Aoka Isika Hiaina Amin’ny Fananana Saina Mahay Mitsara Zavatra sy Araka ny Rariny
1 Miaina eo amin’ny tontolo iray izay mampihatra fitaomana mahery ho amin’ny faharatsiana, isika. Miharatsy hatrany ireo fari-pitsipik’ity fandehan-javatra ity. (2 Tim. 3:3). Amin’ny maha-Kristiana antsika, dia tsy maintsy miandany amin’izay mahitsy isika ary mahatakatra ny antony tokony hanohizantsika hanao izany. Aiza anefa no misy fitarihana sy torolalana? Fari-pitsipika inona avy no tokony harahintsika? “Aoka Isika Hiaina amin’ny Fananana Saina Mahay Mitsara Zavatra sy araka ny Rariny” no loha hevitra feno fampaherezana nofidina ho an’ny fandaharan’ny andro fivoriambe manokana hataontsika amin’ny taom-piasana 1993. — Titosy 2:12, NW.
2 Amin’ny alalan’ny lahateny, fampisehoana ary fitantarana zava-nitranga teo amin’ny fiainana, isika dia hianatra ny fomba ahafahantsika manatanja-tena mba hanohitra ny faharatsiana sy handa ireo filan’izao tontolo izao. Ho hitantsika koa ny fomba ahafahana miaina amin’ny fananana saina mahay mitsara zavatra sy araka ny rariny eo anivon’ity fandehan-javatra ratsy ity. Homena antsika ireo fanazavana hanampy antsika hiaro ny herin-tsaintsika. (1 Pet. 4:7, NW). Ho tian’ireo ray aman-dreny sy ireo tanora indrindra ny hampifantoka ny sainy amin’ireo lahateny sy fanadinadinana mandritra ny fandaharana amin’ny tolakandro. Izy ireo dia hanantitrantitra ny ilana hahazo fahendrena sy fanandraman-javatra araka an’Andriamanitra, ary ny hiarahana miasa mba hanorenana hoavy teokratika sambatra.
3 Na dia voahodidin’ny tontolo ratsy aza isika, ny Tenin’Andriamanitra dia mampianatra antsika eo amin’ny lalana tsara indrindra ny hanarahana azy. Ireo soa azo avy amin’ny fanarahana ny torohevitry ny Baiboly dia hasongadina ao amin’ilay lahateny hoe “Ankamamio Ireo Fitahiana Anananao eo Anivon’ny Tontolo Iray tsy Misy Fifaliana”. Eo am-piomanantsika mba hanatrika izany, dia tiantsika ny hitadidy ao an-tsaina fa ny fampifantohantsika akaiky ny saintsika amin’ny fandaharana sy ny fampiharantsika ireo torohevitra dia hanampy antsika hahita vokatra tsara kokoa eo amin’ny fanompoana ataontsika ho an’i Jehovah. — Fil. 3:15, 16, NW.