Vavolombelona ny kristiana marina

Hatramin’ny taona maromaro izao ireo mpitondra Fiangonana dia miresaka be dia be ny amin’ny fanambarana. Tsy misy mahagaga mihitsy amin’izany, satria ny teny hoe “vavolombelona” (martus amin’ny teny grika) sy ireo teny mitovy fototra aminy hoe “manambara” sy “fanambarana” dia hita in-83 ao amin’ny Soratra grika kristiana (“ny Testamenta vaovao”), araka ny fandikan-teny Segond. Aoka anefa hodinihintsika akaiky kokoa ny sasany amin’ireo fanambarana natao teo anivon’ny fivavahana lazaina fa kristiana.

ARAKA ny filazan’ny L’Osservatore Romano, dia toa hoe nilaza toy izao ny papa Jean-Paul II: “Araka ny nosoritan’i Paul VI nodimbiasako, ny fanambarana dia ‘foto-javatra tena lehibe, amin’ny ankapobeny dia ny voalohany, amin’ny fitoriana ny evanjily’ (Evangelii nuntiandi, n. 21). Tena ilaina indrindra izy io amin’izao androntsika izao, eo anoloan’ny fahaverezan-kevitra sy ny fahatakonan’ny fahatsarana mampiseho fahasahiranana izay miharihary mazava kokoa ihany ho toy ny fahasahiranana tanteraka eo amin’ny sivilizasiona.” (La Documentation catholique tamin’ny 3 jona 1984). Herintaona talohan’izay, io gazety io ihany dia efa namoaka tatitra ny amin’ny fandraisan’ny papa olona teo ambanin’ny lohateny hoe “Mila vavolombelona kristiana ny asa eo amin’izao tontolo izao”.

Miharihary àry fa antitranterin’ny Vatican ny amin’ny ilàna hanao fanambarana kristiana. Ahoana ny amin’ireo Fiangonana protestanta?

Ny fivoriambe fahenina nataon’ny Filan-kevitra eokimenikan’ireo Fiangonana ivondronan’ny finoana 301 ankehitriny, dia natao tany Vancouver tamin’ny 24 jolay ka hatramin’ny 10 aogositra 1983. Teo am-pifaranan’io fivoriana io izy dia namoaka tao amin’ny Revio iraisam-pirenen’ny asa nanirahana nataony (oktobra 1983, anglisy), lahatsoratra iray 36 pejy mitondra ny lohateny hoe “Ny fomba hanaovana fanambarana eo amin’izao tontolo izao voazarazara”. Tao amin’ny fizarana iray nitondra ny foto-kevitra hoe “Tokony hanao fanambarana ny kristiana rehetra”, dia hita tao izao fanantitranterana mazava dia mazava izao: “Ho an’ny kristiana, ny fanaovana fanambarana dia sady valiny omena an’Andriamanitra no fisehoan’ny tsy fivadihana aminy (...). Asa nanirahan’Andriamanitra ny fanaovana fanambarana. Manao fanambarana ny amin’ny fahamboniana sy ny fitiavan’Andriamanitra Mpamorona sady Loharanon’aina isika.”

Ao amin’ny Famakafakana sy Famoaboasana, gazety iray ara-teolojia anglisy misy hevitra batista, dia mbola voamarika koa izao hevitra izao: “Ny fandinihana ny bokin’ny Asa dia mampiharihary fa nisy mpino vaovao niaraka tamin’ny Fiangonana satria nanao fanambarana ireo kristiana. Koa raha tsy manova olona intsony ny kristiana, dia azo inoana fa satria tsy manao fanambarana izy.”

Na dia voasaratsaraka aoka izany aza ny fivavahana lazaina fa kristiana raha ny amin’ny hevitra sy ny foto-pampianarana, dia toa mifanaraka mba hiaiky fa tokony hanao fanambarana izy ireo. Nefa moa ve ny mpikambana ao aminy miseho ho mahay mitana izany andraikitra izany.

Ny amin’izany, dia nanoratra toy izao i Michael Green, pastoran’ny eglizy Saint-Aldgate any Oxford, Angletera: “Nampangaina ho ‘namadika izao tontolo izao’ ireo razambentsika ara-panahy rehefa niresaka ny vaovao tsara ny amin’i Jesosy (Asa. 17:6). (...) Amin’izany indrindra no tsy itoviantsika be dia be amin’ny Fiangonana tany am-boalohany izay nandraisan’ny lehilahy sy ny vehivavy tsirairay avy ho adidy ny hanao fanambarana ny amin’i Jesosy Kristy tamin’ny alalan’ny fomba rehetra azony nampiasaina.”

Ny bokikely batista iray nitondra ny anarana hoe Fanambarana eo amin’izao tontolo izao ankehitriny (anglisy) dia nanambara izao manaraka izao: “Hilaza anakampo toy izao angamba ny kristiana be fandavan-tena iray: ‘Raha tsy maintsy hanao fanambarana amin’olona aho, dia tsy ho haiko ny hoe aiza no tokony hanombohana.’ ” Eo aoriana kokoa, dia izao no teny nanampiny: “Rehefa resahina ny amin’ny fanambarana, dia maro ny anisan’ny Fiangonana batista izay manohitra avy hatrany hoe: ‘Raharahan’ny pastora izany; manakarama azy izahay mba hanaovany izany.’ ”

Mitovitovy amin’izany koa, dia izao no azo novakina tao amin’ny boky anglikana iray atao hoe Fampitana hevitra kristiana: “Rehefa dinihina, matoa ny kristiana miala amin’ny andraikiny hampita ny filazantsara, dia tsy isalasalana fa noho izy ireo tsy manan-javatra firy holazaina fotsiny.”

Marina fa “tsy manan-javatra firy holazaina” ireo izay mankany amin’ny Fiangonan’ny fivavahana lazaina fa kristiana. Ary izany indrindra no fototry ny zava-manahirana. Tsy tsapan’izy ireo ny fisehoan’ny “famantarana” izay, araka ny filazan’i Jesosy, dia tokony hanamarika ny ‘fanatrehany’ amin’ny maha-mpanjaka sy “ny fifaranan’ny fandehan-javatra”. Ireo izay nahita izany “famantarana” izany kosa dia mahatsiaro ho voatosika hanao fanambarana ny aminy. Marina tokoa fa mahafaly ny mahatsapa fa amin’izao androntsika izao ny kristiana marina dia manan-javatra be dia be holazaina. Noho izany antony izany no anambarany amin-jotom-po ny hahatongavan’ny Fanjakana nankinin’i Jehovah tamin’i Jesosy Kristy. — Matio 24:3-14; Isaia 43:12.