Nuvo Program Lasanble Spesyal Enn Zur

Zordi, nu gayn buku linformasyon lor kuma nu kapav gard nu leker an bonn sante pu ki nu truv plis plezir dan lavi ek viv pli lontan. Alor komye plis, li inportan ki nu gard nu leker spirityel an bonn sante. Donk, tem nu lasanble spesyal enn zur ki kumanse an Septam 2003, li apropriye. So tem se: “Anu Servi Zeova Avek enn Leker Konple.” (1 Kro. 28:9) Ki nu pe atann pu aprann?

Sirveyan sirkonskripsyon pu koz lor “Anu Ed Lezot pu Servi Zeova Avek enn Nam Ki Zwaye.” Bann intervyu pu met laksan lor lazwa ki nu kapav gayne kan nu swiv lintere bann dimunn ki anvi servi Zeova ek kan nu kondir bann letid Labib avek zot. Pena dut ki tu bann ki prezan pu gayn rekonfor ek lankurazman grasa premye diskur orater viziter. Tem sa diskur la se: “Anu Protez Nu Leker dan enn Lemond Truble.” Sesyon gramatin pu termine avek diskur batem.

Dan lapremidi, nu pu gayn lokazyon pu ekut diskur “Anu Ed Lezot.” Sa diskur la pu montre nu ki nu kapav fer pu sutenir lezot. Ki bann paran kapav fer pu protez leker zot bann zanfan kont bann move linflyans ek ed zot pu vinn pros ar Zeova? Parti “Anu Ed U Bann Zanfan pu Pran Plezir an Zeova” pu donn bann sigzesyon pratik ek pu montre kuma kapav fer sa.

Eski nu pe profit tu bann dispozisyon ki Zeova finn pran pu gard nu leker spirityel an bonn sante ek for? Dernye diskur orater viziter se: “Anu Gard enn Leker Konple dan Servis Zeova.” Sa diskur la pu atir latansyon lor kat kitsoz byin inportan ki form parti dan program ki nu ena ki ed nu pu res for lor plan spirityel. Ki kantite letan ek zefor nu done pu priye sinserman, pu etidye Parol Bondye, pu prese avek zel ek pu frekant bann lezot frer ek ser? Eski nu kapav amelyor nu dan sertin sa bann domenn la?

Zeova lans sa linvitasyon la: “Amenn to leker ver disiplinn ek to zorey ver bann parol konesans.” (Prov. 23:12) Asterla mem fer u laranzman pu asiste sa zur kot nu pu profit bann lanseynman Biblik la. Si nu fer sa, nu pu gayn lafors pu kontiyn servi Zeova avek enn leker konple ek enn nam zwaye.