Omano ho Amin’ny Asa Fanompoana Ireo Mpianatra Baiboly
1 Ny tanjona fototra amin’ny fitarihana fampianarana Baiboly dia ny hanao mpianatra vaovao, izay hiara-miasa amintsika mba hampianatra ny hafa. (Matio 28:19, 20). Koa tsy ny hampita fahalalana fotsiny àry no zava-kendren’ny fianarana; izy io dia tokony handentika ao am-pon’ireo olona ampianarintsika finoana amim-pahatsorana sy hanomana azy ireo hizara ny fanantenany amin’ny hafa. (2 Kor. 4:13). Fomba mandaitra inona avy no azontsika anampiana azy ireny mba hahay hampianatra ny hafa? — 2 Tim. 2:2.
2 Apetraho ho tanjona ny asa fanompoana: Hatrany am-piandohana mihitsy, dia ataovy mazava fa tafiditra amin’ny fanompoam-pivavahana marina ny fanaovana “fanambarana ampahibemaso hahazoana famonjena”. (Rom. 10:10, NW). Ny anarantsika mihitsy hoe Vavolombelon’i Jehovah, dia mampiseho fa tsy maintsy miresaka amin’ny hafa isika. Ampio izy ireo hahita fa tsy ny famonjena azy manokana fotsiny no mahatonga azy hampianarina. Rehefa ho tonga mpampianatra ny tenany, dia hanana fahafahana hahazo famonjena koa ireo izay hihaino azy. — 1 Tim. 4:16.
3 Famerenana izay nianarana: Fanampiana sarobidy eo amin’ny fampianarana, ny famerenana ara-potoana izay efa nianarana. Manampy ilay mpianatra hitombo ara-panahy izany, arakaraka ny hihazonana ao an-tsaina sy ao am-po ireo fahamarinana vaovao nianarana. Mahatsapa izany ny tenantsika rehefa mamaly ireo fanontaniana ho famerenana izay anisan’ny Fianarana Ny Tilikambo Fiambenana. Manomàna fanontaniana tsotra sady mivantana mba hovalian’ilay olona ampianarinao amin’ny fomba fiteniny manokana.
4 Mety haka endriky ny faritra eny amin’ny asa fanompoana ny famerenana ataonao. Manaova fanontaniana iray na milazalazà tarehin-javatra iray fahita rehefa manao fanambarana amin’ny hafa. Amin’ny fandraisanao ny toeran’ilay tompon-trano, dia avelao ilay olona ampianarinao hanaporofo izay nolazainy. Anaovy teny fankasitrahana izy noho izay zavatra tsara nataony, ary manomeza fanoloran-kevitra azo ampiharina izay hanampy azy mbola hahazo vokatra bebe kokoa amin’ny manaraka. Hampianatra azy ny fomba fampiasa izay nianarany izany fampiofanana izany sady hampitombo ny fahaizany mampiasa ny Baiboly.
5 Boky Fanjohian-kevitra: Ataovy azo antoka fa manana boky Fanjohian-kevitra iray ilay olona ampianarinao, ary ampianaro izy hampiasa azy io. Asehoy ny fomba anomezan’izy io fanoloran-kevitra rehefa hanombo-dresaka, rehefa hamaly ireo fanontaniana ara-baiboly na rehefa tojo fanoherana. Ampiasao ao amin’ny fianarana ilay boky mba hampisehoana ny fomba firesahana amin’ny hafa amin’ny fomba mampiaiky. Io boky io dia afaka manorina ny fitokiany, ka hampitombo ny fahaizany mitari-javatra mba hanambara ny hafatr’ilay Fanjakana.
6 Hamafiso ny maha-zava-dehibe ireo fivoriana: Ireo fivorian’ny kongregasiona, indrindra ny Fivoriana Momba ny Asa sy ny Sekolin’ny Fanompoana Teokratika, dia natao mba hanomanana antsika ho amin’ny asa fanompoana. Ny zavatra fototra rehetra mba hanaovana fanambarana mandaitra dia dinihina sy asehon’ireo za-draharaha sy mahay. Antitrantero ny maha-zava-dehibe ireo fivoriana, ary ataovy izay azonao atao mba hanampiana azy hanatrika ireny. Ny fanatrehana ireo fivoriana tsy tapaka dia ho afaka hanome ilay olona ampianarinao ny fandrisihana ilaina hahatongavany ho tena mpianatr’i Jesosy.
7 Aza hadinoina ny ohatra manokana omenao. Ny fahavononanao sy ny tsy fahatapatapahanao amin’ny asa fitoriana dia mampiseho ny fankasitrahanao lalina ny fahamarinana. Mampirisika ilay olona ampianarinao hanao bebe kokoa mba hanehoana ny finoany, ny fanaovanao zavatra toy izany. (Lioka 6:40). Izany rehetra izany dia manampy ny olona vaovao iray hihevitra ny asa fanompoana ho tombontsoa sy ho velom-pankasitrahana hanana anjara amin’izy io. — 1 Tim. 1:12, NW.