Aoka Ianao ho Vonona!
‘Aoka ianareo ho vonona, satria amin’ny ora tsy eritreretinareo no hiavian’ny Zanak’olona.’—MAT. 24:44.
1, 2. a) Inona no lazain’ny Baiboly fa hitranga, ka azo oharina amin’ny fanafihan’ny tigra? b) Inona no azontsika atao mba ho vonona isika rehefa hampihatra didim-pitsarana i Jesosy?
NILALAO tigra efa an-taonany maro ny lehilahy iray, ary nanao izany mba hampialana voly ny olona. Mahavariana fa tsy namono azy, ireo tigra. Hoy izy: “Toy ny hoe mahazo ny fanomezana tsara indrindra ianao, rehefa misy biby matoky anao.” Lasa tsy natoky an’io lehilahy io intsony anefa ny tigra fotsy iray, nilanja 172 kilao. Namely azy tampoka io tigra io, tamin’ny 3 Oktobra 2003. Tsy nampoizin’ilay lehilahy mihitsy ny fanafihan’ilay biby.
2 Milaza koa ny Baiboly fa hisy “bibidia” iray hanafika tsy ho ela. (Vakio ny Apokalypsy 17:15-18.) Iza io “bibidia” io, ary iza no hotafihiny? Ny Firenena Mikambana sy ny fitondram-panjakana rehetra eto an-tany no antsoina hoe bibidia. I Babylona Lehibe, na ny fivavahan-diso rehetra, kosa no hotafihiny sy horinganiny. Tsy hampoizin’ny olona maro izany satria toy ny hoe mpinamana ilay bibidia sy Babylona Lehibe hatramin’izay. Samy anisan’ny tontolon’i Satana koa izy ireo. Rahoviana anefa no hitranga io fanafihan’ny bibidia io? Tsy fantatsika na ny andro na ny ora. (Mat. 24:36) Ny hany fantatsika dia hoe amin’ny ora tsy eritreretintsika no hitrangan’izany, ary efa kely sisa ny fotoana tavela. (Mat. 24:44; 1 Kor. 7:29) Tena mila miezaka ny ho vonona foana àry isika. Ho voavonjy isika amin’izay, rehefa ho tonga ilay fanafihana, ka hampihatra didim-pitsarana i Jesosy. (Lioka 21:28) Hanampy antsika ho vonona foana ny fandinihana ny ohatra tsara navelan’ireo mpanompon’i Jehovah fahiny. Vonona hanao ny asa nanirahana azy izy ireo, ka nahita ny fahatanterahan’ny fampanantenan’Andriamanitra. Ahoana no ahafahantsika manahaka azy ireo?
Aoka ianao ho vonona toa an’i Noa
3. Nahoana no sarotra tamin’i Noa ny tsy nivadika tamin’Andriamanitra?
3 Tena ratsy ny fiainana tamin’ny andron’i Noa. Nasehon’i Noa tamin’ny zavatra nataony anefa fa vonona izy rehefa hampihatra ny didim-pitsarany Andriamanitra ka hanatanteraka ny fampanantenany. Alao sary an-tsaina ny zava-tsarotra natrehiny. Nikomy ny anjely sasany ka nitafy nofo ary nanambady vehivavy tsara tarehy tetỳ an-tany. Niteraka “olo-mahery” natanjaka noho ny olombelona izy ireo. (Gen. 6:4) Nihetraketraka tamin’ny hafa ireny olona goavam-be ireny, ary nanakorontana tany amin’izay rehetra nalehany, ka nanjaka ny herisetra. Betsaka ny faharatsiana, vokatr’izany. Lasa ratsy be koa ny fitondran-tenan’ny olona sy ny toe-tsainy. Namoaka didy àry i Jehovah, Tompo Fara Tampony, hoe handringana ny ratsy fanahy izy, amin’ny fotoana voatondrony.—Vakio ny Genesisy 6:3, 5, 11, 12.a
4, 5. Inona no itovizan’ny androntsika amin’ny andron’i Noa?
4 Nilaza i Jesosy fa ho toy ny zava-nitranga tamin’ny andron’i Noa ny hitranga amin’ny androntsika. (Mat. 24:37) Mbola manakorontana etỳ an-tany, ohatra, ny fanahy ratsy. (Apok. 12:7-9, 12) Marina fa tsy afaka mitafy nofo toy ny tamin’ny andron’i Noa ny demonia ankehitriny. Mbola miezaka foana anefa izy ireo hifehy ny olona rehetra, na ny tanora na ny antitra. Faly ireny fanahy tsy hita maso ireny, rehefa mahita ny zava-dratsy ataon’ireo olona voafitany.—Efes. 6:11, 12.
5 Milaza ny Tenin’Andriamanitra fa “mpamono olona” ny Devoly, ary “manan-kery hahatonga fahafatesana.” (Jaona 8:44; Heb. 2:14) Marina fa tsy avelan’Andriamanitra hamono an’izay tiany hovonoina izy, kanefa vitany ny mitaona olona hanao zava-dratsy ka hahatonga azy ireo hijaly na ho faty. Ampirisihiny koa ny olona mba hankahala sy hamono ny mpiara-belona aminy. Hita tamin’ny fandinihana, ohatra, fa isaky ny ankizy 142 teraka any Etazonia, dia ho faty hovonoin’ny olona ny iray amin’izy ireo, any aoriana any. Ahoana no hevitrao? Raha nahita ny herisetra tamin’ny andron’i Noa i Jehovah, tsy ho hitany koa ve ny herisetra tsy amin’antony manjaka ankehitriny? Hitazam-potsiny ve izy?
6, 7. Ahoana no nampisehoan’i Noa sy ny fianakaviany, fa nanam-pinoana sy natahotra an’Andriamanitra izy ireo?
6 Tapa-kevitra hahatonga safodrano etỳ ambonin’ny tany Andriamanitra, tamin’ny andron’i Noa, ka handringana ny nofo rehetra. Nilaza izany tamin’i Noa izy, sady naniraka azy hanamboatra sambofiara miendrika vata lehibe. (Gen. 6:13, 17) Nankatò i Noa sy ny fianakaviany ka nanao an’ilay sambo. Inona no nanampy azy ireo hankatò, ka vonona rehefa tonga ilay fotoana nampiharan’Andriamanitra ny didim-pitsarany?
7 Nanana finoana matanjaka sy natahotra an’Andriamanitra i Noa sy ny fianakaviany, ka nanao araka izay nandidian’Andriamanitra. (Gen. 6:22; Heb. 11:7) Nitoetra ho akaiky an’i Jehovah foana i Noa sady tsy nanahaka ny fitondran-tena ratsin’ny olona. (Gen. 6:9) Nanampy ny fianakaviany koa anefa izy mba tsy ho lasa mahery setra sy mpikomy toy ny mpiara-belona taminy. Tena nila nitandrina izy ireo mba tsy ho variana amin’ny fiainana andavanandro, satria nila nifantoka tamin’ny asa nampanaovin’Andriamanitra azy.—Vakio ny Genesisy 6:14, 18.
Vonona i Noa sy ny fianakaviany
8. Inona no manaporofo fa nahafoy tena ho an’Andriamanitra ny fianakavian’i Noa, raha ny tenin’i Ezekiela no jerena?
8 I Noa no tena resahin’ny Baiboly. Nanompo an’i Jehovah koa anefa ny vady aman-janany sy ny vinantony. Nanamafy an’izany i Ezekiela mpaminany. Nilaza izy fa raha mbola velona i Noa tamin’ny androny, dia tsy hahavonjy ny zanak’i Noa ny fahamarinan’i Noa. Efa lehibe mantsy izy ireo ka afaka nisafidy. Matoa voavonjy àry ny zanak’i Noa, dia satria samy tia an’Andriamanitra sy ny lalany izy ireo, ary nampiseho izany tamin’ny nataony. (Ezek. 14:19, 20) Nankatò ny toromarika nomen’i Noa ny fianakaviany. Nanahaka ny finoany koa izy ireo, ary nanao foana ny asa nasain’Andriamanitra nataony na dia nisy aza ny mpanakantsakana.
9. Iza no manahaka ny finoan’i Noa ankehitriny?
9 Misy loham-pianakaviana miezaka mafy manahaka an’i Noa koa ankehitriny. Tena mampahery ny mahita izany! Takatr’izy ireo fa tsy maintsy manome izay ilain’ny fianakaviany eo amin’ny lafiny ara-panahy izy, ankoatra ny fanomezana sakafo, fitafiana, fialofana, ary fianarana. Asehon’izy ireo amin’izany fa vonona hiatrika izay hataon’i Jehovah tsy ho ela izy ireo.
10, 11. a) Mety ho nanao ahoana ny fihetseham-pon’i Noa sy ny fianakaviany tao anatin’ilay sambo? b) Inona no fanontaniana tokony hoeritreretintsika?
10 Naharitra 50 taona tany ho any no nanorenan’i Noa sy ny fianakaviany an’ilay sambo. Impolo kely angamba izy ireo no nivoaka sy niditra an’ilay izy, mandra-pahavitany. Nohosoran’izy ireo godorao ilay izy mba tsy hidiran’ny rano. Nanangona sakafo koa izy ireo, ary nampiditra biby maro be tao. Tonga ihany ilay andro nandrasan’izy ireo tamin’ny farany. Niditra tao amin’ny sambofiara izy ireo tamin’ny andro faha-17 amin’ny volana faharoa, tamin’ny taona 2370 T.K. Nakaton’i Jehovah ny varavaran’ilay sambo avy eo, ary avy ny orana. Oram-be mbola tsy nisy toa azy ilay izy, toy ny rano niraraka avy any an-danitra. (Gen. 7:11, 16) Maty ny olona tany ivelany, fa avotra kosa ny tao anatiny. Mety ho nanao ahoana ny fihetseham-pon’i Noa sy ny fianakaviany? Azo antoka fa velom-pankasitrahana an’i Jehovah izy ireo. Azo inoana koa fa faly izy ireo satria niara-nandeha tamin’Andriamanitra sy vonona hiatrika an’ilay safodrano. (Gen. 6:9) Azonao sary an-tsaina koa ve ny tenanao velom-pankasitrahana toy izany, aorian’ny Hara-magedona?
11 Tsy maintsy ho tanteraka ny fikasan’ilay Mahery Indrindra, dia ny handringana an’ity tontolon’i Satana ity. Tsy misy mahasakana azy tsy hanao izany. Ilaina àry ny manontany tena hoe: ‘Matoky tanteraka ve aho fa tsy maintsy ho tanteraka amin’ny an-tsipiriany ny fampanantenan’Andriamanitra rehetra, ary ho tanteraka amin’ny fotoana voatondrony?’ Raha matoky an’izany ianao, dia aoka ianao ho vonona ka hanao an-tsaina foana ny “andron’i Jehovah” izay mihamanatona haingana.—2 Pet. 3:12.
Vonona foana i Mosesy
12. Inona no mety hahatonga an’i Mosesy hanadino ny fanompoana?
12 Diniho koa ny fiainan’i Mosesy. Tena afaka nahazo toerana ambony tao Ejipta izy, satria zanaka natsangan’ny zanakavavin’i Farao. Azo inoana fa nohajaina be izy, nihinana sakafo faran’izay tsara, nanao ny akanjo tsara indrindra, ary nipetraka tao amin’ny trano tsara tarehy. Tena nahita fianarana koa izy, ary mety ho afaka nahazo lova be.—Vakio ny Asan’ny Apostoly 7:20-22.
13. Inona no nanampy an’i Mosesy hifantoka foana tamin’ny fampanantenan’Andriamanitra?
13 Nanompo sampy ny Ejipsianina. Takatr’i Mosesy anefa fa hadalana izany, satria nampianarin’ny ray aman-dreniny azy tamin’ny mbola kely hoe i Jehovah no tena Andriamanitra. (Eks. 32:8) Tsy niala tamin’ny fivavahana marina i Mosesy, na dia nipetraka tao amin’ny lapa tsara tarehy sy nanao fianarana be aza. Tsy maintsy ho nieritreritra lalina an’ireo fampanantenan’Andriamanitra tamin’ny razambeny izy. Vonona foana koa izy hanao ny sitrapon’Andriamanitra, ka nanaiky hirahiny. Hoy izy tamin’ny zanak’Israely: “Jehovah ... Andriamanitr’i Abrahama sy Andriamanitr’i Isaka ary Andriamanitr’i Jakoba, no naniraka ahy ho atỳ aminareo.”—Vakio ny Eksodosy 3:15-17.
14. Nahoana i Mosesy no nila finoana matanjaka sy herim-po?
14 Andriamanitra tena misy i Jehovah tamin’i Mosesy, fa tsy toa an’ireo andriamanitra tsy manan’aina nivavahan’ny Ejipsianina. Nasehony tamin’ny zava-drehetra nataony, fa toy ny hoe nahita “an’Ilay tsy hita” izy. Natoky i Mosesy hoe tsy maintsy ho afaka amin’ny fanandevozana ny vahoakan’Andriamanitra, na dia tsy fantany aza hoe rahoviana. (Heb. 11:24, 25, 27) Tena tiany ho tanteraka izany, ka rehefa nahita andevo israelita iray nisy namono izy, dia niaro azy io. (Eks. 2:11, 12) Tsy tamin’izay anefa ny fotoana voatondron’i Jehovah hanafahana ny vahoakany, ka tsy maintsy nandositra tany an-tany lavitra, tany Midianina, izy. Azo antoka fa tena mafy tamin’i Mosesy ny nipetraka tany an-tany efitra, satria efa zatra niadana izy tao amin’ny lapan’ny mpanjaka ejipsianina. Vonona hanatanteraka ny sitrapon’Andriamanitra anefa izy, ka nanaraka foana izay toromarika nomeny. Nampiasa azy mba hanafaka ny vahoakany àry Andriamanitra, taorian’ny 40 taona nipetrahany tany Midianina. Niverina tany Ejipta izy, araka ny baikon’Andriamanitra. Tonga ny fotoana hanatanterahan’i Mosesy ny sitrapon’Andriamanitra, araka ny fomba nitiavan’Andriamanitra azy. (Eks. 3:2, 7, 8, 10) Nila finoana matanjaka sy herim-po i Mosesy, “lehilahy be fandeferana indrindra”, satria hiseho eo anatrehan’i Farao. (Nom. 12:3) Tsy indray mandeha monja anefa izy no nankany, nandritra ireo loza folo, sady tsy fantany mialoha hoe impiry izy no mbola ho any.
15. Nahoana i Mosesy no niezaka hanome voninahitra an’i Jehovah foana, na dia maro aza ny zavatra nandiso fanantenana azy?
15 Maro ny zavatra nandiso fanantenana an’i Mosesy, nandritra ireo 40 taona nanaraka, nanomboka tamin’ny taona 1513 T.K. hatramin’ny 1473 T.K. Niezaka hanome voninahitra an’i Jehovah foana anefa izy, ary nampirisika ny Israelita hanao toy izany koa. (Deot. 31:1-8) Nahoana? Satria tsy ny lazany no zava-dehibe kokoa taminy fa ny anaran’i Jehovah sy ny zony hitondra. (Eks. 32:10-13; Nom. 14:11-16) Tsy maintsy manohana ny fitondran’i Jehovah koa isika, na dia mety hisy zavatra handiso fanantenana antsika aza. Mila matoky isika fa ny fomba fanaovan’i Jehovah zavatra no tsara indrindra, sy feno fahendrena, ary araka ny marina. (Isaia 55:8-11; Jer. 10:23) Matoky an’izany ve ianao?
Miambena hatrany!
16, 17. Nahoana no tena zava-dehibe aminao izay lazain’ny Marka 13:35-37?
16 “Mitandrema hatrany sy miambena hatrany, fa tsy fantatrareo hoe rahoviana ny fotoana voatondro.” (Mar. 13:33) Nilaza an’io fampitandremana io i Jesosy, rehefa nanome famantarana momba ny fifaranan’ity tontolo ity. Hoy izy avy eo: “Miambena hatrany àry, fa tsy fantatrareo hoe rahoviana no ho avy ny tompon-trano, na amin’ny takariva, na amin’ny misasakalina, na amin’ny maneno akoho, na vao maraina, mba tsy hahita anareo matory izy, rehefa tonga tampoka. Fa izay lazaiko aminareo dia lazaiko amin’ny rehetra hoe: Miambena hatrany.”—Mar. 13:35-37.
17 Mampisaintsaina ny tenin’i Jesosy. Milaza izy fa mizara efatra ny fiambenana amin’ny alina. Tena sarotra ny miady amin’ny torimaso amin’ny fiambenana fahefatra, izay manomboka amin’ny telo maraina mandra-piposaky ny masoandro. Miresaka ireo manam-pahaizana momba ny ady fa amin’io fotoana io no tena tsara hamelezana ny fahavalo, satria amin’io no fotoana tena ‘mampahatory’ azy ireo. Amin’izao fotoana izao koa angamba no tena sarotra amintsika ny mifoha hatrany, satria ao anatin’ny torimaso lalina ity tontolo ity. Tsy tokony hisalasala mihitsy anefa isika hoe tena zava-dehibe ny ‘mitandrina sy miambina hatrany’ mandra-pahatongan’ny farany, izay fotoana hanafahana antsika.
18. Inona no tombontsoa lehibe ananantsika Vavolombelon’i Jehovah?
18 Tsy maty ilay lehilahy notafihin’ny tigra voaresaka terỳ am-piandohana. Tsy maintsy ho ringana kosa ny fivavahan-diso rehetra ary ho fongotra ny sisa amin’ity tontolo ratsy ity, araka ny faminanian’ny Baiboly. Efa kely sisa izany dia hitranga. (Apok. 18:4-8) Aoka àry ny mpanompon’Andriamanitra rehetra, na tanora na antitra, hahatsapa fa tena ilaina ny miezaka mafy mba ho vonona amin’ny andron’i Jehovah, toy ny nataon’i Noa sy ny fianakaviany. Tsy manome voninahitra an’Andriamanitra ny olona eto amin’ity tontolo ity. Manao tsinontsinona ny Mpamorona ireo mpampianatra ao amin’ny fivavahan-diso sy ireo olona tsy mino an’Andriamanitra. Tsy tokony hanaiky hotaomin’izy ireny anefa isika. Aoka kosa isika hanahaka an’ireo olona noresahina tato, ka ho vonona hiaro an’i Jehovah sy hanome voninahitra azy. Izy no “Andriamanitry ny andriamanitra”, izay “lehibe sy mahery ary mendrika hatahorana.”—Deot. 10:17.
[Fanamarihana ambany pejy]
a Manazava momba ilay “roapolo amby zato taona” resahin’ny Genesisy 6:3 ny Tilikambo 15 Desambra 2010, pejy 30.
Tadidinao Ve?
• Nahoana no tsy maintsy nataon’i Noa loha laharana izay nilain’ny fianakaviany teo amin’ny lafiny ara-panahy?
• Inona no itovizan’ny androntsika amin’ny andron’i Noa?
• Nahoana i Mosesy no nifantoka foana tamin’ny fampanantenan’i Jehovah, na dia maro aza ny zavatra nandiso fanantenana azy?
• Inona no faminanian’ny Baiboly mandrisika anao hiambina hatrany?
[Sary, pejy 25]
Nifantoka tamin’ny asan’i Jehovah i Noa sy ny fianakaviany
[Sary, pejy 26]
Nanampy an’i Mosesy hiambina hatrany ny fitadidiana ny fampanantenan’Andriamanitra, izay tena azo antoka