Ampio ny Zanakao Handray Soa Betsaka Kokoa Amin’ny Fivoriana
1 Mihaino tsara ve ny zanakao any am-pivoriana? Afaka mitantara aminao izay nianarany avy amin’ny fivoriana tsirairay ve izy? Modely tsara ho azy ireo ve ianao any, ka ho voatosika izy hanahaka izay ataonao sy izay lazainao? Tena zava-dehibe ny valin’ireo fanontaniana ireo, raha tianao ho lasa mpanompon’i Jehovah be fandavan-tena ny zanakao.
AMPIANARO AZY FA ZAVA-DEHIBE NY FANATREHANA FIVORIANA
2 Mila ampianarina Baiboly ny ankizy mba hahazoany fiainana mandrakizay. (Jaona 17:3) Tena mila mivory izy, mba hianarany hankasitraka zavatra ara-panahy. Misalasala hitondra ny zanany hivory anefa ny ray aman-dreny, indraindray, satria atahorany hanelingelina ny hafa izy ireo. Ny sasany indray angamba mamela azy ireo ao an-trano mba hanao entimody. Ny ray aman-dreny hendry kosa mitondra ny zanany mivory.—Deot. 31:12.
3 Ny zavatra voalohany tokony hampianarina ny ankizy dieny mbola kely dia ny hoe: Mankany am-pivoriana izy mba hihaino. Hianatra hihaino ve anefa izy, ary ho azony ve ny antony andehanana mivory, raha avela hilalao izy na omena zavatra hahavariana azy toy ny kilalao na sakafo? Marina fa mora mifantoka kokoa ny ankizy sasany noho ny hafa. Manitsy ny zanany anefa ny ray aman-dreny hendry, raha maditra izy ireo any am-pivoriana. Zariny amim-pitiavana izy ireo mba hihaino, tsy amin’ny fanambatambazana azy amin’ny vatomamy na bisikoỳ na kilalao, fa amin’ny fananarana azy araka ny Tenin’Andriamanitra.—Ohab. 13:24; Efes. 6:4.
TOKONY HO MODELY IANAO
4 Izao no fanontaniana tao amin’ny Tilikambo Fiambenana iray: “Hitan’ny zanakao ve fa zava-dehibe aminao ny fivoriana, ka tsy manatrika fotsiny ianao fa mandray anjara koa, ary manome valin-teny rehefa misy fahafahana hanao izany?” Inona no ho vokany eo aminy, raha mahita anao miresadresaka izy mandritra ny fivoriana, na milalao aminy ianao na ny olon-kafa? Mora maka tahaka ny ankizy, ka mety hisy vokany eo aminy ny modely omenao.
5 Hitan’ny ray aman-dreny sasany fa tsara raha samy manana ny bokiny sy ny gazetiny ny ankizy any am-pivoriana, na dia ireo mbola kely aza. Azo ampiana hanomana valin-teny koa izy ireo mandritra ny fianaram-pianakaviana. Ary afaka mandrisika azy ireo ianao, raha miara-mandinika aminy an’ireo hevi-dehibe noresahina tany am-pivoriana, sy mamaly izay fanontaniana apetrany. Rehefa mandray anjara ireo ankizy any am-pivoriana, dia tokony ho mailaka hidera azy ireo ny ray aman-dreniny.
AMPANDRAISO ANJARA IZY AO AMIN’NY FIANGONANA
6 Omeo tanjona hotratrariny miandalana ny zanakareo, mba handraisany anjara feno amin’izay ataon’ny fiangonana. Inona, ohatra, no tanjona voalohany? Nisy ray aman-dreny, manan-janaka roa mbola kely, nilaza hoe: “Nampianarina tsy hikofokofoka aloha ireo ankizy, tany amin’ny Efitrano Fanjakana.” Avy eo, ampio hanome valin-teny amin’ny fomba fiteniny izy ireo, ary asaivo ataony tanjona ny handray anjara amin’ny Sekolin’ny Fanompoana.
7 Mila ny fampianarana omena any am-pivoriana ny ankizy, toy ny olon-dehibe ihany. Tsy hiana-javatra firy anefa izy ireo, raha omena kilalao na sakafo mba hahavariana azy. Tsy handeha matetika sy tsy amin’antony any amin’ny trano fivoahana koa izy, raha fantany fa tsy maintsy hanaraka azy any ny rainy na ny reniny.
8 Asa mafy izany fampiofanana izany. Hoy anefa ny Baiboly: “Izay olona marina mandeha amin’ny fahitsiany—sambatra ny zanany mandimby azy.”—Ohab. 20:7.