Ny Fanaovana Dingana Hentitra mba Hitohizan’ny Fandrosoana
1 Izao dia efa nahatapitra ny famakiana ny Annuaire 1992 ny ankamaroantsika. Nampientana ny fontsika ny fahafantarana ny tampon’isa maneran-tany tamin’ny 1991 tamin’ny mpitory ilay Fanjakana maherin’ny efatra tapitrisa sy sasany any amin’ny tany 211 - fitomboana 6,5 isan-jato! Azo antoka fa manome porofo miavaka dia miavaka ny amin’ny fahatanterahan’ny Isaia 2:2-4 sy ny Mika 4:1-4 ny fitomboan’ilay Fanjakana miseho maneran-tany ankehitriny.
2 Na dia mbola tsy feno aza ny filazana asa ho an’ny taom-piasana 1992, dia efa miharihary ny porofo fa mandrakariva ity taom-piasana ity amin’ny alalan’ny fitomboana miavaka maro i Jehovah. Mbola mitohy ihany ny fanasana ny olona mba hiaraka amintsika ao amin’ilay firahalahiana iraisam-pirenena lehibe misy antsika. Ny isan’ireo nanatrika ny Fahatsiarovana sy ny fivoriamben’ny distrika dia mampiseho fa olona an-tapitrisany maro no manongilan-tsofina hihaino ny hafatra momba ilay Fanjakana. Avy any amin’ny firenena rehetra, dia manaiky ilay fanasana azo tamin’ny tsindrimandry miantso toy izao, izy ireo: “Andeha isika hiakatra any an-tendrombohitr’i Jehovah, ho any an-tranon’Andriamanitr’i Jakoba, mba hampianarany antsika ny amin’ny làlany, ka handehanantsika amin’ny atorony”.
3 Aoka ianao ho tapa-kevitra ny handroso: Mandroso ny fandaminan’i Jehovah. Maro aoka izany ireo vaovao mirohotra miakatra any amin’ny fanompoam-pivavahana marina amin’i Jehovah oharina amin’ny tendrombohitra, hany ka zava-dehibe ny hanaovan’ny tsirairay dingana hentitra hitohizan’ny fandrosoany ara-panahy, ary avy eo dia hiezaka mba hanampy vaovao hafa mba hanao toy izany koa. Ny ilana izany fandrosoana izany dia hita ao amin’ilay fanambarana ataon’ireo manaiky ilay fanasana hiakatra ao an-tendrombohitr’i Jehovah amin’ny hafa, manao hoe: “Avia”. Nitantara zavatra mitovy amin’ izany toy izao ny apostoly Jaona ao amin’ny Apokalypsy 22:17: “Ny Fanahy sy ny ampakarina manao hoe: Avia; ary aoka izay mahare hanao hoe: Avia.”
4 Nasehon’i Jesosy ny fomba azo anaovana io fanasana io. Rehefa nanaiky ny fampianarany ny olona, dia nanasa azy ireo handray anjara amin’io fanompoana nataony io izy ary nampianatra azy ireo ny fomba fanaovana azy. (Matio 4:19; 10:5-7, 11-14). Nianatra ireo fomba nandaitra nampiasainy ireo mpianany, tamin’ny fiarahana taminy sy tamin’ny fandinihana ny fomba nanaovany zavatra. Naka ny fanompoany ho modely ho an’ny fanomponan’ny tenany izy ireo. Nianatra ireo fomba nampiasainy tamin’ny fomba tsara aoka izany izy ireo, hany ka ny fitoriana feno fahasahian’izy ireo dia nisarika ny sain’ireo mpanohitra izay nahafantatra mazava tsara fa mpianatr’i Jesosy izy ireo. Mitantara toy izao ny Asan’ny Apostoly 4:13: “Ary nony nahita ny fahasahisahian’i Petera sy Jaona izy, (...) [dia] fantany tsara fa efa niaraka tamin’i Jesosy izy roa lahy.”
5 Talohan’ny niverenany hankany an-danitra, dia nanome baiko ny mpianany i Jesosy mba hanohizan’ izy ireo ny fanompoana kristiana amin’ny fanaovana mpianatra vaovao, amin’ny fampianarana azy ireo amin’ny fomba tsy misy hafa amin’ny nampianarana ny tenan’izy ireo. Ao amin’ny Matio 28:19,20, dia nanome izao baiko izao i Jesosy: “Koa mandehana hianareo, dia ataovy mpianatra ny firenena rehetra, (...) sady mampianatra azy hitandrina izay rehetra nandidiako anareo”. Ary mba hampisehoana fa tiany ny hitohizan’izany hatramin’izao androntsika izao, dia nanome izao toky fanampiny izao izy: “Indro, Izaho momba anareo mandrakariva ambara-pahatongan’ny fahataperan’ izao tontolo izao.”
6 Ireo tena mpianatr’i Jesosy Kristy dia nankatò ireo toromarika nomeny mba hampianatra ireo zavatra rehetra nandidiany azy tamin’ireo mpianatra vaovao. Kanefa ny fitomboana miavaka hita eo anivon’ny kongregasionan’ny Vavolombelon’i Jehovah maneran-tany dia mitaky ny handinihantsika ireo zavatra manokana ilain’ireo mpikambana vao vita batisa ao amin’ny kongregasiona, ny an’ireo mpitory tsy vita batisa ary koa ny an’ireo olona miara-mianatra ny Baiboly amintsika izay manomboka manatrika ireo fivorian’ny kongregasiona na tsy tapaka izany, na mahalana kokoa.
7 Teo am-piandohan’ny taom-piasana 1992, dia mpitory 1 isaky ny mpitory 9 no nanomboka niasa teo amin’ny fanompoana herintaona monja talohan’ izay. Ankoatra izany, dia mpitory 1 isaky ny mpitory 4 no nanomboka nandray anjara tamin’ny fanompoana tao anatin’ny dimy taona talohan’ izay. Nandroso tamin’ny fomba tsara dia tsara ny vaovao maro nanomboka tamin’ny fotoana mahatongavany ho mpikambana ao amin’ny kongregasiona. Na dia izany aza, dia tsy isalasalana fa hanampy azy ireo hanafaingana ny fandrosoany ara-panahy ny fanomezana ho azy ireo fanampiana hafa koa eo amin’ny lafiny sasany.
8 Mampirisika ny rehetra mba “handroso haingana ho amin’ny fahamatorana” ny Hebreo 6:1 (NW). Mihoatra lavitra noho ny famerenana filazana asa fotsiny ny fahamatorana kritsiana. Tafiditra amin’izany ny fandrosoana eo amin’ny fianarana manokana sy ny fanatrehana tsy tapaka ireo fivoriana ary koa ny fandraisana anjara amin-jotom-po amin’ny asa fanompoana. Tafiditra amin’izany koa ny fanampiana ny hafa mba ho tonga amin’ny fahalalana ny fahamarinana hahazoany famonjena. Tsy maintsy miasa mafy isika mba hanatsara ny fahaizantsika ’manjohy hevitra avy amin’ny Soratra Masina’. (Asa. 17:2, NW). Mitaky fotoana ny fitomboana ho amin’y fahamatorana, ary miankina be dia be amin’ny fifikirantsika amin’ Andriamanitra sy ny fahazoantsika fanandraman-javatra eo amin’ny asa fanompoana. Na dia mahafefy ny halalin’ny fifikiran’ny tenantsika amin’Andriamanitra aza isika, dia lalan’ny fahendrena ny hamelantsika ireo rahalahy sy anabavy matotra hafa hanampy antsika hahazo fanandraman-javatra. Afaka mianatra avy amin’ny fanandraman-javatr’izy ireo isika, indrindra fa eo amin’ny asa fanompoana. Tsy voatery hianatra ny zava-drehetra irery avy amin’ny fanaovan’ny tenantsika fanandramana sy fahadisoana, isika.
9 Fanampiana ho an’ ireo tsy ampy fanandraman-javatra: Ny modely ny amin’ny fanomezana fanampiana dia nomena tany am-piandohan’ny kongregasiona kristiana. Nampianatra ireo mpianany i Jesosy. (Marka 3:14; Luke 9:1; 10:1). Izy ireo indray kosa dia nampianatra ny hafa. Naharay fampaherezana sy fanampiana avy tamin’ny apostoly Paoly i Timoty, ary i Apolosy mpianatra dia nandroso noho ny fanampiana manokana azony avy tamin’i Akoila sy i Prisila. (Asa. 18:24-27; 1Kor. 4:17). Ireo mpikambana matotra ao amin’ny kongregasiona kritsiana dia manaraka ireo amin’ izao andro izao, ka mampianatra sy mampahery ireo kely fanandraman-javatra kokoa, indrindra fa ireo vaovao sy ireo tanora. Araka ny filazan’ ny Romana 15:1,2, “isika izay matanjaka dia tokony hitondra ny fahalemen’ny malemy”.
10 Ny ray aman-dreny dia tompon’ andraikitra ny amin’ny fanaovana dingana hentitra mba hanampiana ny zanany handroso ara-panahy. Tafiditra amin’ izany ny fianaram-pianakaviana, ny fampianarana ireo ankizy ny fomba fanaovana fianarana manokana, ny fanatrehana ireo fivoriana tsy tapaka sy ny fandraisana anjara amin’izy ireny, ary ny fahazoana fanandraman-javatra amin’ny fampiharana izay ianarany. (Efes. 6:4; 1Tim. 5:8). Ireo mpitarika Fianarana ny Bokin’ny Kongregasiona indrindra no tokony hitari-dalana eo amin’ny fanaovana fandaharana mba hanampiana ny rehetra ao amin’ny fianarana ny boky sy ao amin’ireo antokon’olona miara-mivory ho amin’ny asa fanompoana tarihiny, mba handroso eo amin’ny lafiny ara-panahy. Afaka manampy koa ny mpiandraikitra ny asa sy ireo loholona hafa ary koa ireo mpikarakara momba ny asa sy ny mpikambana hafa ao amin’ny kongregasiona.
11 Manomeza izay ilaina: Mety ho fanampiana eo amin’ny lafiny iray amin’ny asa kristiana fotsiny ilay zavatra ilaina, toy ny fianarana manokana, ohatra. Mety hila fanoloran-kevitra momba ny fanaovana fandaharam-potoana azony ampiharina mba hanaovany fianarana ny olona iray. Ny olon-kafa iray dia mety hila fanampiana mba hanomanana valinteny na anjara. Ny hafa angamba mila momba ny foto-kevitra ara-baiboly.
12 Vaovao maro no mila fanampiana eo amin’ny asa fanompoana. Mety haniry hanjary hahita vokatra tsara kokoa eo amin’ny fanompoana isan-trano, na ny fanaovana fiverenana mitsidika, na ny fanombohana fampianarana Baiboly, ny mpitory iray. Mety ho ampy ny fanaovana fandaharana fanazaran-tena vitsivitsy hampiasana ireo fampidiran-dresaka sy fomba fampiseho anoroana hevitra ao amin’ny boky Fanjohian-kevitra na ao amin’ny Ny Fanompoantsika Ilay Fanjakana. Amin’ny toe-javatra hafa, ny hany mety hilaina dia fanoloran-kevitra momba ny fanaovana fandaharam-potoana azo arahina ho amin’ny asa fanompoana, ary fanampiana mba hifikitra amin’izany. Ny fanaovana fandaharana hentitra tsara mba hiaraha-miasa amin’ny olona iray mila fanampiana dia hahatonga azy handroso ka hahatratra zava-kendrena voafaritra tsara.
13 Mampirisika antsika mba hamela ny fandrosoantsika ara-panahy hiseho amin’ny hafa, ny Tenin’Andriamanitra. Izany no torohevitra nosoratan’i Paoly tamin’i Timoty mpiara-miasa taminy. (1Tim. 4:15). Mifanaraka amin’izany fampirisihana izany, dia nanatitrantitra ny ilantsika hanazatra ny tenantsika toy ny rehefa handray anjara amin’ny fifaninanana atletika iray na rehefa hanao ady ara-panahy amim-pahombiazana, ilay apostoly. (1Kor. 9:24-27, NW; 2Kor. 10:5, 6). Tokony no mailaka hampihatra izay rehetra ianarantsika momba ny sitrapon’Andriamanitra isika mba ho hitan’ny mpitazana fa ohatra velona ny amin’ny finoana kristiana ny tenantsika. Toy izany koa, isika dia tokony handroso eo amin’ny fahaizana mampianatra ny hafa mba ho tonga mpianatr’ i Jesosy Kristy nanolo-tena. -Jack. 1:22-25; 1Tim. 4:12-16, NW.
14 Tafiditra ao amin’ny fandrosoana ny fiaretana fitsapana: Na dia i Jesosy Kristy aza dia nianatra lesona sarobidy avy tamin’ ireo fahoriana nentiny. (Heb. 5:8). Afaka manao toy izany koa isika. Araka izany, ny fandrosoana ara-panahy dia hitombo rehefa maka ilay fihetsika manorina nampirisihana antsika toy izao ao amin’ny Jakoba 1:2,3, isika: “Ry rahalahiko, ataovy ho fifaliana avokoa, raha iharan’ny fakam-panahy samy hafa hianareo, satria fantatrareo fa ny fizahan-toetra ny finoanareo dia mahatonga [fiaretana, NW].” Noho izany, na voatera mizaka ny zava-tsarotra ateraky ny aretina mitaiza isika, na fahasahiranana ara-toekarena, na fiainana ao aminn’y tokantrano voazarazara, na fanoherana eo amin’ny faritany, na izay toe-javatra ratsy maro hafa, dia manana ny toky avy amin’ i Jehovah fa, noho ny fanampiany, dia afaka mandresy izany isika ary hanohy handroso eo amin’ny fanompoantsika azy. (1Kor. 10:13; 2Kor. 12:9; 1Pet. 5:8-11) Azo amin’ny alalan’ny fiorenana mafy amin’ny toe-javatra rehetra ny fahombiazana, ’amin’ny filazana ireo tenin’Andriamanitra sy amin’ny fanompoana araka ny hery izay omen’Andriamanitra, mba hankalazana an’Andriamanitra amin’ny zavatra rehetra amin’ny alalan’i Jesosy Kritsy’.- 1Pet. 4:11.
15 Ekeo ny fanampiana atolotra mba hanohizana handroso: Raha iray amin’ireo izay mila fanampiana mba hanohy handroso ara-panahy ianao, dia aoka ianao ho vonona hanaiky ny fanampiana avy amin’ny mpikambana manana fanandraman-javatra kokoa ao amin’ny kongregasiona. Na dia tsy nisy nanatona anao aza mba hanolotra fanampiana ho anao, dia tsy voatery hamela ny hasarotan-kenatra hanaisotra aminao ny fahafahana hahazo fanampiana ianao. Mangataha fanampiana. Aza misalasala mitady ny fanampian’iza na iza amin’ireo manana fandraman-javatra ao amin’ny kongregasiona. Na, azonao atao koa ny manontany ny mpitarika ny Fianarana ny Bokin’ny Kongregasiona misy anao, na ny mpiandraikitra ny asana izay loholona hafa rehetra, mba hahazoana ny fanampiana ilainao.- Ampitahao amin’ny Genesisy 32:27; Matio 7:7,8.
16 Azo antoka fa tombontsoa mahatalanjona ny hoe tafiditra ho anisan’ny “olona betsaka” iraisam-pirenena tsy mitsaha-mitombo izay mirohotra miakatra ho any amin’ny fanompoam-pivavahana marina amin’i Jehovah oharina amin’ny tendrombohitra. (Apok. 7:9). Tombotsoa koa ny manasa ny hafa hiaraka amintsika ho amin’ io fiakarana io. Noho ny fankasitrahana avy amin’ny fo, dia enga anie isika hanohy hanao dingana hentitra mba handroso hatrany. Enga anie koa isika hanohy hanorina fahasalamana ara-panahy ao amin’ny tenantsika manokana, ary hanao izay azontsika atao mba hanampiana ny hafa hiara-mandroso amintsika eo amin’ny fanompoana an’i Jehovah.