Nou bizin patience dan nou ministere
1. Couma Jéhovah finn montré patience envers bann dimoune?
1 Patience c’est enn bann qualité principal ki Bondié finn montré envers bann dimoune. (Ex. 34:6; Ps. 106:41-45; 2 Pierre 3:9) Enn parmi bann pli grand l’exemple So grand patience ek So l’amour c’est kan nou guette travail predication ki pé faire lor la terre entier. Jéhovah finn travail avek bann dimoune pendant environ 2,000 an, ek pourtant Li pé contigne attire bann dimoune sincere vers Li. (Jean 6:44) Couma nou kapav imite patience Jéhovah dan nou ministere?
2. Couma nou kapav montré patience kan nou pé travail nou territoire?
2 Predication porte en porte: Nou imite patience Jéhovah kan nou contigne preché “sans arreté” dan bann territoire kot bann dimoune pankor montré l’interet. (Actes 5:42) Avek patience nou enduré kan bann dimoune montré zot indifferent, bouffonne nou ek oppose zot ar nou ministere. (Marc 13:12, 13) Nou aussi montré patience kan nou contigne faire zeffort pou arrose bann la grain la verité ki nou’nn semé mem kan li difficile pou joinde bann dimoune ki interessé kot zot.
3. Kifer eski li important ki nou manifesté patience kan nou pé faire bann visite ek conduire bann l’etude?
3 Bann l’etude la Bible: Pou faire enn pié poussé, nou bizin ena patience. Nou kapav donne li tou seki li bizin, mais nou pa kapav force li pou grandi. (Jacq. 5:7) Li pareil aussi avek bann progré spirituel. Sa, li faire tigit par tigit ek dan different l’etape. (Marc 4:28) Bann dimoune avek ki nou pé etudié kapav trouve sa difficile pou abandonne bann fausse croyance religieux ou-soit bann coutume ki pa biblik. Fodé pa ki nou essaye force progré spirituel nou bann etudiant kan nou mette pression lor zot pou ki zot faire bann changement. Li necessaire ki nou manifesté patience pou ki sa donne l’esprit Bondié enn quantité le temps raisonnable pou travail dan leker nou etudiant.—1 Cor. 3:6, 7.
4. Couma eski patience aide nou pou rann temoignage ar bann membre nou famille ki pa Témoins dan enn fason efficace?
4 Bann membre nou famille ki pa Témoins: Mem si nou ena enn grand desir ki bann membre nou famille ki pa Témoins aprann la verité, nou montré patience kan nou attann bon moment pou partage nou la foi avek zot, nou faire attention pou pa touffe zot avek trop beaucoup l’information. (Eccl. 3:1, 7) Entre temps, nou laisse nou l’exemple koz pou nou, ek nou bizin toujours pré pou partage nou la foi avek douceur ek enn grand respé. (1 Pierre 3:1, 15) Pena doute ki kan nou manifesté patience, nou ministere pou vinn pli productif ek sa pou faire nou Papa ki dan le ciel plaisir.