Rasanble Ansam pu Donn Zeova Loner
1. Ki tem lasanble, ek kifer eski Zeova merit ki nu donn Li loner?
1 Zeova Li Tu-Pwisan par lafors. Li ena telman enn gran sazes ki nu pa kapav reysi konpran. So lazistis parfe ek Limem Li lamur. Antan ki Kreater, sa Kikenn ki donn lavi la, ek Suverin Liniver, Li tusel merit nu ladorasyon. (Psom 36:9; Rev. 4:11; 15:3, 4) Tem Lasanble Distrik pu sa lane la se “Donn Bondye Laglwar.” Sa lasanble la pu fortifye nu desizyon pu donn Li loner kuma sel vre Bondye.—Psom 86:8-10.
2, 3. Kuma eski enn bon program pu ed u pu profit lasanble byin?
2 Bizin Ena enn Bon Program: Pu nu kapav tir maximem profi pandan sa gran repa spirityel ki Zeova finn prepare pu nu la, li byin inportan ki nu prepar nu byin. (Efe. 5:15, 16) Eski u’nn fini fer tu bann laranzman konsernan transpor? Eski u’nn fini pran dispozisyon pu u gayn konze dan u travay ek lekol? Pa atann dernye minit pu fer sa bann kitsoz inportan la. Si u tarde pu demann konze, u kapav rat enn parti sa levennman byin zwaye la. Nu tu nu bizin prezan pu sak sesyon.
3 Fixe lobzektif pu ariv boner dan lasanble, sak zur. Sa pu ed u pu fini pran plas avan premye kantik. Sa pu usi ed u pu ena enn bon leta despri pu gayn lanseynman ki pu prezante. Bann laport lakur Lasal Lasanble pu uver 8:00 gramatin sak zur. Silvuple, rezerv bann plas zis pu u bann paran pros uswa bann ki vwayaz ansam avek u dan loto.
4 Kifer eski demann nu tu pu amenn enn repa pu midi pandan lasanble?
4 Li bon ki zot tu amenn enn repa pu midi olye zot kit lasal lasanble pu al aste manze andeor. Silvuple, evit aste manze avek bann marsan ki vinn devan Lasal Lasanble. U korperasyon dan sa domenn la pu fer ansort ki ena enn bon latmosfer ek donn u plis lokazyon pu zwenn bann lezot frer ek ser. (Psom 133:1-3) Silvuple, rapel ki pa gayn drwa amenn bann resipyan ki an ver ek bann labwason alkolik dan lasanble.
5. Kuma eski nu kapav kumans prepar nu leker pu lasanble?
5 Ekute ek Aprann: Dan lapriyer, Ezra ti prepar so leker pu aksepte parol Bondye. (Ezra 7:10) Li ti prepar so leker pu ekut bann lanseynman Zeova. (Proverb 2:2) Nu kapav kumans prepar nu leker pu lasanble avan mem ki nu kit nu lakaz. Kuma nu kapav fer sa? Se kan nu medit lor tem lasanble ek nu diskit sa avek nu fami.
6. Ki kitsoz kapav ed nu pu res konsantre lor program lasanble? (Get lankadre.)
6 Dan Lasal Lasanble, nu kapav truv ek tann buku kitsoz otur nu ki kapav distrer nu. Sa bann distraksyon la kapav anpes nu pu res konsantre lor seki orater la pe dir. Kan sa arive, nu pa reysi gayn bann linformasyon ki byin inportan. Bann sigzesyon ki truv dan lankadre ansam avek sa lartik la, kapav ed nu pu amelyor nu konsantrasyon.
7, 8. Kuma eski nu kapav montre konsiderasyon pu lezot?
7 Montre Konsiderasyon pu Lezot: Pandan program, nu kapav servi bann laparey foto ek bann kamera. Me pu evit distrer lezot, nu bizin res dan nu plas kan nu servi sa bann laparey la. Nu bizin teyn bann telefonn portab ek pager pu pa deranz lezot. Fode pa konekte okenn laparey personel avek sistem elektrik uswa sistem sonorizasyon Lasal Lasanble.
8 Wi, nu fite pu rasanble ansam pu donn Zeova loner! Anu tu byin deside pu donn Li loner kan nu asiste tu sesyon, kan nu byin ekute, ek kan nu aplik seki nu’nn aprann.—Det. 31:12.
[Lankadre lor paz 3]
Ekute Pandan Lasanble
▪ Reflesi lor tem bann diskur
▪ Get bann tex Labib
▪ Pran bann ti not
▪ Ekrir apar bann pwin pu aplike
▪ Reget seki u’nn aprann