Ambara maneran-tany ny vaovao tsara
MANAPAKA ny Fanjakan’Andriamanitra! Izany no vaovao tsara indrindra. Izany no nahatonga ny Vavolombelon’i Jehovah 3 700 000 mahery tamin’ny taona 1989 hanambara tamin-kafanam-po maneran-tany ny “vaovao tsara” voalazan’ny faminanian’i Jesosy sy ny “vaovao tsara” nambaran’ilay anjely tao amin’ny fahitan’i Jaona (Matio 24:14; Apokalypsy 14:6, MN ). Araka ny nambaran’ny apostoly Paoly dia hoe: “Efa nivoaka ho any amin’ny tany rehetra ny feony, ary ny teniny hatramin’ny faran’izao rehetra izao.” (Romana 10:18). Ary lehilahy sy vehivavy azo lazaina hoe avy amin’ny firenena sy ny foko ary ny fiteny rehetra no namaly tamim-pifaliana ny antson’izy ireo manao hoe: “Matahora an’Andriamanitra ka omeo voninahitra Izy.” — Apokalypsy 14:7.
Tsy hila antok’aina intsony
Anankiray tamin’ireny ny lehilahy iray tany Angletera izay nanana antom-pivelomana niankina tamin’ny fivadibadihan’ny fiainana. Mpanao fiantohana i Ken, ary rehefa nitsidika fianakaviana Vavolombelon’i Jehovah iray izy, dia nanontany azy toy izao ireo: “Ho tianao ve ny hiaina ao amin’izao tontolo izao iray tsy hilana fiantohana aina intsony?” Inona no tian’izy ireo holazaina? Ny hoe: araka ny Baiboly, eo ambanin’ny Fanjakan’Andriamanitra dia zavatra maro mahatonga ny fiainana tsy ho azo antoka amin’izao fotoana izao, anisan’izany ny aretina sy ny fahafatesana, no tsy hisy intsony.
Mety hisy ve ny zavatra toy izany? Eny, satria Andriamanitra mihitsy no nampanantena izany. Ohatra, hoy ny Baiboly hoe: “Ary Andriamanitra no hitoetra eo aminy [olombelona], dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo na fitarainana na fanaintainana, fa efa lasa ny zavatra taloha.” (Apokalypsy 21:3, 4). Inona moa no hitondra izany fiovana izany? Ny Fanjakan’Andriamanitra. Araka ny Tenin’Andriamanitra, rehefa afaka kelikely, io Fanjakana io dia ‘hanorotoro sy handevona ny fanjakana [ara-politika ankehitriny] rehetra, fa izy kosa hitoetra mandrakizay.’ — Daniela 2:44.
Andinin-teny maro toy izany no nanintonan’ny Vavolombelon’i Jehovah ny sain’ny olona an-jato tapitrisany maro nandritra ny fitoriany maneran-tany. Olona maro be, toa an’i Ken no nanjary nahatsapa fa tsy zavatra irin’ny fo fotsiny izany. Mampiaiky ireo porofo manamarina izany. Azo itokiana ary ho tanteraka tsy ho ela ireo fampanantenan’Andriamanitra ireo.
Niova ireo zavatra omena vidiny indrindra eo amin’ny fiainana
Ireo izay mihaino ny Vavolombelon’i Jehovah mampanakoako ny fanambaran’ilay anjely, dia mahatsapa fa ny fahatahorana an’Andriamanitra sy ny fanomezam-boninahitra azy, dia mahafaoka be lavitra noho ny finoana fotsiny ireo fampanantenan’ny Baiboly. Izany dia manova ny fomba fijerin’izy ireo manontolo ary manamora ny fizakany ireo zava-manahirana maro be eo amin’ny fiainana.
Ry Rafael sy ny vadiny dia nahatsapa ny fahamarinan’izany. Monina any Argentine izy ireo, ary rehefa nivady, maherin’ny 40 taona izy, dia nanao ny fiasana mafy sy ny fihariana ho fitsinjovana ny hoavy ho ny zava-kendrena lehibe indrindra teo amin’ny fiainany. Kanefa 21 taona taty aoriana, ny hany zavatra azony nireharehana noho ny asa mafy nataony, dia trano kely iray izay tsy maintsy nila fanamboarana foana. Tsy nahatsapa tsy fananana ahiahy mihoatra noho izay hitany tamin’izy ireo vao nivady izy.
Tatỳ aoriana, dia nandre ny vaovao tsara avy tamin’ny Vavolombelon’i Jehovah izy mivady ary nianatra ny amin’ny karazana harena tsara kokoa sy karazana tsy fananana ahiahy tsara kokoa. Tao amin’ny Toriteniny tao an-tendrombohitra, dia nilaza ny amin’izany i Jesosy rehefa niteny hoe: “Aza mihary harena ho anareo etỳ an-tany, izay misy kalalao sy harafesina manimba, sady misy mpangalatra manamitrano sy mangalatra. Fa miharia harena ho anareo any an-danitra, izay tsy misy kalalao na harafesina manimba, sady tsy misy mpangalatra manamitrano na mangalatra.” — Matio 6:19, 20.
Tsy mampianatra antsika tsy hiraharaha ny harena ara-nofo ny Baiboly, kanefa mampirisika izy mba tsy hametraka ny fanantenantsika amin’ny zavatra toy izany (Mpitoriteny 7:12). Tokony hiasa mba hahazoana harena ara-panahy kosa isika amin’ny fianarana ny Baiboly, amin’ny famantarana ny sitrapon’Andriamanitra, ary amin’ny fametrahana ny fanaovana izany sitrapo izany eo amin’ny toerana voalohany amin’ny fiainantsika (Matio 6:33). Nanomboka nihary harena ara-panahy ry Rafael mivady, ary ankehitriny, dia mahatsapa ny tenany manankarena izy ireo, tsy noho ny toe-bolany akory, fa noho ny fifandraisany amin’Andriamanitra (Apokalypsy 3:17, 18). Tena vaovao tsara ho azy ireo tokoa ny hafatra ny amin’ny Fanjakan’Andriamanitra.
Fanambadiana iray voalamina
Tena manana hery hanatanterahana zavatra tsara tokoa ny vaovao tsara. Ohatra, i John izay mipetraka any Angletera dia tsy liana mihitsy tamin’ny Baiboly, kanefa tsy toy izany ny vady aman-janany. Nanomboka namonjy ireo fivorian’ny Vavolombelon’i Jehovah àry izy ireo fa i John kosa nandeha nisotro niaraka tamin’ireo namany. Vokatr’izany dia tafalatsaka tao amin’ny fimamoana sy fifohana be, ary tamin’ny farany, tao amin’ny fahalotoam-pitondrantena izy. Farany, dia nandao ny vadiny izy mba hiara-hiaina amin’ny vehivavy hafa iray.
Natomboka àry ny fomba fisaraham-panambadiana. Kanefa gaga i John nahita fa ny vadiny izay nanana fitondrantena kristiana noho ny fianarany ny vaovao tsara, dia nanohy nampiseho fiheverana azy. Tsy nety azon’i John ny antony. Roa tokom-bolana talohan’ny nahavitan’ny fisaraham-panambadiana, dia nisy heriny ny fitondrantena kristiana nananan’ny vadin’i John. Naneho fanenenana tamim-pahatsorana izy, ary tsy natao indray ny fisaraham-panambadiana. Nandinika ny vaovao tsara ho an’ny tenany manokana izao i John ary niara-nianatra ny Baiboly tamin’ny Vavolombelon’i Jehovah. Kristiana koa izy ankehitriny ary miresaka ny vaovao tsaran’ilay Fanjakana amin’ny hafa miaraka amin’ny vadiny.
Amin’izao fotoana mampirodana ny maha-izy ny fianakaviana izao, dia maro be no mila ny fanampiana atolotry ny vaovao tsara mifototra amin’ny Baiboly. Nipetraka teo akaikin’ny kolonely iray ny Vavolombelon’i Jehovah iray tany Peroa nandritra ny diany tao anaty fiaramanidina. Velona ny resadresaka ary namboraka ny olana ara-pianakaviana ilay kolonely. Noresahiny tamin’izany fa ny vadiny dia nampiasa zava-mahadomelina ary nadiva handao azy mba hiara-hiaina amin’ny lehilahy tanora kokoa noho izy. Nampiseho taminy tamim-pahaiza-mandanjalanja ilay Vavolombelona fa ny Baiboly dia manome torohevitra tsara sy mafy orina ny amin’ny fianakaviana izay nanampy azy manokana handamina ny zava-manahirana hitan’ny tenany tao amin’ny fianakaviany. — Efesiana 5:21 ka hatramin’ny 6:4.
Nisaotra ilay Vavolombelona noho ny teny nampahery nataony ilay kolonely ary nanao famandrihana tamin’ny Ny Tilikambo Fiambenana sy Reveillez-vous! mba hahazoany fahalalana bebe kokoa ny amin’ny vaovao tsara. Rehefa niala tamin’ny fiaramanidina ilay Vavolombelona, dia nanao izay hahatratrarana azy haingana ny mpivady tanora iray, ary nangataka ny hiresaka taminy: “Nipetraka teo anoloanao izahay”, hoy izy ireo, “ary nandre ny resaka nifanaovanao tamin’iny andriamatoa iny. Ho tianay koa ny hanao famandrihana ny amin’ireny gazety ireny.” Naniry ny hianatra ny vaovao tsara izay afaka manatsara ny fiainana koa izy ireo.
Fiainana niova
Manaraka izany, manova olona ny vaovao tsara miorina amin’ny Baiboly. Toy izao no nolazain’ny apostoly Paoly: “Fa velona sy mahery ny Tenin’Andriamanitra.” (Hebreo 4:12.) Voamarina tokoa izany tamin-jazalahy iray tany Makedonia, any Gresy. Taitra izy rehefa nahafantatra fa araka ny Baiboly dia Jehovah no anaran’Andriamanitra. Koa dia nangataka tamin’ny namany iray izy mba hitondra azy any amin’ny Vavolombelon’i Jehovah haingana araka izay farany azo atao. Nalamina ny fifanakalozan-kevitra roa niaraka tamin’ny Vavolombelona, ka ny tsirairay tamin’ireo dia naharitra adiny efatra teo ho eo avy. Avy eo dia nanomboka nianatra Baiboly tsy tapaka io tovolahy io, ka ny fianarana voalohany dia naharitra hatramin’ny folo ora maraina!
Taorian’io fianarana voalohany io, dia nanomboka nampifanaraka ny fiainany sahady tamin’ny fari-pitsipika ao amin’ny Baiboly izy. Nanatrika fivoriana mba hanao fanompoam-pivavahana miaraka amin’ny Vavolombelon’i Jehovah izy, ary nitombo be dia be ny fitiavany ilay Mpamorona. Ho setrin’izany, dia nitahy azy i Jehovah. Ny herinandro voalohany nianarany Baiboly dia notapahiny ny volony lava. Ny herinandro faharoa, dia nitsahatra tsy nankany amin’ny toeram-pisotroana sy fandihizana fitadiavany namana manaitaitra izy. Ny herinandro fahatelo dia nanary ny sigarany farany izy. Taorian’ny roa volana nianarany Baiboly, dia nanomboka niresaka ny vaovao tsaran’ilay Fanjakana tamin’ny hafa niaraka tamin’ny Vavolombelona izy. Eny, faly izy fa nitondra ny vaovao tsara tany amin’ny faritra nisy azy ny Vavolombelon’i Jehovah.
Vaovao tsara any an-tranomaizina
Na dia ny tsora-by amin’ny tranomaizina aza dia tsy mahasakana ny vaovao tsara. Ny tovolahy iray antsoina hoe José monina any Espaina dia nigadra nandritra ny taona maro noho ny halatra nitanam-piadiana sy ny heloka bevava hafa. Kanefa ny Vavolombelon’i Jehovah dia afaka niresaka taminy ny vaovao tsara, ary nanova tanteraka ny fomba fijeriny ny fiainana ny hafatra avy tao amin’ny Baiboly. ‘Nampahery’ azy tokoa i Jehovah. — Filipiana 4:13.
Milaza i José fa mety handany ny androny sisa amin’ity fandehan-javatra ity any am-pigadrana izy noho ny fitondrantenany teo aloha. Kanefa efa vita batisa izy ary kristiana amin’izao fotoana izao. Manohana azy tokoa ny vadiny ary miezaka mitaiza ny zanany lahy kely amin’ny fomba kristiana. Mandritra izany fotoana izany, i José dia mizara ny vaovao tsara amin’ireo mpiara-migadra aminy izay sarotra ho an’ireo mipetraka any ivelan’ny tranomaizina ny mifandray aminy. Ankehitriny, ny mpiray fonja aminy iray koa dia kristiana vita batisa.
Ohatra vitsy monja ireo mba hampisehoana ny vokatry ny fitoriana maneran-tany ataon’ny Vavolombelon’i Jehovah. Marina tokoa fa ny Vavolombelon’i Jehovah dia mampanakoako izay voalazan’ilay anjely tsy hita maso, dia “filazantsara mandrakizay hotorina amin’izay monina ambonin’ny tany sy amin’ny firenena sy ny fokom-pirenena ary ny samy hafa fiteny, ary ny olona rehetra.”
Izany dia ny tsara indrindra amin’ny vaovao, ary ny hany fanantenan’ny olombelona. Mampirisika anao hitandrina izany izahay. Toa an-dry Ken sy John any Angletera, Rafael sy ny vadiny any Argentine, José any Espaina ary ny hafa ana hetsiny maro, dia miaraka amin’ny anjely izahay mampirisika ny rehetra hoe: “Matahora an’Andriamanitra ary omeo voninahitra izy, fa tonga ny andro fitsarany, ary miankohofa eo anoloan’izay nanao ny lanitra sy ny tany, sy ny ranomasina ary ny loharano.” — Apokalypsy 14:7.