Fahazato taona tsy hay hadinoina
TAMIN’NY andro ankehitriny, ireo mpanompon’Andriamanitra dia nanana tombontsoa ho vavolombelon’ny fahagagana maro. Ny anankiray amin’ny mahagaga indrindra dia ny fandrosoan’ny fandaminana maneran-tany ampiasain’i Jehovah amin’izao andro izao mba hanambarana ny anarany amin’ny tany manontolo. Ny zavatra rehetra dia nanomboka tany Pittsburgh, teo am-piandohan’ireo taona 1870, tamin’ny antokon’olom-bitsy tso-po izay nanokan-tena ho amin’ny fianarana ny Baiboly. Nitombo haingana aoka izany ny isany, hany ka tsy ela dia nanjary nilaina ny hamoronana fikambanana iray mba hanomezana fitsipika itondrana ara-pitsarana ny fandaminany. Araka izany no nanoratana ny Zion’s Watch Tower Tract Society ny 13 desambra 1884 araka ireo lalàn’ny Fanjakan’i Pennsylvanie, any Etazonia.
Ny asabotsy 6 oktobra 1984, Pittsburgh dia nandray ny fahazato tamin’ny fivoriambe fanaon’ireo anisan’io fikambanana io, izay mitondra ny anarana hoe Watch Tower Bible and Tract Society of Pennsylvania izao. Tena hafa noho ny fahita io fivoriambe io. Sahala amin’ny nahatsiarovan’ireo mpanompon’Andriamanitra fahizay ireo fisehoan-javatra lehibe, dia toy izany koa fa nety ny nandraisan’ny Vavolombelon’i Jehovah ny fahazato taonan’ny Fikambanana Watch Tower tamin’ny alalan’ny fivoriana manokana. Izany dia fomba tsara dia tsara fanolorana fisaorana sy fiderana an’i Jehovah Mpanjaka Tompo izay niaro, namahana sy nampitombo ny fandaminany tamin’ny fitsapana rehetra hitany tao anatin’ireo zato taona farany. — Josoa 4:4-8, 20-24; Estera 9:20-22; Salamo 23:1-6.
Ny fivoriambe
Tamin’ny folo ora marina, tamin’ny andro voatondro, ny fivoriambe fanaon’ny Fikambanana isan-taona dia nanomboka tao amin’ny Efitrano fanaovan’ny Vavolombelon’i Jehovah fivoriambe any Coraopolis, any akaikin’ny Pittsburgh. Ao amin’ireo fandaminan’izao tontolo izao ankehitriny, ireo fivoriana karazan’izany dia matetika fanaraham-pomba fotsiny ka tsy misy firesahana afa-tsy raharaha ara-barotra. Hafa dia hafa noho izany ny zavatra.
Tamin’ireo anisan’ny fikambanana 429, dia 259 no tonga teo mihitsy. Ary nisy olona nasain’izy ireo. Tamin’ny fitambarany, dia solontena 1 615 no avy any amin’ny tany samy hafa toa an’i Alaska, Antigua, Argentine, Australie, Autriche sy Zimbabwe. Rehefa avy nanao fifidianana ara-dalàna an’ireo mpikambana efatra ao amin’ny filakevi-pitondran’ny Fikambanana ny mpandray anjara dia nanaraka lahateny maromaro mety hanatanjaka ny fahasalamana ara-panahin’ny rehetra. Ny anankiray tamin’izany dia niorina tamin’ny teny ao amin’ny Baiboly nofidin’ny Vavolombelon’i Jehovah ho baiko harahina ho amin’ny 1985: “Tanteraho amin’ny fomba feno ny fanompoanao.” — II Timoty 4:5.
Raha efa izany, F. Franz, prezidan’ny Fikambanana, dia nanonona lahateny iray nahery indrindra na dia tao aza ny taonany 91. Naharihariny fa nahatsapa ny fifaliana lehibe indrindra teo amin’ny fiainany izy, 65 taona lasa izay, tamin’ny andro nandrenesany voalohany tamin’i J. Rutherford ny fitenenana hoe “fandaminan’Andriamanitra”. Rehefa avy nanipika ny fandrosoan’ny fandaminan’ny Mpamorona eto an-tany izy dia nisaotra an’i Jehovah noho ny nahafahan’io fandaminana io nampiasa hatramin’ny 100 taona ny Fikambanana Watch Tower mba hampitana amin’ny rehetra ny fampianarana mahavelona avy amin’ny Soratra masina. Tamim-peo nihamafy mampiseho fandresena, dia notononin’ny rahalahy Franz ny andininy farany amin’ny Salamo 150:6 tamin’izao teny izao: ‘Aoka izay rehetra manam-pofonaina samy hidera an’i Jehovah. HALELOIA.’
‘Momba ny vahoakany Jehovah’
Ireo kongregasionan’ny Vavolombelon’i Jehovah tany Pittsburgh dia naneho fitiavan-drahalahy sy fahaiza-mampiantrano vahiny tsy fahita firy (Hebreo 13:1, 2). Tsy nisy fitadiavana valiny fa nandany be izy ireo mba hanomezana sakafo tsara, fonenana sy fomba fitaterana ho an’ny nasaina rehetra. Ambonin’izany, dia nomanin’izy ireo ny zavatra rehetra, hatramin’ny antsipiriany madinika indrindra, mba hahavonona ny Three Rivers Stadium any Pittsburgh ho amin’ny fivoriana haharitra ora telo izay tokony hatao ny takariva tamin’io andro io ihany.
Tsara aoka izany ny andro tamin’io takarivam-pararano io, hany ka ho azo natao ny nihevitra izany ho tsikim-pankasitrahana avy amin’i Jehovah. Ireo mpanatrika 37 733 izay tafavory tao amin’ny kianja dia faly afaka nanaraka ny fandaharana tao anatin’ny toe-javatra tsara. Afa-tsy izany koa, noho ny foto-kevitra nampitaina tany amin’ny Efitrano 34 fanaovana fivoriamben’ny Vavolombelon’i Jehovah any Etazonia sy Kanada, dia olon-kafa 59 715 no nahita fifaliana nihaino azy ireny, hany ka tafakatra ho 97 448 ny isan’ireo izay nandray soa tamin’ilay fivoriana. Afa-tsy izany koa, ny tsirairay avy dia afaka nitondra nody ho fahatsiarovana, ilay bokikely 32 pejy miloko izay nampiseho ny fandaharana tamin’io fihaonambe nanan-tantara io.
Nanomboka tamim-pifaliana ny fotoam-pivoriana tamin’ny takariva, tamin’ny hira sy ny vavaka. Avy eo, ny mpikambana folo ao amin’ny kolejy foiben’ny Vavolombelon’i Jehovah, sy “tranainy” maro hafa koa teo amin’ny asan’Andriamanitra, no nanazava ilay foto-kevitra hoe “Nasehon’i Jehovah foana fa nomba ny vahoakany izy”. Ny amin’izany, dia nanambara toy izao ilay bokikely voatonona eo aloha: “Manana porofo maro tokoa isika fa momba an’ireo mpanompony Jehovah, ary nitahy sy nanamafy orina ny asa notontosain’ny tanan’izy ireo tamin’ny alalan’ny Fikambanana Watch Tower. Noho izany, araka ny hevitra fonosin’ny Salamo 78:2-7, dia mety ny hanararaotantsika izao fotoana izao mba hitantarana amin’ny taranaka vaovao ‘ny fiderana an’i Jehovah (...) ary ny fahagagana izay efa nataony’.”
Nahavita tanteraka ny asa nilana azy io fandaharana io. Araka ny nampahatsiaroviny, Hitler sy ireo mpiseho ho mpivavaka niala tamin’ny marina dia tena nanandrana tokoa nanafoana ireo Vavolombelon’i Jehovah noheveriny ho “olona tsy vanona”, nefa ireny fahavalo ireny dia niafara tamin’ny fahalevonana “toy ny orampanala azon’ny masoandro”. Tetsy andaniny koa, raha inoana ny voalazan’i E. Goodspeed, mpandika tenin’ny Baiboly iray, tamin’ny taonjato voalohany ireny kristiana ireny dia nahaforona ‘vahoaka nanokan-tena handika teny sy hanao boky’. Mihatra tsy misy toy izany amin’ny Vavolombelon’i Jehovah anefa io fanamarihana io amin’izao taonjato faha-20 izao. Tao anatin’izao 105 taona farany izao ireny kristiana ireny dia namoaka Baiboly, boky, bokikely, gazety sy trakitra 8 800 000 000 amin’ny fiteny 200 mahery. Amin’ny fitambarany na tapatapany, ny Soratra Masina dia nahavitana 51 034 000 amin’ny fiteny 14 amin’ny Fandikan-tenin’izao tontolo izao vaovao. Tsy ho ela, ny fanontana iray fanao am-paosy sy ny fanontana amin’ny sora-baventy mizara ho boky efatra amin’io fandikan-teny io ihany dia havoaka koa. Amin’izany ny Fikambanana Watch Tower dia hijanona eo an-tampony amin’ny fampielezana ny Soratra Masina.
Izao koa no nolazain’ilay bokikely: “Ny hasarobidin’ny lehilahy mahatoky manompo eo anivon’ny Fikambanana Watch Tower dia voamarika amin’ny hoe, tao anatin’ny 100 taona, dia lehilahy efatra monja no niantsoroka ny andraikitry ny prezidà tao.” Mizotra amim-pahamendrehana ho amin’ny fandresena farany ny fandaminan’i Jehovah. Martin Poetzinger, lehilahy iray tsy nivadika hatrany tao anatin’ireo sivy taona laniny tany amin’ny toby fitanana nazia, dia nanao izao fananarana izao: “Mifikira mafy hatrany amin’i Jehovah, amin’i Jesosy Kristy sy amin’ny fandaminan’Andriamanitra, dia ho hitanareo izy ireo handresy ny fahavalony rehetra.”
Ny mpandahateny farany tamin’ny takariva, ny prezidà F. Franz, dia nilazalaza tamim-pahendrena an’io fahazato taona io ho “fisehoan-javatra tsy hiverina intsony mihitsy”. Rehefa nampahatsiahy ny lasa nahavarianan’ny fandaminan’Andriamanitra ny rahalahy Franz, dia nahatsiaro ny fehezanteny iray nolazain’i J. Rutherford, prezidàn’ny Fikambanana faharoa izay maty tamin’ny 1942. Taloha kelin’ny hahafatesany izy io, dia namboraka taminy hoe: “Fred a, heveriko fa rehefa dinihina dia tsy dia betsaka manao ahoana ny [vahoaka] betsaka.” Araka ny nasain’ny rahalahy Franz nomarihina, dia “maty aloha loatra izy”. Tamin’izany fotoana izany tokoa, dia latsaka ny 100 000 ny Vavolombelon’i Jehovah naneran-tany. Amin’izao andro izao, dia olona ‘an-tapitrisany maro tsy ho faty mihitsy’ no tonga manatevin-daharana ny olo-mahatoky.
Namarana ny teniny tamin’izao teny izao ny rahalahy Franz: “Mahatsiaro ho voatosika hiara-manambara toy izao isika: ‘Samia mihoby an’i Jehovah, tompom-piandrianana eo amin’izao rehetra izao!’ ” Tamin’ny tehaka nirefodrefotra no nampisehoan’ny mpanatrika fa niriny ny hamaly tamin’ny fo rehetra an’io fanasana io. Taorian’ny hira sy ny vavaka, dia niverina tany amin’ny taniny sy tany amin’ny kongregasionany ny tsirairay avy, tapa-kevitra kokoa tsy nisy toy izany ny haharitra amim-pifaliana sy hatramin’ny farany amin’ny asan’i Jehovah.