Seki nou aprann ar patience Jéhovah ek Jésus

1. Ki question certain serviteur ki fidele pé demann zot-mem?

ENN soeur fidele ki finn konn beaucoup l’epreuve pendant plusieurs dizaine l’année, ti demandé: “Eski mo pou trouve la fin avant mo mort?” Beaucoup ki finn servi Jéhovah pendant longtemps pose mem question. Avek impatience, nou pé attann sa jour kot Bondié pou faire tou kitsoz nouveau, ek pou tire bann probleme ki nou pé gagné zordi. (Rév. 21:5) Mem si nou ena bann bon raison pou croire ki la fin systeme Satan bien pré, li kapav difficile pou attann sa jour-la avek patience.

2. Ki bann question en rapport avek patience nou pou examiné?

² Pourtant la Bible montré ki nou bizin ena patience. Pareil couma bann serviteur Bondié dan le passé, nou pou gagne seki Bondié finn promette si nou ena enn la foi solide ek si nou attann avek patience le temps ki Li’nn fixé pou realise so bann promesse. (Lire Hébreux 6:11, 12.) Jéhovah Li-mem finn ena enn grand patience. Li ti kapav efface la mechanceté depuis longtemps, mais Li pé attann enn bon moment pou faire sa. (Rom. 9:20-24) Kifer Jéhovah ena enn grand patience coumsa? Couma Jésus finn imite mem patience ki so Papa ek finn laisse nou enn l’exemple? Ki bienfait nou pou gagné si nou developpe mem patience ki Bondié? Reponse sa bann question-la kapav aide nou pou ena plus patience ek faire nou la foi vinn pli solide, mem si nou ena l’impression ki Jéhovah pé tardé.

KIFER JÉHOVAH ENA PATIENCE?

3, 4. (a) Kifer Jéhovah finn ena patience pou realise so projet concernant la terre? (b) Couma Jéhovah finn reagir apré rebellion en Éden?

³ Jéhovah ena enn bon raison kifer Li ena patience. Li vrai ki depuis touletan Jéhovah finn ena pli grand l’autorité dan l’univers; mais kan finn ena rebellion en Éden, Satan finn souleve bann question bien important pou tou l’univers. Jéhovah finn montré beaucoup patience, Li ti koné ki sa ti pou prend beaucoup le temps pou reponn sa bann question-la dan enn fason parfait. Li konn bien bann action ek l’attitude sakenn so bann serviteur dan le ciel ek lor la terre, ek nou sur ki Li agir dan nou l’interet.​—Héb. 4:13.

⁴ Projet ki Jéhovah ti ena c’est ki la terre rempli ar bann descendant Adam ek Ève. Kan Satan ti embete Ève ek apré kan Adam ti desobeir, Bondié pa ti abandonne so projet. Li pa ti paniké, prend bann decision vite-vite, ou-soit reagir brite ek abandonne bann humain. Au contraire, Li ti trouve enn fason pou realise so projet pou bann dimoune ek pou la terre. (Is. 55:11) Pou realise so projet ek justifié so souveraineté, Jéhovah finn ena enn grand patience ek enn grand controle lor Li-mem. Li finn mem attann pendant plusieurs millier l’année pou ki certain l’aspect so projet realisé dan pli bon fason possible.

5. Ki benediction nou gagné grace a patience Jéhovah?

⁵ Enn lot raison kifer Jéhovah finn attann avek patience, c’est pou permette pli beaucoup dimoune gagne la vie eternel. Asterla-mem Li pé prend bann disposition pou sauve “enn grand la foule.” (Rév. 7:9, 14; 14:6) Grace a nou l’activité predication, Jéhovah pé invite bann dimoune pou aprann konn so Royaume ek so bann principe ki juste. Message lor Royaume Bondié, c’est enn “bon nouvelle”​—oui, pli bon nouvelle ki bann dimoune kapav tendé. (Mat. 24:14) Chaque dimoune ki Bondié attiré, forme partie dan enn congregation mondial kot ena bann vrai camarade ki content seki juste. (Jean 6:44-47) Nou Papa ki ena l’amour pé faire tou pou aide sa bann dimoune-la pou gagne so faveur. Parmi bann dimoune, Li finn aussi choisir certain ki pou forme partie dan so gouvernement ki dan le ciel. Kan zot pou dan le ciel, zot pou aide bann dimoune obeissant pou vinn parfait ek pou gagne la vie eternel. Li clair ki pendant ki Jéhovah pé attann avek patience, en mem temps Li pé travail pou realise so bann promesse​—pou nou prop di-bien.

6. (a) Couma Jéhovah finn montré so patience dan lepok Noé? (b) Couma Jéhovah pé montré so patience dan nou lepok?

⁶ Mem devant seki mauvais, Jéhovah garde so patience. Nou trouve sa par fason ki Li ti agir kan ti ena mechanceté avant deluge. Dan sa lepok-la, la terre ti rempli avek l’immoralité ek violence, ek ‘leker Jéhovah ti faire mal’ parski bann dimoune ti ena zis tendance pou faire seki mauvais. (Gen. 6:2-8) Li pa ti pou tolere sa situation-la touletan, alors, Li ti decidé pou faire enn deluge pou detruire bann mauvais dimoune. Pendant ki “patience Bondié ti pé attann dan lepok Noé,” Jéhovah ti prend bann disposition pou sauve Noé ek so famille. (1 Pierre 3:20) Dan moment ki Li ti fixé, Jéhovah ti faire Noé konn so decision ek ti demann li pou construire enn l’arche. (Gen. 6:14-22) En plus, Noé ti enn “predicateur la justice,” li ti annonce bann dimoune dan so lepok destruction ki Bondié ti pré pou amené. (2 Pierre 2:5) Jésus ti dire ki nou lepok ressemblé lepok Noé. Jéhovah finn fini decidé kan Li pou detruire sa mauvais systeme-la. Okenn dimoune pa konn ‘jour ek ler’ ki sa pou arrivé. (Mat. 24:36) Dan nou lepok, Bondié finn donne nou responsabilité pou averti bann dimoune ek pou dire zot couma zot kapav sauvé.

7. Eski Jéhovah pé tardé pou realise so bann promesse? Expliké.

⁷ Li clair ki patience Jéhovah pa vedir ki Li pé zis attann le temps passé, sans faire nanyé. Fodé jamais nou pensé ki Jéhovah pa pé prend nou compte ou-soit Li pa gagne nou tracas! Mais, dan la realité, li kapav arrivé ki nou pense coumsa surtout kan nou pé vinn vié ou-soit nou pé souffert dan sa mauvais le monde-la. Nou kapav mem decouragé ou-soit pensé ki Bondié pé tardé pou realise so bann promesse. (Héb. 10:36) Fodé jamais nou blié ki Bondié ena bann bon raison pou ena patience ek ki Li pé servi sa le temps-la pou faire so bann serviteur fidele gagne bann bienfait. (2 Pierre 2:3; 3:9) Anou examine aussi couma Jésus ti ena mem patience ki so Papa.

COUMA JÉSUS ENN BON L’EXEMPLE EN RAPPORT AVEK PATIENCE?

8. Dan ki situation Jésus ti montré ki li ti ena patience?

⁸ Jésus pé faire volonté so Papa ek li finn faire sa avek la joie depuis plusieurs millier l’année. Kan Satan ti rebellé, Jéhovah ti decidé ki so sel Garson ki Li finn crée direct, pou vinn lor la terre en tant ki Messie. Reflechi seki sa ti vedir pou Jésus​—avek patience, li ti attann plusieurs millier l’année ziska ki sa le temps-la arrivé. (Lire Galates 4:4.) Pendant, tou sa le temps-la, li pa ti attann sans faire nanyé; au contraire, li ti occupé avek travail ki so Papa ti donne li. Ek kan finalement, li ti vinn lor la terre, li ti koné ki Satan pou faire touye li, pareil couma sa ti prophetisé. (Gen. 3:15; Mat. 16:21) Avek patience, li ti accompli volonté Bondié, mem si sa vedir ki li ti pou bizin souffert beaucoup avant li mort. So fidelité ti vrai-mem extraordinaire! Li pa ti fixé so l’attention lor li-mem ni lor so position, ek nou kapav imite so l’exemple.​—Héb. 5:8, 9.

9, 10. (a) Ki Jésus ti faire pendant ki li ti pé attann ki Jéhovah agir? (b) Couma nou kapav imite l’exemple Jésus?

⁹ Apré so resurrection, Jésus ti gagne pouvoir dan le ciel ek lor la terre. (Mat. 28:18) Li servi sa pouvoir-la pou accompli projet Jéhovah ek li touletan agir dapré calendrier Jéhovah. Jésus ti attann avek patience dan coté droite Bondié ziska 1914 kan Bondié finn place so bann l’ennemi couma enn ti banc enba so lipié. (Ps. 110:1, 2; Héb. 10:12, 13) Bientot, li pou detruire systeme Satan. Mais avant sa, avek patience, Jésus pé aide bann dimoune pou gagne faveur Bondié ek pé amenn zot kot ena “de l’eau la vie.”​—Rév. 7:17.

¹⁰ Eski ou kapav imite l’exemple Jésus dan fason ki ou considere calendrier Jéhovah? Pena doute ki Jésus ti bien envie faire tou seki so Papa ti demann li; mais, li ti disposé pou attann moment ki Jéhovah ti decidé. Pendant ki nou pé attann la fin sa mauvais systeme Satan-la, nou tou nou bizin ena patience. Nou bizin attann ki Bondié agir ek pa baisse lé-bras kan nou decouragé. Ki nou kapav faire pou nou developpe sa qualité patience-la?

COUMA MO KAPAV ENA PATIENCE PAREIL COUMA BONDIÉ?

11. (a) Ki rapport ena entre la foi ek patience? (b) Kifer nou ena bann bon raison pou ena enn la foi solide?

¹¹ Avant ki Jésus ti vinn lor la terre, bann prophete ek lezot serviteur fidele Jéhovah ti montré par zot l’exemple ki mem bann dimoune imparfait, kapav enduré avek patience. Ti ena enn rapport direct entre zot la foi ek zot patience. (Lire Jacques 5:10, 11.) Si zot pa ti croire vrai-mem seki Jéhovah ti dire zot​—si zot pa ti ena la foi​—eski zot ti pou attann avek patience ki so bann promesse realisé? Plusieurs fois, zot ti bizin faire face ar bann situation ki ti faire zot peur, ou-soit ar bann l’epreuve ki ti testé zot la foi, mais zot ti ena confiance ki finalement, Bondié ti pou faire seki Li ti’nn promette. (Héb. 11:13, 35-40) Nou ena encore plus raison pou ena enn la foi solide, parski asterla Jésus li “Agent principal nou la foi.” (Héb. 12:2) Li finn realise beaucoup prophetie ek li finn faire nou konn projet Bondié, dan enn fason ki donne nou bann bon raison pou ena la foi.

12. Ki nou kapav faire pou augmente nou la foi?

¹² Ki bann kitsoz pratik nou kapav faire pou fortifié nou la foi ek pou ena plus patience? Li important ki nou applik bann conseil ki Bondié donne nou. Par exemple, reflechi lor bann raison ki ou ena pou mette Royaume Bondié en premier dan ou la vie. Eski ou kapav faire plus zeffort pou applik conseil ki trouve dan Matthieu 6:33? Kitfois, ou pou bizin passe plus le temps dan ou ministere, ou-soit faire certain changement pou amenn enn la vie pli simple. Jéhovah finn deja beni bann zeffort ki ou finn faire pou obeir Li. Li possible ki Li finn aide ou pou conduire enn l’etude la Bible, ou-soit pou gagne “la paix Bondié ki depasse tou pensée.” (Lire Philippiens 4:7.) A mesure ki ou reflechi lor bann bienfait ki ou finn gagné personnellement parski ou finn suive bann instruction Jéhovah, ou pou realisé ki li bon ki ou ena patience.​—Ps. 34:8.

13. Ki l’exemple nou kapav servi pou montré couma nou kapav augmente nou la foi ek nou patience?

¹³ Ena enn l’exemple ki kapav aide nou pou comprend couma nou la foi kapav faire nou ena plus patience. C’est l’exemple enn planteur ki seme bann la grain, li occupe so plantation ek apré sa, li recolté seki li’nn planté. Chaque fois ki li gagne enn bon recolte, sa donne li plus confiance pou ré-seme bann la grain pou prochain saison. Bien sur, li pou bizin ena patience ek attann prochain recolte, mais sa pa empeche li planté, kitfois-mem li pou seme lor pli beaucoup la terre ki avant. Li ena confiance ki li pou recolté. Li pareil aussi pou nou, a mesure ki nou aprann bann instruction Jéhovah, nou suive zot ek nou recolté bann bienfait, nou confiance en Jéhovah augmenté. Nou la foi aussi grandi ek li vinn pli facile pou nou attann bann benediction ki nou koné Jéhovah pou donne nou.​—Lire Jacques 5:7, 8.

14, 15. Couma nou bizin considere souffrance zordi?

¹⁴ Enn lot fason ki nou kapav ena plus patience c’est kan nou ena mem fason pensé ki Jéhovah lor le monde ek lor nou situation personnel. Par exemple, reflechi couma Li considere souffrance bann dimoune. Sa faire longtemps ki Jéhovah trouve bann dimoune souffert ek sa faire Li beaucoup la peine; pourtant, Li pa finn vinn amer, ek Li pa finn laisse sa empeche Li pou faire le bien. Li finn envoye so Garson “pou detruire bann travail ki le Diable finn faire” ek pou repare tou di-tort ki Satan finn faire bann dimoune. (1 Jean 3:8) En realité, bientot Bondié pou tire tou souffrance pou touletan. Alors, fodé pa nou laisse sa mauvais le monde Satan-la decourage nou ou-soit faire nou perdi patience parski nou pa trouve la fin pé vini. Au contraire, anou ena la foi dan bann kitsoz ki nou pa trouvé ek ki pou duré pou touletan. Jéhovah fini decidé kan exactement Li pou tire mechanceté lor la terre, ek Li pou agir dan ler ki Li’nn fixé.​—Is. 46:13; Nah. 1:9.

¹⁵ Pendant sa bann dernier jour difficile-la, li possible nou konn bann l’epreuve ki pé testé nou la foi. Au lieu ki nou en colere kan nou victime bann violence ou-soit kan nou perdi enn dimoune ki nou content dan la mort, nou bizin bien determiné pou mette tou nou confiance en Jéhovah. Nou imparfait, alors li pa facile pou nou faire sa. Mais rappel seki Jésus ti faire ek ki nou kapav lire dan Matthieu 26:39.​—Lire.

16. Ki nou bizin evité faire tant ki la fin pankor vini?

¹⁶ Enn kitsoz ki kapav empeche nou pou manifesté patience c’est si nou ena enn mauvais l’attitude ek nou dire: ‘Attann ek nou guetté si vrai-mem la fin pou vini.’ Ki sa vedir? Kitfois enn dimoune ki pa sur ki la fin pré, pou commence faire bann lezot projet pangar bann promesse Jéhovah pa realisé. C’est coumadir li pé dire: ‘Mo pou attann ek mo pou guetté si vrai-mem Jéhovah realise seki Li’nn dire.’ Kitfois li pou rod al faire enn carriere pou vinn enn grand dimoune dan sa le monde-la, rod gagne beaucoup l’argent pou garantie so securité au lieu ki li mette Royaume Bondié en premier. Li possible aussi ki li faire bann grand l’etude pou li sur ki li ena enn la vie confortable. En realité, eski sa pa pou montré ki li pena assez la foi? Rappel ki Paul ti encourage nou pou imite bann serviteur Jéhovah ki “grace a la foi ek patience” finn herite bann promesse Bondié. (Héb. 6:12) Jéhovah pa pou permette ki sa mauvais le monde-la contigne existé pli longtemps ki necessaire dapré so projet. (Hab. 2:3) Mais tant ki la fin pankor arrivé, nou bizin evite faire zis enn minimum dan service Jéhovah. Au contraire, nou bizin reste lor nou garde ek faire nou maximum pou preche la bonne nouvelle. Sa pou donne nou beaucoup la joie asterla-mem.​—Luc 21:36.

KI BENEDICTION NOU POU GAGNÉ GRACE A NOU PATIENCE?

17, 18. (a) Ki l’occasion nou ena zordi pendant ki nou pé attann avek patience? (b) Ki benediction nou pou gagné zordi si nou manifesté patience?

¹⁷ Ki nou finn servi Bondié zis depuis deux-trois mois ou-soit pendant plusieurs dizaine l’année, nou envie servi Li pou touletan. Si nou ena patience, sa pou aide nou pou enduré ziska la fin, n’importe ki quantité le temps resté. Zordi, Jéhovah pé donne nou l’occasion pou prouvé ki nou ena enn grand confiance dan so bann decision, ek si necessaire, pou disposé souffert pou so nom. (1 Pierre 4:13, 14) Bondié pé donne nou aussi enn formation ki kapav aide nou pou ena patience pou enduré ziska ki nou gagne la vie sauve.​—1 Pierre 5:10.

¹⁸ Jésus ena tou pouvoir dan le ciel ek lor la terre, ek nanyé pa kapav empeche li pou protege ou​—a part ou-mem. (Jean 10:28, 29) Nou pena okenn raison pou peur l’avenir, ni mem pou peur la mort. Bann ki endure avek patience ziska la fin, pou sauvé. Alors, nou bizin faire sur ki nou pa laisse le monde detourne nou ek faire nou arrete ena confiance en Jéhovah. Au contraire, nou bizin bien determiné pou augmente nou la foi ek profite patience Bondié avek sagesse.​—Mat. 24:13; lire 2 Pierre 3:17, 18.