“Ansam, Anu Glorifye So Non”
1. Ki lokazyon nu pu gayne pu glorifye non Bondye ansam avek nu bann frer ek ser, ek kuma nu kapav prepar nu depi aster-la mem?
1 Enn ekrivin Psaume ti sante: “Ansam avek mwa, anu donn Jéhovah la glwar ek ansam, anu glorifye so non.” (Ps. 34:3) Tem nu prosin lasanble distrik se “Mars Avek Bondye.” Sa lasanble-la pu donn nu lokazyon glorifye non Jéhovah ansam avek nu bann frer ek ser ki sorti dan diferan kongregasyon. Eski u’nn fini kumans fer tu u bann laranzman: transpor? konze? Li bon si nu kapav organiz nu byin alavans.—Prov. 21:5.
2. Kifer eski li bon ki nu prevwar pu ariv lasanble boner?
2 Kan Nu Ariv Lasanble: Ena enn kantite kitsoz ki nu bizin pran kont kan nu pe asiste enn lasanble. Si nu sorti lakaz boner, sa pu permet nu ratrap bann retar ki nu kapav gayne lor larut. Kumsa, nu pu rant lasanble aler ek pran nu plas pu profit kantik ek lapriyer. (Ps. 69:30) Detrwa minit avan program kumanse, prezidan sesyon pu pran plas lor lestrad pandan ki lamizik pe zwe. Sa moman-la, fode ki nu tu nu fini pran nu plas pu ki program kapav kumanse dan enn fason ordone.—1 Cor. 14:33, 40.
3. Kuma eski nu kapav montre konsiderasyon pu lezot kan nu pe rod plas?
3 Parol Bondye ankuraz nu pu “fer tu kitsoz avek lamur.” (1 Cor. 16:14) Nu montre konsiderasyon pu lezot kan nu pa galupe, uswa pus lezot pu nu gayn bann plas ki nu prefere. U kapav rezerv plas zis pu u bann pros uswa pu bann ki vwayaz ansam avek u dan mem veykil.—1 Cor. 13:5; Phil. 2:4.
4. Ki bann dispozisyon nu bizin pran pu poz midi, ek kuma sa kapav profitab pu nu?
4 Nu ankuraz u pu amenn enn repa pu midi, olye ki u al aste manze andeor. Kumsa u pu kapav profit bon konpayni nu bann frer ek ser, ek u pu kapav la kan sesyon lapremidi kumanse. Si se neseser, u kapav amenn enn cooler, uswa enn glacière pu gard bann kitsoz fre. Me, fode pa ki li tro gran, pu ki li kapav rant anba u sez. Fode pa amenn bann resipyan an ver ek byinsir labwason alkolik.
5. Kuma eski nu kapav prepar nu leker pu lanseynman ki nu pu gayne?
5 Enn Festin Spirityel Pe Atann Nu: Le-Rwa Yehoshaphat ti “prepar [so] leker pu rod vre Bondye.” (2 Chron. 19:3) Kuma eski nu’si nu kapav prepar nu leker avan lasanble? Lor dernye paz Réveillez-vous! 22 Mai, ek 8 Juin, u pu gayn enn avangu sa festin spirityel ki pe atann nu-la. Kifer eski nu pa pran letan pu reflesi lor sa bann lartik-la? Sa pu fer nu vinn pli inpasyan ankor pu gut seki Jéhovah finn rezerve pu nu. Prepar nu leker vedir usi demann Jéhovah led pu konpran lanseynman ki nu pu gayne ek pu aplik li dan nu lavi.—Ps. 25:4, 5.
6. Ki dezir nu ena, ek kifer?
6 Nu tu dezir pu aprann ankor plis lor Parol Bondye, parski nu kone ki se grasa sa ki nu pu kapav progrese pu gayn faver Bondye. (1 Pierre 2:2) Donk, anu asiste Lasanble Distrik “Mars Avek Bondye” ek ‘ansam, anu glorifye non Jéhovah.’—Ps. 34:3.
[Lankadre lor paz 3]
Bann Fason pu Glorifye Non Bondye
◼ Prepar nu alavans
◼ Montre konsiderasyon anver lezot
◼ Prepar nu leker