Tafaray mba hanambara ny Tenin’i Jehovah

“[Manàna] eo aminareo toe-tsaina toy ny an’i Kristy Jesosy, mba ho amim-pifanarahana sy amin’ny vava iray no hankalazanareo an’ilay Andriamanitra sady Rain’i Jesosy Kristy Tompontsika.” — ROMANA 15:5, 6, MN.

1. a) Inona avy no fandaharana nataon’i Jehovah mba hampiraisana ny vahoakany? b) Araka ny filazan’ny Soratra masina, ahoana no tokony ho filaharan’izany fampiraisana izany?

JEHOVAH no nahatonga ny Vavolombelony hifaly maneran-tany noho ny firaisan-tsaina mahagaga. Tafiditra tao amin’ny fomba fitondrany ny tranony izany, araka ny nasehon’i Paoly tao amin’ny taratasiny ho an’ny Efesiana (1:10) raha niresaka ny amin’ny “fitondrana hatao mandra-pahatapitry ny andro voatendry, hanangonany ny zavatra rehetra ho iray ao amin’i Kristy, na ny any an-danitra, na ny ety an-tany” izy. Io fitondrana io dia tokony hanangona voalohany indrindra “ondry vitsy” kristiana voahosotry ny fanahy masina sy voantso handova ny lanitra, avy eo dia “olona betsaka” ‘avy amin’ny firenena rehetra’ izay hanantena ho tafita velona mba hahita “tany vaovao” marina nampanantenain’Andriamanitra haorina. — Lioka 12:32; Apokalypsy 7:3, 4, 9, 13-17; 21:1, 5.

2. Inona no mahatonga ny Vavolombelon’i Jehovah ho afaka hiresaka “amim-pifanarahana”?

² Tena “amim-pifanarahana” tokoa no anambaran’ny Vavolombelon’i Jehovah ny hafatra momba ny Fanjakany. Matoa tafaray toy izany izy ireo, dia satria nanaraka any amin’ny tany rehetra ny “saina [toe-tsaina, MN ], izay tao amin’i Kristy Jesosy koa” fony izy nivahiny teto an-tany. Tsy anisan’izao tontolo izao ankehitriny miavonavona tokoa Jesosy. Nanetry tena kosa aza izy mba hanatanteraka ny sitrapon’Andriamanitra, sy mba hamorona eo amin’ny mpianany, firaisan-tsaina mafana sy miorina amin’ny fitiavana. Tamin’ny fanaovana toy izany, dia tsy nalatsany ny fototry ny asa fampiraisana maneran-tany izay tokony hampiavaka ny kristiana marina ao anatin’ireo taona ho avy. — Filipiana 2:5-8; Jaona 13:34, 35; 17:14.

3. a) Inona no fifanoheran-javatra manaitra voamarika amin’izao andro izao eto an-tany? b) Ahoana no anampian’ny Soratra masina antsika hamantatra ny fikambanana iraisam-pirenen’ny kristiana marina?

³ Ny firaisan-tsaina ao amin’ny fandaminana kristiana dia nahita ny fisehoany tsara indrindra tao anatin’izao “andro farany” izao izay mampifanohitra azy indrindra amin’ny fankahalana sy ny tsy firaharahana lalàna miely aoka izany ao anatin’ny fandehan-javatra rotidrotika eo ambany fahefan’i Satana (II Timoty 3:1-5, 13; Matio 24:3, 12). Mbola tsy nisy mihitsy teo aloha, tany amin’ny tany 203, fandaminana mifandrindra tanteraka toy izany raha ny amin’ny zavatra inoany sy kendreny ary ataony. Raha ny marina, ny fikambanana iraisam-pirenen’ny mpianatr’i Jesosy dia fantatra amin’izao andro izao amin’ny vokatra aterany. — Jaona 15:8; Hebreo 13:15; Galatiana 5:22, 23.

Ny fomba hiasana ao anatin’ny firaisan-tsaina

4. a) Fiadian-kevitra inona no nitranga tao amin’ny kongregasiona tamin’ny taonjato voalohany? b) Araka ny Asan’ny apostoly 15:1-6, fomba teokratika inona no narahina mba handaminana izany?

⁴ Ny toko faha-15 amin’ny Asan’ny apostoly dia manazava tsara ny fomba azon’ny fandaminan’i Jehovah iasana ao anatin’ny firaisan-tsaina. Alao sary an-tsaina ny fitambarana vavolombelona matotra: ireo apostoly 12, loholona hafa tao amin’ny kongregasiona tany Jerosalema, ary farany dia Paoly sy Barnabasy, loholona tao amin’ny kongregasiona tany Antiokia. Tany Antiokia toy ny tany Jerosalema, ny kristiana sasany nanam-piandohana jiosy dia nino mafy fa ny olona eo amin’ireo firenena dia tokony hoforana sy hitandrina ny lalàn’i Mosesy mba hovonjena. Koa “nivory ny Apostoly sy ny loholona mba hihevitra izany zavatra izany”. — Asan’ny apostoly 15:1-6.

5-7. a) Tamin’ny heviny ahoana moa no hoe “nisy ady hevitra be ihany”? Inona avy no fanambarana natao? b) Ahoana no nanampian’ny Soratra masina hanapaka ilay raharaha? d) Inona no hevitra naposak’i Jakoba taorian’ny fieritreretana tsara? Niafara tamin’ny fanapahan-kevitra farany inona izany? e) Inona avy no fandaharana natao rehefa nifarana ny fivoriana?

⁵ Nandinika ilay zava-nanahirana tsy nisy fitompoan-teny fantatra ireo lehilahy nahatoky ireo, tamin’ny fandanjalanjana tamim-pitandremana ny eny sy ny tsia. Tsy nanapaka na inona na inona mialoha izy ireo. Vonona izy ny handinika ilay raharaha tamin’ny lafiny rehetra. Hisy “ady hevitra be”, nefa tsy isalasalana fa hatao amim-pilaminana izany ary hihaino daholo ny hevitry ny hafa ny rehetra. Ny apostoly Petera koa dia nanamarina fa nanome ny fanahiny masina ho an’olona tsy voafora Andriamanitra, ka izany dia miharihary fa fanaporofoan-kevitra mavesa-danja mba hanamarinana fa tsy notakina intsony tamin’ireo izay hovonjena ny famorana ny nofo. Tetsy andaniny koa dia nilaza mihoatra noho izany Barnabasy sy Paoly tamin’ny fitantarana ny fahagagana maro nataon’Andriamanitra tamin’ny fanompoan’izy ireo teo amin’ireo firenena. — Asan’ny apostoly 15:7-12.

⁶ Raha efa izany, dia naka teny tao amin’ny Soratra masina i Jakoba mba hanamafisana ny fanjohian-kevitra vao natao. Araka ny nampahatsiaroviny, Amosa mpaminany (9:11, 12) dia nanambara fa haneho indray ny fanohanany ny olony Andriamanitra amin’ny alalan’ilay Davida Lehibe, dia Jesosy Kristy, ka hanitatra izany fankasitrahana izany amin’ny ‘jentilisa rehetra, izay efa niantsoana ny anarany’. Tsy hitan’i Jakoba àry izay ilàna ny hanakorontanan-tsaina ny olona avy amin’ireo firenena izay niova hanaraka ny kristianisma amin’ny fanerena azy ireny hoforana sy hitandrina ireo fitsipika maro karazana tafiditra tao anatin’ny lalàn’i Mosesy. Ilaina kosa anefa ny zavatra sasantsasany: fifadiana ny fanompoan-tsampy sy izay rehetra mety ho fandraisana ra ary ny fahalotoam-pitondrantena. — Asan’ny apostoly 15:13-21.

⁷ Farany, ny kolejy foibe tafavory tany Jerosalema dia tonga tamin’ny fanatsoahan-kevitra niraisana. Haniraka mpitondra hafatra izy mba hitondra any amin’ny kongregasionan’i Antiokia, taratasy iray izay nifarana tamin’izao fampaherezana izao: “Raha mahatandrin-tena hifady izany hianareo, dia ho soa. Veloma hianareo. — Asan’ny apostoly 15:22-29.

Modely teokratika

8. a) Manaiky hotarihin’ny inona moa ny Kolejy foibe amin’izao andro izao mba hanaovana fanapahan-kevitra iray? b) Tonony ny sasantsasany amin’ireo fanazavana nentina vao haingana.

⁸ Amin’ny maha-solontenan’ny “mpanompo mahatoky sy malina” notendren’ny Tompo eto an-tany azy, ny kolejy foiben’ny Vavolombelon’i Jehovah dia manaraka foana an’io modely apostolika io (Matio 24:45-47). Noho ny fanandraman-javatra azony teo amin’ny fanarahana ny kristianisma sy ireo fotopoto-pitsipika ao amin’ny Baiboly ary ny fitarihan’ny fanahy masina, io antokon’olona Vavolombelona mitafy hosotra io dia afaka manatsoaka hevitra teokratika ny amin’ireo raharaha izay mahakasika akaiky ny kongregasiona. Ohatra, tao anatin’izao taona faramparany izao ny Kolejy foibe dia nanaraka ny fomba voalazan’ny Soratra masina mba hanomezana fahazavana ny amin’ny hevitra isan-karazany. Aoka hotononintsika ny hevitry ny teny hoe “minisitra” araka ny Baiboly, ny anjara raisin’ny fieritreretana kristiana, ny fitanam-piadiana sy ny fampiharana ho avy ny sary sasany ao amin’ny bokin’Isaia amin’ny Paradisa an-tany. — Jereo Jaona 14:26; I Korintiana 2:10.

9. Ahoana no tokony hataon’ireo loholona mba handaminana ireo zava-manahirana miseho ao anatin’ny kongregasionany?

⁹ Isaky ny kongregasiona, ireo loholona dia tokony hifikitra koa amin’ny fomba fanao voalazalaza ao amin’ny Asan’ny apostoly toko faha-15 rehefa manan-java-manahirana halamina. Voalohany indrindra, dia manambara mazava ilay zava-manahirana sy ny zava-nisy nifandray tamin’izany. Manaraka izany, dia mangataka amin’ny vavolombelona mendrika itokisana mba hanome porofo hentitra sy azo hamarinina. Mifanitsy amin’izany, dia mandinika ny Soratra masina mba hahalalana ny fiheveran’i Jehovah, amin’ny fitadiavana fanampiana araka izay rehetra azo atao ao amin’ireo bokin’ny Fikambanana Watch Tower. Farany, dia mampiasa ny vavaka sy miezaka ho tonga amin’ny fanatsoahan-kevitra izay sady iaraha-manaiky no mifanaraka amin’ny fampianaran’ny Tenin’Andriamanitra sy mahasoa ny kongregasiona. — Isaia 48:17; I Korintiana 14:33.

Antom-pifaliana

10. a) Inona no tokony ho vokatr’ireo fanapahan-kevitra teokratika eo amintsika? b) Amin’izao androntsika izao, fanavaozana inona no nanampy tamin’ny fanatanjahana sy ny fampitomboana ny vahoakan’Andriamanitra?

¹⁰ Raha vantany vao fantany ny fanapahan-kevitry ny kolejy foibe, ireo anisan’ny kongregasiona tany Antiokia amin’ny ankapobeny dia “nifaly noho ny anatra tsara”. Toy izany koa amin’izao andro izao, ny Vavolombelon’i Jehovah dia faly mahafantatra ireo fanapahan-kevitra natao amin’ny lafin’ny fandaminana sy ireo fanazavana ny foto-pampianarana izay miara-miasa ho amin’ny fahasalaman’izy ireo ara-panahy sy ny fandrosoan’ny asan’Andriamanitra (jereo Titosy 2:1). Ny Kolejy foibe anefa dia tsy mila intsony ny manome ireo toromariny amin’ny alalan’ny taratasy soratanana sy mampiely izany amin’ny alalan’ny mpitondra hafatra mandeha an-tongotra. Noho ireo fomba fifamoivoizana amin’ny andro ankehitriny sy ireo fanontam-pirinty ampiasain’ny sampan’ny Fikambanana Watch Tower 30 mahery, dia azony atao izao ny mampita “ny tenin’ny Tompo [ny vaovao tsaran’ny tenin’i Jehovah, MN ] amin’ny kristiana an-tapitrisany maro ao anatin’ny fotoana fohy dia fohy. Izany dia atao indrindra amin’ny alalan’ny Ny Tilikambo Fiambenana. Amin’izany no anohizan’ireo kongregasiona maneran-tany ‘mihamahery finoana sady mihamaro isan’andro’. — Asan’ny apostoly 15:30 ka hatramin’ny faha-16:5.

11. Ahoana no nampiasan’i Jehovah Ny Tilikambo Fiambenana mba hanatanterahana ny faminaniana voasoratra ao amin’ny Isaia 30:18-21?

¹¹ Ireo izay mamaky Ny Tilikambo Fiambenana hatramin’ny taona maro dia faly mahatsapa ny fitaran’ny fampielezana azy. Tao anatin’ny 105 taona nisian’ny tantara, ny indray mivoaka amin’io gazety io izay 6 000 isam-bolana tamin’ny teny anglisy dia tafakatra ho 11 150 000 amin’ny fiteny 102, ka mivoaka indroa isam-bolana ny fanontana lehibe indrindra. Tsy isalasalana fa Jehovah, Mpampianatra lehibe antsika, dia nampiasa be dia be Ny Tilikambo Fiambenana mba hanatanterahana izao fampanantenana izao: “Sambatra izay rehetra miandry Azy (...) Fa na mivily ho amin’ny ankavanana hianao, na mivily ho amin’ny ankavia, ny sofinao dia handre teny ao ivohonao manao hoe: Ity no làlana, ka andehano.” — Isaia 30:18-21.

12. a) Inona hatramin’izao no antony amboniny tokony hifaliantsika? b) Amin’ny ahoana io fandaharana vaovao io no hahasoa antsika?

¹² Manana antony amboniny tokony hifaliana anefa isika hatramin’izao. Eo am-piandohan’ny 1985 tokoa, ireo hevitra ao amin’ny Ny Tilikambo Fiambenana dia avoaka miaraka amin’ny fiteny 23a. Ny pejy voalohany, ny fitohitohizan-dahatsoratra voalohany sy ireo lahatsoratra natao hianarana dia mitovy ao amin’ireo fanontana voakasika rehetra. Izany dia mahatonga ho azo atao ny fanorenana fandaharana ‘fisakafoana’ miaraka izay hampiray ireo mpanompon’Andriamanitra amin’ny fandrosoany ara-panahy, “mandra-pahatongantsika rehetra ho amin’ny firaisan’ny finoana”. Izany dia vao mainka tokony hamporisika antsika ‘hankalaza an’ilay Andriamanitra sady Rain’i Jesosy Kristy Tompontsika amim-pifanarahana sy amin’ny vava iray’. — Efesiana 4:13; Romana 15:6, MN.

13. a) Manao ahoana ny halehiben’io fandaharana io? b) Ahoana no ifanarahany amin’ny I Korintiana 1:10?

¹³ Raha mbola eny an-tananao ity gazety ity mba hianarana azy ao amin’ny kongregasionanao, moa ve ianao tsy sambatra aoka izany mahafantatra fa ny ankamaroan’ireo rahalahinao dia tafaray aminao mba hiara-manana sakafo ara-panahy mitovy? Hatramin’izao, dia ho toy izany manerana ny kontinanta amerikana, any amin’ny tapany lehibe amin’i Eoropa, any Japon sy any amin’ny faritra maro amin’i Afrika atsimo. Araka ny fanombanana, dia 90 isan-jato mahery amin’ny lehilahy sy vehivavy ary ankizy mandray anjara isan-kerinandro amin’ny fianarana Ny Tilikambo Fiambenana, izany hoe eo amin’ny olona 2 500 000 no efa mandray anjara sahady amin’io fandaharana ‘fisakafoana’ miaraka io, ka izany dia manampy azy ireo hiseho ‘ho tafakambana tsara hiray saina sy hevitra’. (I Korintiana 1:10.) Ary raha mamela izany ny toe-javatra, dia hanalava ny lisitra ny fiteny hafa.

14. Inona no soa horaisin’ireo fianakaviana avy amin’izany?

¹⁴ Hatramin’izao, noho ny tsy fitovian’ny fiteny, indraindray ny mpianakavy dia misy elanelany volana maromaro no ianarany lahatsoratra iray ihany amin’ny Ny Tilikambo Fiambenana. Izao anefa dia afaka ny ho tafaray izy ireo amin’io lafiny io. Araka izany, any amin’ireo tany miteny frantsay, ny vahiny manana zanaka miteny frantsay dia ho afaka hanomana ny fianarana isan-kerinandro Ny Tilikambo Fiambenana miaraka amin’ny fianakaviany amin’ireo fiteny roa miaraka. Noho izany, ao amin’ireo tokantrano miteny amin’ny fiteny roa miaraka, dia ho mora kokoa ho an’ny ray aman-dreny hatramin’izao ny hampihatra ny torohevitra voarakitra ao amin’ny Efesiana 6:4. — Jereo koa II Timoty 3:14, 15.

15. a) Afaka manao inona isika izao ao anatin’ny faritry ny fanompoantsika, araka ny faminaniana ao amin’ny Isaia 52:8, 9? b) Mahatonga inona ho azo atao izany raha vao eo am-piandohan’ny 1985 sy amin’ny ho avy?

¹⁵ Hevero koa ny ho vokatr’izany eo amin’ny fanompoantsika. Amin’ny fampisehoana foto-dresaka iray ihany miaraka maneran-tany, ireo mpitory ilay Fanjakana dia tena ‘hiara-hihoby’ tsaratsara kokoa ihany noho ny nataony teo aloha (Isaia 52:8, 9). Ireo izay mitory ao amin’ny araben’ny tanàna iray misy mponina samy hafa firenena dia ho afaka hanolotra gazety mitovy lohateny amin’ny fiteny roa na mihoatra. Ohatra, raha vao eo am-piandohan’ny 1985, ireo mpitory ilay Fanjakana amin’izany dia ho afaka hiara-hanao fanambarana mahery ny amin’ny Haramagedona, amin’ny tany manontolo. Amin’ny fotoana ilàna izany, dia mety hitarika ireo izay manompo azy ‘miaraka amin’ny fanahy iray ihany noho ny finoana ny vaovao tsara” Jehovah mba hampiely be dia be fanambarana hafa manakoako toy izany (Filipiana 1:27, MN ). Noho ny famoahana miaraka Ny Tilikambo Fiambenana amin’ny fiteny maro, dia azo atao izao ny manao fanambarana toy izany. — Daniela 11:44.

Aoka isika tsirairay avy hijery mahitsy eo anoloany

16. a) Inona no fantatsika ao amin’ny pejy 8, 9 sy 25 ny amin’ny fampielezana gazety? b) Nahoana moa ny olona no mila indrindra ny hahafantatra ireo gazetintsika amin’izao fotoana izao?

¹⁶ Tamin’ny 1984, ny Vavolombelon’i Jehovah dia nampiely be dia be Ny Tilikambo Fiambenana sy ny Réveillez-vous! fanampiny. Nitahy ny fiezahan’izy ireo Jehovah, araka ny porofoin’ireo tarehi-marika aseho ao amin’ny pejy faha-8, 9 sy 25. Maneran-tany, dia gazety 287 358 064 no voazara, ka izany dia mampiseho fitomboana 11,1 isan-jato oharina amin’ny tamin’ny taona teo aloha. Tao anatin’izany fotoana izany ihany koa, dia famandrihana 1 812 221 no natao, izany hoe fitomboana 3,2 isan-jato. Miharihary fa mihamaro ny isan’ny olona maniry hahafantatra hoe nahoana ireo firenena no mitebiteby sy ‘very hevitra’. (Lioka 21:25, 26.) Maniry hanomana ho avy sambatra ho an’ireo zanany ny ray aman-dreny, hanome ho anjarany, zavatra tsaratsara kokoa noho ny planeta levon’ny ady noklehera. Ireo gazetintsika anefa dia manolotra ho an’ny rehetra fanantenana velona. — Matio 12:18, 21; Romana 15:4.

17. Amin’ny ahoana ireo gazetintsika no hanampy antsika hanohitra ny Devoly?

¹⁷ Ahoana no hiheverana ny taona 1985? Mihamivantana kokoa ihany ny hafatra velabelarina ao amin’ireo pejin’ny Ny Tilikambo Fiambenana sy ny Réveillez-vous!. Tsy misy mahagaga mihitsy amin’izany, satria tonga eo am-pifaranany ireo andro faran’izao tontolo izaon’i Satana (Apokalypsy 12:12). Tsy izao no fotoana tokony hanekena ho voafitaka. Ho tian’ny Devoly ny hanakivy antsika mba tsy handray anjara tsy tapaka amin’ny asan’i Jehovah. Eny, ho tiany tokoa ny hampisaraka antsika amin’ny olon’Andriamanitra sy ny asany mba hahafahany mandany antsika (I Petera 5:8). Ho afaka hahatohitra azy anefa isika raha mivory tsy tapaka mba handray ny fahalalana marina ary raha mampiasa izany fahalalana marina izany mba hanompoana tsaratsara kokoa an’i Jehovah. — Efesiana 6:11, 14-16; Kolosiana 1:9-11.

18. a) Raha mpitory ianao, inona no maha-zava-dehibe ny andraikitrao? b) Ahoana no azo anarahana ireo torohevitra omena ao amin’ny Romana 12:10, 11 sy 15:5, 6?

¹⁸ Anisan’ireo mpitory ny Fanjakan’Andriamanitra ve ianao? Raha izany no izy, dia mitana toerana fototra eo anivon’ny fikambanana teokratika ianao. Raha kristiana vita batisa ianao, dia mety hanana andraikitra hafa hiantsorohana ao anatin’ny kongregasiona. Na ahoana na ahoana, mba hitondrana amim-pahamendrehana ny anaran’i Jehovah, dia tena ilaina ny hanehoanao zotom-po eo amin’ny fanompoana fitoriana. Noho isika tafaray amin’ny fitiavan’ny mpirahalahy sy ny firaiketam-po lalina, dia manana adidy isika rehetra hiseho “harehitry ny fanahy” sy hiasa ho an’i Jehovah “amin’ny maha-mpanompo”. (Romana 12:10, 11, MN.) Na manao ahoana na manao ahoana fandrika mbola havelatr’i Satana sy izao tontolo izao manana azy ho filoha eo amin’ny lalantsika, dia tena tokony hanohy toy ny olona iray isika hankalaza an’i Jehovah “amim-pifanarahana sy amin’ny vava iray” amin’ny fampahafantarana ireo fikasana noforoniny ny amin’ny Fanjakany.

19. a) Ahoana no azo andresena amim-pahombiazana ny fanenjehana sy ny zava-manahirana hafa? b) Inona avy no torohevitra hita ny amin’izany ao amin’ny Zefania 3:8, 9?

¹⁹ Maro be amintsika no iharan’ny fanenjehana na mitory any amin’ny faritra tsy ihainoan’ny olona ny hafatra mihitsy. Zava-dehibe anefa ny hitanantsika rehetra toe-tsaina sahala amin’ny an’i Jesosy (Jaona 16:33; I Petera 4:1, 2). Aoka àry isika ho tafaray hatrany toy ny tena iray ihany ka haneho herim-po marina, tanjaka ara-panahy anaty tsy resy eo anoloan’ny fanerena (Salamo 27:14; Filipiana 1:14). Aoka isika tsy ho ketraka na oviana na oviana amin’ny asa fitadiavana ny “ondry”. Aoka isika hanohy ‘hiandry’ an’i Jehovah sy ny andro fitsarany amin’ny fanompoana azy amim-piraisan-tsaina, amin’ny fiantsoana ny anarany sy amin’ny firesahana ny ‘fiteny madion’ny’ fahamarinana. — Zefania 3:8, 9.

20. a) Ahoana no hahazoantsika ny tena fahasambarana? b) Amin’ny fomba miavaka ahoana no efa nahatanterahan’ny faminaniana voasoratra ao amin’ny Isaia 11:6-9 sahady?

²⁰ Aoka àry izay rehetra mankalaza an’i Jehovah hitafy ao anatin’ny firaisan-tsaina “ny toetra vaovao, izay noforonina araka an’Andriamanitra amin’ny fahitsiana sy ny fahamasinana momba ny fahamarinana”. (Efesiana 4:24.) Izany dia hitondra ho azy ireo ny fahasambarana marina, dia izay voazava ao amin’ny Isaia 11:6-9 iresahana ny amin’ny paradisa ara-panahy iainan’ny vahoakan’i Jehovah tafarina ankehitriny. Ao, dia fihavanana sy fifandrindrana ny zavatra rehetra. Nanjavona ny fitiavan-karena fatratra sy ny toetoetra manimba mifamatotra amin’izany. Mifarana amin’izao teny izao anefa io sarin’ny paradisa io: “Ary tsy handratra na hanimba eran’ny tendrombohitro masina izy; fa ny tany ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina.” Ankehitriny, ny ‘tendrombohitra masina’ izay mampiseho ny fanompoam-pivavahana amin’i Jehovah ahitana firaisan-tsaina dia voaorina mafy manerana ny gilaoby. Nahoana? Satria ny Mpamorona nanosika an’ireo vavolombelony hanome voninahitra ny anarany “amim-pifanarahana sy amin’ny vava iray”, hany ka “henika ny fahalalana an’i Jehovah” ankehitriny “ny tany”, dia ny toerana ara-panahy misy ny olon’Andriamanitra.

21. Nahoana no zava-dehibe ny hampahafantarantsika ireo gazetintsika amin’ny fomba mitatra araka izay azo atao?

²¹ Enga anie isika mba hiantehitra amin’ny hery omen’Andriamanitra antsika mba hampahafantarana Ny Tilikambo Fiambenana sy Réveillez-vous! betsaka araka izay azo atao, noho ny fanantenana fa hisy olona avy any amin’ny “faran’ny tany rehetra” sy ny “fokon’ny firenen-tsamy hafa” “hahatsiaro ka hiverina ho amin’i Jehovah”. — Salamo 22:27; Apokalypsy 15:4.

[Fanamarihana ambany pejy]

Famerenana

◻ Ahoana no fomba nisian’ny kongregasiona kristiana tamin’ny taonjato voalohany?

◻ Inona no soa tsy isalasalana mihitsy fa hateraky ny famoahana miaraka ireo lahatsoratra ao amin’ny Ny Tilikambo Fiambenana?

◻ Inona no fiezahana mahagaga natao tamin’ny 1984 mba hampielezana tsaratsara kokoa ireo gazetintsika?

◻ Ahoana no mety handrosoana ara-panahy na dia ao anatin’ny fahoriana aza?