Mpitondra Fahazavana eo Amin’ny Manodidina Antsika
1 Rehefa avy nanatrika ny fivoriamben’ny distrika tamin’ity taona ity isika dia vao mainka mahatsapa kokoa ny ilàntsika ny ho mpitondra fahazavana any amin’ireo mpiara-monina amintsika. (Matio 5:14). Rehefa misaintsaina momba ireo fanazavana rehetra natolotra tamin’ny fandaharana isika, ka miezaka mafy ny hampihatra azy ireo eo amin’ny fiainantsika andavanandro, dia voatosika hanatona akaiky kokoa an’i Jehovah ao amin’ny fanompoam-pivavahana marina ary koa hanampy ny hafa hianatra momba ireo fampanantenan’i Jehovah.
2 Nitombo ireo fahafahantsika hitondra fahazavana rehefa navoaka ilay taratasy mivalona vaovao mitondra ny lohateny hoe Ho Tafita Velona ve Ity Tontolo Ity? tamin’ny faran’ny fotoam-pivoriana ny zoma maraina. Ireo fampisehoana tamin’ny asabotsy maraina dia tena nanampy tokoa satria nampiseho ny fomba azo ampiasana io taratasy mivalona io. Niaraka tamin’izay koa, dia nisy fanambarana fa hisy taratasy mivalona telo hafa koa ho azo tsy ho ela. Izy ireo dia mitondra ny lohateny hoe Fampiononana ho An’ireo Ketraka, Ankafizo ny Fiainam-pianakaviana, ary Iza Marina no Manapaka Ity Tontolo Ity? Nampirisihina isika mba hitondra eny amintsika ireo fitaovana mora entina ireo mba hampiasaina isaky ny misy fahafahana ho amin’izany.
3 Tamin’ny fifaranan’ny lahateny hoe “Fanafahana Amin’ny Fotoan’ny Fampiharihariana an’i Jesosy Kristy” tamin’ny asabotsy tolakandro, dia navoaka ny bokikely vaovao tsara dia tsara iray mitondra ny lohateny hoe Tena Miahy Antsika ve Andriamanitra? Io bokikely miloko tanteraka ary voaravaka sary tsara tarehy io dia hamaly fanontaniana maro ataon’ny olona, toy ny hoe: Nahoana Andriamanitra no mamela ny fijaliana hisy? Hisy farany ve ny fijaliana indray andro any? Ahoana no ahafantarantsika fa miaina amin’ny andro farany isika izao? Amin’ny fomba ahoana no hanovana ny tany ho paradisa? Ahoana no mety hahazoantsika fiainana mandrakizay ao amin’ny tontolo vaovaon’Andriamanitra? Tena fitaovana faran’izay tsara mba hanombohana fampianarana vaovao io bokikely io.
4 Velom-pankasitrahana toy inona moa isika noho ny sakafo ara-panahy tondraka noraisintsika tamin’ny Fivoriamben’ny Distrika “Ireo Mpitondra Fahazavana”! Enga anie isika, amin’ny maha-mpitondra ny fahazavana ara-panahin’Andriamanitra antsika, ka ho tapa-kevitra ny haneho fankasitrahana feno fahatsorana amin’ny fampiharana amim-pitandremana tsara izay nianarantsika ary amin’ny fampiasana amim-pahamalinana ireo fitaovana vaovao tsara dia tsara ireo mba hanampiana ny olona hatraiza hatraiza hahafantatra sy hanompo an’i Jehovah.