Fanontanian’ny mpamaky

◼ Nahoana ny fandikana ny 2 Petera 1:19 ao amin’ny Ny Soratra Masina — Fandikan-tenin’izao tontolo izao vaovao no tsy mitovy amin’izay ao amin’ny Baiboly hafa?

Mba hanamafisana ny hasarobidin’ny teny ara-tsindrimandrin’Andriamanitra, dia nanoratra toy izao ny apostoly Petera: “Koa noho izany, isika dia manana ny teny faminaniana natao azo antoka kokoa; ary mampiseho fahendrena ianareo amin’ny fandinihana izany toy ny jiro mazava ao amin’ny toerana maizimaizina, mandra-pahazavan’ny andro sy hiposahan’ny fitarikandro, ao am-ponareo”. — 2 Petera 1:19, MN.

Mariho fa ny fitenenana hoe “mandra-pahazavan’ny andro sy hiposahan’ny fitarikandro”, dia avahana amin’ny alalan’ny faingo. Tsy manao izany ny ankamaroan’ny fandikan-tenin’ny Baiboly.

Ohatra, ny Fandikan-teny Eokiomenikan’ny Baiboly (frantsay) dia mandika ny tapany faharoa amin’io andinin-teny io toy izao: “(...) jiro iray mazava ao amin’ny toerana maizimaizina, mandra-pahazavan’ny andro ary hiposahan’ny fitarikandro ao am-ponareo”. Ny fandikan-teny toy io dia mitarika hihevitra fa ny fiposahan’ny fitarikandro dia mitranga ao am-pon’ny mino, toy ny hoe mahazo karazana aingam-panahy izy ireo.

Kanefa, na dia tany amin’ny andron’i Mosesy aza, dia efa nisy filazana fa hiposaka ny ‘kintana avy amin’i Jakoba’. (Nomery 24:17; ampitahao amin’ny Salamo 89:34-37.) Nampahafantatra mazava tsara ny tenany ho io “taranak’i Davida, ny Kintana mamirapiratra fitarika andro” io i Jesosy. — Apokalypsy 22:16.

Io fampahafantarana ny amin’ny “fitarikandro”, na “Kintana fitarika andro” io, dia mifanentana amin’ny teny manodidina ilay foto-kevitra noresahin’ny apostoly Petera. Vao avy nanisy fitenenana ny amin’ny fahitana momba ny fiovan’i Jesosy tarehy izay hitany 30 taona lasa teo ho eo talohan’izay izy. (Matio 16:28–17:9). Izany fahitana nahatalanjona izany dia nanondro ny fotoana hahatongavan’i Jesosy ao “amin’ny fanjakany”, na hahazoany voninahitra ao amin’ny herin’ny Fanjakana. Izay hitan’i Petera dia nampisongadina ny hasarobidin’ny tenin’Andriamanitra; toy izany koa, mila mitandrina izany teny ara-paminaniana izany ny kristiana amin’izao andro izao.

Na dia tao amin’ny maizina — ary mbola ao — aza ny fon’ny taranak’olombelona amin’ny ankapobeny, dia tsy voatery ho toy izany ny an’ny kristiana marina. Toy ny hoe manana jiro mazava izy ireo ao amin’ny toerana iray izay ho maizina raha tsy izany, dia ny fony. Fantatr’i Petera fa amin’ny fitandremana ny teny ara-paminaniana manome fahazavana avy amin’Andriamanitra, ny kristiana dia ho mailo sady ho voazava hatrany mandra-pahazavan’ny andro vaovao iray. Izany dia ho ny fotoana tena hanjakan’ilay “fitarikandro”, na ilay “Kintana mamirapiratra fitarika andro”, ao amin’ny herin’ny Fanjakana.

Mahaliana izay nosoratan’i E. W. Bullinger mikasika ny 2 Petera 1:19: “Eto, dia mazava fa tokony hisy fononteny, satria ny faminaniana no ilay fahazavana izay mazava, ary Kristy sy ny Fisehoany no ilay Fitarikandro sy Fiposahan’ny fahazavan’ny andro. Azo antoka fa ny heviny dia tsy mety hoe ampirisihina isika hitandrina ilay teny ara-paminaniana mandra-pihariharin’i Kristy ao am-pontsika! Tsia; fa hoe tokony hitandrina ao am-pontsika an’io teny ara-paminaniana io isika, mandra-pahatongan’ny fahatanterahany amin’ny fisehoan’i Kristy — ny fiposahan’Ilay antsoina hoe ‘Kintana fitarika andro’ ”. — Sarim-pitenenana ampiasaina ao amin’ny Baiboly (angl.), 1898.

Mifanaraka amin’izany, dia misy fandikan-tenin’ny Baiboly maro mampiasa fononteny ao amin’ny 2 Petera 1:19.a Mihazona ny filaharana fototr’ireo teny hita ao amin’ny fiteny grika tany am-boalohany Ny Soratra Masina — Fandikan-tenin’izao tontolo izao vaovao. Kanefa, mampiasa faingo izy mba hanavahana ireo teny hoe “mandra-pahazavan’ny andro ary hiposahan’ny fitarikandro”, amin’ilay fananarana hitandrina ny teny ‘toy ny jiro mazava ao amin’ny toerana maizimaizina, ao am-ponareo’.

[Fanamarihana ambany pejy]