Imite patience Jéhovah
“Jéhovah pa tardé pou realise so promesse, . . . mais Li ena patience.”—2 Pierre 3:9.
1. Ki kitsoz extraordinaire Jéhovah inn propose pou donne bann dimoune?
JÉHOVAH inn propose nou enn kitsoz ki personne pa pou kapav donne nou. Enn kitsoz ki bien attirant ek ki ena enn grand valeur, mais ki nou pa kapav ni acheté, ni gagné. Jéhovah propose nou la vie eternel—ek pou la plupart parmi nou, c’est la vie eternel dan enn paradi lor la terre. (Jean 3:16) C’est vrai-mem enn kitsoz extraordinaire ki pé attann nou! Nepli pou ena okenn kitsoz ki pou faire nou triste, bann kitsoz couma la guerre, la violence, la misere, crime, maladie, ek mem la mort. Pou ena enn la-paix ek enn l’unité parfait parmi bann dimoune, ek Royaume Bondié pou dirige zot avek amour. Oui, nou pé vrai-mem attann sa Paradi-la avek impatience!—Isaïe 9:6, 7; Révélation 21:4, 5.
2. Kifer Jéhovah pankor detruire le monde ki Satan pé dirigé?
2 Jéhovah aussi pé attann avek impatience kan Li pou faire la terre vinn enn paradi. Li normal, parski Jéhovah enn Bondié ki content seki juste ek seki droite. (Psaume 33:5) Sa pa faire Li plaisir pou guette enn lé-monde ki indifferent ou-soit ki opposé ar So bann principe ki droite, enn lé-monde ki rejette So l’autorité ek ki persecute So bann serviteur. Pourtant, ena bann bon raison kifer Li pankor detruire sa mauvais lé-monde ki Satan pé dirigé-la. Sa bann raison-la ena enn rapport avek bann question ki concerne So droit pou dirige l’univers. Kan Jéhovah reglé sa bann question-la, Li manifesté enn qualité ki attire nou vers Li, enn qualité ki beaucoup dimoune pena zordi—la patience.
3. (a) Ki vedir bann mot grec ek hébreu ki’nn traduire par “patience” dan la Bible? (b) Ki question nou pou examiné dan sa lartik-la?
3 Dan Traduction du monde nouveau ena enn mot grec ki parfois traduire par “patience.” Sa mot-la vedir “ena enn longue l’esprit,” alors, finn traduire sa mot-la par “longanimité,” ek par “ena patience.” En grec ek en hébreu toulé-deux, bann mot ki’nn traduire par “patience” vedir pa pressé pou en colere. Couma eski nou finn gagne bann bienfait grace a patience Jéhovah? Ki leson nou kapav tiré ar patience ek l’endurance ki Jéhovah ek so bann serviteur fidel finn manifesté? Couma nou koné ki patience Jéhovah ena enn limite? Anou examine sa bann question-la.
Reflechi lor patience Jéhovah
4. En rapport avek patience Jéhovah, ki l’apotre Pierre ti ecrire?
4 En rapport avek patience Jéhovah, guette seki l’apotre Pierre ti ecrire: “Mo bann frere ki mo bien content, rappel sa touletan: ki enn jour pou Jéhovah, li couma mille an, ek mille an, couma enn jour. Jéhovah pa tardé pou realise so promesse, couma certain dimoune pensé, mais Li ena patience avek zot parski Li pa envie ki personne detruire, mais Li envie ki tou dimoune repenti.” (2 Pierre 3:8, 9) Noté ki dan sa text-la, ena deux point ki kapav aide nou pou comprend patience Jéhovah.
5. Couma la fason ki Jéhovah considere le temps ena enn l’effet lor so bann action?
5 Premier point c’est ki Jéhovah pa considere le temps couma nou. Parski Jéhovah vive pou touletan, mille an couma enn sel jour pou Li. Li pa limité, ni pressé par le temps, mais sa pa vedir ki Li tardé pou faire kitsoz. Parski Jéhovah ena enn grand sagesse, Li koné kan pli bon moment pou agir, pou ki tou dimoune gagne bann bienfait, ek avek patience Li attann sa moment-la. Seulement, fodé pa nou pensé ki Jéhovah Li insensible ar souffrance ki so bann serviteur kapav gagné entre-temps. Li enn Bondié ki ena “compassion” ek l’amour. (Luc 1:78; 1 Jean 4:8) Li ena pouvoir pou repare dan enn fason permanent, n’importe ki mauvais kitsoz ki kapav arrivé pendant ki Li pé permette la souffrance lor la terre.—Psaume 37:10.
6. Ki fodé pa nou pensé lor Bondié, ek kifer?
6 Bien-sur, li pa facile pou attann enn kitsoz ki nou bien envie. (Proverbes 13:12) C’est a cause sa ki, kan enn kikenn pa faire vite seki li’nn promette, lezot kapav pensé ki li pena l’intention pou faire seki li’nn dire. Mais li pa bon ki nou pense sa lor Bondié! Si, au lieu nou pensé ki Bondié ena patience, nou pensé ki Li pé trop tardé, avek le temps, nou kapav ena bann doute ek decouragé. Lerla, nou riské vinn faible lor plan spirituel. Seki pire, nou kapav mem laisse-nou trompé par bann dimoune kont ki Pierre ti mette nou en garde: bann moqueur, ki pena la foi. Sa bann dimoune-la ti sikann bann chrétien, zot ti dire: “Li pa ti promette ki li pou là? Kot li été? Oui, depuis la mort nou bann ancetre, tou kitsoz pé contigné pareil couma zot ti été depuis commencement la creation.”—2 Pierre 3:4.
7. Couma patience Jéhovah ena enn rapport avek so desir ki bann dimoune repenti?
7 Nou aprann enn deuxieme point dan seki Pierre ti dire: Jéhovah ena patience parski Li pa envie ki personne detruire, mais Li envie ki tou dimoune repenti. Jéhovah pou detruire bann ki persisté pou faire seki mauvais ek ki pa’lé changé. Seulement, Bondié pa content ki bann mauvais dimoune mort. Au contraire, Li content kan bann dimoune repenti, arrete faire seki mauvais, ek contigne vive. (Ézékiel 33:11) C’est pou sa ki Li pé contigne ena patience ek Li pé envoye so bann serviteur pou preche la bonne nouvelle partout lor la terre, pou ki tou dimoune kapav gagne possibilité pou vive.
8. Couma Jéhovah finn manifesté so patience envers bann Israélite?
8 Nou trouve patience Jéhovah aussi dan la fason ki Li ti agir avek bann Israélite. Pendant plusieurs siecle, Li ti supporte zot desobeissance. Li ti servi so bann prophete pou averti zot plusieurs fois. Li ti dire zot: “Arrete faire seki mauvais, ek garde mo bann commandement ek mo bann l’ordre, dapré tou bann la-loi ki mo finn donne zot bann ancetre ek ki mo finn envoye zot par mo bann serviteur, bann prophete.” Eski zot ti ecoute sa conseil Jéhovah-la? Malheureusement, le peuple “pa ti ecouté.”—2 Rois 17:13, 14.
9. Couma Jésus ti reflete patience Jéhovah?
9 Finalement, Jéhovah ti envoye so Garson, ki ti faire tou seki li ti kapav pou encourage bann Juif pou retourne vers Bondié. Jésus ti reflete patience Jéhovah dan enn fason parfait. Li ti bien koné ki bannla ti pré pou touye li, mais li ti dire avek beaucoup tristesse: “Jérusalem, Jérusalem, la ville ki touye bann prophete ek ki lapide bann ki [Bondié] envoye kot li,—comié fois mo ti envie rassemblé to bann zenfant, pareil couma enn poule rassemblé so bann ti-poussin enba so lezel! Mais zot pa ti oulé.” (Matthieu 23:37) C’est pa enn juge sans pitié ki zis envie puni bann dimoune, ki ti prononce sa bann parole bien touchant-la. C’est plutot bann parole enn camarade ki ena l’amour pou bann dimoune ek ki ena patience envers zot. Jésus, li pareil couma so Papa ki dan le ciel. Li ti envie ki sa bann Juif-la repenti pou zot pa detruire kan Bondié ti pou faire so jugement. Certain ti obeir bann l’avertissement ki Jésus ti donne zot, ek zot ti sapé kan enn grand destruction ti vinn lor Jérusalem en l’an 70 n.l.—Luc 21:20-22.
10. Dan ki fason nou finn gagne bann bienfait grace a patience Bondié?
10 Patience Bondié li vrai-mem extraordinaire, pa vrai? Malgré sa quantité dimoune ki desobeir Li-la, Jéhovah finn donne sakenn parmi nou ek plusieurs million lezot dimoune, l’occasion pou konn Li ek pou accepté l’esperance la vie eternel. L’apotre Pierre ti ecrire bann chrétien: “Mazinn bien ki patience nou Seigneur permette nou gagne la vie sauve.” (2 Pierre 3:15) Eski nou pa reconnaissant ki grace a patience Jéhovah, nou ena possibilité pou gagne la vie sauve? Eski nou pa prié pou ki Li contigne ena patience envers nou pendant ki nou pé servi Li jour apré jour?—Matthieu 6:12.
11. Kan nou comprend kifer Jéhovah ena patience, ki sa pousse nou pou faire?
11 Kan nou comprend kifer Jéhovah ena patience, sa aide nou pou attann avek patience sa moment ki Li’nn fixé pou sauve nou-la, ek jamais nou pa pou dire ki Li pé tardé pou tini so bann promesse. (Lamentations 3:26) Pendant ki nou contigne prié pou ki so Royaume vini, nou ena confiance ki Bondié koné kan pli bon moment pou realise sa la-priere-la. En plus, nou envie imite Jéhovah ek ena patience nou aussi dan fason ki nou agir avek nou bann frere, ek avek bann dimoune ki nou joinde dan predication. Nou aussi, nou pa envie ki personne detruire, mais nou ti pou content ki zot repenti ek pareil couma nou, ena l’espoir pou gagne la vie eternel.—1 Timothée 2:3, 4.
Reflechi lor patience bann prophete
12, 13. En accord avek seki’nn dire dan Jacques 5:10, couma prophete Isaïe ti reussi ena patience?
12 Kan nou reflechi lor patience Jéhovah, sa pousse nou pou apprecié ek pou developpe sa qualité-la. Li pa facile pou bann dimoune imparfait developpe la patience, mais nou kapav faire li. Nou kapav aprann beaucoup kan nou examine la vie bann serviteur Bondié ki’nn vive dan le passé. Disciple Jacques ti ecrire: “Frere, pou zot kapav supporte le mal, ek ena patience, prend l’exemple bann prophete ki ti koz lor nom Jéhovah.” (Jacques 5:10) Li bien encourageant pou koné ki lezot dimoune aussi finn reussi faire face ar bann problem pareil couma nou pé gagné.
13 Par exemple, prophete Isaïe ti bizin ena patience pou li kapav accompli mission ki Jéhovah ti donne li. Jéhovah ti faire li koné ki li ti pou bizin ena sa qualité-la, kan Li ti dire li: “Allé, ek to pou bizin dire le peuple: ‘Zot pou contigne tendé plusieurs fois, mais zot pa pou comprend; zot pou contigne trouvé, mais zot pa pou gagne okenn connaissance.’ Faire leker sa peuple-la vinn dur, ek faire zot zoreille vinn sourde, ek colle zot lizié, pou ki zot pa trouvé avek zot lizié, ek zot pa tendé avek zot zoreille, ek pou zot leker pa comprend, pou ki zot pa retourné ek gagne enn guerison pou zot-mem.” (Isaïe 6:9, 10) Malgré ki le peuple pa ti’lé ecouté, Isaïe ti annonce bann avertissement Jéhovah avek patience pendant au moins 46 an! Li pareil pou nou, la patience pou aide nou pou perseveré ek contigne preche la bonne nouvelle, mem si beaucoup dimoune pa accepté pou ecoute nou.
14, 15. Ki ti aide Jérémie pou faire face ar persecution ek decouragement?
14 Bien-sur, kan bann prophete ti preché, apart ki bann dimoune pa ti’lé ecoute zot, zot ti bizin aussi faire face ar persecution. Bann adversaire prophete Jérémie ti mette li dan bann ceps, zot ti ferme li dan “prison” ek zot ti jette li dan enn trou. (Jérémie 20:2; 37:15; 38:6) C’est sa bann dimoune ki li ti envie aidé-la ki ti faire li passe par sa bann mauvais traitement-la. Pourtant, li pa ti vinn amer, ni li ti rod tire vengeance. Li ti prend patience pendant plusieurs l’année.
15 Mem si bann dimoune ti persecute Jérémie ek ti bouffonne li, sa pa ti faire li arrete preché. Li pareil pou nou aussi zordi. Bien-sur, parfois nou kapav senti-nou decouragé. Jérémie aussi ti decouragé. Li ti ecrire: “Parski mo ti preche parole Jéhovah, dimoune ti reproche moi ek ti bouffonne moi. Ek mo ti dire: ‘Mo pa pou koz lor Li, ek mo pou arrete koz lor so nom.’ ” Ki ti arrivé lerla? Eski Jérémie ti arrete preché? Li ti dire: “[Parole Jéhovah] ti couma enn difé dan mo leker, ki ti’nn bloqué dan mo lezo; ek mo ti fatigué pou tini li, ek mo ti nepli kapav supporte sa.” (Jérémie 20:8, 9) Remarké ki Jérémie ti perdi so la-joie kan li ti arrete so l’esprit lor ki quantité le peuple ti pé bouffonne li. Mais kan li ti reflechi lor beauté ek l’importance ki message ki li ti preché ena, li ti regagne so la-joie. En plus, Jéhovah ti avek Jérémie, “couma enn kikenn ki fort ek ki faire lezot gagne peur.” Li ti donne li la force necessaire pou preche So parole avek zèle ek courage.—Jérémie 20:11.
16. Couma nou kapav garde nou la-joie kan nou preche la bonne nouvelle?
16 Eski prophete Jérémie ti gagne la joie kan li ti preché? Oui! Li ti dire Jéhovah: “[Mo] finn trouve to bann parole, ek mo finn mange zot; ek to parole finn mette la joie ek contentement dan mo leker; parski mo porte to nom, ah Jéhovah.” (Jérémie 15:16) Jérémie ti content privilege ki li ti ena pou represente vrai Bondié ek pou preche so parole. Nou aussi nou kapav content sa privilege-la. Pareil couma bann ange dan le ciel, nou content surtout kan nou trouve beaucoup dimoune dan le monde entier pé accepté message ki nou preché lor Royaume Bondié, ki zot pé repenti ek ki zot pé prend chemin ki pou amenn zot vers la vie eternel.—Luc 15:10.
“L’endurance Job”
17, 18. Dan ki fason Job ti enduré, ek ki ti arrive li apré?
17 Apré ki disciple Jacques ti koz lor bann prophete ki ti vive dan le passé, li ti ecrire: “Zot finn tann koz lor l’endurance Job, ek zot finn trouvé ki Jéhovah finn faire pou li apré, ki Jéhovah Li rempli ar l’affection ek misericorde.” (Jacques 5:11) Mot grec ki’nn traduire par “endurance” dan sa verset-la ena mem sens ar mot ki Jacques inn traduire par “patience” dan verset avant. Enn bibliste ti montré ki difference ena entre sa deux mot-la, li ti ecrire: “Premier mot-la vedir la patience ki nou manifesté kan dimoune maltraite nou, ek deuxieme-la c’est kan nou perseveré avek courage dan bann situation difficile.”
18 Job ti bien souffert. Li ti perdi tou so di-bien, so bann zenfant ti mort ek li ti gagne enn maladie ki ti faire li bien souffert. Li ti bizin aussi faire face ar bann fausse accusation kan bann dimoune ti pretann ki c’est Jéhovah ki ti pé puni li. Job pa ti souffert en silence; Li ti plaigné a cause so situation ek li ti mem faire croire ki li ti pli droite ki Bondié. (Job 35:2) Pourtant, jamais li ti perdi la foi, ni li ti vinn infidel. Li pa ti maudit Bondié couma Satan ti pretann li ti pou faire. (Job 1:11, 21) Ki’nn arrive li? Jéhovah “apré ti beni bann dernier jour Job plus ki avant.” (Job 42:12) Jéhovah ti gueri Job ek ti donne li deux fois plus richesse ki seki li ti ena avant. Jéhovah ti beni li ek ti faire li gagne enn grand satisfaction dan so la-vie, ek li ti vive heureux avek so famille. L’endurance ek fidelité Job ti aussi permette li pou comprend Jéhovah pli bien.
19. Ki nou aprann ar l’endurance ek patience Job?
19 Ki nou aprann ar l’endurance ek patience Job? Pareil couma Job, nou kapav souffert a cause enn maladie ek lezot problem bien grave. Li possible ki nou pa comprend kifer Jéhovah pé permette nou gagne certain problem. Seulement, ena enn kitsoz ki nou kapav sur: si nou reste fidel, Jéhovah pou beni nou. Jéhovah pa manké pou recompense bann dimoune ki rod Li vrai-mem. (Hébreux 11:6) Jésus ti dire: “Celui ki enduré ziska la fin, c’est li ki pou sapé.”—Matthieu 10:22; 24:13.
“Jour Jéhovah pou vini”
20. Kifer nou kapav sur ki jour Jéhovah pou vini?
20 Mem si Jéhovah ena patience, Li aussi enn Bondié droite ki pa pou touletan tolere mechanceté lor la terre. So patience ena limite. Pierre ti ecrire: “[Bondié] pa ti hesité pou puni enn lé-monde ancien.” Alors ki Noé ek so famille ti gagne la vie sauve, sa lé-monde mauvais-la ti detruire par enn deluge. Jéhovah ti amenn aussi enn jugement lor Sodome ek Gomorrhe kan li ti detruire sa deux la-ville-la ziska zot vinn la cendre. Sa bann punition-la donne “bann dimoune ki pena okenn respé pou Bondié enn l’exemple bann kitsoz ki pou vini.” Seki nou kapav sur, c’est ki “jour Jéhovah pou vini.”—2 Pierre 2:5, 6; 3:10.
21. Couma nou kapav montré nou patience ek nou l’endurance, ek ki nou pou examiné dan prochain lartik?
21 Alors, anou imite patience Jéhovah ek aide nou prochain pou repenti pou zot kapav sauvé. Anou imite aussi bann prophete ek ena patience ek preche la bonne nouvelle malgré ki bann dimoune pa’lé ecoute nou. Ek finalement, nou kapav sur ki Jéhovah pou beni nou beaucoup si pareil couma Job, nou endure bann difficulté ek nou garde nou fidelité. Nou ena bann bon raison pou nou trouve la joie dan nou service, parski nou trouvé couma Jéhovah finn bien beni bann zeffort ki so bann serviteur pé faire pou preche la bonne nouvelle partout lor la terre. C’est seki nou pou trouvé dan prochain lartik.
Eski ou Rappel?
• Kifer Jéhovah manifesté patience?
• Ki nou aprann ar patience ki bann prophete ti ena?
• Couma Job ti montré so l’endurance, ek ki ti arrive li?
• Couma nou koné ki patience Jéhovah ena limit?
[Zimage, page 15]
Patience ki Jésus ti ena ti reflete dan enn fason parfait patience so Papa
[Zimage, page 16]
Couma Jéhovah ti recompense patience Jérémie?
[Zimage, page 17]
Couma eski Jéhovah ti recompense l’endurance Job?