Aza Manary An’ireo Mpiray Finoana Aminao

HOY i Johary sy Bakoly vadiny:a “Revo tamin’ny fitadiavana izahay, nandritra ny folo taona, ary lasa nanan-karem-be. Notezaina tao amin’ny fahamarinana izahay, nefa niala tamin’i Jehovah. Tsy nanan-kery hiverenana intsony izahay.”

Nitantara toy izao koa i Marek: “Very asa imbetsaka aho, noho ny fiovana ara-politika sy ara-tsosialy teto Polonina. Tena kivy aho. Tsy sahy nanangana orinasa aho tamin’ny voalohany, satria tsy nahay raharaham-barotra. Nataoko ihany anefa ilay izy, satria nihevitra aho fa hanampy ahy amin’ny famelomana ny ankohonako izany, sady tsy hanimba ny fifandraisako amin’i Jehovah. Tsapako anefa tatỳ aoriana fa diso tanteraka aho.”

Miakatra foana ny vidim-piainana ary mihamaro hatrany ny tsy an’asa. Mahatsiaro ho tsy afa-manoatra ny olona sasany ka lasa manaonao foana. Maro ny rahalahy manapa-kevitra hiasa mandritra ny ora maro kokoa, na hanao asa fanampiny, na hanangana orinasa kely na dia tsy manana traikefa momba izany aza. Mihevitra izy ireo fa hanampy ny fianakaviany ny vola azony amin’izany, sady tsy hanimba ny fifandraisany amin’i Jehovah. Mety hitranga anefa ny sampona, ary mety hanimba zavatra koa ny fiovaovan’ny toe-karena. Lasa variana mitady vola ny sasany vokatr’izany, ka manao tsirambina ny fanompoany.—Mpito. 9:11, 12.

Lasa revo tanteraka amin’ny fikatsahana zavatra eto amin’ity tontolo ity ny rahalahy sy anabavy sasany, ka tsy manam-potoana intsony hianarana samirery, hanatrehana fivoriana, na hanompoana. Mazava ho azy fa misy vokany ratsy eo amin’ny lafiny ara-panahy izany, sady manimba ny fifandraisana amin’i Jehovah. Tsy izay ihany anefa no olana. Mety ho tafasaraka tsikelikely amin’ireo “mpiray finoana” koa izy. (Gal. 6:10) Tokony hojerena akaiky izany, satria sarobidy ny fifandraisana amin’ireo rahalahy sy anabavy.

Ny adidintsika amin’ireo mpiray finoana

Misy toe-javatra maro azontsika hararaotina mba hanehoana fitiavana an’ireo rahalahy sy anabavintsika. (Rom. 13:8) Azo inoana fa misy olona ‘ory miantso vonjy’ ao amin’ny fiangonana misy anao. (Joba 29:12) Tsy manana ny zavatra tena ilaina eo amin’ny fiainana angamba ny sasany. Inona no azo atao? Mampahatsiahy antsika ny apostoly Jaona hoe: “Raha misy manam-pananana eto amin’ity tontolo ity, ka mahita ny fahantran’ny rahalahiny, nefa mandà tsy hangoraka azy, ahoana moa no hitoeran’ny fitiavana an’Andriamanitra ao aminy?”—1 Jaona 3:17.

Angamba ianao efa nalala-tanana tamin’ny rahalahy toy izany. Afaka manampy amin’ny fomba hafa koa anefa isika, rehefa misy mpiray finoana miantso vonjy noho izy manirery na kivy. Mahatsiaro ho tsy mendrika angamba izy, na marary mafy, na nidonam-pahoriana. Inona no azontsika atao? Tena ilaina ny mihaino azy sy mifampiresaka aminy. Hampahery azy izany sady hanampy azy hifandray akaiky amin’i Jehovah foana. (1 Tes. 5:14) Matetika no manamafy ny fifankatiavana ny fifanampiana toy izany.

Ireo anti-panahy indrindra no tokony hihaino sy hangoraka ny hafa. Tokony hiezaka koa izy ireo mba hahatakatra izay mahazo ny hafa, ary hanome torohevitra am-pitiavana miorina amin’ny Soratra Masina. (Asa. 20:28) Tia an’ireo rahalahy sy anabavy izy ireo raha manao izany, toy ny apostoly Paoly izay nilaza fa ‘tena maminy’ ireo mpiray finoana taminy.—1 Tes. 2:7, 8.

Raha miala amin’ny andian’ondry anefa ny Kristianina iray, ahoana no hahafahany hanao ny adidiny amin’ireo mpiray finoana aminy? Marihina fa na ny anti-panahy aza mety ho resin’ny fakam-panahy hitady vola be loatra, ka hihataka amin’ny andian’ondry. Inona àry no tokony hataon’ny Kristianina, raha tratran’io fandrika io izy?

Ireo vesaran’ny fanahiana eo amin’ny fiainana

Hitantsika tetsy aloha fa rehefa mifofotra mitady izay ilain’ny ankohonany ny olona, dia matetika no lasa manahy, ka mety hanamaivana an’ireo zavatra ilaina ara-panahy. (Mat. 13:22) Hoy i Marek, ilay voaresaka tetsy aloha, izay manambady tsy Vavolombelona: ‘Tsy tafavoaka ilay orinasa natsangako, ka nitady asa be karama tany ivelany aho. Niasa tany telo volana aho, dia niverina kely, ary avy eo lasa indray telo volana. Dia hoatran’izany foana. Nampahory ny vadiko anefa izany.’

Tsy ny tao an-tokantranony ihany anefa no nisy olana. Hoy ihany i Marek: “Niasa ora maro tao amin’ny toerana mahamay be aho. Ratsy toetra sy mpanararaotra koa ny olona niara-niasa tamiko. Tena jiolahim-boto! Kivy be aho sady nahatsiaro ho natao tsinontsinona. Tsy nanam-potoana hikarakarana an’izay nilaiko ara-panahy aho, ka nieritreritra hoe tsy hahavita hanampy olon-kafa.”

Mampalahelo ny nahazo an’i Marek. Tokony hampieritreritra antsika izany. Marina fa mety tsy hanana olana ara-bola intsony isika raha mankany an-tany hafa. Tsy hiteraka olana hafa ve anefa izany? Hanao ahoana, ohatra, ny fianakavianao eo amin’ny lafiny ara-panahy sy ara-pihetseham-po? Tsy ho tapaka koa ve ny fifandraisanao amin’ny fiangonana raha mandeha ianao? Mbola ho afaka hanampy an’ireo mpiray finoana aminao ve ianao? Tadidio fa tombontsoa tokoa izany.—1 Tim. 3:2-5.

Mety ho lasa revo tanteraka amin’ny asany anefa ny olona iray, na dia tsy mankany an-tany hafa aza. Diniho izay nitranga tamin’i Johary sy Bakoly. Hoy i Johary: “Nanokatra tsena kely fivarotana hani-masaka izahay, tamin’izahay vao nivady. Tsara toerana ilay izy. Nandeha be ilay tsena, ka nohalehibeazinay ny fivarotanay. Nanjary sahirana be izahay, ka tapatapaka tamin’ny fivoriana. Tsy vitako intsony, tsy ela taorian’izay, ny asan’ny mpisava lalana sy ny andraikitry ny mpanampy amin’ny fanompoana. Tena faly anefa izahay satria nahazo tombom-barotra be, ka nanokatra tsena lehibe kokoa. Nanjary niombon’antoka tamin’ny olona tsy Vavolombelona koa izahay. Tsy ela aho dia nitety tany sy nanao fifanekena ara-barotra tamin’ny olona tany ivelany. Vola an-tapitrisany dolara no nampiasaina tamin’izany. Zara àry aho raha tao an-trano, ary lasa tsy nifandray tsara tamin’ny vady aman-janako. Nanjary natory ara-panahy tanteraka izahay tamin’ny farany, satria variana tamin’ilay asa nandeha be. Tapaka koa ny fifandraisanay tamin’ny fiangonana, ka tsy nahatsiaro an’ireo rahalahy sy anabavy akory izahay.”

Inona no ianarantsika amin’izany? Mety ho voafandrika ny Kristianina raha te hanorina “paradisa” ho an’ny tenany manokana. Mety ho lasa afa-po loatra amin’ny tenany izy, vokatr’izany. Mety hanary ny “akanjony ivelany” koa izy, izany hoe tsy hita intsony ny maha Kristianina azy. (Apok. 16:15) Mety tsy ho afaka hifandray intsony amin’ireo rahalahy koa izy, ka tsy ho afaka hanampy azy ireo intsony.

Diniho amim-pahatsorana ny tenanao

Mety hieritreritra ianao hoe tsy hitranga aminao ireo voalaza ireo. Tsara ihany anefa ny mandinika hoe: Inona no tena ilaina eo amin’ny fiainana? Hoy i Paoly: “Tsy nitondra na inona na inona ho amin’izao tontolo izao isika, sady tsy hahatondra na inona na inona hiala. Koa raha manan-kanina sy fitafiana ary fialofana isika, dia aoka hianina amin’izany.” (1 Tim. 6:7, 8) Marina fa samy hafa ny fari-piainan’ny olona any amin’ny tany mandroso sy any amin’ny tany mahantra. Misy zavatra heverin’ny olona any amin’ny tany mandroso hoe tena ilaina, nefa haitraitra fotsiny any amin’ny tany maro hafa.

Na manao ahoana na manao ahoana anefa fari-piainantsika, dia tadidio foana ny tenin’i Paoly hoe: “Izay tapa-kevitra ny ho tonga mpanankarena dia latsaka ao amin’ny fakam-panahy sy ny fandrika ary ny faniriana maro tsy misy antony sady manimba, izay mandentika ny olona ao amin’ny fandringanana sy ny fanimban-tena.” (1 Tim. 6:9) Tsy hita ny fandrika, ary mamely tampoka. Toy izany ny ‘faniriana manimba.’ Ahoana no azontsika atao mba tsy ho voafandrik’izy io?

Mila mamaritra izay tena zava-dehibe amintsika isika. Handrisika antsika izany mba hanokana fotoana bebe kokoa ho an’ny fanompoana an’i Jehovah, anisan’izany ny fianarana samirery. Manampy antsika Kristianina mantsy ny fianarana sy ny vavaka mba hahatonga antsika ho “tena mahay sy ho ampy fitaovana” amin’ny fanampiana ny hafa.—2 Tim. 2:15; 3:17.

Nisy anti-panahy be fitiavana niezaka nanampy sy nampahery an’i Johary, nandritra ny taona vitsivitsy. Tena niova i Johary, vokatr’izany. Hoy izy: “Noresahin’izy ireo tamiko, indray mandeha, ny momba ilay tovolahy mpanankarena voatantara ao amin’ny Baiboly. Te hiaina mandrakizay izy io, nefa tsy nahafoy ny harenany. Nampisaintsaina ahy tamin-katsaram-panahy izy ireo avy eo hoe sao dia mba mitovy amin’io tovolahy io aho. Tena nahatonga saina ahy izany!”—Ohab. 11:28; Mar. 10:17-22.

Nandini-tena tamim-pahatsorana i Johary, ka nanapa-kevitra ny tsy hanao raharaham-barotra lehibe intsony. Lasa nifandray tsara tamin’i Jehovah indray izy sy ny fianakaviany, tao anatin’ny roa taona. Anti-panahy izy izao, ary manampy an’ireo rahalahy. Hoy i Johary: “Rehefa misy rahalahy variana amin’ny fitadiavam-bola ka manao an-tsirambina ny fifandraisany amin’i Jehovah, dia resahiko aminy ny zavatra niainako mba hampisehoana aminy fa tsy fahendrena ny miray zioga amin’ny tsy mpino. Tsy mora ny manao ny marina foana sy ny mandà, rehefa misy manolotra asa mety hahazoam-bola be.”—2 Kor. 6:14.

Efa voa koa i Marek vao tonga saina. Marina fa tsy sahirana ara-bola intsony ny fianakaviany tamin’izy niasa tany ivelany. Simba anefa ny fifandraisany tamin’Andriamanitra sy ny mpiara-manompo. Nandinika indray an’izay tokony ho zava-dehibe àry izy. Hoy izy: “Tsapako hoe nanao toa an’i Baroka aho, ka ‘nikatsaka zavatra lehibe ho ahy.’ Namboraka ny tao am-poko tamin’i Jehovah aho, ka nolazaiko taminy ny fanahiako. Lasa mahay mandanjalanja indray aho izao.” (Jer. 45:1-5) Miezaka ny ho tonga mpiandraikitra eo anivon’ny fiangonana izao i Marek.—1 Tim. 3:1.

Izao no fampitandremana nomeny ho an’ireo mieritreritra hitady asa be karama any ivelany: “Mora tratran’ny fandrik’ity tontolo ity ianao, rehefa any an-tany hafa. Tsy afaka mifampiresaka tsara amin’ny olona koa ianao satria tsy mahay tsara ny fiteniny. Mety hitondra vola mody tokoa ianao, nefa mety harary ara-panahy koa ka tsy ho sitrana vetivety.”

Marina fa tsy maintsy miasa isika. Tsy tokony hohadinointsika anefa fa manana adidy hanampy an’ireo rahalahy sy anabavintsika isika. Hampifaly an’i Jehovah isika raha mahay mandanjalanja toy izany. Ho modely ho an’ny hafa koa isika, ka hanampy azy ireo handray fanapahan-kevitra tsara. Tadidio fa tokony homena ohatra tsara ireo Kristianina tototry ny zava-manahirana. Mila ampiana sy anehoana fangorahana koa izy ireo. Afaka manampy an’ireo mpiray finoana aminy àry ny anti-panahy sy ny Kristianina matotra hafa, mba hahay handanjalanja sy tsy ho resin’ny fanahiana.—Heb. 13:7.

Tsy tokony ho variana amin’ny asantsika àry isika ka hanary an’ireo mpiray finoana. (Fil. 1:10) Tokony hikatsaka voalohany an’ilay Fanjakana kosa isika, ka ‘hanan-karena eo imason’Andriamanitra.’—Lioka 12:21.

[Fanamarihana ambany pejy]

[Sary, pejy 21]

Tapatapaka amin’ny fivoriana ve ianao noho ny asanao?

[Sary, pejy 23]

Tena zava-dehibe aminao ve ny manampy an’ireo rahalahy sy anabavy?