Ilay Miaramila sy Ilay Ankizivavikely

Nisy ankizivavikely israelita anankiray tany Syria. Fa naninona izy no lasa lavitra be tany dia tafasaraka tamin’ny fianakaviany? Miaramila syrianina no nitondra an’azy tany, dia lasa mpiasan’izay vehivavy izay izy. Lehiben’ny miaramila ny vadin’io vehivavy io, ary Namàna no anarany. Nivavaka tamin’i Jehovah ilay ankizivavikely, na dia tsy nisy nanao an’izany aza ny olona tany Syria.

Voan’ny aretin-koditra nahatsiravina i Namàna, sady naharary be an’azy foana ilay izy. Te hanampy azy ilay ankizivavikely, dia hoy izy tamin’ny vadiny: ‘Mahafantatra olona afaka manasitrana ny vadinao aho. Elisa no anarany. Mpaminanin’i Jehovah any Israely izy.’

Notenenin’ilay vehivavy tamin’ny vadiny ny tenin’ilay ankizivavikely. Tena te ho sitrana i Namàna, ka lasa nankany amin’i Elisa tany Israely. Nieritreritra izy hoe hanajanaja be azy i Elisa. Ny mpiasan’i Elisa fotsiny anefa no nirahiny handray azy dia hilaza taminy hoe: ‘Mandehana, hono, ianao mandro impito ao amin’ny Reniranon’i Jordana, dia ho sitrana.’

Diso fanantenana be i Namàna. Hoy izy: ‘Noheveriko hoe izy mihitsy no hivavaka amin’ny Andriamaniny, dia hanao fahagagana ka ho sitrana aho. Fa maninona aho no asainy mankany amin’izany renirano eto Israely izany? Izahay ange manana renirano tsara kokoa any Syria e! Dia maninona raha any aho no mandeha?’ Tezitra be i Namàna dia lasa nandeha.

Soa ihany fa notenenin’ny mpiasany i Namàna hoe: ‘Angaha ianao tsy te ho sitrana e? Zavatra tsotra kely ange izany asain’ilay mpaminany ataonao izany e! Dia maninona raha atao fotsiny?’ Nanaraka ny tenin-dry zareo i Namàna, dia nandeha nisitrika impito tao amin’ny Reniranon’i Jordana. Rehefa nivoaka fanimpitony avy tao anaty rano izy, dia sitrana tanteraka! Tena faly be izy ka lasa niverina nisaotra an’i Elisa. Hoy izy: ‘Fantatro amin’izay izao fa i Jehovah no tena Andriamanitra.’ Mba ahoana izao hozy ilay ankizivavikely israelita rehefa nahita an’ i Namàna sitrana tamin’izy niverina tany an-tranony?