Karazan’izay Manam-pinoana Isika
Fanorenana Finoana Amin’ny Alalan’ny Fampianarana Baiboly any Inde
HATREO amin’ny Tendrombohitra Himalaya manerinerina sy rakotra ranomandry, any avaratra, ka hatrany amin’ny morontsiraka mafanan’ny Ranomasimbe Indianina, any atsimo, i Inde dia tany miavaka noho ny fahasamihafana ara-jeografia sy ara-pivavahana. Amin’ireo mponina ao izay maherin’ny arivo tapitrisa, dia tokony ho 83 isan-jato no Hindoa, 11 isan-jato no Miozolimanina, ary Kristianina anarana, Sikhs, Bodista, ary Jaina no tena mahaforona ny tapany sisa aminy. Manana fahalalahana hanao fanompoam-pivavahana ny rehetra. “Mitana anjara toerana lehibe eo amin’ny fomba fiainan’ny Karàna ny fivavahana”, hoy ny The World Book Encyclopedia.
Mampiavaka ny Vavolombelon’i Jehovah, izay miisa maherin’ny 21 200 any Inde, ny fananana fiainana mifanaraka amin’ny finoany kristianina. Tahaka ireo namany ara-panahy any amin’ny faritra hafa amin’ny tany, dia raisin’ireo Vavolombelona any Inde ho tombontsoa ny manampy ny mpiara-belona aminy hamboly finoana matanjaka ny Tenin’Andriamanitra, dia ny Baiboly Masina. (2 Timoty 3:16, 17). Diniho ny fomba nananan’ny fianakaviana iray, tany Chennai, any atsimon’i Inde, fahalalana ny fahamarinana ara-baiboly.
Talohan’ny niresahany voalohany tamin’ny Vavolombelon’i Jehovah, io fianakaviana io dia nafana fo tao amin’ny fiangonana katolika mpanao fahagagana, izay nihambo ho nahita fahitana sy niteny tamin’ny fiteny tsy fantatra ary nanasitrana ny marary. Nitana toerana ambony tao amin’ny fiangonana sy ny fiaraha-monina izy ireo, ny olona aza dia niantso mihitsy ny mpianakavy sasany tao ho “swami”, izay midika hoe “tompo”. Indray andro àry dia nitsidika ilay fianakaviana ny Vavolombelona iray ary nampiseho taminy, avy tao amin’ny Baiboly, fa i Jesosy dia Zanak’Andriamanitra, fa tsy ilay Andriamanitra Tsitoha, araka ny finoan’ny olona. Nasehon’ilay Vavolombelona tamin’izy ireo koa fa Jehovah no anaran’Andriamanitra, ary ny hanao ny tany ho paradisa tsara tarehy no fikasany ho an’ny tany.—Salamo 83:18; Lioka 23:43, NW; Jaona 3:16.
Noho izy ireo nanaja ny Tenin’Andriamanitra, sady tia izay zavatra reny, dia nanaiky hiara-mianatra ny Baiboly tsy tapaka tamin’ny Vavolombelon’i Jehovah ireo mpianakavy ireo. Izany dia nahatonga ny fanarabian’ny mpiara-niangona taminy. Na izany aza, dia tapa-kevitra hatrany ny hanohy ny fianarany ny Baiboly ilay fianakaviana. Rehefa nitombo ny fahalalany ary nihanatanjaka ny finoany, dia tsy nanao ireo fanao ara-pivavahan-diso narahiny intsony izy ireo. Ankehitriny, dia mpikambana telo ao amin’io fianakaviana io no Vavolombelona be zotom-po sy vita batisa, ary manao ny asan’ny mpisava lalana mpanampy, isaky ny afaka, ilay renim-pianakaviana.
Finoana mba handresena fananan-kilema
Nila finoana sy herim-po lehibe i Sunder Lal, tovolahy iray mipetraka any amin’ny vohitra kely iray any Punjab, mba hizarana ny vaovao tsaran’ny Fanjakan’Andriamanitra amin’ny hafa. (Matio 24:14). Ny antony iray dia noho izy tsy maintsy nandao ny fivavahana tamin’andriamanitra maro, izay narahin’ny fianakaviany sy ny mponina teo amin’ilay vohitra misy azy, mba hanompoany an’ilay Andriamanitra marina, dia i Jehovah. Ny antony hafa iray dia noho i Sunder Lal tsy nisy tongotra.
Hatramin’ny 1992, dia nandeha tamim-pahazarana fotsiny ny fiainan’i Sunder Lal. Mpanampy ny dokotera iray no asany, ary nanompo andriamanitra maro samihafa niaraka tamin’ny fianakaviany, teo ambany fitarihan’ny guru voafidy, izy. Avy eo, indray alina, dia nianjera izy, rehefa niampita lalamby. Nanitsaka azy ny lamasinina iray, ka nanapaka ny tongony roa. Na dia velona aza izy, dia potika ny fiainany. Tsy mahagaga raha nanjary ketraka mafy sy nieritreritra ny hamono tena mihitsy aza i Sunder Lal. Nanohana azy ny fianakaviany, nefa toa tsy nisy fanantenana ny hoaviny.
Avy eo dia nisy Vavolombelon’i Jehovah iray nitsidika an’i Sunder Lal, ary nampiseho taminy, avy tao amin’ny Baiboly, fa nampanantena ny hanao ny tany ho paradisa mahafinaritra, sy ny hanome fahasalamana lavorary ho an’izay rehetra tia sy matahotra azy, Andriamanitra. Nanaiky hianatra Baiboly i Sunder Lal, ary nazoto nianatra izy nandritra ny herintaona. Nasaina hanatrika fivoriana kristianina izy, ary tamin’ny farany dia nandeha, ary nitaingina tao aoriana tamin’ny bisikiletan’ny namana iray. Na dia nampanaintaina aza ilay dia, dia lehibe ny valisoa. Voamarina tsara izay nianarany tamin’ny fianarany manokana ny Baiboly, rehefa nihaona tamin’ny hafa, izay tena nino ny fampanantenan’ny Tenin’Andriamanitra sy niaina nifanaraka tamin’ny fampianaran’ny Baiboly, izy.
Nanomboka nizara ny vaovao tsara tamin’ny mpiara-monina taminy i Sunder Lal, ary natao batisa tamin’ny 1995. Tamin’ny voalohany, dia nitaritarika ny tenany izy, rehefa nanao fanompoana isan-trano teo amin’ny vohitra nisy azy, satria izany no fomba nahafahany nandeha. Ankehitriny anefa izy dia nahazo fanomezana avy tamin’ny rahalahiny ara-panahy—bisikileta misy kodiarany telo izay natao “hovoizina” amin’ny tanana. Noho ny bisikiletany, dia mahaleo tena kokoa izy izao, ary afaka manao dia 12 kilaometatra samirery, mba hanatrehana ny fivorian’ny kongregasiona. Indraindray dia mandeha bisikileta ao anatin’ny rivo-mahery arahin’oram-batravatra izy, ary amin’ny fotoana hafa, dia mandeha ao anatin’ny hafanana mahatratra 43 degre.
Fanampin’ny fanatrehana fivoriana, dia mitarika fampianarana Baiboly maro amin’ny hafa izay maniry hahazo fanampiana mba hanorenana finoana matanjaka an’ilay Andriamanitra marina, dia i Jehovah, i Sunder Lal. Raha ny marina, dia vita batisa izao ny fito amin’ireo nampianariny Baiboly taloha, ary koa ny olona telo hafa izay niresahany, nefa niara-nianatra Baiboly tamin’ny Vavolombelona hafa.
Ny “finoana”, araka ny Baiboly, dia ‘tsy ananan’ny olona rehetra’. (2 Tesaloniana 3:2). Ho an’ireo izay ‘mirona araka ny mety ho amin’ny fiainana mandrakizay’ anefa, dia afaka mampiorina finoana matanjaka ao aminy ny fianarany tsy tapaka ny Tenin’Andriamanitra. (Asan’ny Apostoly 13:48, NW ). Ny fianarana toy izany koa dia mahatonga ny maso hamirapiratra noho ny fanantenana hoavy mahatalanjona—dia zavatra izay inoan’ny olona mihamitombo isa hatrany any Inde.
[Sarintany, pejy 30]
(Jereo ny gazety)
AFGHANISTAN
PAKISTAN
NÉPAL
BHOUTAN
CHINE
BANGLADESY
MYANMAR
LAOS
TAILANDY
VIETNAM
KAMBODJA
SRI LANKA
INDE
[Sary nahazoan-dalana]
Mountain High Maps® Copyright © 1997 Digital Wisdom, Inc