Ampiasao Ireo Gazety mba Hizarana ny Fahamarinana
1 Nihasimba matetika ny hasarobidin’ny fanazavana milaza ny marina sy miorina amin’ny zava-misy eo amin’ny fitambaran’olona amin’izao andro izao, noho ny fanaovana laza masaka amin’ny dokam-barotra sy ireo fampanantenana ara-politika mamitaka ary ireo fanambarana iraisam-pirenena tsy marina. Tsy manam-paharoa kosa Ny Tilikambo Fiambenana sy ny Mifohaza! satria izy ireo irery no manambara ny fahamarinana momba ny Fanjakan’Andriamanitra sy manazava izay tsy maintsy ataontsika rehetra mba hahazoana ireo fitahiana mandrakizay hoentiny.
2 Tany amin’ny tany iray, ny manam-pahefana iray ao amin’ny ministeran’ny filazam-baovao izay nahatsapa ny hasarobidin’ireo gazety roa ireo, dia tsy nisalasala nanampy mba hahazoana ny fanomezan-dalana hizarana azy ireo. Izao no nambarany: “Amiko dia iray amin’ireo gazety tsara indrindra Ny Tilikambo Fiambenana; faly indrindra aho afaka manampy.” Manana tombontsoa manampy ny hafa isika, amin’ny fizarana ireny gazety mitondra fahalalana manome fiainana ireny. (Jaona 17:3). Ahoana no hanoloranao ireo gazety sarobidy ireo mandritra ny May? Hanampy anao angamba ireto fanoloran-kevitra manaraka ireto.
3 Raha manasongadina “Ny Tilikambo Fiambenana” ianao dia ho azonao atao ny hilaza toy izao:
◼ “Miresaka amin’ny olona momba ilay boky be mpividy indrindra eo amin’izao tontolo izao izahay. Fantatrao ve hoe inona izy io? [Avelao izy hamaly.] Ny amin’ny Baiboly no resahinay. Tsy maintsy nisy antony tena tsara nahatonga olona maro be hividy ny Baiboly. Hita ao amin’ny 2 Timoty 3:16 izany antony izany.” Rehefa avy mamaky ilay andinin-teny dia asongadino ireo hevitra mifanentana ao amin’ny iray amin’ireo lahatsoratry Ny Tilikambo Fiambenana farany.
4 Na aorian’ny fampidiran-dresaka fohy iray, dia ho azonao atao ny hilaza zavatra tahaka izao:
◼ “Nomarihinao angamba fa tao anatin’izao taona faramparany izao naneran-tany, dia nisy fanahiana nitombo momba ireo zava-manahirana atrehin’ny ankizy. Zava-manahirana momba ny ankizy inona avy no hitanao ho mampanahy eto an-toerana?” Avelao izy hamaly. Lazao ny sasany amin’ireo zava-manahirana lehibe zakain’ny ankizy maneran-tany, araka ny andinihana izany ao amin’ireo lahatsoratra ao amin’ny Mifohaza! No 1/93 na No 4/92, ary tariho ny saina ho amin’ny fanafodiny atolotry Fanjakan’Andriamanitra.
5 Ao amin’ny firaketanao ireo fiverenana mitsidika, dia azo inoana fa manana ny anaran’ireo izay nampiseho fahalianana kely teo am-boalohany, nefa tsy dia nahazoam-bokatra, ianao. Koa satria voafetra ihany ny fahalianana, dia mety tsy ho tsapanao ny ilana ny hiverina hatrany. Mety ho afaka hampiasa io lisitra io anefa ianao mba hampitomboana ireo lalana fizarana gazety. Rehefa mahamarika lahatsoratra iray izay tsapanao fa mety hanintona olona iray manokana ianao, dia ataovy azo antoka ny hitsidihana an’io olona io sy ny hanomezana azy ilay gazety.
6 Fanambarana tsy ara-potoana: Fomba iray tsara dia tsara hanairana fahalianana amin’ireo gazety izy io. Mety ho ampy ny fampisehoana amim-pahamalinana fonony maro manintona ny maso mba hanombohan-dresaka. Nametraka gazety sasantsasany teo amin’ny latabany ny anabavy iray mba hahafahan’ireo mpiara-miasa aminy hahita izany rehefa mandalo; afaka nametraka maromaro tamin’izany izy. Anaovy ezaka manokana ny fitondrana gazety vitsivitsy ary aoka ianao hitari-javatra amin’ny fanolorana azy ireny amin’itỳ volana itỳ rehefa miantsena, rehefa mankany an-tsekoly, rehefa mitaingina aotobisy, na rehefa mifampikasoka amin’ny olon-kafa any an-toeran-kafa. Ohatra, ny rahalahy iray dia nahapetraka gazety maromaro tamin’ny olona teo am-pilaharana lasantsy.
7 Isika dia nahita valiny tamin’ireo fanontaniana tena lehibe momba an’i Jehovah sy ny fanompoam-pivavahana aminy noho ny fanampian’ny Ny Tilikambo Fiambenana sy ny Mifohaza! Tiantsika ny hampiasa ireny gazety ireny amin’ny fomba rehetra azo atao mba hanampiana ny hafa ho tonga amin’ny fahalalana an’i ‘Jehovah, ilay Andriamanitry ny fahamarinana’. — Salamo 31:5.