Valin’ny Fanontanianareo

◼ Mety ve ny mampiely eo anivon’ny fiangonana, zavatra mahakasika fitsaboana na sampan’asa mpanoro hevitra, na zavatra hafa?

Raha ny amin’ny fitondran-tena mendrika ny Kristianina, dia nanoratra ny apostoly Paoly fa ‘andry sy tohana ho an’ny fahamarinana ny fiangonana.’ (1 Tim. 3:15) Tsy natao hizarana zavatr’olona manokana àry ny fiangonana, na amin’ny alalan’ny fivoriana alamina manokana ao amin’ny Efitrano Fanjakana no anaovana izany, na any an-toeran-kafa, na koa amin’ny alalan’ny zavatra vita pirinty, sy kasety ary video.

Manana Ny Tilikambo Fiambenana sy Mifohaza! isika, mba hanomezana fanazavana sy torohevitra tsara dia tsara hiatrehana olana ara-pitsaboana sy hanarahana ny lalàn’Andriamanitra mahakasika ny ra. Efa noresahin’ireo gazety ireo koa, tamin’ny alalan’ny lahatsoratra voalanjalanja tsara sy mifanaraka amin’ny Soratra Masina, ny momba ny tahotra sy fahaketrahana ary olana ara-pihetseham-po hafa. Natao hanomezana fanazavana ireny lahatsoratra ireny, fa tsy hanohanana karazana fitsaboana na famantarana aretina sasany. Tsy natao hanoroana dokotera mahay, na toeram-pitsaboana tokony haleha koa izy ireny. Ny tsirairay no tsy maintsy manapa-kevitra ny amin’ireo zavatra ireo.—Jereo ny g 8/11/00 p. 3-12.

Misy olona miezaka mampandroso ny asany sy ny fomba fiheviny, anisan’izany ireo rahalahintsika, ka mamoaka lahatsoratra sy bokikely ary kasety nataony ho an’ny Vavolombelon’i Jehovah. Mety hahaliana na hahasoa ny zavatra resahina ao, nefa inona no antony ampielezana azy ireny? Mba hisarihana mpividy. Na tsy noho io antony io aza no ampielezana ny sasany amin’ireny zavatra ireny, dia mety hahitana fomba fihevitra manokana ihany izy ireny saingy ampiasana ‘voambolana kristianina’ sy teny ao amin’ny Baiboly. Mety tsy hifanaraka amin’ny Baiboly sy ny torohevitra araka ny Soratra Masina omen’ny anti-panahy izany fomba fihevitra izany, na Vavolombelona no namoaka azy, na tsia. Mety hiorina amin’ny filozofia na zavatra fototra eo amin’ity tontolo ity kosa ilay izy.—Kol. 2:8; 1 Tim. 6:20.

Nentim-pahatsorana ireo rahalahy sy anabavy ka nampiely an’ireny zavatra ireny, ary nahatonga olana sy fisafotofotoana. Tsy maniry hampisy izany fahasahiranana izany anefa isika rehetra, indrindra fa ny anti-panahy, izay miara-miasa amin’ny “mpanompo mahatoky sy malina” sy natao hitadiavana tari-dalana. (Matio 24:45) Tsy tokony hampandroso raharaham-barotra na hevitr’olona manokana koa isika, ka hampiely ireny zavatra ireny eo anivon’ny fiangonana.