Valin’ny Fanontanianareo

◼ Mety ve raha atambatry ny anti-panahy, fa tsy ataony tsirairay, ny fiaraha-midinika ireo fanontaniana amin’ny mpilatsaka hatao batisa? Tokony ho adiny firy ny fiaraha-midinika tsirairay?

Tena misy tombontsoa raha atao tsirairay ny fiaraha-midinika ireo fanontaniana ao amin’ny Fanompoantsika. Raha ny tsirairay mantsy no asaina mamaly ny fanontaniana rehetra, dia ho mora amin’ny anti-panahy ny hahita hoe hatraiza ny fahatakaran’ilay olona ny fahamarinana. Hiharihary amin’izay raha vonona ho amin’ny batisa izy na tsia. Ankoatra izany, dia ho mora kokoa aminy ny hilaza ny heviny, raha izy sy ilay anti-panahy irery no miara-midinika.

Tsy mampaninona anefa raha ampiarahina ny mpilatsaka hatao batisa, amin’ny toe-javatra sasany. Mety ho tsara, ohatra, ny hiarahan’ny mpivady na ny mpianakavy hafa, indrindra raha niara-nianatra izy ireo, ary mikasa hatao batisa amin’ny fotoana iray ihany. Raha vitsy koa ny anti-panahy, nefa maro be tsy toy ny mahazatra ny mpilatsaka hatao batisa, dia mety hilaina ny hampiarahana azy ireo tsiroaroa na tsitelotelo. Tokony hahay hitsara zavatra ny anti-panahy amin’izay.

Tokony ho adiny iray, amin’ny ankapobeny, ny fiara-midinika tsirairay, kanefa tsy maninona raha mihoatra an’izany, rehefa ilaina. (Mety hitranga izany rehefa olona roa na telo no ampiarahina, na rehefa mila fotoana bebe kokoa ny anti-panahy mba hahazoany antoka fa vonona ho amin’ny batisa ilay olona.) Samy tsy tokony ho maika ny hamita ireo fanontaniana, na ny anti-panahy, na ny mpilatsaka hatao batisa.

Tokony hiomana tsara ilay mpilatsaka hatao batisa, ka efa handinika samirery ireo fanontaniana, ary hijery sy hamaky ny ankamaroan’ireo andinin-teny voatonona. Tsy tokony hisy hanampy azy amin’ny fanomanana ireo fanontaniana, alohan’ny hihaonany amin’ny anti-panahy. Tokony hodinihina daholo ireo fanontaniana misy nomerao. Hapetraky ny anti-panahy koa ireo fanontaniana azo iaraha-midinika, raha mahakasika ilay olona.