Aoka isika handray anjara amin’ny fitaran’ilay Fanjakana
1 “Endrey izany fiovana mahatalanjona!” “Haingana be izany fisehoany izany!” “Fitahiana re izany ho an’ireo rahalahy any amin’ny Firaisana Sovietika!”
2 Ireo teny ireo dia re tamin’ny faran’ny Aogositra sy fiandohan’ny Septambra rehefa vita tamim-pahombiazana ny fitohitohizan’ireo fivoriamben’ny distrika natao tany amin’ny Firaisana Sovietika na dia teo aza ny nety hisian’ny fanakantsakanana. Tamin’ny fitambarany manontolo, dia nisy 74 252 ny nanatrika ireo fivoriamben’ny distrika sovietika fito tamin’ny fahavaratra teo (tany amin’ny ila bolantany avaratra misy azy), ary nisy 7 820 ny natao batisa. Ambonin’izany, dia nisy 295 924 fanampiny tafavory tamin’ireo fivoriamben’ny distrika natao tany Eoropa Atsinanana.
3 Azo antoka fa, toy ny tamin’ny taonjato voalohany, dia mahita fahatanterahany ireo tenin’i Isaia mpaminany manao hoe: “Ny olona izay mandeha amin’ny maizina dia mahita mazava lehibe (...) Hamaroinao ity firenena ity, ary ampitomboinao ny hafaliany; mifaly eo anatrehanao izy tahaka ny hafaliana amin’ny fararano.” Eny tokoa, mandroso ny fitaran’ilay Fanjakana! Manapaka i Jesosy Kristy! Ary araka ny tohin’ilay faminaniana, “ny handrosoan’ny fanapahana sy ny fiadanana dia tsy hanam-pahataperana”. — Isaia 9:1, 2, 6 [2, 3, 7, MN].
4 Ny fikarakarana ny fitomboana mahafinaritra aoka izany any Eoropa Atsinanana dia nitaky ny fanorenana toeram-panontam-pirinty lehibe lavitra any Alemaina izay eo am-panaovana azy ankehitriny. Ravoravo ireo rahalahintsika any manohana io fitarana io, izay mahatanteraka amin’ny fomba mivantana ilay faminaniana ara-tantara nataon’i Jesosy hoe: “Hotorina amin’izao tontolo izao ity filazantsaran’ny [vaovao tsaran’ilay, MN] fanjakana ity ho vavolombelona amin’ny firenena rehetra, dia vao ho tonga ny farany.” — Matio 24:14.
5 Misy fitarana lehibe kokoa noho izany aza eo am-panaovana azy any Etazonia. Tamin’ny fanomezana ny diplaoman’ireo nahavita ny Sekolin’i Gileada tamin’ny Septambra teo, dia nambara fa hampitomboina ho avo roa heny, hahatratra mpianatra 50 eo ho eo, ireo hanatrika ny kilasin’ny Gileada hanomboka amin’ny Aprily! Any aoriana, io sekoly io dia hatao any amin’ny Foibem-pampianaran’ny Watchtower, izay eo am-panorenana azy efa ho telo taona izao any Patterson, any New York.
6 Fanorenana Betela vaovao eny Mandrosoa-Ivato: Nankasitrahantsika ny nahare ny fividianan’ny Fikambanana tany hanorenana Betela. Tonga amin’ny ilàna azy izany, satria miitatra aoka izany ilay Fanjakana eto Madagasikara. Inoana fa ankehitriny dia manontany ny maro hoe: “Mby aiza moa ny dingana amin’ny fanorenana Betela vaovao?”
7 Faly izahay manambara aminareo fa tsy ho ela dia hiandoha ny asa. Ka ny voalohany amin’izany dia ny fanorenana ny tamboho hamefy ny Betela vaovao. Ahoana moa no hanaovana azy io? Nandefasan’ny Fandaminana drafitra amin’ny antsipiriany isika mba hananganana io tamboho io. Tafiditra amin’izany ny fatran’ny fasika, ny simenitra, ny vy. Mbola hanapa-kevitra koa ny Fikambanana raha hampiasa lasitra isika mba hananganana ny tamboho. Raha izany no hotapahiny, dia halefan’ny sampana ao Zambia atỳ amintsika izany lasitra izany. Hita avy amin’izany àry fa ho mora ny fananganana io tamboho io kanefa dia ho tena azo antoka koa ny hamafiny.
8 Raha ny amin’ny tena fanorenana kosa dia eo am-panaovana ny fandinihana rehetra ilaina mba hahazoan’ny Fikambanana mamaritra ny amin’ny hoe karazana trano manao ahoana no azo atsangana eo amin’ilay tany. Tafiditra amin’izany fandinihana izany ny sary sy ny toetoetr’ilay toerana. Ao koa ny fandinihana ny nofon-tany sy ny hamafiny. Tsy hadino koa ny toetr’andro toy ny hamafin’ny rivotra, ny habetsahan’ny orana, ny maripana, etsetra. Tsapa tokoa fa zava-dehibe amin’ny Fandaminana ilay fanorenana ka tsy maintsy heverina hatramin’ny zavatra bitika indrindra. Aoka hojerentsika izao ny fomba hoenti-manao io fanorenana io.
9 Ny fomba fanorenana antsoina hoe “tilt-up”: Mampiavaka ny fandaharam-panorenana iraisam-pirenena ny fampiasana io teknika antsoina hoe “tilt-up” io izay mikendry ny hananganana rindrina efa namboarina mialoha (préfabriqué): atambatra eo an-toerana ny takela-drindrina lehibe vita amin’ny rihibato, izay mety mahatratra rihana roa ny haavony ary milanja roa taonina. Ampifanongoavina ny takelaka 6 na 8 ka rehefa maina sy mafy tsara dia atsangana ary apetraka amin’ny toerany amin’ny alalan’ny milina fampakarana enta-mavesatra (grue). Ahazoana fotoana io fomba fanorenana io sady tsy voatery mila mpiasa ampy fahaizana. Fomba tsotra sy mahomby tokoa ny “tilt-up”, koa tsy mahagaga raha izany no ampiasaina amin’ny fandaharam-panorenana vaovao.
10 Inona no azonao atao?: Efa nisy rahalahy sy anabavy nanao zavatra betsaka. Any Etazonia, ohatra, tao anatin’ireo taona maro lasa, dia nisy mpiasa an-tsitrapo maherin’ny 14 000 tonga tany New York mba hanampy tamin’ny fanorenana ireo trano samihafa. Nankasitrahana tokoa ireo asa nataon’izy ireo tamim-pitiavana ireo. Ny fanontaniana dia izao: Moa ve ny tenanao manokana afaka manao izay hahafahanao handray anjara amin’ny fanorenana ny trano Betela vaovao eto Madagasikara? — Heb. 13:16.
11 Mazava ho azy fa tsy ny rehetra no ho afaka hanao izany. Kanefa mbola misy zavatra maro azonao atao. Ohatra, ireo loholona sy mpikarakara maro dia afaka manampy amin’ny fikarakarana izay ilain’ny kongregasiona rehefa mandeha manampy vetivety any amin’ny fanorenana ny Betela ireo nanolo-tena hiasa an-tsitrapo amin’izany avy ao amin’ny kongregasionany. (Ampitahao amin’ny Nehemia 4:13-16 [19-22, MN].) Ny fomba lehibe hafa iray mba hanampiana dia amin’ny alalan’ny fanomezana an-tsitrapo mba hanampiana amin’ny fandaniana. Ny fanorenana ny tabernakely tamin’ny andron’i Mosesy dia efa nilàna harena ara-nofo be dia be, ary toy izany koa ny tempoly naorina teo ambany fitarihan’i Solomona. Kanefa, nanosika ny fon’ny olona mba hanome izay rehetra nilaina i Jehovah. (Eks. 35:4-6, 21, 22; 36:3-6; 1 Tant. 29:3-9). Amin’izao androntsika izao, ireo isam-batan’olona, kongregasiona ary fizaran-tany dia efa nanao fanomezana ho an’ireo fanorenana maneran-tany izay tsy isalasalana fa manana anjara lehibe amin’ny fanitarana ny fanambarana ilay Fanjakana maneran-tany. Afaka manao fanomezana ho fanohanana io asa fanitarana mahatalanjona io ve ianao? Raha afaka ianao, raha sitrakao dia alefaso any amin’ny FI.MPI.BA.MA. ny fanomezanao.
12 Raha tsy manana fahafahana hanao fanomezana mivantana ianao nefa manam-bola izay ho tianao ny hampiasan’ny Fikambanana azy mandritra ny fe-potoana sasantsasany ary handray azy io indray rehefa tianao izany, raha sitrakao dia manorata any amin’ny Fikambanana momba io fandaharana ny amin’ny fanomezana misy fepetra io. Halefa any aminao ireo tsipirian-javatra manazava momba izany.
13 Na afaka ny hiasa an-tsitrapo any amin’ny toeram-panorenana ianao na tsia, na afaka ny hanao fanomezana ara-bola an-tsitrapo ianao na tsia, isika rehetra dia afaka mivavaka mba hahombiazan’ireo fanorenana ireo mba hiitatra maneran-tany ny tombontsoan’ny Fanjakan’Andriamanitra. Enga anie ny fanambinan’ilay Raintsika any an-danitra ho eo amintsika rehetra eo am-piezahantsika hamita ny asany.