Ecouté ek Aprann
1. Kifer nou bizin faire bann grand zeffort pou ecouté ek aprann dan l’assemblée district?
1 Bientot, bann l’assemblée district pou 2013 pou commencé. Enn grand travail finn faire pou kapav prepare enn programme ki adapté ar besoin bann frere ek soeur dan le monde entier. Eski ou finn faire bann l’arrangement pou ki ou present toulé-trois jour l’assemblée? Dan bann grand l’assemblée ena beaucoup kitsoz ki kapav distraire nou, alors kitfois nou pou bizin faire bann grand zeffort pou donne tou nou l’attention programme ki pou ena. Bann session l’assemblée dure pli longtemps ki bann reunion congregation, alors nou bizin reste concentré pli longtemps. En plis, voyage ek bann lezot facteur kapav faire nou senti-nou fatigué. Ki pou aide nou pou reste concentré pou ki nou kapav ecouté ek aprann?—Deut. 31:12.
2. Couma nou kapav prepare nou leker pou l’assemblée?
2 Avant l’Assemblée Commencé: Lor nou site officiel www.pr2711.com, ena programme l’assemblée kot ena titre tou bann discours ek enn ou-soit deux verset principal chaque discours. Si nou kapav al lor Internet ek guette sa bann l’information-la a l’avance, sa pou aide nou pou prepare nou leker pou l’assemblée. (Ezra 7:10) Pendant ou l’Adoration en Famille, eski ou kapav prend le temps pou koz lor programme l’assemblée? Sa pou prepare ou famille pou attann l’assemblée avek impatience.
3. Ki pou aide nou pou ecoute bien pendant l’assemblée?
3 Pendant Programme: Si possible, al toilette avant ki session commencé. Teigne ou portable pou ki bann appel ou-soit bann message pa derange ou, ou-soit pou ki ou pa tenté pou envoye message pendant programme. Si ou bizin garde ou telephone allumé, reglé li dan enn fason pou ki li pa pou derange lezot si jamais enn dimoune telephone ou. Si ou pé servi enn tablette electronik, faire sa dan enn fason ki li pa derange lezot. Evite mangé-boire pendant programme. (Eccl. 3:1) Garde ou lizié fixé lor l’orateur. Kan pé lire enn verset, suive dan ou la Bible. Prend bann ti note.
4. Couma bann parent kapav aide zot zenfant pou ecouté ek aprann?
4 Nou aussi envie ki nou bann zenfant ecouté ek aprann. Proverbes 29:15 dire: “Kan laisse enn garson faire seki li envie, li pou faire so mama honté.” Alors, li bon ki bann famille assize ensam pou ki bann parent kapav veillé ki zot zenfant ecoute programme l’assemblée au lieu ki zot kozé, envoye message, ou-soit marche-marché. Mem si bann zenfant ankor trop tipti pou comprend tou seki pé dire, bann parent kapav faire zot aprann pou pa dormi ek pou assize trankil pendant l’assemblée.
5. Kifer li bon ki nou ré-guette seki nou finn aprann dan l’assemblée, ek couma nou kapav faire sa?
5 Apré ki l’Assemblée Fini Chaque Jour: Pa faire bann sorti ziska tard. Al dormi assez boner pou ou bien reposé. Kan ou ré-guette seki ou finn aprann, sa pou aide ou pou rappel li pli longtemps. Alors, si chaque soir ou ek ou famille prend deux-trois minute pou koz lor l’assemblée, sa pou faire zot di-bien. Si ou al restaurant avek ou bann camarade, kitfois ou kapav amenn ou bann note ek partage enn-deux point ki ou’nn bien apprecié. Kan ou retourne lakaz apré l’assemblée, ou kapav prend inpé le temps pendant ou l’Adoration en Famille pou guetté couma ou famille kapav applik bann conseil ki’nn gagné. Chaque semaine, ou kapav aussi reserve le temps pou examine enn portion dan bann nouveau publication ki’nn gagné.
6. Eski sa assez ki nou zis present pou l’assemblée? Expliké.
6 Enn grand repas pa pou servi grand kitsoz si nou pa mange seki’nn preparé ek digere sa mangé-la. Nou kapav dire pareil pou grand repas spirituel ki nou pou gagné pendant l’assemblée district. Anou bien profite sa l’assemblée-la kan nou assisté chaque session, nou ecoute bien, ek nou applik seki nou aprann.