Voavonjy Izy Ireo Satria Nankatò
NY TEMPOLIN’I Jerosalema no foiben’ny tontolo jiosy fahiny. Nambaran’i Jesosy Kristy mialoha anefa fa horavana io firenena io. Tsy nanondro daty izy, fa nilaza ireo zavatra hiseho alohan’ilay fandravana. Nampirisika ny mpianany àry izy mba hiambina hatrany sy hiala teo amin’ilay faritra nampidi-doza.
Izao no nambaran’i Jesosy: “Rehefa hitanareo fa misy miaramila mitoby manodidina an’i Jerosalema, dia fantaro fa manakaiky ny fandravana azy.” Hoy koa izy: “Raha vantany vao hitanareo mitsangana ao amin’ny toerana masina ilay zavatra maharikoriko mahatonga faharavana, ... dia aoka izay any Jodia handositra any an-tendrombohitra.” Nampirisihin’i Jesosy ny mpianany mba tsy hiverina hanangona ny fananany. Tsy maintsy nandositra haingana kosa izy ireo raha te ho voavonjy.—Lioka 21:20, 21; Matio 24:15, 16.
Nitondra miaramila romanina tany Jerosalema i Cestius Gallus tamin’ny taona 66, mba hampandry tany. Niditra tao an-tanàna mihitsy izy, ary naka an-keriny ny tempoly. Nikorontana ny tao an-tanàna. Izay olona niambina hatrany dia nahita fa nananontanona ny loza. Azo natao ve anefa ny nandositra? Nisinda tampoka i Cestius Gallus sy ny miaramilany. Nanenjika azy ireo ny Jiosy mpikomy. Tamin’izay indrindra no fotoana tokony ho nialana tao Jerosalema sy tany amin’ny tanànan’i Jodia rehetra!
Niverina indray ny miaramila romanina tamin’ny taona 67, notarihin’i Vespasien sy Titus zanany. Niely nanerana ny firenen’Israely ny ady tamin’izay. Teo am-piandohan’ny taona 70, dia nasian’ny Romanina fefy hazo maranitra nanodidina an’i Jerosalema. Tsy nisy olona afaka nandositra intsony. (Lioka 19:43, 44) Nifamono ny samy Jiosy. Izay sisa tsy maty tamin’izany kosa novonoin’ny Romanina, na lasa babo. Rava tanteraka ilay tanàna sy ny tempoliny. Jiosy maherin’ny iray tapitrisa no nijaly sy maty tamin’izany, araka ny voalazan’ilay Jiosy mpahay tantara atao hoe Josèphe. Tsy namboarina intsony ilay tempoly taorian’izay.
Raha mbola tao Jerosalema ireo Kristianina tamin’ny taona 70, dia mety ho voavono na lasa babo niaraka tamin’ny olon-kafa. Voalazan’ny mpahay tantara anefa fa nihaino ny fampitandreman’Andriamanitra ny Kristianina, ka nandositra niala an’i Jerosalema sy ny tanànan’i Jodia rehetra, ary nankany amin’ny tendrombohitra tany atsinanan’ny Reniranon’i Jordana. Nisy tamin’izy ireo nanorim-ponenana tany Pela, faritanin’i Pere. Niala tany Jodia izy ireo, ary tsy niverina tany intsony. Voavonjy izy ireo satria nihaino ny fampitandreman’i Jesosy.
Mankatò ve ianao rehefa azo antoka ny fampitandremana?
Betsaka ny fampitandremana tsy tanteraka akory, ka olona maro no tsy taitra intsony rehefa misy fampitandremana. Mety hamonjy ny ainao anefa ny fihainoana fampitandremana.
Nisy fampitandremana tany Chine tamin’ny 1975, fa hisy horohoron-tany. Nandray fepetra ny manam-pahefana, ary nanaraka izany ny vahoaka. Olona an’arivony no voaro tamin’ny loza.
Tamin’ny Aprily 1991, dia nanao tatitra ireo mponina teo akaikin’ny Volkano Pinatubo, any Philippines, fa namoaka setroka sy lavenona ilay tendrombohitra. Nandinika ilay toe-javatra nandritra ny roa volana ny Fikambanana Mpamantatra Volkano sy Horohoron-tany tany Philippines, ary nampitandrina fa nananontanona ny loza. Olona an’aliny no nesorina avy hatrany teo amin’ilay faritra. Nipoaka ilay volkano tamin’ny 15 Jona maraina. Nisy ranon-javatra mahamay nahatratra valo kilaometatra toratelo mahery nipitika teny amin’ny habakabaka, ary avy eo nandrakotra ny faritra manodidina. Olona an’arivony no tsy niharan-doza, satria nihaino fampitandremana.
Mampitandrina ny Baiboly fa horavana ity tontolo ity. Miaina amin’ny andro farany isika ankehitriny. Miambina hatrany ve ianao arakaraka ny hanakekezan’ny farany? Manao zavatra ve ianao mba hiarovana ny ainao? Mampitandrina ny olon-kafa ve ianao mba hanao toy izany, satria tsapanao fa efa akaiky ny farany?
[Sary, pejy 20]
Olona maro no nihaino ny fampitandremana, ka voaro rehefa nipoaka ny Volkano Pinatubo
[Sary, pejy 21]
Tsy niharan-doza ireo Kristianina nihaino ny fampitandreman’i Jesosy, rehefa noravana i Jerosalema tamin’ny taona 70