwat pu kontan pu obeir. (Izai 9:6, 7) Kan Zakob ti pre pu mor, li ti donn enn profesi lor sa lerwa la. Li ti dir: “Baton rwayal pa pu kit Zida, ni baton komandan pa pu kit so lipye, ziska ki Silo vini; ek tu bann pep pu obeir li.”—Zenez 49:10.

2. Ki mo “Silo” vedir, ek lor kisannla li pu gayn puvwar pu reyne?

² “Silo”, se enn mo Ebre ki vedir “Kikenn pu Ki Li Ete.” Wi, Silo pu gayn tu drwa pu reyne, se akoz sa ki li ena enn baton rwayal, ek so baton komandan montre ki li pu ena lotorite. Anplis, li pa pu ena sa reyn la zis lor bann desandan Zakob, me lor tu bann “pep.” Se seki Zeova ti promet Abraam, kan Li ti dir li: “To desandan pu gayn puvwar lor laport so bann lennmi. Ek par mwayin to desandan, tu bann nasyon pu kapav gayn benediksyon.” (Zenez 22:17, 18) Kan Zeova ti donn Zezi lespri sin an lan 29 N.L., Li’ inn montre ki, se Zezi limem sa desandan la.—Lik 3:21-23, 34; Galat 3:16.

Premye Rwayom Zezi

3. Ki “rwayom” eski Zezi finn gayne kan li’nn return dan lesyel?

³ Kan Zezi ti return dan lesyel, li pa’nn kumans reyne tutswit lor tu bann pep lor later. (Psom 110:1) Me selman, li’nn gayn enn “rwayom,” ek li finn kumans reyne lor bann dimunn ki ti obeir li. Lapot Pol ti idantifye sa rwayom la kan li ti ekrir: “Nu ti pe domine par nwarte, me Bondye inn delivre nu, ek Li’nn transfer nu dan rwayom so Garson ki Li kontan.” (Kolosyin 1:13) Sa delivrans la inn kumanse Lapantkot 33 N.L. kan bann disip Zezi ti gayn lespri sin.—Akt 2:1-4; 1 Pyer 2:9.

4. Kuma eski bann premye disip Zezi ti montre zot lobeisans, ek antan ki enn grup, kuma eski Zezi ti apel zot?

⁴ Bann disip ki’nn gayn lespri sin, ti “bann reprezantan Zezi” lor later. Zot inn montre zot lobeisans kan zot inn kumans rasanble bann lezot disip ki pu usi manb avek zot dan sa rwayom spirityel la. (2 Korintyin 5:20; Efezyin 2:19; Akt 1:8) Anplis, pu zot gayn faver zot lerwa, zot tu ti bizin “res byin dakor, ek ena enn mem fason panse.” (1 Korintyin 1:10) Antan ki enn grup, zot ti form seki Zezi ti apel enn “esklav fidel ki ena bon zizman” uswa enn grup serviter fidel ki ansarz.—Matye 24:45; Lik 12:42.

Nu Gayn Benediksyon kan Nu Obeir “Sa Serviter Ansarz La”

5. Kuma eski Zeova ti anseyn so pep lontan?

⁵ Zeova inn tuzur donn so pep bann anseynan. Par egzanp, apre ki bann Zwif ti sorti Babilonn, Ezra ek bann lezot zom kalifye, pa ti zis lir lalwa Bondye avek zot. Non, me zot ti “donn enn lexplikasyon ek zot ti fer lepep konpran” seki zot ti pe lir.—Neemya 8:8.

6, 7. Kuma eski atraver Kolez Santral, esklav fidel inn donn bann repa spirityel dan bon moman? Kifer li inportan ki nu sumet ar sa esklav la?

⁶ Dan premye syek, grup esklav fidel ti ena enn kolez santral bann ansyin ki ti regle bann problem. An 49 N.L., ti ena enn problem konsernan sirkonsizyon ek sa kolez santral la, ti priye pu ki Bondye gid zot pu regle sa problem la. Finalman, zot ti pran enn desizyon ki ti an akor avek Parol Bondye ek zot ti ekrir bann kongregasyon pu fer konn zot desizyon. Bann kongregasyon ti obeir sa desizyon la ek Bondye ti beni zot. (Akt 15:6-15, 22-29; 16:4, 5) Zordi usi parey, esklav fidel, atraver so Kolez Santral, inn donn bann plis eklersisman lor bann size byin inportan. Par egzanp, bann Kretyin bizin pa pran par dan politik, zot bizin konpran ki disan li sakre, ek kuma zot bizin konsider ladrog ek sigaret. (Izai 2:4; Akt 21:25; 2 Korintyin 7:1) Zeova finn beni so pep parski zot finn obeir so Parol ek sa esklav fidel la.

⁷ Kan bann serviter Bondye sumet ar sa esklav fidel la, zot montre ki zot sumet usi ar zot Met, Zezi. Zot sumisyon ena ankor plis linportans dan nu lepok parski Zezi inn gayn enn pli gran puvwar. Se seki Zakob ti dir dan enn profesi, kan li ti pre pu mor.

Silo Gayn Puvwar pu Diriz Later

8. Kan ek kuma eski Zezi inn gayn plis puvwar?

⁸ Zakob ti dir dan so profesi ki Silo pu gayn ‘lobeisans tu bann pep.’ Li kler alor, ki Zezi pa ti pu reyn zis lor Izrael spirityel. Lor kisannla alor Zezi ti pu reyne? Revelasyon 11:15 reponn: “Rwayom lemond inn vinn rwayom nu Senyer ek so Kris, ek li pu reyne pu tuletan.” Labib montre ki Zezi inn gayn sa puvwar la alafin peryod “set tan,” kan “letan fixe ki’nn donn bann nasyon” inn fini, an 1914.a (Danyel 4:16, 17; Lik 21:24) Sa lane la, Zezi inn kumans reyne dan enn fason invizib, “omilye [so] bann lennmi.”—Matye 24:3; Psom 110:2.

9. Ki Zezi inn fer kan li’nn vinn lerwa, ek ki lefe sa inn ena lor tu bann dimunn, sirtu lor so bann disip?

⁹ Premye kitsoz ki Zezi inn fer kan li’nn vinn lerwa, se pus Satan, sa kikenn ki plis dezobeir la. Zezi inn pus li ek so bann demon, ek finn avoy zot “lor later.” Depi sa lepok la, sa bann move lespri la inn fer dimunn gayn bann maler ki zame zot pa’nn gayne avan. Anplis, zot inn kre enn lanvironnman kot lobeisans pu Zeova inn vinn byin difisil. (Revelasyon 12:7-12; 2 Timote 3:1-5) An realite, Satan pe fer enn lager spirityel sirtu kont bann serviter ki Bondye inn swazire pu al viv dan lesyel. Bannla, zot “pratik bann komannman Bondye, ek zot ena responsabilite pu donn temwanyaz lor Zezi.” Bann dimunn ki ena lespwar pu res lor later pe ed zot dan sa travay la ek Satan pe fer enn lager kont zot usi.—Revelasyon 12:17; Zan 10:16.

10. Satan pa pu reysi dan lager ki li pe fer kont bann vre Kretyin. Ki bann profesi ki pe realize montre sa?

¹⁰ Detut fason, Satan finn kondane, li pa pu resi dan so lager. Kifer? Parski nu pe viv dan “zur Senyer,” ek Zezi pe al ‘konplet so viktwar.’ (Revelasyon 1:10; 6:2) Par egzanp, li pu konfirm tu bann manb 144,000 dan enn fason permanan. Li pu usi protez enn “ gran laful, ki personn pa kapav konte, ki sorti dan tu nasyon, tribi, pep ek lang.” (Revelasyon 7:1-4, 9, 14-16) Kontrerman ar bann 144,000 ki pu al dan lesyel, sa gran laful la zot, zot pu viv lor later, anba dominasyon Zezi. (Danyel 7:13, 14) Prezans sa bann dimunn la lor later zordi, li enn prev ki vremem Silo inn gayn enn ‘rwayom ki pu diriz lemond.’—Revelasyon 11:15.

Asterla Se Lepok pu “Obeir Labonn Nuvel”

11, 12. (a) Kisannla selman pu sape kan lafin pu vini? (b) Kuma eski bann dimunn ki ena ‘latitid sa lemond’ la, ete?

¹¹ Tu seki anvi gayn lavi pu tuletan bizin aprann obeir. Kifer? Parski Labib dir ki “tu bann ki pa obeir Bondye ek ki pa obeir labonn nuvel konsernan Zezi” pa pu sape pandan zur vanzans Bondye. (2 Tesalonisyin 1:8) Purtan zordi, nu pe viv dan enn move lanvironnman kot dimunn rebele kont bann lalwa ek bann prinsip Labib. Akoz sa, li byin difisil pu obeir labonn nuvel.

¹² Sa latitid pu rebel kont Bondye la, Labib apel sa “latitid ki ena dan lemond.’’ (1 Korintyin 2:12) Kan lapot Pol ti ekrir bann Kretyin dan lavil Efez, li ti montre ki lefe sa latitid la ena lor bann dimunn, li ti dir: “Zot ti pe viv dapre manyer sa lemond la, ek dapre sef ki ena puvwar pu inflyans latitid sa lemond la. Se sa latitid la ki, zordi pe inflyans bann dimunn ki pa obeir Bondye. Wi, nu tu avan, nu ti parey kuma zot, nu ti pe viv dapre dezir nu lekor ek nu ti fer seki nu lekor ek nu lespri anvi. Parey kuma sa bann dimunn la, nu’si nu ti bann zanfan ki merit lakoler Bondye.”—Efezyin 2:2, 3.

13. Kuma eski bann Kretyin kapav pa les zot domine par latitid ki ena dan sa lemond la, ek ki bon rezilta zot pu gayne?

¹³ Erezman, bann Kretyin dan Efez pa’nn tuzur les zot domine par sa latitid rebel la. Kan zot inn sumet zot ar lespri Bondye, zot inn vinn bann zanfan obeisan. Lerla sa lespri la inn permet zot devlop bann bon kalite dan zot lavi. (Galat 5:22, 23) Zordi usi parey, pli gran lafors ki ena dan liniver, setadir lespri Bondye, pe ed bann milyon dimunn pu obeir Zeova. Kumsa, sa bann dimunn la kapav ‘sir ki zot lesperans pu realize ziska lafin.’—Ebre 6:11; Zekarya 4:6.

14. Kuma eski Zezi ti averti tu bann Kretyin zordi konsernan bann problem ki pu teste zot lobeisans?

¹⁴ Nu bizin rapel usi ki nu ena led Silo. Ansam avek so Papa, zot pa pu les okenn lennmi, ni enn demon, ni enn dimunn, teste nu lobeisans plis ki seki nu kapav siporte. (1 Korintyin 10:13) Avredir, Zezi finn donn nu bann ranseynman ki pu ed nu dan lager ki nu fer pu pa les nu inflyanse par latitid sa lemond la. Li ti fer sa par mwayin set let ki li ti donn lapot Zan dan enn vizyon. Dan sa bann let la, li ti mansyonn bann problem byin presi ki nu pu gayne pandan dernye zur, lepok ki nu pe viv zordi. (Revelasyon 1:10, 11) Byinsir, bann konsey ki ti ena dan sa set let la, ti konsern bann Kretyin ki ti viv dan premye syek. Me zot aplik sirtu pandan “zur Senyer,” depi 1914. Li bon alor, ki nu pran kont sa bann mesaz la!b

Gard Nu Lamur pu Zeova For, Evit Move Kondwit ek Materyalis

15. Kifer eski nu bizin fer atansyon kont bann problem ki ti afekte kongregasyon Efez? Kuma eski nu kapav fer sa? (2 Pyer 1:5-8)

¹⁵ Zezi ti adres so premye let ar kongregasyon ki dan lavil Efez. Apre ki li’nn felisit sa kongregasyon la pu so landirans, Zezi dir li: “Me selman, mo ena enn kitsoz kont twa, seki to’nn perdi lamur ki to ti ena okumansman.” (Revelasyon 2:1-4) Zordi usi parey, ena bann Kretyin ki ti byin devwe lontan, me ki’nn perdi zot lamur profon ki zot ti ena okumansman pu Bondye. Si enn kikenn finn perdi sa lamur la, li pu byin bizin fer kitsoz parski sa kapav fer so relasyon ki li ena avek Zeova vinn frazil. Ki li kapav fer pu ki sa lamur la revinn for? Enn letid Labib regilye, asiste tu reynion, lapriyer ek meditasyon pu ed li. (1 Zan 5:3) Li vre ki tusala demann “bann gran zefor,” me, li vo lapenn. (2 Pyer 1:5-8) Si u onet kan u egzaminn umem, ek u truve ki u lamur pu Zeova pa kuma avan, alor koriz sa sityasyon la pli vit posib. Obeir konsey ki Zezi ti done kan li ti dir: “Rapel ki to ti ete avan ek dan ki kondisyon to’nn tonbe ek sanz to latitid ek fer bann aksyon ki to ti pe fer avan.”—Revelasyon 2:5.

16. Ki linflyans ki ti enn danze lor plan spirityel, ti egziste dan kongregasyon Pergam ek Tyatir? Kifer seki Zezi ti dir zot, li aplik usi dan nu lepok?

¹⁶ Zezi ti felisit bann Kretyin dan lavil Pergam ek Tyatir. Kifer? Zot ti servi Zeova avek tu zot leker, zot ti ena landirans ek zot ti byin devwe. (Revelasyon 2:12, 13, 18, 19) Purtan, zot ti les zot inflyanse par sertin dimunn ki ti ena mem move latitid ki Balaam ek Zezabel. Nu rapel ki sa de la ti ena enn move linflyans lor bann Izraelit. Zot ti pus bannla pu ador Baal ek pu ena enn move kondwit sexyel. (Nonm 31:16; 1 Rwa 16:30, 31; Revelasyon 2:14, 16, 20-23) Ki nu kapav dir lor nu lepok? Eski zordi nu truv mem move linflyans? Wi, parski enn rezon prinsipal kifer sertin serviter Zeova exkli, se akoz zot ena enn move kondwit sexyel. Li byin inportan alor, ki zordi, nu evit bann dimunn ki kapav ena enn move linflyans lor nu, ki li andan uswa andeor la kongregasyon! (1 Korintyin 5:9-11; 15:33) Bann seki anvi viv anba dominasyon Silo ek obeir li, pu bizin rezet tu seki pa an akor avek bann prinsip Labib. Par egzanp, bann divertisman, bann liv uswa bann zimaz pornografi lor Internet.—Amos 5:15; Matye 5:28, 29.

17. Ki latitid bann manb kongregasyon Sard ek Laodise ti ena ek ki zot ti panse lor zotmem? Me ki Zezi li, li ti panse lor zot?

¹⁷ Apar detrwa dimunn, kongregasyon Sard pa ti gayn okenn felisitasyon. Kongregasyon la ti paret vivan, me parski li ti vinn tyed lor plan spirityel, li ti “mor” pu Zezi. Li ti pe obeir labonn nuvel akoz ki’afer. Enn gran lakizasyon sa! (Revelasyon 3:1-3) Kongregasyon Laodise usi ti parey. Li ti fer vantar avek so rises, li ti dir: “Mo ris.” Purtan, pu Zezi li ti “mizer, aveg ek tuni.”—Revelasyon 3:14-17.

18. Kuma eski enn kikenn kapav evite vinn tyed lor plan spirityel?

¹⁸ Zordi usi parey, sertin Kretyin, ki avan ti fidel, finn kumans ena sa mem latitid pu dezobeir la. Li posib ki zot finn les latitid ki ena dan lemond, anpes zot realize ki lafin pre. Akoz sa, zot finn vinn tyed lor plan spirityel. Zot nepli truv letid Labib, lapriyer, reynion ek predikasyon inportan. (2 Pyer 3:3, 4, 11, 12) Me, li byin neseser ki sa bann Kretyin la, obeir Zezi, ek fer bann gran zefor pu vinn ris lor plan spirityel. Wi, ki zot “aste lor ki’nn pas dan dife, avek [Zezi]”! (Revelasyon 3:18) Nu gayn sa bann vre rises la kan nu ‘vinn ris avek bann bon aksyon, nu kontan done ek nu pre pu partaze.’ Si nu fer zefor pu fer sa bann kitsoz spirityel la, ‘nu pu ramas pu numem enn trezor pu lavenir ki pu fer nu gayn lavi.’—1 Timote 6:17-19.

Zot Inn Gayn Felisitasyon Akoz Zot Lobeisans

19. Ki lankurazman ek felisitasyon Zezi ti donn bann Kretyin ki ti dan kongregasyon Smirn ek Filadelfi?

¹⁹ Pena okenn repros dan let ki Zezi inn avoy kongregasyon Smirn ek Filadelfi. Sa de kongregasyon la, ti bann bon legzanp an seki konsern lobeisans. Avek kongregasyon Smirn, Zezi ti dir: “Mo konn to sufrans ek mizer ki to pe pase, me to ris.” (Revelasyon 2:9) Se enn gran diferans avek bann seki ti res Laodise! Zot, zot ti fer vantar avek rises ki zot ti ena, me purtan zot ti mizer lor plan spirityel! Byinsir, Satan pa ti kontan truv personn res fidel ek obeir Zezi Kris. Me, Zezi ti dir: “Pa bizin per bann kitsoz ki pu fer twa sufer. Gete, Satan pu kontiyn zet sertin parmi zot dan prizon pu teste zot ek pu fer zot gayn persekisyon pandan dis zur. Res fidel ziska lamor, ek mo pu donn twa enn kuronn lavi.” (Revelasyon 2:10) Zezi ti felisit usi kongregasyon Filadelfi, li ti dir li: “To finn obeir mwa ek to pa’nn fer tret ar mo non. Mo pe vinn vit. Kontiyn tini byin ferm seki to ena, pu ki personn pa pran to kuronn.”—Revelasyon 3:8, 11.

20. Malgre ki sityasyon zordi, bann milyon dimunn inn kontiyne obeir parol Zezi, ek kuma zot inn fer sa?

²⁰ Pandan “zur Senyer,” ki’nn kumanse an 1914, bann manb 144,000 ki ankor lor later ek bann manb gran laful, ki par milyon zordi, inn obeir parol Zezi. Zot inn devwe dan predikasyon ek zot inn res byin fidel. Parey kuma zot bann frer ki ti viv dan premye syek, buku finn sufer parski zot ti obeir Zezi. Sertin finn mem al dan prizon ek dan bann kan konsantrasyon. Lezot finn obeir Zezi kan zot finn gard enn lavi sinp. Zot ti anture par larises ek par bann dimunn ki fer tu pu gayn buku larzan, me zot pa finn les zot tante par sa. (Matye 6:22, 23) Wi, bann vre Kretyin kontiyne fer leker Zeova kontan kan zot obeir Li dan ninport ki sityasyon ek plas ki zot ete.—Proverb 27:11.

21. (a) Ki responsabilite spirityel esklav fidel pu kontiyne ranpli? (b) Kuma eski nu kapav montre ki nu vremem anvi obeir Silo?

²¹ Alor ki peryod gran detres pe koste, “esklav fidel ki ena bon zizman”, byin deside pu pa fer naryin ki pu fer li dezobeir so Met, Zezi. Se enn rezon kifer li prepar bann repa spirityel dan bon moman, pu bann serviter Bondye. Donk anu kontiyne montre ki nu apresye lorganizasyon Zeova ek seki Li donn nu. Par sa fason la, nu pu montre ki nu sumet ar Silo. Li pu beni bann dimunn obeisan ki pu viv anba so dominasyon kan li pu donn zot lavi pu tuletan.—Matye 24:45-47; 25:40; Zan 5:22-24.

[Not anba paz]

Eski U Rapel?

• Dapre seki Zakob inn dir dan enn profesi, ki rol Zezi ti pu ena?

• Kuma nu kapav montre ki nu rekonet ki Zezi limem Silo, ek ki latitid nu bizin evite?

• Ki bann konsey konsernan nu lepok, nu truve dan bann let ki set kongregasyon inn gayne?

• Kuma eski nu kapav imit bann Kretyin ki ti dan kongregasyon Smirn ek Filadelfi?

[Zimaz lor paz 28]

Zeova beni so bann serviter parski zot obeir sa fidel “serviter ansarz”la

[Zimaz lor paz 29]

Li difisil pu obeir Zeova akoz linflyans Satan

[Zimaz lor paz 31]

Enn relasyon solid avek Zeova ed nu pu obeir Li