Valin’ny Fanontanianareo

◼ Tokony hiala amin’ny andraikiny ve ny rahalahy iray, raha miaiky ny fahotana vitany efa an-taonany vitsivitsy lasa izy?

Hoy i Paoly tamin’i Timoty: “Anaro eo imason’ny rehetra ny olona zatra manota, mba hatahotra koa ny sisa.” (1 Tim. 5:20) Meloka ilay rahalahy, na dia efa an-taonany vitsivitsy aza no lasa, raha anti-panahy na mpanampy amin’ny fanompoana izy tamin’ny fotoana nanaovany ilay fahotana. Meloka izy satria mbola nitana andraikitra ihany tamin’izany, na dia fantany aza fa tsy fenony ny fepetra. ‘Nisy hokianina’ mantsy izy. (1 Tim. 3:2, 10; Tit. 1:6, 7) Tokony ho nampandre ny komitim-pitsarana izy, ary niala tamin’ny andraikiny.

Tsy ny hilazan’ilay rahalahy ny fahotany taloha anefa no tanjona, raha efa ela izy no nibebaka tamin’izany, ary hita fa namela azy i Jehovah, sady tsy zatra manota izy. Matetika ilay fahotana no nitranga talohan’ny fotoana nanazavan’ny “Tilikambo Fiambenana” ny amin’izay lazain’ny Soratra Masina momba azy io.

Nahoana moa ilay rahalahy no tokony hesorina amin’ny andraikiny, raha manompo amim-pahatokiana efa hatramin’ny taona vitsivitsy izy, izany hoe roa na telo taona taorian’ilay fahotany, ary hitany fa mitahy azy i Jehovah? Tokony ho afaka hanohy ny andraikiny izy, raha mety ny fomba fiheviny mahakasika ny fitondran-tena, ary hanome torohevitra tsara izy. Mbola afaka mitana ny andraikiny izy, raha hitan’ireo anti-panahy fa manaja azy ny fiangonana ary nasehony tao anatin’ny roa na telo taona fa fenony ireo fepetra.

Mila hampahafantarina ny hafa ve ny fahotana natao efa taona maro lasa izay? Fananarana an’ireo miaiky fa nanao fahotana lehibe mihoatra ny indray mandeha no resahin’ny 1 Timoty 5:20. Zava-nitranga vao haingana mantsy no tena resahiny eo. Ireo “manota”, izany hoe ireo mbola manao an’ilay fahotana, no tondroin’ilay teny grika tany am-boalohany. Tsy ilaina hanarina eo imason’ny hafa àry ny olona nanao fahotana lehibe mihoatra ny indray mandeha, raha efa an-taonany maro izy no nibebaka, izany hoe telo taona na mahery, ary efa tsy manao ilay fahotana intsony izy, sady manaja azy ny fiangonana.