Enn croyance ki’nn fané partout

“Mo ti faire bann cauchemar kot mo ti pé brulé dan l’enfer! Mo ti revé ki pé jette moi dan enn place kot ti ena difé, mo ti pé criyé, zis lerla mo sommeil cassé. Pa bizin dire, mo ti faire beaucoup zeffort pou pa faire peché.”—Arline.

DAPRÉ ou, eski l’enfer li enn l’endroit kot zis bann dimoune ki’nn faire peché al tourmenté? Beaucoup dimoune croire sa. Par exemple, en 2005 enn theologien dan l’université Saint Andrews dan l’Écosse, ti trouvé ki enn tiers bann ministre religieux dan l’Écosse ti croire ki bann dimoune ki eloigné ar Bondié pou konn enn “souffrance mental eternel dan l’enfer.” Enn cinquieme parmi zot ti croire ki bann ki al dan l’enfer pou konn bann souffrance physik.

Dan beaucoup pays, beaucoup dimoune croire ki l’enfer existé. Par exemple en 2007, dapré enn sondage ki ti faire dan États-Unis, 70 pour cent bann dimoune ti croire dan l’enfer. Mem dan bann pays kot la plupart bann dimoune pa interessé ar la religion, zot encore toujours croire dan l’enfer. Dapré enn sondage ki ti faire dan Canada, en 2004, inn trouvé ki 42 pour cent bann dimoune croire dan l’enfer. Ek en Grande-Bretagne, 32 pour cent ti sur ki l’enfer existé.

Seki bann chef religieux enseigné

Beaucoup ministre religieux inn arrete enseigné ki l’enfer li enn l’endroit kot bann dimoune souffert dan difé. Zot plutot soutenir enn l’explication ki pareil couma seki ti publié dan Catéchisme de l’Église Catholique en 1994. Sa livre reference-la dire: “Pli grand punition l’enfer c’est separation eternel avek Bondié.”

Malgré sa, beaucoup dimoune encore croire ki l’enfer li enn place kot bann dimoune souffert mentalement ek physiquement. Bann ki soutenir sa doctrine-la pretann ki sa qualité l’enseignement-la li basé dan la Bible. Albert Mohler ki president Séminaire théologique baptiste du Sud, dire avek conviction: “Sa li zis enn fait ki trouve dan l’Ecriture.”

Kifer seki ou croire li important?

Si vrai-mem l’enfer li enn place kot dimoune tourmenté, pena doute ki ou bizin peur sa. Mais, si sa l’enseignement-la li pa vrai, bann chef religieux ki enseigne sa doctrine-la zot crée enn confusion dan l’esprit bann ki croire zot, ek zot faire sa bann dimoune-la peur pou nanyin. Zot aussi gate reputation Bondié.

Ki Parole Bondié, la Bible, dire lor sa sujet-la? Bann lartik ki pou suive pou servi bann traduction la Bible protestant ek catholique toulé-deux pou reponn trois question: (1) Ki vrai-mem arrivé kan enn dimoune mort? (2) Ki Jésus ti enseigné lor l’enfer? (3) Kan ou konn la verité lor l’enfer, ki l’effet sa ena lor ou?