Mythe 2: Bann mauvais al dan l’enfer

Ki l’origine sa mythe-la?

“Parmi tou bann philosophe grec, dimoune ki finn ena pli grand l’influence lor bann pensée traditionnel concernant l’enfer c’est Platon.”—Georges Minois, Histoire des enfers, Paris, Fayard, 1991, page 50.

“A partir la moitié 2^eme siecle nou lepok, bann chretien ki ti gagne enn certain formation lor philosophie grec ti commence trouve sa necessaire pou exprime zot la foi dan enn fason ki reflete sa bann philosophie-la . . . Philosophie ar ki zot ti pli adapté ti platonisme [bann l’enseignement Platon].”—The New Encyclopædia Britannica (1988), volume 25, page 890.

“L’enseignement l’Eglise confirmé ki l’enfer existé ek ki li duré pou touletan. Desuite apré la mort, nâme bann dimoune ki finn faire enn peché mortel desann dan l’enfer, kot la zot gagne punition l’enfer, ‘enn difé eternel.’ Pli grand punition l’enfer c’est separation eternel avek Bondié.”—Catéchism de l’Église catholique (1992), I^re partie, II^e section, article 12, IV, § 1035.

Ki la Bible dire?

“Bann vivant au moins zot koné ki zot pou mort, mais bann mort pa konn nanyin ditou. . . . parski pena ni travail, ni reflexion, ni connaissance, ni sagesse dan Shéol kot to pé allé.”—Ecclésiaste 9:5, 10, Bible de Jérusalem.

Mot hébreu she’ôl, ki vedir “place kot bann dimoune mort allé,” inn traduire par “l’enfer” dan certain version la Bible. Ki Ecclésiaste 9:5, 10 montré nou concernant condition bann mort? Eski zot souffert dan shéol pou ki zot paye zot bann erreur? Non, parski zot “pa konn nanyin.” C’est a cause sa ki Job, kan li ti pé bien souffert a cause enn maladie grave, ti suppliye Bondié pou ‘cachiette li dan l’enfer [hébreu: she’ôl].’ (Job 14:13; Sacy) Ki signification so la priere ti pou ena si shéol ti enn place kot ena tourment eternel? Dapré la Bible, l’enfer li zis enn tombe kot tou dimoune allé, kot nepli ena okenn activité.

Eski sa definition l’enfer-la, li pa pli logik ek en accord avek bann l’Ecriture? Ki mauvais action, mem ki quantité terrible li été, kapav pousse enn Bondié ki ena l’amour pou faire enn dimoune souffert pou touletan? (1 Jean 4:8) Mais si l’enfer li enn mythe, eski sa vedir ki la vie dan le ciel aussi li enn mythe?

Examine sa bann verset la Bible-la: Psaume 146:3, 4; Actes 2:25-27; Romains 6:7, 23