Aiza no Ahazoanao ny Fampianarana Tsara Indrindra?
“Tsy misy hafa amin’izay ataon’ny sokitra amin’ny bolongana marbra, no ataon’ny fampianarana amin’ny saina.” — Joseph Addison, 1711.
EFA nianatra tany an-tsekoly ve ianao? Ny ankamaroan’ny olona — fa tsy ny rehetra — no afaka mamaly hoe eny. Eo am-pidirantsika amin’ny taonjato faha-21, dia ankizy an-tapitrisany maro no tsy ampianarina ara-dalàna. Efa ela no toy izany no izy, hany ka olon-dehibe efa ho arivo tapitrisa ankehitriny no tsy mahay mamaky teny sy manoratra.
Zavatra ilaina fototra anefa ny fampianarana tsara. Tsy mihevitra azy io ho haitraitra tsy mety ho azo ny maro amin’izao andro izao, fa mihevitra azy io ho zon’ny ankizy sy ny olon-dehibe kosa. Ahoana anefa no ahazoana fampianarana tsara raha tsy ampy ny hoenti-manana? Ahoana raha vitsy ny boky, na tsy ampy ny mpampianatra mahay, na ny sekoly?
Aiza tokoa no ahazoan’ny olona fampianarana tsara izay mampirisika ny tsirairay handray anjara, manitatra ny fahalalany ny tontolo manodidina azy ary manome azy ny zava-tsarobidy ara-panahy afaka manova ny fiainany? Inona no fampianarana manantitrantitra ny fitsipi-pitondran-tena mahasoa sy mampiseho ny fomba hananana fiainana tsara kokoa ary manome fanantenana azo antoka ny amin’ny hoavy? Tena misy sy azon’ny rehetra raisina tokoa ve ny fampianarana toy izany?
Fototry ny fampianarana tsara indrindra
Na dia toa mahagaga aza izany, dia afaka mamaly tsara isika hoe: Eny, misy fampianarana tsara azon’ny rehetra raisina. Marina izany, satria misy fitaovam-pampianarana mahery afaka manome fototra ho amin’izy io. Izany dia “boky fianarana” iray tranainy nefa manan-kaja, azo vakina manontolo na tapany, amin’ny fiteny 2 200 mahery maneran-tany. Saika ny rehetra maneran-tany no afaka manana azy io amin’ny fiteny iray azony. Inona io boky io?
Izy io dia ny Baiboly, boky iray nambara hatraiza hatraiza ho ny boky manan-danja indrindra amin’ny boky rehetra nosoratana hatramin’izao. “Azo antsoina marina hoe nahita fianarana ny olon-drehetra manana fahalalana feno momba ny Baiboly”, hoy ny nosoratan’i William Lyon Phelps, manam-pahaizana iray tany am-piandohan’ny taonjato faha-20. “Tsy misy fahalalana na kolontsaina hafa, na dia mahafaoka be sy tsara toy inona aza, (...) mahasolo azy araka ny tokony ho izy.”
Ny Baiboly dia fitambaram-boky nosoratana nandritra ny 1 600 taona eo ho eo. Izao koa no nolazain’i Phelps momba an’io boky manan-danja io: “Avy ao amin’ny Baiboly no anovozantsika bebe kokoa ny hevitsika, ny fahendrentsika, ny fomba fisainantsika, ny literatiorantsika sy ny zavakantontsika ary ny filamatsika, noho ny avy ao amin’ny boky hafa rehetra mitambatra. (...) Amiko dia sarobidy kokoa ny fianarana Baiboly tsy nisy fianarana tany amin’ny oniversite noho ny fianarana tany amin’ny oniversite tsy nisy fianarana Baiboly.”
Ankehitriny, dia misy fampianarana lehibe miorina amin’ny Baiboly ataon’ny fitambaran’olona kristianina Vavolombelon’i Jehovah maneran-tany. Tsy fampianarana fototra mamaky teny sy manoratra fotsiny io fampianarana io, fa mampitombo saina sy manatsara fitondran-tena koa. Misy vokany tsara eo amin’ny fomba fijerin’ny olona ny hoavy koa izy io, ka manome fototra ho an’ny fanantenana marim-pototra ny amin’ny hoavy tsara lavitra noho ny teo aloha.
Iangaviana ianao hamantatra momba io fandaharam-pampianarana manome fiainana io, amin’ny famakiana ny lahatsoratra manaraka.