Joba

 2 “Mandra-pahoviana ianao no hiteniteny toy izany,+

Nefa rediredy* fotsiny ny teny aloaky ny vavanao?+

 3 Andriamanitra ve dia hamadika ny rariny?+

Ary ilay Mahery Indrindra ve dia hanao ny tsy rariny?+

 4 Raha nanota taminy ny zanakao,

Dia avelany hizaka ny vokatry ny fikomiany izy ireo.

 5 Raha mitady an’Andriamanitra ianao,+

Sady mitalaho famindram-po amin’ilay Mahery Indrindra,

 6 Ary raha madio sy marina ianao,+

Dia ho efa nifoha hamonjy anao izy,

Ka ho efa naveriny tamin’ny laoniny ny fonenan’ny fahamarinanao.

 7 Ary na kely aza no niandohanao,

Dia ho lehibe kosa no hiafaranao.+

 8 Mba anontanio tokoa ange ny olona taloha e,+

Ary mifantoha amin’izay efa nodinihin’ireo razany!+

 9 Fa vao omaly isika,+ ka tsy mahalala na inona na inona,

Satria aloka ihany ny androntsika eto an-tany.+

10 Tsy hampianatra anao ve izy ireo ka hilaza aminao,

Ary hamoaka teny avy ao am-pony?

11 Haniry tsara ve ny zozoro+ raha tsy eny amin’ny heniheny?

Ary haniry tsara ve ny bararata raha tsy misy rano?

12 Mbola tanora sy tsy voatapaka akory izy,

Nefa ho maina alohan’ny ahitra hafa rehetra.+

13 Toy izany koa no hiafaran’ny fiainan’izay rehetra manadino an’Andriamanitra.+

Ary ho foana ny fanantenan’ny mpivadi-pinoana.+

14 Levona koa ny tokiny,

Ary tranon-kala no ianteherany.+

15 Hiankina amin’ny tranony izy, nefa hianjera izany,

Hamikitra amin’izany izy, nefa tsy haharitra izany.

16 Maniry tsara izy azon’ny masoandro,

Ary misandrahaka ao amin’ny zaridaina misy azy.+

17 Mifamatopatotra eo amin’ny antontam-bato ny fakany,

Ary mijery trano vato izy.

18 Raha misy manongotra anefa izy,+

Dia handa azy ilay toerana nisy azy, ka hanao hoe: ‘Mbola tsy nahita anao mihitsy aho.’+

19 Ho levona toy izany ny fiainany,+

Ary hisy hafa indray hitsimoka avy eo amin’ny vovoka.

20 Fa tsy hanary ny tsy manan-tsiny Andriamanitra,

Sady tsy hitantana ny mpanao ratsy.

21 Amin’ny farany dia hofenoiny hehy ny vavanao,

Ary hofenoiny horakora-pifaliana ny molotrao.

22 Hitafy henatra izay mankahala anao,+

Ary ho levona ny tranolain’ny ratsy fanahy.”